Library / Tipiṭaka / తిపిటక • Tipiṭaka / అఙ్గుత్తరనికాయ • Aṅguttaranikāya

    ౯. ధమ్మకథికసుత్తం

    9. Dhammakathikasuttaṃ

    ౧౩౯. ‘‘చత్తారోమే, భిక్ఖవే, ధమ్మకథికా. కతమే చత్తారో? ఇధ, భిక్ఖవే, ఏకచ్చో ధమ్మకథికో అప్పఞ్చ భాసతి అసహితఞ్చ; పరిసా చస్స 1 న కుసలా హోతి సహితాసహితస్స. ఏవరూపో, భిక్ఖవే, ధమ్మకథికో ఏవరూపాయ పరిసాయ ధమ్మకథికోత్వేవ సఙ్ఖం గచ్ఛతి.

    139. ‘‘Cattārome, bhikkhave, dhammakathikā. Katame cattāro? Idha, bhikkhave, ekacco dhammakathiko appañca bhāsati asahitañca; parisā cassa 2 na kusalā hoti sahitāsahitassa. Evarūpo, bhikkhave, dhammakathiko evarūpāya parisāya dhammakathikotveva saṅkhaṃ gacchati.

    ‘‘ఇధ పన, భిక్ఖవే, ఏకచ్చో ధమ్మకథికో అప్పఞ్చ భాసతి సహితఞ్చ; పరిసా చస్స కుసలా హోతి సహితాసహితస్స. ఏవరూపో, భిక్ఖవే, ధమ్మకథికో ఏవరూపాయ పరిసాయ ధమ్మకథికోత్వేవ సఙ్ఖం గచ్ఛతి.

    ‘‘Idha pana, bhikkhave, ekacco dhammakathiko appañca bhāsati sahitañca; parisā cassa kusalā hoti sahitāsahitassa. Evarūpo, bhikkhave, dhammakathiko evarūpāya parisāya dhammakathikotveva saṅkhaṃ gacchati.

    ‘‘ఇధ పన, భిక్ఖవే, ఏకచ్చో ధమ్మకథికో బహుఞ్చ భాసతి అసహితఞ్చ; పరిసా చస్స న కుసలా హోతి సహితాసహితస్స. ఏవరూపో, భిక్ఖవే, ధమ్మకథికో ఏవరూపాయ పరిసాయ ధమ్మకథికోత్వేవ సఙ్ఖం గచ్ఛతి.

    ‘‘Idha pana, bhikkhave, ekacco dhammakathiko bahuñca bhāsati asahitañca; parisā cassa na kusalā hoti sahitāsahitassa. Evarūpo, bhikkhave, dhammakathiko evarūpāya parisāya dhammakathikotveva saṅkhaṃ gacchati.

    ‘‘ఇధ పన, భిక్ఖవే, ఏకచ్చో ధమ్మకథికో బహుఞ్చ భాసతి సహితఞ్చ; పరిసా చస్స కుసలా హోతి సహితాసహితస్స. ఏవరూపో, భిక్ఖవే, ధమ్మకథికో ఏవరూపాయ పరిసాయ ధమ్మకథికోత్వేవ సఙ్ఖం గచ్ఛతి. ఇమే ఖో, భిక్ఖవే, చత్తారో ధమ్మకథికా’’తి. నవమం.

    ‘‘Idha pana, bhikkhave, ekacco dhammakathiko bahuñca bhāsati sahitañca; parisā cassa kusalā hoti sahitāsahitassa. Evarūpo, bhikkhave, dhammakathiko evarūpāya parisāya dhammakathikotveva saṅkhaṃ gacchati. Ime kho, bhikkhave, cattāro dhammakathikā’’ti. Navamaṃ.




    Next: ౧౦. వాదీసుత్తం • 10. Vādīsuttaṃ




    Footnotes:
    1. పరిసా చ (సీ॰ స్యా॰ కం॰ పీ॰) పు॰ ప॰ ౧౫౬
    2. parisā ca (sī. syā. kaṃ. pī.) pu. pa. 156



    Related texts:



    అట్ఠకథా • Aṭṭhakathā / సుత్తపిటక (అట్ఠకథా) • Suttapiṭaka (aṭṭhakathā) / అఙ్గుత్తరనికాయ (అట్ఠకథా) • Aṅguttaranikāya (aṭṭhakathā) / ౯. ధమ్మకథికసుత్తవణ్ణనా • 9. Dhammakathikasuttavaṇṇanā

    టీకా • Tīkā / సుత్తపిటక (టీకా) • Suttapiṭaka (ṭīkā) / అఙ్గుత్తరనికాయ (టీకా) • Aṅguttaranikāya (ṭīkā) / ౯-౧౦. ధమ్మకథికసుత్తాదివణ్ణనా • 9-10. Dhammakathikasuttādivaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact