| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. ධම්‌මකථිකසුත්‌තං
6. Dhammakathikasuttaṃ
16. සාවත්‌ථියං …පෙ.… අථ ඛො අඤ්‌ඤතරො භික්‌ඛු යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘‘ධම්‌මකථිකො ධම්‌මකථිකො’ති, භන්‌තෙ, වුච්‌චති. කිත්‌තාවතා නු ඛො, භන්‌තෙ, ධම්‌මකථිකො හොතී’’ති?
16. Sāvatthiyaṃ …pe… atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘‘dhammakathiko dhammakathiko’ti, bhante, vuccati. Kittāvatā nu kho, bhante, dhammakathiko hotī’’ti?
‘‘ජරාමරණස්‌ස චෙ භික්‌ඛු නිබ්‌බිදාය විරාගාය නිරොධාය ධම්‌මං දෙසෙති, ‘ධම්‌මකථිකො භික්‌ඛූ’ති අලං වචනාය. ජරාමරණස්‌ස චෙ භික්‌ඛු නිබ්‌බිදාය විරාගාය නිරොධාය පටිපන්‌නො හොති, ‘ධම්‌මානුධම්‌මප්‌පටිපන්‌නො භික්‌ඛූ’ති අලං වචනාය. ජරාමරණස්‌ස චෙ භික්‌ඛු නිබ්‌බිදා විරාගා නිරොධා අනුපාදාවිමුත්‌තො හොති, ‘දිට්‌ඨධම්‌මනිබ්‌බානප්‌පත්‌තො භික්‌ඛූ’ති අලං වචනාය.
‘‘Jarāmaraṇassa ce bhikkhu nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃ vacanāya. Jarāmaraṇassa ce bhikkhu nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃ vacanāya. Jarāmaraṇassa ce bhikkhu nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃ vacanāya.
‘‘ජාතියා චෙ භික්‌ඛු…පෙ.… භවස්‌ස චෙ භික්‌ඛු… උපාදානස්‌ස චෙ භික්‌ඛු… තණ්‌හාය චෙ භික්‌ඛු… වෙදනාය චෙ භික්‌ඛු… ඵස්‌සස්‌ස චෙ භික්‌ඛු… සළායතනස්‌ස චෙ භික්‌ඛු… නාමරූපස්‌ස චෙ භික්‌ඛු… විඤ්‌ඤාණස්‌ස චෙ භික්‌ඛු… සඞ්‌ඛාරානං චෙ භික්‌ඛු… අවිජ්‌ජාය චෙ භික්‌ඛු නිබ්‌බිදාය විරාගාය නිරොධාය ධම්‌මං දෙසෙති, ‘ධම්‌මකථිකො භික්‌ඛූ’ති අලං වචනාය. අවිජ්‌ජාය චෙ භික්‌ඛු නිබ්‌බිදාය විරාගාය නිරොධාය පටිපන්‌නො හොති, ‘ධම්‌මානුධම්‌මප්‌පටිපන්‌නො භික්‌ඛූ’ති අලං වචනාය. අවිජ්‌ජාය චෙ භික්‌ඛු නිබ්‌බිදා විරාගා නිරොධා අනුපාදාවිමුත්‌තො හොති, ‘දිට්‌ඨධම්‌මනිබ්‌බානප්‌පත්‌තො භික්‌ඛූ’ති අලං වචනායා’’ති.
‘‘Jātiyā ce bhikkhu…pe… bhavassa ce bhikkhu… upādānassa ce bhikkhu… taṇhāya ce bhikkhu… vedanāya ce bhikkhu… phassassa ce bhikkhu… saḷāyatanassa ce bhikkhu… nāmarūpassa ce bhikkhu… viññāṇassa ce bhikkhu… saṅkhārānaṃ ce bhikkhu… avijjāya ce bhikkhu nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃ vacanāya. Avijjāya ce bhikkhu nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃ vacanāya. Avijjāya ce bhikkhu nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃ vacanāyā’’ti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 6. ධම්‌මකථිකසුත්‌තවණ්‌ණනා • 6. Dhammakathikasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 6. ධම්‌මකථිකසුත්‌තවණ්‌ණනා • 6. Dhammakathikasuttavaṇṇanā
