| Library / Tipiṭaka / തിപിടക • Tipiṭaka / സംയുത്തനികായ (അട്ഠകഥാ) • Saṃyuttanikāya (aṭṭhakathā) |
൬. ധമ്മകഥികസുത്തവണ്ണനാ
6. Dhammakathikasuttavaṇṇanā
൧൬. ഛട്ഠേ നിബ്ബിദായാതി നിബ്ബിന്ദനത്ഥായ. വിരാഗായാതി വിരജ്ജനത്ഥായ. നിരോധായാതി നിരുജ്ഝനത്ഥായ. പടിപന്നോ ഹോതീതി ഏത്ഥ സീലതോ പട്ഠായ യാവ അരഹത്തമഗ്ഗാ പടിപന്നോതി വേദിതബ്ബോ. ധമ്മാനുധമ്മപ്പടിപന്നോതി ലോകുത്തരസ്സ നിബ്ബാനധമ്മസ്സ അനുധമ്മഭൂതം പടിപദം പടിപന്നോ. അനുധമ്മഭൂതന്തി അനുരൂപസഭാവഭൂതം. നിബ്ബിദാ വിരാഗാ നിരോധാതി നിബ്ബിദായ ചേവ വിരാഗേന ച നിരോധേന ച. അനുപാദാ വിമുത്തോതി ചതൂഹി ഉപാദാനേഹി കിഞ്ചി ധമ്മം അനുപാദിയിത്വാ വിമുത്തോ. ദിട്ഠധമ്മനിബ്ബാനപ്പത്തോതി ദിട്ഠേവ ധമ്മേ നിബ്ബാനപ്പത്തോ. അലം വചനായാതി, ഏവം വത്തബ്ബതം അരഹതി, യുത്തോ അനുച്ഛവികോതി അത്ഥോ . ഏവമേത്ഥ ഏകേന നയേന ധമ്മകഥികസ്സ പുച്ഛാ കഥിതാ, ദ്വീഹി തം വിസേസേത്വാ സേക്ഖാസേക്ഖഭൂമിയോ നിദ്ദിട്ഠാതി. ഛട്ഠം.
16. Chaṭṭhe nibbidāyāti nibbindanatthāya. Virāgāyāti virajjanatthāya. Nirodhāyāti nirujjhanatthāya. Paṭipanno hotīti ettha sīlato paṭṭhāya yāva arahattamaggā paṭipannoti veditabbo. Dhammānudhammappaṭipannoti lokuttarassa nibbānadhammassa anudhammabhūtaṃ paṭipadaṃ paṭipanno. Anudhammabhūtanti anurūpasabhāvabhūtaṃ. Nibbidā virāgā nirodhāti nibbidāya ceva virāgena ca nirodhena ca. Anupādā vimuttoti catūhi upādānehi kiñci dhammaṃ anupādiyitvā vimutto. Diṭṭhadhammanibbānappattoti diṭṭheva dhamme nibbānappatto. Alaṃ vacanāyāti, evaṃ vattabbataṃ arahati, yutto anucchavikoti attho . Evamettha ekena nayena dhammakathikassa pucchā kathitā, dvīhi taṃ visesetvā sekkhāsekkhabhūmiyo niddiṭṭhāti. Chaṭṭhaṃ.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൬. ധമ്മകഥികസുത്തം • 6. Dhammakathikasuttaṃ
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൬. ധമ്മകഥികസുത്തവണ്ണനാ • 6. Dhammakathikasuttavaṇṇanā
