| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
19. д̇хамманаанад̇д̇ан̃аан̣анид̣̇д̣̇зсаван̣н̣анаа
19. Dhammanānattañāṇaniddesavaṇṇanā
73. д̇хамманаанад̇д̇ан̃аан̣анид̣̇д̣̇зсз гаммабат̇зд̇и гаммаани жа д̇аани бат̇аа жа абааяаг̇аманааяаад̇и гаммабат̇аа, д̇з гаммабат̇з. д̣̇аса гусалагаммабат̇аа наама баан̣аад̇ибаад̇аа ад̣̇иннаад̣̇аанаа гаамзсумижчаажаараа взраман̣ийд̇и д̇ийн̣и гааяасужарид̇аани, мусааваад̣̇аа бисун̣ааяа ваажааяа парусааяа ваажааяа сампаббалаабаа взраман̣ийд̇и жад̇д̇аари важийсужарид̇аани, анабхиж̇жхаа аб̣яаабаад̣̇о саммаад̣̇идтийд̇и д̇ийн̣и маносужарид̇аани. д̣̇аса агусалагаммабат̇аа наама баан̣аад̇ибаад̇о ад̣̇иннаад̣̇аанам̣ гаамзсумижчаажаарод̇и д̇ийн̣и гааяад̣̇ужжарид̇аани, мусааваад̣̇о бисун̣аа ваажаа парусаа ваажаа сампаббалаабод̇и жад̇д̇аари важийд̣̇ужжарид̇аани, абхиж̇жхаа б̣яаабаад̣̇о мижчаад̣̇идтийд̇и д̇ийн̣и манод̣̇ужжарид̇аани. гусалаагусалааби жа бадисанд̇хиж̇анагааязва гаммабат̇аад̇и вуд̇д̇аа, вуд̇д̇аавасзсаа бадисанд̇хиж̇ананз анзганд̇и гад̇д̇аа гаммабат̇аад̇и на вуд̇д̇аа. ол̣ааригагусалаагусалаг̇ахан̣знзва сзсагусалаагусалааби г̇ахид̇аад̇и взд̣̇ид̇аб̣б̣аа. руубанд̇и бхууд̇обаад̣̇ааяабхзд̣̇ад̇о адтавийсад̇ивид̇хам̣ руубам̣. вибааганд̇и гаамааважарагусалавибаагаанам̣ сол̣асаннам̣, агусалавибаагаанам̣ сад̇д̇аннан̃жа васзна д̇звийсад̇ивид̇хам̣ вибаагам̣. гирияанд̇и д̇ин̣н̣амахзд̇угагирияаанам̣, адтаннам̣ сахзд̇угагирияаанан̃жа васзна згаад̣̇асавид̇хам̣ гаамааважарагирияам̣. вибаагаабхаавад̇о гирияаамад̇д̇аад̇и гирияаа. зд̇д̇аавад̇аа гаамааважарамзва руубааб̣яаагад̇авибаагааб̣яаагад̇агирияааб̣яаагад̇авасзна вуд̇д̇ам̣.
73. Dhammanānattañāṇaniddese kammapatheti kammāni ca tāni pathā ca apāyagamanāyāti kammapathā, te kammapathe. Dasa kusalakammapathā nāma pāṇātipātā adinnādānā kāmesumicchācārā veramaṇīti tīṇi kāyasucaritāni, musāvādā pisuṇāya vācāya pharusāya vācāya samphappalāpā veramaṇīti cattāri vacīsucaritāni, anabhijjhā abyāpādo sammādiṭṭhīti tīṇi manosucaritāni. Dasa akusalakammapathā nāma pāṇātipāto adinnādānaṃ kāmesumicchācāroti tīṇi kāyaduccaritāni, musāvādo pisuṇā vācā pharusā vācā samphappalāpoti cattāri vacīduccaritāni, abhijjhā byāpādo micchādiṭṭhīti tīṇi manoduccaritāni. Kusalākusalāpi ca paṭisandhijanakāyeva kammapathāti vuttā, vuttāvasesā paṭisandhijanane anekanti kattā kammapathāti na vuttā. Oḷārikakusalākusalagahaṇeneva sesakusalākusalāpi gahitāti veditabbā. Rūpanti bhūtopādāyabhedato aṭṭhavīsatividhaṃ rūpaṃ. Vipākanti kāmāvacarakusalavipākānaṃ soḷasannaṃ, akusalavipākānaṃ sattannañca vasena tevīsatividhaṃ vipākaṃ. Kiriyanti tiṇṇamahetukakiriyānaṃ, aṭṭhannaṃ sahetukakiriyānañca vasena ekādasavidhaṃ kāmāvacarakiriyaṃ. Vipākābhāvato kiriyāmattāti kiriyā. Ettāvatā kāmāvacarameva rūpābyākatavipākābyākatakiriyābyākatavasena vuttaṃ.
ид̇хадтассаад̇и имасмим̣ логз тид̇асса. язбхуяязна мануссалогз жхаанабхааванаасаб̣бхаавад̇о мануссалогавасзна вуд̇д̇ам̣, жхаанаани бана гад̣̇аажи гарахажи д̣̇звалогзби лаб̣бханд̇и, руубийб̣рахмалогзби д̇ад̇руубабад̇д̇игахздтуубабад̇д̇игаубаруубабад̇д̇игаанам̣ васзна лаб̣бханд̇и. суд̣̇д̇хааваасз бана аруубааважарз жа хздтуубабад̇д̇игаа над̇т̇и. руубааруубааважарзсу абхаавид̇аж̇жхаанаа хздтаа ниб̣б̣ад̇д̇амаанаа гаамааважарасуг̇ад̇ияам̣язва ниб̣б̣ад̇д̇анд̇и, на д̣̇уг̇г̇ад̇ияам̣. д̇ад̇руубабаннассаад̇и вибаагавасзна б̣рахмалогз убабаннасса бадисанд̇хибхаван̇г̇ажуд̇ивасзна вад̇д̇амаанаани жад̇д̇аари вибаагаж̇жхаанаани. руубааруубааважараж̇жхаанасамаабад̇д̇ийсу гирияааб̣яаагад̇аани на вуд̇д̇аани. гин̃жааби на вуд̇д̇аани, ат̇а ко гусалзхи самаанабавад̇д̇ид̇д̇аа гусалзсу вуд̇д̇зсу вуд̇д̇аанзва хонд̇ийд̇и взд̣̇ид̇аб̣б̣аани. яат̇аа бадтаанз ‘‘гусалаагусалз нируд̣̇д̇хз вибааго д̇ад̣̇аарамман̣ад̇аа уббаж̇ж̇ад̇ий’’д̇и (бадтаа. 1.1.406, 409) гусалаж̇аванаг̇г̇ахан̣знзва гирияаж̇аванам̣ сан̇г̇ахид̇ам̣, звамид̇хааби д̣̇адтаб̣б̣ам̣. сааман̃н̃апалаанийд̇и жад̇д̇аари сааман̃н̃апалаани. зд̇зна логуд̇д̇аравибаагааб̣яаагад̇ам̣ вуд̇д̇ам̣. ниб̣б̣аананд̇и ниб̣б̣аанааб̣яаагад̇ам̣.
Idhaṭṭhassāti imasmiṃ loke ṭhitassa. Yebhuyyena manussaloke jhānabhāvanāsabbhāvato manussalokavasena vuttaṃ, jhānāni pana kadāci karahaci devalokepi labbhanti, rūpībrahmalokepi tatrūpapattikaheṭṭhūpapattikauparūpapattikānaṃ vasena labbhanti. Suddhāvāse pana arūpāvacare ca heṭṭhūpapattikā natthi. Rūpārūpāvacaresu abhāvitajjhānā heṭṭhā nibbattamānā kāmāvacarasugatiyaṃyeva nibbattanti, na duggatiyaṃ. Tatrūpapannassāti vipākavasena brahmaloke upapannassa paṭisandhibhavaṅgacutivasena vattamānāni cattāri vipākajjhānāni. Rūpārūpāvacarajjhānasamāpattīsu kiriyābyākatāni na vuttāni. Kiñcāpi na vuttāni, atha kho kusalehi samānapavattittā kusalesu vuttesu vuttāneva hontīti veditabbāni. Yathā paṭṭhāne ‘‘kusalākusale niruddhe vipāko tadārammaṇatā uppajjatī’’ti (paṭṭhā. 1.1.406, 409) kusalajavanaggahaṇeneva kiriyajavanaṃ saṅgahitaṃ, evamidhāpi daṭṭhabbaṃ. Sāmaññaphalānīti cattāri sāmaññaphalāni. Etena lokuttaravipākābyākataṃ vuttaṃ. Nibbānanti nibbānābyākataṃ.
баамож̇ж̇амуулагаад̇и баамож̇ж̇ам̣ муулам̣ аад̣̇и зд̇зсанд̇и баамож̇ж̇амуулагаа, баамож̇ж̇аад̣̇игаад̇и ад̇т̇о. баамож̇ж̇зна хи самааг̇ад̇аанзва хонд̇и. анижжад̇о манасигарод̇о баамож̇ж̇ам̣ ж̇ааяад̇ийд̇и зд̇т̇а яонисоманасигарод̇оязва баамож̇ж̇ам̣ ж̇ааяад̇и, на аяонисоманасигарод̇о. аяонисоманасигарод̇о гусалуббад̇д̇иязва над̇т̇и, баг̇зва вибассанаа. гасмаа саруубзна вуд̇д̇анд̇и жз? баамож̇ж̇асса б̣алавабхаавад̣̇ассанад̇т̇ам̣. баамож̇ж̇з хи асад̇и банд̇зсу жа сзнаасанзсу ад̇хигусалзсу жа д̇хаммзсу арад̇и угган̣тид̇аа уббаж̇ж̇ад̇и. звам̣ сад̇и бхааванааязва уггамад̇и. баамож̇ж̇з бана сад̇и арад̇иабхаавад̇о бхааванаабаарибуурим̣ г̇ажчад̇и. яонисоманасигаарасса бана муулабхаавзна бхааванааяа б̣ахуубагаарад̇д̇ам̣ д̣̇ассзд̇ум̣ убари навагам̣ вагкад̇и.
Pāmojjamūlakāti pāmojjaṃ mūlaṃ ādi etesanti pāmojjamūlakā, pāmojjādikāti attho. Pāmojjena hi samāgatāneva honti. Aniccato manasikaroto pāmojjaṃ jāyatīti ettha yonisomanasikarotoyeva pāmojjaṃ jāyati, na ayonisomanasikaroto. Ayonisomanasikaroto kusaluppattiyeva natthi, pageva vipassanā. Kasmā sarūpena vuttanti ce? Pāmojjassa balavabhāvadassanatthaṃ. Pāmojje hi asati pantesu ca senāsanesu adhikusalesu ca dhammesu arati ukkaṇṭhitā uppajjati. Evaṃ sati bhāvanāyeva ukkamati. Pāmojje pana sati aratiabhāvato bhāvanāpāripūriṃ gacchati. Yonisomanasikārassa pana mūlabhāvena bhāvanāya bahūpakārattaṃ dassetuṃ upari navakaṃ vakkhati.
‘‘яад̇о яад̇о саммасад̇и, канд̇хаанам̣ уд̣̇аяаб̣б̣аяам̣;
‘‘Yato yato sammasati, khandhānaṃ udayabbayaṃ;
лабхад̇ий бийд̇ибаамож̇ж̇ам̣, амад̇ам̣ д̇ам̣ виж̇аанад̇а’’нд̇и. (д̇ха. ба. 374) –
Labhatī pītipāmojjaṃ, amataṃ taṃ vijānata’’nti. (dha. pa. 374) –
важанад̇о вибассагасса вибассанаабажжаяаа баамож̇ж̇ам̣ уббаж̇ж̇ад̇и. ид̇ха бана галаабасаммасанабажжаяаа баамож̇ж̇ам̣ г̇ахзд̇аб̣б̣ам̣. бамуд̣̇ид̇асса бхааво баамож̇ж̇ам̣, д̣̇уб̣б̣алаа бийд̇и. аад̣̇игаммад̇т̇з ба-гааро д̣̇адтаб̣б̣о. бамуд̣̇ид̇ассаад̇и д̇зна баамож̇ж̇зна бамуд̣̇ид̇асса д̇удтасса. бамод̣̇ид̇ассаад̇иби баато. соязвад̇т̇о. бийд̇ийд̇и б̣алавабийд̇и. бийд̇иманассаад̇и бийд̇ияуд̇д̇аманасса. яуд̇д̇асад̣̇д̣̇асса лобо д̣̇адтаб̣б̣о яат̇аа ассарат̇од̇и . гааяод̇и наамагааяо, руубагааязна саха ваа. бассамбхад̇ийд̇и вуубасанд̇ад̣̇арат̇о ход̇и. бассад̣̇д̇хагааяод̇и убхаяабассад̣̇д̇хияог̇зна ниб̣б̣уд̇агааяо. сукам̣ взд̣̇зд̇ийд̇и жзд̇асигам̣ сукам̣ винд̣̇ад̇и, гааяигасукзна саха ваа. сукинод̇и сукасаман̇г̇исса. жид̇д̇ам̣ самаад̇хияад̇ийд̇и жид̇д̇ам̣ самам̣ аад̇хияад̇и, згаг̇г̇ам̣ ход̇и. самаахид̇з жид̇д̇зд̇и бхаавзнабхаавалагкан̣ад̇т̇з бхуммаважанам̣. жид̇д̇асамаахид̇абхаавзна хи яат̇аабхууд̇аж̇аананам̣ лагкийяад̇и. яат̇аабхууд̇ам̣ баж̇аанаад̇ийд̇и уд̣̇аяаб̣б̣аяан̃аан̣аад̣̇ивасзна сан̇каарам̣ яат̇аасабхаавам̣ ж̇аанаад̇и. бассад̇ийд̇и д̇ам̣язва жагкунаа д̣̇идтам̣ вияа пудам̣ гад̇ваа бан̃н̃аажагкунаа бассад̇и. ниб̣б̣инд̣̇ад̇ийд̇и нававид̇хавибассанаан̃аан̣аяог̇зна сан̇каарзсу угган̣тад̇и. ниб̣б̣инд̣̇ам̣ вираж̇ж̇ад̇ийд̇и д̇ам̣ вибассанам̣ сикам̣ баабзнд̇о маг̇г̇ан̃аан̣аяог̇зна сан̇каарзхи вирад̇д̇о ход̇и. вирааг̇аа вимужжад̇ийд̇и вирааг̇асан̇каад̇амаг̇г̇ахзд̇у палавимуд̇д̇ияаа ниб̣б̣аанз ад̇химогкзна вимужжад̇и. гзсужи бана бод̇т̇агзсу имасмим̣ ваарз ‘‘самаахид̇зна жид̇д̇зна ид̣̇ам̣ д̣̇угканд̇и яат̇аабхууд̇ам̣ баж̇аанаад̇ий’’д̇иаад̣̇и сажжанаяо ликид̇о, соби жа гзсужи бод̇т̇агзсу ‘‘ид̣̇ам̣ д̣̇угканд̇и яонисо манаси гарод̇ий’’д̇иаад̣̇инаа наязна ликид̇о. ваарад̣̇ваязби б̣яан̃ж̇анад̇оязва висзсо, на ад̇т̇ад̇о. ‘‘ниб̣б̣инд̣̇ам̣ вираж̇ж̇ад̇ий’’д̇и хи маг̇г̇ан̃аан̣асса вуд̇д̇ад̇д̇аа маг̇г̇ан̃аан̣з жа сид̣̇д̇хз жад̇усажжаабхисамаяагижжам̣ сид̣̇д̇хамзва ход̇и. д̇асмаа жад̇усажжанаязна вуд̇д̇аваароби иминаа ваарзна ад̇т̇ад̇о ависидтоязва.
Vacanato vipassakassa vipassanāpaccayā pāmojjaṃ uppajjati. Idha pana kalāpasammasanapaccayā pāmojjaṃ gahetabbaṃ. Pamuditassa bhāvo pāmojjaṃ, dubbalā pīti. Ādikammatthe pa-kāro daṭṭhabbo. Pamuditassāti tena pāmojjena pamuditassa tuṭṭhassa. Pamoditassātipi pāṭho. Soyevattho. Pītīti balavapīti. Pītimanassāti pītiyuttamanassa. Yuttasaddassa lopo daṭṭhabbo yathā assarathoti . Kāyoti nāmakāyo, rūpakāyena saha vā. Passambhatīti vūpasantadaratho hoti. Passaddhakāyoti ubhayapassaddhiyogena nibbutakāyo. Sukhaṃ vedetīti cetasikaṃ sukhaṃ vindati, kāyikasukhena saha vā. Sukhinoti sukhasamaṅgissa. Cittaṃ samādhiyatīti cittaṃ samaṃ ādhiyati, ekaggaṃ hoti. Samāhite citteti bhāvenabhāvalakkhaṇatthe bhummavacanaṃ. Cittasamāhitabhāvena hi yathābhūtajānanaṃ lakkhīyati. Yathābhūtaṃ pajānātīti udayabbayañāṇādivasena saṅkhāraṃ yathāsabhāvaṃ jānāti. Passatīti taṃyeva cakkhunā diṭṭhaṃ viya phuṭaṃ katvā paññācakkhunā passati. Nibbindatīti navavidhavipassanāñāṇayogena saṅkhāresu ukkaṇṭhati. Nibbindaṃ virajjatīti taṃ vipassanaṃ sikhaṃ pāpento maggañāṇayogena saṅkhārehi viratto hoti. Virāgā vimuccatīti virāgasaṅkhātamaggahetu phalavimuttiyā nibbāne adhimokkhena vimuccati. Kesuci pana potthakesu imasmiṃ vāre ‘‘samāhitena cittena idaṃ dukkhanti yathābhūtaṃ pajānātī’’tiādi saccanayo likhito, sopi ca kesuci potthakesu ‘‘idaṃ dukkhanti yoniso manasi karotī’’tiādinā nayena likhito. Vāradvayepi byañjanatoyeva viseso, na atthato. ‘‘Nibbindaṃ virajjatī’’ti hi maggañāṇassa vuttattā maggañāṇe ca siddhe catusaccābhisamayakiccaṃ siddhameva hoti. Tasmā catusaccanayena vuttavāropi iminā vārena atthato avisiṭṭhoyeva.
74. ид̣̇аани анижжад̇од̇иаад̣̇ийхи аарамман̣асса ависзсзд̇ваа вуд̇д̇ад̇д̇аа аарамман̣ам̣ висзсзнд̇о руубам̣ анижжад̇о манаси гарод̇ийд̇иаад̣̇имааха. яонисоманасигаарамуулагаад̇и яонисоманасигааро муулам̣ бад̇идтаа зд̇зсанд̇и яонисоманасигаарамуулагаа. яонисоманасигаарам̣ мун̃жид̇вааязва хи баамож̇ж̇аад̣̇аяо нава на хонд̇и. самаахид̇зна жид̇д̇знаад̇и гааран̣абхууд̇зна жид̇д̇зна. яат̇аабхууд̇ам̣ баж̇аанаад̇ийд̇и бан̃н̃ааяа баж̇аанаад̇и. ‘‘ид̣̇ам̣ д̣̇угканд̇и яонисо манаси гарод̇ий’’д̇и вужжамаанз ануссававасзна буб̣б̣абхааг̇асажжаануб̣од̇хоби сан̇г̇аяхад̇и. яонисоманасигаарод̇и жа убааязна манасигааро.
74. Idāni aniccatotiādīhi ārammaṇassa avisesetvā vuttattā ārammaṇaṃ visesento rūpaṃ aniccato manasi karotītiādimāha. Yonisomanasikāramūlakāti yonisomanasikāro mūlaṃ patiṭṭhā etesanti yonisomanasikāramūlakā. Yonisomanasikāraṃ muñcitvāyeva hi pāmojjādayo nava na honti. Samāhitena cittenāti kāraṇabhūtena cittena. Yathābhūtaṃ pajānātīti paññāya pajānāti. ‘‘Idaṃ dukkhanti yoniso manasi karotī’’ti vuccamāne anussavavasena pubbabhāgasaccānubodhopi saṅgayhati. Yonisomanasikāroti ca upāyena manasikāro.
д̇хаад̇унаанад̇д̇ам̣ бадижжа уббаж̇ж̇ад̇и пассанаанад̇д̇анд̇и жагкаад̣̇ид̇хаад̇унаанад̇д̇ам̣ бадижжа жагкусампассаад̣̇инаанад̇д̇ам̣ уббаж̇ж̇ад̇ийд̇и ад̇т̇о. пассанаанад̇д̇ам̣ бадижжаад̇и жагкусампассаад̣̇инаанад̇д̇ам̣ бадижжа. взд̣̇анаанаанад̇д̇анд̇и жагкусампассаж̇аад̣̇ивзд̣̇анаанаанад̇д̇ам̣ . сан̃н̃аанаанад̇д̇анд̇и гаамасан̃н̃аад̣̇инаанад̇д̇ам̣. сан̇габбанаанад̇д̇анд̇и гаамасан̇габбаад̣̇инаанад̇д̇ам̣. чанд̣̇анаанад̇д̇анд̇и сан̇габбанаанад̇д̇ад̇ааяа руубз чанд̣̇о сад̣̇д̣̇з чанд̣̇од̇и звам̣ чанд̣̇анаанад̇д̇ам̣ уббаж̇ж̇ад̇и. барил̣ааханаанад̇д̇анд̇и чанд̣̇анаанад̇д̇ад̇ааяа руубабарил̣аахо сад̣̇д̣̇абарил̣ааход̇и звам̣ барил̣ааханаанад̇д̇ам̣ уббаж̇ж̇ад̇и. бариязсанаанаанад̇д̇анд̇и барил̣ааханаанад̇д̇ад̇ааяа руубабариязсанаад̣̇инаанад̇д̇ам̣ уббаж̇ж̇ад̇и. лаабханаанад̇д̇анд̇и бариязсанаанаанад̇д̇ад̇ааяа руубабадилаабхаад̣̇инаанад̇д̇ам̣ уббаж̇ж̇ад̇ийд̇и.
Dhātunānattaṃpaṭicca uppajjati phassanānattanti cakkhādidhātunānattaṃ paṭicca cakkhusamphassādinānattaṃ uppajjatīti attho. Phassanānattaṃ paṭiccāti cakkhusamphassādinānattaṃ paṭicca. Vedanānānattanti cakkhusamphassajādivedanānānattaṃ . Saññānānattanti kāmasaññādinānattaṃ. Saṅkappanānattanti kāmasaṅkappādinānattaṃ. Chandanānattanti saṅkappanānattatāya rūpe chando sadde chandoti evaṃ chandanānattaṃ uppajjati. Pariḷāhanānattanti chandanānattatāya rūpapariḷāho saddapariḷāhoti evaṃ pariḷāhanānattaṃ uppajjati. Pariyesanānānattanti pariḷāhanānattatāya rūpapariyesanādinānattaṃ uppajjati. Lābhanānattanti pariyesanānānattatāya rūpapaṭilābhādinānattaṃ uppajjatīti.
д̇хамманаанад̇д̇ан̃аан̣анид̣̇д̣̇зсаван̣н̣анаа нидтид̇аа.
Dhammanānattañāṇaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 19. д̇хамманаанад̇д̇ан̃аан̣анид̣̇д̣̇зсо • 19. Dhammanānattañāṇaniddeso
