| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১৯. ধম্মনানত্তঞাণনিদ্দেসো
19. Dhammanānattañāṇaniddeso
৭৩. কথং নৰধম্মৰৰত্থানে পঞ্ঞা ধম্মনানত্তে ঞাণং? কথং ধম্মে ৰৰত্থেতি? কামাৰচরে ধম্মে কুসলতো ৰৰত্থেতি, অকুসলতো ৰৰত্থেতি, অব্যাকততো ৰৰত্থেতি। রূপাৰচরে ধম্মে কুসলতো ৰৰত্থেতি, অব্যাকততো ৰৰত্থেতি। অরূপাৰচরে ধম্মে কুসলতো ৰৰত্থেতি, অব্যাকততো ৰৰত্থেতি। অপরিযাপন্নে ধম্মে কুসলতো ৰৰত্থেতি, অব্যাকততো ৰৰত্থেতি।
73. Kathaṃ navadhammavavatthāne paññā dhammanānatte ñāṇaṃ? Kathaṃ dhamme vavattheti? Kāmāvacare dhamme kusalato vavattheti, akusalato vavattheti, abyākatato vavattheti. Rūpāvacare dhamme kusalato vavattheti, abyākatato vavattheti. Arūpāvacare dhamme kusalato vavattheti, abyākatato vavattheti. Apariyāpanne dhamme kusalato vavattheti, abyākatato vavattheti.
কথং কামাৰচরে ধম্মে কুসলতো ৰৰত্থেতি, অকুসলতো ৰৰত্থেতি, অব্যাকততো ৰৰত্থেতি? দস কুসলকম্মপথে কুসলতো ৰৰত্থেতি, দস অকুসলকম্মপথে অকুসলতো ৰৰত্থেতি, রূপঞ্চ ৰিপাকঞ্চ কিরিযঞ্চ অব্যাকততো ৰৰত্থেতি – এৰং কামাৰচরে ধম্মে কুসলতো ৰৰত্থেতি, অকুসলতো ৰৰত্থেতি, অব্যাকততো ৰৰত্থেতি।
Kathaṃ kāmāvacare dhamme kusalato vavattheti, akusalato vavattheti, abyākatato vavattheti? Dasa kusalakammapathe kusalato vavattheti, dasa akusalakammapathe akusalato vavattheti, rūpañca vipākañca kiriyañca abyākatato vavattheti – evaṃ kāmāvacare dhamme kusalato vavattheti, akusalato vavattheti, abyākatato vavattheti.
কথং রূপাৰচরে ধম্মে কুসলতো ৰৰত্থেতি, অব্যাকততো ৰৰত্থেতি? ইধট্ঠস্স চত্তারি ঝানানি কুসলতো ৰৰত্থেতি, তত্রূপপন্নস্স চত্তারি ঝানানি অব্যাকততো ৰৰত্থেতি – এৰং রূপাৰচরে ধম্মে কুসলতো ৰৰত্থেতি, অব্যাকততো ৰৰত্থেতি।
Kathaṃ rūpāvacare dhamme kusalato vavattheti, abyākatato vavattheti? Idhaṭṭhassa cattāri jhānāni kusalato vavattheti, tatrūpapannassa cattāri jhānāni abyākatato vavattheti – evaṃ rūpāvacare dhamme kusalato vavattheti, abyākatato vavattheti.
কথং অরূপাৰচরে ধম্মে কুসলতো ৰৰত্থেতি, অব্যাকততো ৰৰত্থেতি? ইধট্ঠস্স চতস্সো অরূপাৰচরসমাপত্তিযো কুসলতো ৰৰত্থেতি, তত্রূপপন্নস্স চতস্সো অরূপাৰচরসমাপত্তিযো অব্যাকততো ৰৰত্থেতি – এৰং অরূপাৰচরে ধম্মে কুসলতো ৰৰত্থেতি, অব্যাকততো ৰৰত্থেতি।
Kathaṃ arūpāvacare dhamme kusalato vavattheti, abyākatato vavattheti? Idhaṭṭhassa catasso arūpāvacarasamāpattiyo kusalato vavattheti, tatrūpapannassa catasso arūpāvacarasamāpattiyo abyākatato vavattheti – evaṃ arūpāvacare dhamme kusalato vavattheti, abyākatato vavattheti.
কথং অপরিযাপন্নে ধম্মে কুসলতো ৰৰত্থেতি, অব্যাকততো ৰৰত্থেতি? চত্তারো অরিযমগ্গে কুসলতো ৰৰত্থেতি, চত্তারি চ সামঞ্ঞফলানি নিব্বানঞ্চ অব্যাকততো ৰৰত্থেতি – এৰং অপরিযাপন্নে ধম্মে কুসলতো ৰৰত্থেতি, অব্যাকততো ৰৰত্থেতি। এৰং ধম্মে ৰৰত্থেতি।
Kathaṃ apariyāpanne dhamme kusalato vavattheti, abyākatato vavattheti? Cattāro ariyamagge kusalato vavattheti, cattāri ca sāmaññaphalāni nibbānañca abyākatato vavattheti – evaṃ apariyāpanne dhamme kusalato vavattheti, abyākatato vavattheti. Evaṃ dhamme vavattheti.
নৰ পামোজ্জমূলকা ধম্মা। অনিচ্চতো মনসিকরোতো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি। সমাহিতে চিত্তে যথাভূতং পজানাতি পস্সতি। যথাভূতং জানং পস্সং নিব্বিন্দতি, নিব্বিন্দং ৰিরজ্জতি, ৰিরাগা ৰিমুচ্চতি। দুক্খতো মনসিকরোতো পামোজ্জং জাযতি…পে॰… অনত্ততো মনসিকরোতো পামোজ্জং জাযতি…পে॰… ৰিমুচ্চতি।
Nava pāmojjamūlakā dhammā. Aniccato manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhite citte yathābhūtaṃ pajānāti passati. Yathābhūtaṃ jānaṃ passaṃ nibbindati, nibbindaṃ virajjati, virāgā vimuccati. Dukkhato manasikaroto pāmojjaṃ jāyati…pe… anattato manasikaroto pāmojjaṃ jāyati…pe… vimuccati.
রূপং অনিচ্চতো মনসিকরোতো পামোজ্জং জাযতি…পে॰… রূপং দুক্খতো মনসিকরোতো…পে॰… ৰেদনং… সঞ্ঞং… সঙ্খারে… ৰিঞ্ঞাণং… চক্খুং…পে॰… জরামরণং অনিচ্চতো মনসিকরোতো পামোজ্জং জাযতি…পে॰… জরামরণং দুক্খতো মনসিকরোতো পামোজ্জং জাযতি…পে॰… জরামরণং অনত্ততো মনসিকরোতো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি। সমাহিতে চিত্তে যথাভূতং পজানাতি পস্সতি। যথাভূতং জানং পস্সং নিব্বিন্দতি, নিব্বিন্দং ৰিরজ্জতি, ৰিরাগা ৰিমুচ্চতি। ইমে নৰ পামোজ্জমূলকা ধম্মা ।
Rūpaṃ aniccato manasikaroto pāmojjaṃ jāyati…pe… rūpaṃ dukkhato manasikaroto…pe… vedanaṃ… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato manasikaroto pāmojjaṃ jāyati…pe… jarāmaraṇaṃ dukkhato manasikaroto pāmojjaṃ jāyati…pe… jarāmaraṇaṃ anattato manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhite citte yathābhūtaṃ pajānāti passati. Yathābhūtaṃ jānaṃ passaṃ nibbindati, nibbindaṃ virajjati, virāgā vimuccati. Ime nava pāmojjamūlakā dhammā .
৭৪. নৰ যোনিসো মনসিকারমূলকা ধম্মা। অনিচ্চতো যোনিসো মনসিকরোতো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি। সমাহিতেন চিত্তেন ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি। দুক্খতো যোনিসো মনসিকরোতো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি। সমাহিতেন চিত্তেন ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি। অনত্ততো যোনিসো মনসিকরোতো পামোজ্জং জাযতি…পে॰…।
74. Nava yoniso manasikāramūlakā dhammā. Aniccato yoniso manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhitena cittena ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Dukkhato yoniso manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhitena cittena ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Anattato yoniso manasikaroto pāmojjaṃ jāyati…pe….
রূপং অনিচ্চতো যোনিসো মনসিকরোতো পামোজ্জং জাযতি…পে॰… রূপং দুক্খতো যোনিসো মনসিকরোতো পামোজ্জং জাযতি…পে॰… রূপং অনত্ততো যোনিসো মনসিকরোতো পামোজ্জং জাযতি…পে॰… ৰেদনং… সঞ্ঞং… সঙ্খারে… ৰিঞ্ঞাণং… চক্খুং…পে॰… জরামরণং অনিচ্চতো যোনিসো মনসিকরোতো পামোজ্জং জাযতি…পে॰… জরামরণং দুক্খতো যোনিসো মনসিকরোতো পামোজ্জং জাযতি…পে॰… জরামরণং অনত্ততো যোনিসো মনসিকরোতো পামোজ্জং জাযতি, পমুদিতস্স পীতি জাযতি, পীতিমনস্স কাযো পস্সম্ভতি, পস্সদ্ধকাযো সুখং ৰেদেতি, সুখিনো চিত্তং সমাধিযতি। সমাহিতেন চিত্তেন ‘‘ইদং দুক্খ’’ন্তি যথাভূতং পজানাতি, ‘‘অযং দুক্খসমুদযো’’তি যথাভূতং পজানাতি, ‘‘অযং দুক্খনিরোধো’’তি যথাভূতং পজানাতি, ‘‘অযং দুক্খনিরোধগামিনী পটিপদা’’তি যথাভূতং পজানাতি। ইমে নৰ যোনিসো মনসিকারমূলকা ধম্মা।
Rūpaṃ aniccato yoniso manasikaroto pāmojjaṃ jāyati…pe… rūpaṃ dukkhato yoniso manasikaroto pāmojjaṃ jāyati…pe… rūpaṃ anattato yoniso manasikaroto pāmojjaṃ jāyati…pe… vedanaṃ… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato yoniso manasikaroto pāmojjaṃ jāyati…pe… jarāmaraṇaṃ dukkhato yoniso manasikaroto pāmojjaṃ jāyati…pe… jarāmaraṇaṃ anattato yoniso manasikaroto pāmojjaṃ jāyati, pamuditassa pīti jāyati, pītimanassa kāyo passambhati, passaddhakāyo sukhaṃ vedeti, sukhino cittaṃ samādhiyati. Samāhitena cittena ‘‘idaṃ dukkha’’nti yathābhūtaṃ pajānāti, ‘‘ayaṃ dukkhasamudayo’’ti yathābhūtaṃ pajānāti, ‘‘ayaṃ dukkhanirodho’’ti yathābhūtaṃ pajānāti, ‘‘ayaṃ dukkhanirodhagāminī paṭipadā’’ti yathābhūtaṃ pajānāti. Ime nava yoniso manasikāramūlakā dhammā.
নৰ নানত্তা – ধাতুনানত্তং পটিচ্চ উপ্পজ্জতি ফস্সনানত্তং, ফস্সনানত্তং পটিচ্চ উপ্পজ্জতি ৰেদনানানত্তং, ৰেদনানানত্তং পটিচ্চ উপ্পজ্জতি সঞ্ঞানানত্তং, সঞ্ঞানানত্তং পটিচ্চ উপ্পজ্জতি সঙ্কপ্পনানত্তং, সঙ্কপ্পনানত্তং পটিচ্চ উপ্পজ্জতি ছন্দনানত্তং, ছন্দনানত্তং পটিচ্চ উপ্পজ্জতি পরিল়াহনানত্তং, পরিল়াহনানত্তং পটিচ্চ উপ্পজ্জতি পরিযেসনানানত্তং, পরিযেসনানানত্তং পটিচ্চ উপ্পজ্জতি লাভনানত্তং – ইমে নৰ নানত্তা। তং ঞাতট্ঠেন ঞাণং, পজাননট্ঠেন পঞ্ঞা। তেন ৰুচ্চতি – ‘‘নৰধম্মৰৰত্থানে পঞ্ঞা ধম্মনানত্তে ঞাণং’’।
Nava nānattā – dhātunānattaṃ paṭicca uppajjati phassanānattaṃ, phassanānattaṃ paṭicca uppajjati vedanānānattaṃ, vedanānānattaṃ paṭicca uppajjati saññānānattaṃ, saññānānattaṃ paṭicca uppajjati saṅkappanānattaṃ, saṅkappanānattaṃ paṭicca uppajjati chandanānattaṃ, chandanānattaṃ paṭicca uppajjati pariḷāhanānattaṃ, pariḷāhanānattaṃ paṭicca uppajjati pariyesanānānattaṃ, pariyesanānānattaṃ paṭicca uppajjati lābhanānattaṃ – ime nava nānattā. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘navadhammavavatthāne paññā dhammanānatte ñāṇaṃ’’.
ধম্মনানত্তঞাণনিদ্দেসো একূনৰীসতিমো।
Dhammanānattañāṇaniddeso ekūnavīsatimo.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১৯. ধম্মনানত্তঞাণনিদ্দেসৰণ্ণনা • 19. Dhammanānattañāṇaniddesavaṇṇanā
