| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৪. ধম্মঞ্ঞূসুত্তং
4. Dhammaññūsuttaṃ
৬৮. ‘‘সত্তহি, ভিক্খৰে, ধম্মেহি সমন্নাগতো ভিক্খু আহুনেয্যো হোতি …পে॰… অনুত্তরং পুঞ্ঞক্খেত্তং লোকস্স। কতমেহি সত্তহি? ইধ, ভিক্খৰে, ভিক্খু ধম্মঞ্ঞূ চ হোতি অত্থঞ্ঞূ চ অত্তঞ্ঞূ চ মত্তঞ্ঞূ চ কালঞ্ঞূ চ পরিসঞ্ঞূ চ পুগ্গলপরোপরঞ্ঞূ চ।
68. ‘‘Sattahi, bhikkhave, dhammehi samannāgato bhikkhu āhuneyyo hoti …pe… anuttaraṃ puññakkhettaṃ lokassa. Katamehi sattahi? Idha, bhikkhave, bhikkhu dhammaññū ca hoti atthaññū ca attaññū ca mattaññū ca kālaññū ca parisaññū ca puggalaparoparaññū ca.
‘‘কথঞ্চ, ভিক্খৰে, ভিক্খু ধম্মঞ্ঞূ হোতি? ইধ, ভিক্খৰে, ভিক্খু ধম্মং জানাতি – সুত্তং গেয্যং ৰেয্যাকরণং গাথং উদানং ইতিৰুত্তকং জাতকং অব্ভুতধম্মং ৰেদল্লং। নো চে, ভিক্খৰে, ভিক্খু ধম্মং জানেয্য – সুত্তং গেয্যং…পে॰… অব্ভুতধম্মং ৰেদল্লং, নযিধ ‘ধম্মঞ্ঞূ’তি ৰুচ্চেয্য। যস্মা চ খো, ভিক্খৰে, ভিক্খু ধম্মং জানাতি – সুত্তং গেয্যং…পে॰… অব্ভুতধম্মং ৰেদল্লং, তস্মা ‘ধম্মঞ্ঞূ’তি ৰুচ্চতি। ইতি ধম্মঞ্ঞূ।
‘‘Kathañca, bhikkhave, bhikkhu dhammaññū hoti? Idha, bhikkhave, bhikkhu dhammaṃ jānāti – suttaṃ geyyaṃ veyyākaraṇaṃ gāthaṃ udānaṃ itivuttakaṃ jātakaṃ abbhutadhammaṃ vedallaṃ. No ce, bhikkhave, bhikkhu dhammaṃ jāneyya – suttaṃ geyyaṃ…pe… abbhutadhammaṃ vedallaṃ, nayidha ‘dhammaññū’ti vucceyya. Yasmā ca kho, bhikkhave, bhikkhu dhammaṃ jānāti – suttaṃ geyyaṃ…pe… abbhutadhammaṃ vedallaṃ, tasmā ‘dhammaññū’ti vuccati. Iti dhammaññū.
‘‘অত্থঞ্ঞূ চ কথং হোতি? ইধ, ভিক্খৰে, ভিক্খু তস্স তস্সেৰ ভাসিতস্স অত্থং জানাতি – ‘অযং ইমস্স ভাসিতস্স অত্থো, অযং ইমস্স ভাসিতস্স অত্থো’তি। নো চে, ভিক্খৰে, ভিক্খু তস্স তস্সেৰ ভাসিতস্স অত্থং জানেয্য – ‘অযং ইমস্স ভাসিতস্স অত্থো, অযং ইমস্স ভাসিতস্স অত্থো’তি, নযিধ ‘অত্থঞ্ঞূ’তি ৰুচ্চেয্য। যস্মা চ খো, ভিক্খৰে, ভিক্খু তস্স তস্সেৰ ভাসিতস্স অত্থং জানাতি – ‘অযং ইমস্স ভাসিতস্স অত্থো, অযং ইমস্স ভাসিতস্স অত্থো’তি, তস্মা ‘অত্থঞ্ঞূ’তি ৰুচ্চতি। ইতি ধম্মঞ্ঞূ, অত্থঞ্ঞূ।
‘‘Atthaññū ca kathaṃ hoti? Idha, bhikkhave, bhikkhu tassa tasseva bhāsitassa atthaṃ jānāti – ‘ayaṃ imassa bhāsitassa attho, ayaṃ imassa bhāsitassa attho’ti. No ce, bhikkhave, bhikkhu tassa tasseva bhāsitassa atthaṃ jāneyya – ‘ayaṃ imassa bhāsitassa attho, ayaṃ imassa bhāsitassa attho’ti, nayidha ‘atthaññū’ti vucceyya. Yasmā ca kho, bhikkhave, bhikkhu tassa tasseva bhāsitassa atthaṃ jānāti – ‘ayaṃ imassa bhāsitassa attho, ayaṃ imassa bhāsitassa attho’ti, tasmā ‘atthaññū’ti vuccati. Iti dhammaññū, atthaññū.
‘‘অত্তঞ্ঞূ চ কথং হোতি? ইধ, ভিক্খৰে, ভিক্খু অত্তানং জানাতি – ‘এত্তকোম্হি সদ্ধায সীলেন সুতেন চাগেন পঞ্ঞায পটিভানেনা’তি। নো চে, ভিক্খৰে, ভিক্খু অত্তানং জানেয্য – ‘এত্তকোম্হি সদ্ধায সীলেন সুতেন চাগেন পঞ্ঞায পটিভানেনা’তি, নযিধ ‘অত্তঞ্ঞূ’তি ৰুচ্চেয্য। যস্মা চ, ভিক্খৰে , ভিক্খু অত্তানং জানাতি – ‘এত্তকোম্হি সদ্ধায সীলেন সুতেন চাগেন পঞ্ঞায পটিভানেনা’তি, তস্মা ‘অত্তঞ্ঞূ’তি ৰুচ্চতি। ইতি ধম্মঞ্ঞূ, অত্থঞ্ঞূ, অত্তঞ্ঞূ।
‘‘Attaññū ca kathaṃ hoti? Idha, bhikkhave, bhikkhu attānaṃ jānāti – ‘ettakomhi saddhāya sīlena sutena cāgena paññāya paṭibhānenā’ti. No ce, bhikkhave, bhikkhu attānaṃ jāneyya – ‘ettakomhi saddhāya sīlena sutena cāgena paññāya paṭibhānenā’ti, nayidha ‘attaññū’ti vucceyya. Yasmā ca, bhikkhave , bhikkhu attānaṃ jānāti – ‘ettakomhi saddhāya sīlena sutena cāgena paññāya paṭibhānenā’ti, tasmā ‘attaññū’ti vuccati. Iti dhammaññū, atthaññū, attaññū.
‘‘মত্তঞ্ঞূ চ কথং হোতি? ইধ, ভিক্খৰে, ভিক্খু মত্তং জানাতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং পটিগ্গহণায। নো চে, ভিক্খৰে, ভিক্খু মত্তং জানেয্য চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং পটিগ্গহণায, নযিধ ‘মত্তঞ্ঞূ’তি ৰুচ্চেয্য। যস্মা চ খো, ভিক্খৰে, ভিক্খু মত্তং জানাতি চীৰরপিণ্ডপাতসেনাসনগিলানপ্পচ্চযভেসজ্জপরিক্খারানং পটিগ্গহণায, তস্মা ‘মত্তঞ্ঞূ’তি ৰুচ্চতি। ইতি ধম্মঞ্ঞূ, অত্থঞ্ঞূ, অত্তঞ্ঞূ, মত্তঞ্ঞূ।
‘‘Mattaññū ca kathaṃ hoti? Idha, bhikkhave, bhikkhu mattaṃ jānāti cīvarapiṇḍapātasenāsanagilānappaccayabhesajjaparikkhārānaṃ paṭiggahaṇāya. No ce, bhikkhave, bhikkhu mattaṃ jāneyya cīvarapiṇḍapātasenāsanagilānappaccayabhesajjaparikkhārānaṃ paṭiggahaṇāya, nayidha ‘mattaññū’ti vucceyya. Yasmā ca kho, bhikkhave, bhikkhu mattaṃ jānāti cīvarapiṇḍapātasenāsanagilānappaccayabhesajjaparikkhārānaṃ paṭiggahaṇāya, tasmā ‘mattaññū’ti vuccati. Iti dhammaññū, atthaññū, attaññū, mattaññū.
‘‘কালঞ্ঞূ চ কথং হোতি? ইধ, ভিক্খৰে, ভিক্খু, কালং জানাতি – ‘অযং কালো উদ্দেসস্স, অযং কালো পরিপুচ্ছায, অযং কালো যোগস্স, অযং কালো পটিসল্লানস্সা’তি। নো চে, ভিক্খৰে, ভিক্খু কালং জানেয্য – ‘অযং কালো উদ্দেসস্স, অযং কালো পরিপুচ্ছায, অযং কালো যোগস্স, অযং কালো পটিসল্লানস্সা’তি, নযিধ ‘কালঞ্ঞূ’তি ৰুচ্চেয্য। যস্মা চ খো, ভিক্খৰে, ভিক্খু কালং জানাতি – ‘অযং কালো উদ্দেসস্স, অযং কালো পরিপুচ্ছায, অযং কালো যোগস্স, অযং কালো পটিসল্লানস্সা’তি, তস্মা ‘কালঞ্ঞূ’তি ৰুচ্চতি। ইতি ধম্মঞ্ঞূ, অত্থঞ্ঞূ, অত্তঞ্ঞূ, মত্তঞ্ঞূ, কালঞ্ঞূ।
‘‘Kālaññū ca kathaṃ hoti? Idha, bhikkhave, bhikkhu, kālaṃ jānāti – ‘ayaṃ kālo uddesassa, ayaṃ kālo paripucchāya, ayaṃ kālo yogassa, ayaṃ kālo paṭisallānassā’ti. No ce, bhikkhave, bhikkhu kālaṃ jāneyya – ‘ayaṃ kālo uddesassa, ayaṃ kālo paripucchāya, ayaṃ kālo yogassa, ayaṃ kālo paṭisallānassā’ti, nayidha ‘kālaññū’ti vucceyya. Yasmā ca kho, bhikkhave, bhikkhu kālaṃ jānāti – ‘ayaṃ kālo uddesassa, ayaṃ kālo paripucchāya, ayaṃ kālo yogassa, ayaṃ kālo paṭisallānassā’ti, tasmā ‘kālaññū’ti vuccati. Iti dhammaññū, atthaññū, attaññū, mattaññū, kālaññū.
‘‘পরিসঞ্ঞূ চ কথং হোতি? ইধ, ভিক্খৰে, ভিক্খু পরিসং জানাতি – ‘অযং খত্তিযপরিসা, অযং ব্রাহ্মণপরিসা, অযং গহপতিপরিসা, অযং সমণপরিসা। তত্থ এৰং উপসঙ্কমিতব্বং, এৰং ঠাতব্বং , এৰং কত্তব্বং, এৰং নিসীদিতব্বং, এৰং ভাসিতব্বং, এৰং তুণ্হী ভৰিতব্ব’ন্তি। নো চে, ভিক্খৰে, ভিক্খু পরিসং জানেয্য – ‘অযং খত্তিযপরিসা…পে॰… এৰং তুণ্হী ভৰিতব্ব’ন্তি, নযিধ ‘পরিসঞ্ঞূ’তি ৰুচ্চেয্য। যস্মা চ খো, ভিক্খৰে, ভিক্খু পরিসং জানাতি – ‘অযং খত্তিযপরিসা, অযং ব্রাহ্মণপরিসা, অযং গহপতিপরিসা, অযং সমণপরিসা । তত্থ এৰং উপসঙ্কমিতব্বং, এৰং ঠাতব্বং, এৰং কত্তব্বং, এৰং নিসীদিতব্বং, এৰং ভাসিতব্বং, এৰং তুণ্হী ভৰিতব্ব’ন্তি, তস্মা ‘পরিসঞ্ঞূ’তি ৰুচ্চতি। ইতি ধম্মঞ্ঞূ, অত্থঞ্ঞূ, অত্তঞ্ঞূ, মত্তঞ্ঞূ, কালঞ্ঞূ, পরিসঞ্ঞূ।
‘‘Parisaññū ca kathaṃ hoti? Idha, bhikkhave, bhikkhu parisaṃ jānāti – ‘ayaṃ khattiyaparisā, ayaṃ brāhmaṇaparisā, ayaṃ gahapatiparisā, ayaṃ samaṇaparisā. Tattha evaṃ upasaṅkamitabbaṃ, evaṃ ṭhātabbaṃ , evaṃ kattabbaṃ, evaṃ nisīditabbaṃ, evaṃ bhāsitabbaṃ, evaṃ tuṇhī bhavitabba’nti. No ce, bhikkhave, bhikkhu parisaṃ jāneyya – ‘ayaṃ khattiyaparisā…pe… evaṃ tuṇhī bhavitabba’nti, nayidha ‘parisaññū’ti vucceyya. Yasmā ca kho, bhikkhave, bhikkhu parisaṃ jānāti – ‘ayaṃ khattiyaparisā, ayaṃ brāhmaṇaparisā, ayaṃ gahapatiparisā, ayaṃ samaṇaparisā . Tattha evaṃ upasaṅkamitabbaṃ, evaṃ ṭhātabbaṃ, evaṃ kattabbaṃ, evaṃ nisīditabbaṃ, evaṃ bhāsitabbaṃ, evaṃ tuṇhī bhavitabba’nti, tasmā ‘parisaññū’ti vuccati. Iti dhammaññū, atthaññū, attaññū, mattaññū, kālaññū, parisaññū.
‘‘পুগ্গলপরোপরঞ্ঞূ চ কথং হোতি? ইধ, ভিক্খৰে, ভিক্খুনো 1 দ্ৰযেন পুগ্গলা ৰিদিতা হোন্তি। দ্ৰে পুগ্গলা – একো অরিযানং দস্সনকামো, একো অরিযানং ন দস্সনকামো। য্ৰাযং পুগ্গলো অরিযানং ন দস্সনকামো , এৰং সো তেনঙ্গেন গারয্হো। য্ৰাযং পুগ্গলো অরিযানং দস্সনকামো, এৰং সো তেনঙ্গেন পাসংসো।
‘‘Puggalaparoparaññū ca kathaṃ hoti? Idha, bhikkhave, bhikkhuno 2 dvayena puggalā viditā honti. Dve puggalā – eko ariyānaṃ dassanakāmo, eko ariyānaṃ na dassanakāmo. Yvāyaṃ puggalo ariyānaṃ na dassanakāmo , evaṃ so tenaṅgena gārayho. Yvāyaṃ puggalo ariyānaṃ dassanakāmo, evaṃ so tenaṅgena pāsaṃso.
‘‘দ্ৰে পুগ্গলা অরিযানং দস্সনকামা – একো সদ্ধম্মং সোতুকামো, একো সদ্ধম্মং ন সোতুকামো। য্ৰাযং পুগ্গলো সদ্ধম্মং ন সোতুকামো, এৰং সো তেনঙ্গেন গারয্হো। য্ৰাযং পুগ্গলো সদ্ধম্মং সোতুকামো, এৰং সো তেনঙ্গেন পাসংসো।
‘‘Dve puggalā ariyānaṃ dassanakāmā – eko saddhammaṃ sotukāmo, eko saddhammaṃ na sotukāmo. Yvāyaṃ puggalo saddhammaṃ na sotukāmo, evaṃ so tenaṅgena gārayho. Yvāyaṃ puggalo saddhammaṃ sotukāmo, evaṃ so tenaṅgena pāsaṃso.
‘‘দ্ৰে পুগ্গলা সদ্ধম্মং সোতুকামা – একো ওহিতসোতো ধম্মং সুণাতি, একো অনোহিতসোতো ধম্মং সুণাতি। য্ৰাযং পুগ্গলো অনোহিতসোতো ধম্মং সুণাতি, এৰং সো তেনঙ্গেন গারয্হো। য্ৰাযং পুগ্গলো ওহিতসোতো ধম্মং সুণাতি, এৰং সো তেনঙ্গেন পাসংসো।
‘‘Dve puggalā saddhammaṃ sotukāmā – eko ohitasoto dhammaṃ suṇāti, eko anohitasoto dhammaṃ suṇāti. Yvāyaṃ puggalo anohitasoto dhammaṃ suṇāti, evaṃ so tenaṅgena gārayho. Yvāyaṃ puggalo ohitasoto dhammaṃ suṇāti, evaṃ so tenaṅgena pāsaṃso.
‘‘দ্ৰে পুগ্গলা ওহিতসোতা ধম্মং সুণন্তি 3 – একো সুত্ৰা ধম্মং ধারেতি, একো সুত্ৰা ধম্মং ন ধারেতি। য্ৰাযং পুগ্গলো সুত্ৰা ন ধম্মং ধারেতি, এৰং সো তেনঙ্গেন গারয্হো। য্ৰাযং পুগ্গলো সুত্ৰা ধম্মং ধারেতি, এৰং সো তেনঙ্গেন পাসংসো।
‘‘Dve puggalā ohitasotā dhammaṃ suṇanti 4 – eko sutvā dhammaṃ dhāreti, eko sutvā dhammaṃ na dhāreti. Yvāyaṃ puggalo sutvā na dhammaṃ dhāreti, evaṃ so tenaṅgena gārayho. Yvāyaṃ puggalo sutvā dhammaṃ dhāreti, evaṃ so tenaṅgena pāsaṃso.
‘‘দ্ৰে পুগ্গলা সুত্ৰা ধম্মং ধারেন্তি 5 – একো ধাতানং 6 ধম্মানং অত্থং উপপরিক্খতি, একো ধাতানং ধম্মানং অত্থং ন উপপরিক্খতি। য্ৰাযং পুগ্গলো ধাতানং ধম্মানং অত্থং ন উপপরিক্খতি, এৰং সো তেনঙ্গেন গারয্হো। য্ৰাযং পুগ্গলো ধাতানং ধম্মানং অত্থং উপপরিক্খতি, এৰং সো তেনঙ্গেন পাসংসো।
‘‘Dve puggalā sutvā dhammaṃ dhārenti 7 – eko dhātānaṃ 8 dhammānaṃ atthaṃ upaparikkhati, eko dhātānaṃ dhammānaṃ atthaṃ na upaparikkhati. Yvāyaṃ puggalo dhātānaṃ dhammānaṃ atthaṃ na upaparikkhati, evaṃ so tenaṅgena gārayho. Yvāyaṃ puggalo dhātānaṃ dhammānaṃ atthaṃ upaparikkhati, evaṃ so tenaṅgena pāsaṃso.
‘‘দ্ৰে পুগ্গলা ধাতানং ধম্মানং অত্থং উপপরিক্খন্তি 9 – একো অত্থমঞ্ঞায ধম্মমঞ্ঞায ধম্মানুধম্মপ্পটিপন্নো, একো অত্থমঞ্ঞায ধম্মমঞ্ঞায ন ধম্মানুধম্মপ্পটিপন্নো। য্ৰাযং পুগ্গলো অত্থমঞ্ঞায ধম্মমঞ্ঞায ন ধম্মানুধম্মপ্পটিপন্নো, এৰং সো তেনঙ্গেন গারয্হো। য্ৰাযং পুগ্গলো অত্থমঞ্ঞায ধম্মমঞ্ঞায ধম্মানুধম্মপ্পটিপন্নো, এৰং সো তেনঙ্গেন পাসংসো।
‘‘Dve puggalā dhātānaṃ dhammānaṃ atthaṃ upaparikkhanti 10 – eko atthamaññāya dhammamaññāya dhammānudhammappaṭipanno, eko atthamaññāya dhammamaññāya na dhammānudhammappaṭipanno. Yvāyaṃ puggalo atthamaññāya dhammamaññāya na dhammānudhammappaṭipanno, evaṃ so tenaṅgena gārayho. Yvāyaṃ puggalo atthamaññāya dhammamaññāya dhammānudhammappaṭipanno, evaṃ so tenaṅgena pāsaṃso.
‘‘দ্ৰে পুগ্গলা অত্থমঞ্ঞায ধম্মমঞ্ঞায ধম্মানুধম্মপ্পটিপন্না – একো অত্তহিতায পটিপন্নো নো পরহিতায, একো অত্তহিতায চ পটিপন্নো পরহিতায চ। য্ৰাযং পুগ্গলো অত্তহিতায পটিপন্নো নো পরহিতায, এৰং সো তেনঙ্গেন গারয্হো। য্ৰাযং পুগ্গলো অত্থহিতায চ পটিপন্নো পরহিতায চ, এৰং সো তেনঙ্গেন পাসংসো। এৰং খো, ভিক্খৰে, ভিক্খুনো 11 দ্ৰযেন পুগ্গলা ৰিদিতা হোন্তি। এৰং, ভিক্খৰে, ভিক্খু পুগ্গলপরোপরঞ্ঞূ হোতি। ‘‘ইমেহি খো, ভিক্খৰে, সত্তহি ধম্মেহি সমন্নাগতো ভিক্খু আহুনেয্যো হোতি পাহুনেয্যো…পে॰… অনুত্তরং পুঞ্ঞক্খেত্তং লোকস্সা’’তি। চতুত্থং।
‘‘Dve puggalā atthamaññāya dhammamaññāya dhammānudhammappaṭipannā – eko attahitāya paṭipanno no parahitāya, eko attahitāya ca paṭipanno parahitāya ca. Yvāyaṃ puggalo attahitāya paṭipanno no parahitāya, evaṃ so tenaṅgena gārayho. Yvāyaṃ puggalo atthahitāya ca paṭipanno parahitāya ca, evaṃ so tenaṅgena pāsaṃso. Evaṃ kho, bhikkhave, bhikkhuno 12 dvayena puggalā viditā honti. Evaṃ, bhikkhave, bhikkhu puggalaparoparaññū hoti. ‘‘Imehi kho, bhikkhave, sattahi dhammehi samannāgato bhikkhu āhuneyyo hoti pāhuneyyo…pe… anuttaraṃ puññakkhettaṃ lokassā’’ti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৪. ধম্মঞ্ঞূসুত্তৰণ্ণনা • 4. Dhammaññūsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৪. ধম্মঞ্ঞূসুত্তৰণ্ণনা • 4. Dhammaññūsuttavaṇṇanā
