| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
4. த⁴ம்மஞ்ஞூஸுத்தவண்ணனா
4. Dhammaññūsuttavaṇṇanā
68. சதுத்தே² ஸுத்தகெ³ய்யாதி³த⁴ம்மங் ஜானாதீதி த⁴ம்மஞ்ஞூ. தஸ்ஸ தஸ்ஸேவ ஸுத்தகெ³ய்யாதி³னா பா⁴ஸிதஸ்ஸ தத³ஞ்ஞஸ்ஸ ஸுத்தபத³த்த²ஸ்ஸ போ³த⁴கஸ்ஸ ஸத்³த³ஸ்ஸ அத்த²குஸலதாவஸேன அத்த²ங் ஜானாதீதி அத்த²ஞ்ஞூ. ‘‘எத்தகொம்ஹி ஸீலேன ஸமாதி⁴னா பஞ்ஞாயா’’தி ஏவங் யதா² அத்தனோ பமாணஜானநவஸேன அத்தானங் ஜானாதீதி அத்தஞ்ஞூ. படிக்³க³ஹணபரிபோ⁴க³பரியேஸனவிஸ்ஸஜ்ஜனேஸு மத்தங் ஜானாதீதி மத்தஞ்ஞூ. நித்³தே³ஸே பன படிக்³க³ஹணமத்தஞ்ஞுதாய ஏவ பரிபோ⁴கா³தி³மத்தஞ்ஞுதா பபோ³தி⁴தா ஹோதீதி படிக்³க³ஹணமத்தஞ்ஞுதாவ த³ஸ்ஸிதா. ‘‘அயங் காலோ உத்³தே³ஸஸ்ஸ, அயங் காலோ பரிபுச்சா²ய, அயங் காலோ யோக³ஸ்ஸ அதி⁴க³மாயா’’தி ஏவங் காலங் ஜானாதீதி காலஞ்ஞூ. தத்த² பஞ்ச வஸ்ஸானி உத்³தே³ஸஸ்ஸ காலோ, த³ஸ பரிபுச்சா²ய, இத³ங் அதிஸம்பா³த⁴ங், அதிக்க²பஞ்ஞஸ்ஸ தாவதா காலேன தீரேதுங் அஸக்குணெய்யத்தா த³ஸ வஸ்ஸானி உத்³தே³ஸஸ்ஸ காலோ, வீஸதி பரிபுச்சா²ய, ததோ பரங் யோகே³ கம்மங் காதப்³ப³ங். க²த்தியபரிஸாதி³கங் அட்ட²வித⁴ங் பரிஸங் ஜானாதீதி பரிஸஞ்ஞூ. பி⁴க்கு²பரிஸாதி³கங் சதுப்³பி³த⁴ங், க²த்தியபரிஸாதி³கங் மனுஸ்ஸபரிஸங்யேவ புன சதுப்³பி³த⁴ங் க³ஹெத்வா அட்ட²வித⁴ங் வத³ந்தி அபரே. நித்³தே³ஸே பனஸ்ஸ க²த்தியபரிஸாதி³சதுப்³பி³த⁴பரிஸக்³க³ஹணங் நித³ஸ்ஸனமத்தங் த³ட்ட²ப்³ப³ங். ‘‘இமங் மே ஸேவந்தஸ்ஸ அகுஸலா த⁴ம்மா பரிஹாயந்தி, குஸலா த⁴ம்மா அபி⁴வட்³ட⁴ந்தி, தஸ்மா அயங் புக்³க³லோ ஸேவிதப்³போ³, விபரியாயதோ அஞ்ஞோ அஸேவிதப்³போ³’’தி ஸேவிதப்³பா³ஸேவிதப்³ப³புக்³க³லங் ஜானாதீதி புக்³க³லபரோபரஞ்ஞூ. ஏவஞ்ஹி தேஸங் புக்³க³லானங் பரோபரங் உக்கட்ட²னிஹீனதங் ஜானாதி நாம. நித்³தே³ஸேபிஸ்ஸ ஸேவிதப்³பா³ஸேவிதப்³ப³புக்³க³லே விபா⁴வனமேவ ஸமணகதா²கதந்தி த³ட்ட²ப்³ப³ங்.
68. Catutthe suttageyyādidhammaṃ jānātīti dhammaññū. Tassa tasseva suttageyyādinā bhāsitassa tadaññassa suttapadatthassa bodhakassa saddassa atthakusalatāvasena atthaṃ jānātīti atthaññū. ‘‘Ettakomhi sīlena samādhinā paññāyā’’ti evaṃ yathā attano pamāṇajānanavasena attānaṃ jānātīti attaññū. Paṭiggahaṇaparibhogapariyesanavissajjanesu mattaṃ jānātīti mattaññū. Niddese pana paṭiggahaṇamattaññutāya eva paribhogādimattaññutā pabodhitā hotīti paṭiggahaṇamattaññutāva dassitā. ‘‘Ayaṃ kālo uddesassa, ayaṃ kālo paripucchāya, ayaṃ kālo yogassa adhigamāyā’’ti evaṃ kālaṃ jānātīti kālaññū. Tattha pañca vassāni uddesassa kālo, dasa paripucchāya, idaṃ atisambādhaṃ, atikkhapaññassa tāvatā kālena tīretuṃ asakkuṇeyyattā dasa vassāni uddesassa kālo, vīsati paripucchāya, tato paraṃ yoge kammaṃ kātabbaṃ. Khattiyaparisādikaṃ aṭṭhavidhaṃ parisaṃ jānātīti parisaññū. Bhikkhuparisādikaṃ catubbidhaṃ, khattiyaparisādikaṃ manussaparisaṃyeva puna catubbidhaṃ gahetvā aṭṭhavidhaṃ vadanti apare. Niddese panassa khattiyaparisādicatubbidhaparisaggahaṇaṃ nidassanamattaṃ daṭṭhabbaṃ. ‘‘Imaṃ me sevantassa akusalā dhammā parihāyanti, kusalā dhammā abhivaḍḍhanti, tasmā ayaṃ puggalo sevitabbo, vipariyāyato añño asevitabbo’’ti sevitabbāsevitabbapuggalaṃ jānātīti puggalaparoparaññū. Evañhi tesaṃ puggalānaṃ paroparaṃ ukkaṭṭhanihīnataṃ jānāti nāma. Niddesepissa sevitabbāsevitabbapuggale vibhāvanameva samaṇakathākatanti daṭṭhabbaṃ.
த⁴ம்மஞ்ஞூஸுத்தவண்ணனா நிட்டி²தா.
Dhammaññūsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 4. த⁴ம்மஞ்ஞூஸுத்தங் • 4. Dhammaññūsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 4. த⁴ம்மஞ்ஞூஸுத்தவண்ணனா • 4. Dhammaññūsuttavaṇṇanā
