| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༤. དྷམྨཉྙཱུསུཏྟཝཎྞནཱ
4. Dhammaññūsuttavaṇṇanā
༦༨. ཙཏུཏྠེ སུཏྟགེཡྻཱདིདྷམྨཾ ཛཱནཱཏཱིཏི དྷམྨཉྙཱུ། ཏསྶ ཏསྶེཝ སུཏྟགེཡྻཱདིནཱ བྷཱསིཏསྶ ཏདཉྙསྶ སུཏྟཔདཏྠསྶ བོདྷཀསྶ སདྡསྶ ཨཏྠཀུསལཏཱཝསེན ཨཏྠཾ ཛཱནཱཏཱིཏི ཨཏྠཉྙཱུ། ‘‘ཨེཏྟཀོམྷི སཱིལེན སམཱདྷིནཱ པཉྙཱཡཱ’’ཏི ཨེཝཾ ཡཐཱ ཨཏྟནོ པམཱཎཛཱནནཝསེན ཨཏྟཱནཾ ཛཱནཱཏཱིཏི ཨཏྟཉྙཱུ། པཊིགྒཧཎཔརིབྷོགཔརིཡེསནཝིསྶཛྫནེསུ མཏྟཾ ཛཱནཱཏཱིཏི མཏྟཉྙཱུ། ནིདྡེསེ པན པཊིགྒཧཎམཏྟཉྙུཏཱཡ ཨེཝ པརིབྷོགཱདིམཏྟཉྙུཏཱ པབོདྷིཏཱ ཧོཏཱིཏི པཊིགྒཧཎམཏྟཉྙུཏཱཝ དསྶིཏཱ། ‘‘ཨཡཾ ཀཱལོ ཨུདྡེསསྶ, ཨཡཾ ཀཱལོ པརིཔུཙྪཱཡ, ཨཡཾ ཀཱལོ ཡོགསྶ ཨདྷིགམཱཡཱ’’ཏི ཨེཝཾ ཀཱལཾ ཛཱནཱཏཱིཏི ཀཱལཉྙཱུ། ཏཏྠ པཉྩ ཝསྶཱནི ཨུདྡེསསྶ ཀཱལོ, དས པརིཔུཙྪཱཡ, ཨིདཾ ཨཏིསམྦཱདྷཾ, ཨཏིཀྑཔཉྙསྶ ཏཱཝཏཱ ཀཱལེན ཏཱིརེཏུཾ ཨསཀྐུཎེཡྻཏྟཱ དས ཝསྶཱནི ཨུདྡེསསྶ ཀཱལོ, ཝཱིསཏི པརིཔུཙྪཱཡ, ཏཏོ པརཾ ཡོགེ ཀམྨཾ ཀཱཏབྦཾ། ཁཏྟིཡཔརིསཱདིཀཾ ཨཊྛཝིདྷཾ པརིསཾ ཛཱནཱཏཱིཏི པརིསཉྙཱུ། བྷིཀྑུཔརིསཱདིཀཾ ཙཏུབྦིདྷཾ, ཁཏྟིཡཔརིསཱདིཀཾ མནུསྶཔརིསཾཡེཝ པུན ཙཏུབྦིདྷཾ གཧེཏྭཱ ཨཊྛཝིདྷཾ ཝདནྟི ཨཔརེ། ནིདྡེསེ པནསྶ ཁཏྟིཡཔརིསཱདིཙཏུབྦིདྷཔརིསགྒཧཎཾ ནིདསྶནམཏྟཾ དཊྛབྦཾ། ‘‘ཨིམཾ མེ སེཝནྟསྶ ཨཀུསལཱ དྷམྨཱ པརིཧཱཡནྟི, ཀུསལཱ དྷམྨཱ ཨབྷིཝཌྜྷནྟི, ཏསྨཱ ཨཡཾ པུགྒལོ སེཝིཏབྦོ, ཝིཔརིཡཱཡཏོ ཨཉྙོ ཨསེཝིཏབྦོ’’ཏི སེཝིཏབྦཱསེཝིཏབྦཔུགྒལཾ ཛཱནཱཏཱིཏི པུགྒལཔརོཔརཉྙཱུ། ཨེཝཉྷི ཏེསཾ པུགྒལཱནཾ པརོཔརཾ ཨུཀྐཊྛནིཧཱིནཏཾ ཛཱནཱཏི ནཱམ། ནིདྡེསེཔིསྶ སེཝིཏབྦཱསེཝིཏབྦཔུགྒལེ ཝིབྷཱཝནམེཝ སམཎཀཐཱཀཏནྟི དཊྛབྦཾ།
68. Catutthe suttageyyādidhammaṃ jānātīti dhammaññū. Tassa tasseva suttageyyādinā bhāsitassa tadaññassa suttapadatthassa bodhakassa saddassa atthakusalatāvasena atthaṃ jānātīti atthaññū. ‘‘Ettakomhi sīlena samādhinā paññāyā’’ti evaṃ yathā attano pamāṇajānanavasena attānaṃ jānātīti attaññū. Paṭiggahaṇaparibhogapariyesanavissajjanesu mattaṃ jānātīti mattaññū. Niddese pana paṭiggahaṇamattaññutāya eva paribhogādimattaññutā pabodhitā hotīti paṭiggahaṇamattaññutāva dassitā. ‘‘Ayaṃ kālo uddesassa, ayaṃ kālo paripucchāya, ayaṃ kālo yogassa adhigamāyā’’ti evaṃ kālaṃ jānātīti kālaññū. Tattha pañca vassāni uddesassa kālo, dasa paripucchāya, idaṃ atisambādhaṃ, atikkhapaññassa tāvatā kālena tīretuṃ asakkuṇeyyattā dasa vassāni uddesassa kālo, vīsati paripucchāya, tato paraṃ yoge kammaṃ kātabbaṃ. Khattiyaparisādikaṃ aṭṭhavidhaṃ parisaṃ jānātīti parisaññū. Bhikkhuparisādikaṃ catubbidhaṃ, khattiyaparisādikaṃ manussaparisaṃyeva puna catubbidhaṃ gahetvā aṭṭhavidhaṃ vadanti apare. Niddese panassa khattiyaparisādicatubbidhaparisaggahaṇaṃ nidassanamattaṃ daṭṭhabbaṃ. ‘‘Imaṃ me sevantassa akusalā dhammā parihāyanti, kusalā dhammā abhivaḍḍhanti, tasmā ayaṃ puggalo sevitabbo, vipariyāyato añño asevitabbo’’ti sevitabbāsevitabbapuggalaṃ jānātīti puggalaparoparaññū. Evañhi tesaṃ puggalānaṃ paroparaṃ ukkaṭṭhanihīnataṃ jānāti nāma. Niddesepissa sevitabbāsevitabbapuggale vibhāvanameva samaṇakathākatanti daṭṭhabbaṃ.
དྷམྨཉྙཱུསུཏྟཝཎྞནཱ ནིཊྛིཏཱ།
Dhammaññūsuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༤. དྷམྨཉྙཱུསུཏྟཾ • 4. Dhammaññūsuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༤. དྷམྨཉྙཱུསུཏྟཝཎྞནཱ • 4. Dhammaññūsuttavaṇṇanā
