| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. த⁴ம்மபத³ஸுத்தவண்ணனா
9. Dhammapadasuttavaṇṇanā
29. நவமே ஜா²னாதி³பே⁴தோ³ த⁴ம்மோ பஜ்ஜதி ஏதேனாதி த⁴ம்மபத³ங், அனபி⁴ஜ்ஜா²வ த⁴ம்மபத³ங் அனபி⁴ஜ்ஜா²த⁴ம்மபத³ங், அனபி⁴ஜ்ஜா²பதா⁴னோ வா த⁴ம்மகொட்டா²ஸோ அனபி⁴ஜ்ஜா²த⁴ம்மபத³ங். ஏவங் ஸேஸேஸுபி. அத்த²தோ பன அனபி⁴ஜ்ஜா²த⁴ம்மபத³ங் நாம அலோபோ⁴ வா அலோப⁴ஸீஸேன அதி⁴க³தஜ்ஜா²னவிபஸ்ஸனாமக்³க³ப²லனிப்³பா³னானி வா. அப்³யாபாதோ³ த⁴ம்மபத³ங் நாம மெத்தா வா மெத்தாஸீஸேன அதி⁴க³தஜ்ஜா²னாதீ³னி வா. ஸம்மாஸதித⁴ம்மபத³ங் நாம ஸூபட்டி²தஸ்ஸதி வா ஸதிஸீஸேன அதி⁴க³தஜ்ஜா²னாதீ³னி வா. ஸம்மாஸமாதி⁴த⁴ம்மபத³ங் நாம அட்ட²ஸமாபத்தி வா அட்ட²ஸமாபத்திஸீஸேன அதி⁴க³தஜ்ஜா²னவிபஸ்ஸனாமக்³க³ப²லனிப்³பா³னானி வா. த³ஸஅஸுப⁴வஸேன வா அதி⁴க³தஜ்ஜா²னாதீ³னி அனபி⁴ஜ்ஜா த⁴ம்மபத³ங். சதுப்³ரஹ்மவிஹாரவஸேன அதி⁴க³தானி அப்³யாபாதோ³ த⁴ம்மபத³ங். த³ஸானுஸ்ஸதி ஆஹாரேபடிகூலஸஞ்ஞாவஸேன அதி⁴க³தானி ஸம்மாஸதித⁴ம்மபத³ங். த³ஸகஸிணஆனாபானவஸேன அதி⁴க³தானி ஸம்மாஸமாதி⁴த⁴ம்மபத³ங். அனபி⁴ஜ்ஜா²லூதி அனபி⁴ஜ்ஜா²யனஸீலோ. அபி⁴புப்³போ³ ஜே²ஸத்³தோ³ அபி⁴ஜ்ஜா²யனட்டோ². தேனேவாஹ ‘‘நித்தண்ஹோ ஹுத்வா’’தி. பகதிபா⁴வங் அவிஜஹந்தேனாதி பரிஸுத்³த⁴பா⁴வங் ஸபா⁴வஸங்கா²தஅனவஜ்ஜஸங்கா²தங் பகதிபா⁴வங் அவிஜஹந்தேன. ஸாவஜ்ஜத⁴ம்மஸமுப்பத்தியா ஹி சித்தஸ்ஸ அனவஜ்ஜபா⁴வோ ஜஹிதோ ஹோதீதி.
29. Navame jhānādibhedo dhammo pajjati etenāti dhammapadaṃ, anabhijjhāva dhammapadaṃ anabhijjhādhammapadaṃ, anabhijjhāpadhāno vā dhammakoṭṭhāso anabhijjhādhammapadaṃ. Evaṃ sesesupi. Atthato pana anabhijjhādhammapadaṃ nāma alobho vā alobhasīsena adhigatajjhānavipassanāmaggaphalanibbānāni vā. Abyāpādo dhammapadaṃ nāma mettā vā mettāsīsena adhigatajjhānādīni vā. Sammāsatidhammapadaṃ nāma sūpaṭṭhitassati vā satisīsena adhigatajjhānādīni vā. Sammāsamādhidhammapadaṃ nāma aṭṭhasamāpatti vā aṭṭhasamāpattisīsena adhigatajjhānavipassanāmaggaphalanibbānāni vā. Dasaasubhavasena vā adhigatajjhānādīni anabhijjā dhammapadaṃ. Catubrahmavihāravasena adhigatāni abyāpādo dhammapadaṃ. Dasānussati āhārepaṭikūlasaññāvasena adhigatāni sammāsatidhammapadaṃ. Dasakasiṇaānāpānavasena adhigatāni sammāsamādhidhammapadaṃ. Anabhijjhālūti anabhijjhāyanasīlo. Abhipubbo jhesaddo abhijjhāyanaṭṭho. Tenevāha ‘‘nittaṇho hutvā’’ti. Pakatibhāvaṃ avijahantenāti parisuddhabhāvaṃ sabhāvasaṅkhātaanavajjasaṅkhātaṃ pakatibhāvaṃ avijahantena. Sāvajjadhammasamuppattiyā hi cittassa anavajjabhāvo jahito hotīti.
த⁴ம்மபத³ஸுத்தவண்ணனா நிட்டி²தா.
Dhammapadasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. த⁴ம்மபத³ஸுத்தங் • 9. Dhammapadasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. த⁴ம்மபத³ஸுத்தவண்ணனா • 9. Dhammapadasuttavaṇṇanā
