| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৯. ধম্মপদসুত্তৰণ্ণনা
9. Dhammapadasuttavaṇṇanā
২৯. নৰমে ঝানাদিভেদো ধম্মো পজ্জতি এতেনাতি ধম্মপদং, অনভিজ্ঝাৰ ধম্মপদং অনভিজ্ঝাধম্মপদং, অনভিজ্ঝাপধানো ৰা ধম্মকোট্ঠাসো অনভিজ্ঝাধম্মপদং। এৰং সেসেসুপি। অত্থতো পন অনভিজ্ঝাধম্মপদং নাম অলোভো ৰা অলোভসীসেন অধিগতজ্ঝানৰিপস্সনামগ্গফলনিব্বানানি ৰা। অব্যাপাদো ধম্মপদং নাম মেত্তা ৰা মেত্তাসীসেন অধিগতজ্ঝানাদীনি ৰা। সম্মাসতিধম্মপদং নাম সূপট্ঠিতস্সতি ৰা সতিসীসেন অধিগতজ্ঝানাদীনি ৰা। সম্মাসমাধিধম্মপদং নাম অট্ঠসমাপত্তি ৰা অট্ঠসমাপত্তিসীসেন অধিগতজ্ঝানৰিপস্সনামগ্গফলনিব্বানানি ৰা। দসঅসুভৰসেন ৰা অধিগতজ্ঝানাদীনি অনভিজ্জা ধম্মপদং। চতুব্রহ্মৰিহারৰসেন অধিগতানি অব্যাপাদো ধম্মপদং। দসানুস্সতি আহারেপটিকূলসঞ্ঞাৰসেন অধিগতানি সম্মাসতিধম্মপদং। দসকসিণআনাপানৰসেন অধিগতানি সম্মাসমাধিধম্মপদং। অনভিজ্ঝালূতি অনভিজ্ঝাযনসীলো। অভিপুব্বো ঝেসদ্দো অভিজ্ঝাযনট্ঠো। তেনেৰাহ ‘‘নিত্তণ্হো হুত্ৰা’’তি। পকতিভাৰং অৰিজহন্তেনাতি পরিসুদ্ধভাৰং সভাৰসঙ্খাতঅনৰজ্জসঙ্খাতং পকতিভাৰং অৰিজহন্তেন। সাৰজ্জধম্মসমুপ্পত্তিযা হি চিত্তস্স অনৰজ্জভাৰো জহিতো হোতীতি।
29. Navame jhānādibhedo dhammo pajjati etenāti dhammapadaṃ, anabhijjhāva dhammapadaṃ anabhijjhādhammapadaṃ, anabhijjhāpadhāno vā dhammakoṭṭhāso anabhijjhādhammapadaṃ. Evaṃ sesesupi. Atthato pana anabhijjhādhammapadaṃ nāma alobho vā alobhasīsena adhigatajjhānavipassanāmaggaphalanibbānāni vā. Abyāpādo dhammapadaṃ nāma mettā vā mettāsīsena adhigatajjhānādīni vā. Sammāsatidhammapadaṃ nāma sūpaṭṭhitassati vā satisīsena adhigatajjhānādīni vā. Sammāsamādhidhammapadaṃ nāma aṭṭhasamāpatti vā aṭṭhasamāpattisīsena adhigatajjhānavipassanāmaggaphalanibbānāni vā. Dasaasubhavasena vā adhigatajjhānādīni anabhijjā dhammapadaṃ. Catubrahmavihāravasena adhigatāni abyāpādo dhammapadaṃ. Dasānussati āhārepaṭikūlasaññāvasena adhigatāni sammāsatidhammapadaṃ. Dasakasiṇaānāpānavasena adhigatāni sammāsamādhidhammapadaṃ. Anabhijjhālūti anabhijjhāyanasīlo. Abhipubbo jhesaddo abhijjhāyanaṭṭho. Tenevāha ‘‘nittaṇho hutvā’’ti. Pakatibhāvaṃ avijahantenāti parisuddhabhāvaṃ sabhāvasaṅkhātaanavajjasaṅkhātaṃ pakatibhāvaṃ avijahantena. Sāvajjadhammasamuppattiyā hi cittassa anavajjabhāvo jahito hotīti.
ধম্মপদসুত্তৰণ্ণনা নিট্ঠিতা।
Dhammapadasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৯. ধম্মপদসুত্তং • 9. Dhammapadasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. ধম্মপদসুত্তৰণ্ণনা • 9. Dhammapadasuttavaṇṇanā
