| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၉. ဓမ္မပဒသုတ္တဝဏ္ဏနာ
9. Dhammapadasuttavaṇṇanā
၂၉. နဝမေ ဈာနာဒိဘေဒော ဓမ္မော ပဇ္ဇတိ ဧတေနာတိ ဓမ္မပဒံ, အနဘိဇ္ဈာဝ ဓမ္မပဒံ အနဘိဇ္ဈာဓမ္မပဒံ, အနဘိဇ္ဈာပဓာနော ဝာ ဓမ္မကောဋ္ဌာသော အနဘိဇ္ဈာဓမ္မပဒံ။ ဧဝံ သေသေသုပိ။ အတ္ထတော ပန အနဘိဇ္ဈာဓမ္မပဒံ နာမ အလောဘော ဝာ အလောဘသီသေန အဓိဂတဇ္ဈာနဝိပသ္သနာမဂ္ဂဖလနိဗ္ဗာနာနိ ဝာ။ အဗ္ယာပာဒော ဓမ္မပဒံ နာမ မေတ္တာ ဝာ မေတ္တာသီသေန အဓိဂတဇ္ဈာနာဒီနိ ဝာ။ သမ္မာသတိဓမ္မပဒံ နာမ သူပဋ္ဌိတသ္သတိ ဝာ သတိသီသေန အဓိဂတဇ္ဈာနာဒီနိ ဝာ။ သမ္မာသမာဓိဓမ္မပဒံ နာမ အဋ္ဌသမာပတ္တိ ဝာ အဋ္ဌသမာပတ္တိသီသေန အဓိဂတဇ္ဈာနဝိပသ္သနာမဂ္ဂဖလနိဗ္ဗာနာနိ ဝာ။ ဒသအသုဘဝသေန ဝာ အဓိဂတဇ္ဈာနာဒီနိ အနဘိဇ္ဇာ ဓမ္မပဒံ။ စတုဗ္ရဟ္မဝိဟာရဝသေန အဓိဂတာနိ အဗ္ယာပာဒော ဓမ္မပဒံ။ ဒသာနုသ္သတိ အာဟာရေပဋိကူလသညာဝသေန အဓိဂတာနိ သမ္မာသတိဓမ္မပဒံ။ ဒသကသိဏအာနာပာနဝသေန အဓိဂတာနိ သမ္မာသမာဓိဓမ္မပဒံ။ အနဘိဇ္ဈာလူတိ အနဘိဇ္ဈာယနသီလော။ အဘိပုဗ္ဗော ဈေသဒ္ဒော အဘိဇ္ဈာယနဋ္ဌော။ တေနေဝာဟ ‘‘နိတ္တဏ္ဟော ဟုတ္ဝာ’’တိ။ ပကတိဘာဝံ အဝိဇဟန္တေနာတိ ပရိသုဒ္ဓဘာဝံ သဘာဝသင္ခာတအနဝဇ္ဇသင္ခာတံ ပကတိဘာဝံ အဝိဇဟန္တေန။ သာဝဇ္ဇဓမ္မသမုပ္ပတ္တိယာ ဟိ စိတ္တသ္သ အနဝဇ္ဇဘာဝော ဇဟိတော ဟောတီတိ။
29. Navame jhānādibhedo dhammo pajjati etenāti dhammapadaṃ, anabhijjhāva dhammapadaṃ anabhijjhādhammapadaṃ, anabhijjhāpadhāno vā dhammakoṭṭhāso anabhijjhādhammapadaṃ. Evaṃ sesesupi. Atthato pana anabhijjhādhammapadaṃ nāma alobho vā alobhasīsena adhigatajjhānavipassanāmaggaphalanibbānāni vā. Abyāpādo dhammapadaṃ nāma mettā vā mettāsīsena adhigatajjhānādīni vā. Sammāsatidhammapadaṃ nāma sūpaṭṭhitassati vā satisīsena adhigatajjhānādīni vā. Sammāsamādhidhammapadaṃ nāma aṭṭhasamāpatti vā aṭṭhasamāpattisīsena adhigatajjhānavipassanāmaggaphalanibbānāni vā. Dasaasubhavasena vā adhigatajjhānādīni anabhijjā dhammapadaṃ. Catubrahmavihāravasena adhigatāni abyāpādo dhammapadaṃ. Dasānussati āhārepaṭikūlasaññāvasena adhigatāni sammāsatidhammapadaṃ. Dasakasiṇaānāpānavasena adhigatāni sammāsamādhidhammapadaṃ. Anabhijjhālūti anabhijjhāyanasīlo. Abhipubbo jhesaddo abhijjhāyanaṭṭho. Tenevāha ‘‘nittaṇho hutvā’’ti. Pakatibhāvaṃ avijahantenāti parisuddhabhāvaṃ sabhāvasaṅkhātaanavajjasaṅkhātaṃ pakatibhāvaṃ avijahantena. Sāvajjadhammasamuppattiyā hi cittassa anavajjabhāvo jahito hotīti.
ဓမ္မပဒသုတ္တဝဏ္ဏနာ နိဋ္ဌိတာ။
Dhammapadasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၉. ဓမ္မပဒသုတ္တံ • 9. Dhammapadasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၉. ဓမ္မပဒသုတ္တဝဏ္ဏနာ • 9. Dhammapadasuttavaṇṇanā
