| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༩. དྷམྨཔདསུཏྟཝཎྞནཱ
9. Dhammapadasuttavaṇṇanā
༢༩. ནཝམེ ཛྷཱནཱདིབྷེདོ དྷམྨོ པཛྫཏི ཨེཏེནཱཏི དྷམྨཔདཾ, ཨནབྷིཛ྄ཛྷཱཝ དྷམྨཔདཾ ཨནབྷིཛ྄ཛྷཱདྷམྨཔདཾ, ཨནབྷིཛ྄ཛྷཱཔདྷཱནོ ཝཱ དྷམྨཀོཊྛཱསོ ཨནབྷིཛ྄ཛྷཱདྷམྨཔདཾ། ཨེཝཾ སེསེསུཔི། ཨཏྠཏོ པན ཨནབྷིཛ྄ཛྷཱདྷམྨཔདཾ ནཱམ ཨལོབྷོ ཝཱ ཨལོབྷསཱིསེན ཨདྷིགཏཛ྄ཛྷཱནཝིཔསྶནཱམགྒཕལནིབྦཱནཱནི ཝཱ། ཨབྱཱཔཱདོ དྷམྨཔདཾ ནཱམ མེཏྟཱ ཝཱ མེཏྟཱསཱིསེན ཨདྷིགཏཛ྄ཛྷཱནཱདཱིནི ཝཱ། སམྨཱསཏིདྷམྨཔདཾ ནཱམ སཱུཔཊྛིཏསྶཏི ཝཱ སཏིསཱིསེན ཨདྷིགཏཛ྄ཛྷཱནཱདཱིནི ཝཱ། སམྨཱསམཱདྷིདྷམྨཔདཾ ནཱམ ཨཊྛསམཱཔཏྟི ཝཱ ཨཊྛསམཱཔཏྟིསཱིསེན ཨདྷིགཏཛ྄ཛྷཱནཝིཔསྶནཱམགྒཕལནིབྦཱནཱནི ཝཱ། དསཨསུབྷཝསེན ཝཱ ཨདྷིགཏཛ྄ཛྷཱནཱདཱིནི ཨནབྷིཛྫཱ དྷམྨཔདཾ། ཙཏུབྲཧྨཝིཧཱརཝསེན ཨདྷིགཏཱནི ཨབྱཱཔཱདོ དྷམྨཔདཾ། དསཱནུསྶཏི ཨཱཧཱརེཔཊིཀཱུལསཉྙཱཝསེན ཨདྷིགཏཱནི སམྨཱསཏིདྷམྨཔདཾ། དསཀསིཎཨཱནཱཔཱནཝསེན ཨདྷིགཏཱནི སམྨཱསམཱདྷིདྷམྨཔདཾ། ཨནབྷིཛ྄ཛྷཱལཱུཏི ཨནབྷིཛ྄ཛྷཱཡནསཱིལོ། ཨབྷིཔུབྦོ ཛྷེསདྡོ ཨབྷིཛ྄ཛྷཱཡནཊྛོ། ཏེནེཝཱཧ ‘‘ནིཏྟཎྷོ ཧུཏྭཱ’’ཏི། པཀཏིབྷཱཝཾ ཨཝིཛཧནྟེནཱཏི པརིསུདྡྷབྷཱཝཾ སབྷཱཝསངྑཱཏཨནཝཛྫསངྑཱཏཾ པཀཏིབྷཱཝཾ ཨཝིཛཧནྟེན། སཱཝཛྫདྷམྨསམུཔྤཏྟིཡཱ ཧི ཙིཏྟསྶ ཨནཝཛྫབྷཱཝོ ཛཧིཏོ ཧོཏཱིཏི།
29. Navame jhānādibhedo dhammo pajjati etenāti dhammapadaṃ, anabhijjhāva dhammapadaṃ anabhijjhādhammapadaṃ, anabhijjhāpadhāno vā dhammakoṭṭhāso anabhijjhādhammapadaṃ. Evaṃ sesesupi. Atthato pana anabhijjhādhammapadaṃ nāma alobho vā alobhasīsena adhigatajjhānavipassanāmaggaphalanibbānāni vā. Abyāpādo dhammapadaṃ nāma mettā vā mettāsīsena adhigatajjhānādīni vā. Sammāsatidhammapadaṃ nāma sūpaṭṭhitassati vā satisīsena adhigatajjhānādīni vā. Sammāsamādhidhammapadaṃ nāma aṭṭhasamāpatti vā aṭṭhasamāpattisīsena adhigatajjhānavipassanāmaggaphalanibbānāni vā. Dasaasubhavasena vā adhigatajjhānādīni anabhijjā dhammapadaṃ. Catubrahmavihāravasena adhigatāni abyāpādo dhammapadaṃ. Dasānussati āhārepaṭikūlasaññāvasena adhigatāni sammāsatidhammapadaṃ. Dasakasiṇaānāpānavasena adhigatāni sammāsamādhidhammapadaṃ. Anabhijjhālūti anabhijjhāyanasīlo. Abhipubbo jhesaddo abhijjhāyanaṭṭho. Tenevāha ‘‘nittaṇho hutvā’’ti. Pakatibhāvaṃ avijahantenāti parisuddhabhāvaṃ sabhāvasaṅkhātaanavajjasaṅkhātaṃ pakatibhāvaṃ avijahantena. Sāvajjadhammasamuppattiyā hi cittassa anavajjabhāvo jahito hotīti.
དྷམྨཔདསུཏྟཝཎྞནཱ ནིཊྛིཏཱ།
Dhammapadasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༩. དྷམྨཔདསུཏྟཾ • 9. Dhammapadasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༩. དྷམྨཔདསུཏྟཝཎྞནཱ • 9. Dhammapadasuttavaṇṇanā
