| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৭. ধম্মসৰত্থেরগাথাৰণ্ণনা
7. Dhammasavattheragāthāvaṇṇanā
পব্বজিং তুলযিত্ৰানাতি আযস্মতো ধম্মসৰত্থেরস্স গাথা। কা উপ্পত্তি? অযং কির পদুমুত্তরস্স ভগৰতো কালে সুৰচ্ছো নাম ব্রাহ্মণো হুত্ৰা তিণ্ণং ৰেদানং পারগূ ঘরাৰাসে দোসং দিস্ৰা তাপসপব্বজ্জং পব্বজিত্ৰা অরঞ্ঞাযতনে পব্বতন্তরে অস্সমং কারেত্ৰা বহূহি তাপসেহি সদ্ধিং ৰসি। অথস্স কুসলবীজং রোপেতুকামো পদুমুত্তরো ভগৰা অস্সমসমীপে আকাসে ঠত্ৰা ইদ্ধিপাটিহারিযং দস্সেসি। সো তং দিস্ৰা পসন্নমানসো পূজেতুকামো নাগপুপ্ফানি ওচিনাপেসি। সত্থা, ‘‘অলং ইমস্স তাপসস্স এত্তকং কুসলবীজ’’ন্তি পক্কামি। সো পুপ্ফানি গহেত্ৰা সত্থু গমনমগ্গং ওকিরিত্ৰা চিত্তং পসাদেন্তো অঞ্জলিং পগ্গয্হ অট্ঠাসি। সো তেন পুঞ্ঞকম্মেন দেৰলোকে নিব্বত্তিত্ৰা অপরাপরং সুগতীসুযেৰ সংসরন্তো ইমস্মিং বুদ্ধুপ্পাদে মগধরট্ঠে ব্রাহ্মণকুলে নিব্বত্তিত্ৰা ধম্মসৰোতি লদ্ধনামো ৰিঞ্ঞুতং পত্তো হেতুসম্পত্তিযা চোদিযমানো ঘরাৰাসে আদীনৰং পব্বজ্জায আনিসংসঞ্চ দিস্ৰা দক্খিণাগিরিস্মিং ৰিহরন্তং ভগৰন্তং উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ অরহত্তং পাপুণি। তেন ৰুত্তং অপদানে (অপ॰ থের ১.১৬.৩৯-৪৫) –
Pabbajiṃtulayitvānāti āyasmato dhammasavattherassa gāthā. Kā uppatti? Ayaṃ kira padumuttarassa bhagavato kāle suvaccho nāma brāhmaṇo hutvā tiṇṇaṃ vedānaṃ pāragū gharāvāse dosaṃ disvā tāpasapabbajjaṃ pabbajitvā araññāyatane pabbatantare assamaṃ kāretvā bahūhi tāpasehi saddhiṃ vasi. Athassa kusalabījaṃ ropetukāmo padumuttaro bhagavā assamasamīpe ākāse ṭhatvā iddhipāṭihāriyaṃ dassesi. So taṃ disvā pasannamānaso pūjetukāmo nāgapupphāni ocināpesi. Satthā, ‘‘alaṃ imassa tāpasassa ettakaṃ kusalabīja’’nti pakkāmi. So pupphāni gahetvā satthu gamanamaggaṃ okiritvā cittaṃ pasādento añjaliṃ paggayha aṭṭhāsi. So tena puññakammena devaloke nibbattitvā aparāparaṃ sugatīsuyeva saṃsaranto imasmiṃ buddhuppāde magadharaṭṭhe brāhmaṇakule nibbattitvā dhammasavoti laddhanāmo viññutaṃ patto hetusampattiyā codiyamāno gharāvāse ādīnavaṃ pabbajjāya ānisaṃsañca disvā dakkhiṇāgirismiṃ viharantaṃ bhagavantaṃ upasaṅkamitvā dhammaṃ sutvā paṭiladdhasaddho pabbajitvā vipassanāya kammaṃ karonto nacirasseva arahattaṃ pāpuṇi. Tena vuttaṃ apadāne (apa. thera 1.16.39-45) –
‘‘সুৰচ্ছো নাম নামেন, ব্রাহ্মণো মন্তপারগূ।
‘‘Suvaccho nāma nāmena, brāhmaṇo mantapāragū;
পুরক্খতো সসিস্সেহি, ৰসতে পব্বতন্তরে॥
Purakkhato sasissehi, vasate pabbatantare.
‘‘পদুমুত্তরো নাম জিনো, আহুতীনং পটিগ্গহো।
‘‘Padumuttaro nāma jino, āhutīnaṃ paṭiggaho;
মমুদ্ধরিতুকামো সো, আগচ্ছি মম সন্তিকং॥
Mamuddharitukāmo so, āgacchi mama santikaṃ.
‘‘ৰেহাসম্হি চঙ্কমতি, ধূপাযতি জলতে তথা।
‘‘Vehāsamhi caṅkamati, dhūpāyati jalate tathā;
হাসং মমং ৰিদিত্ৰান, পক্কামি পাচিনামুখো॥
Hāsaṃ mamaṃ viditvāna, pakkāmi pācināmukho.
‘‘তঞ্চ অচ্ছরিযং দিস্ৰা, অব্ভুতং লোমহংসনং।
‘‘Tañca acchariyaṃ disvā, abbhutaṃ lomahaṃsanaṃ;
নাগপুপ্ফং গহেত্ৰান, গতমগ্গম্হি ওকিরিং॥
Nāgapupphaṃ gahetvāna, gatamaggamhi okiriṃ.
‘‘সতসহস্সিতো কপ্পে, যং পুপ্ফং ওকিরিং অহং।
‘‘Satasahassito kappe, yaṃ pupphaṃ okiriṃ ahaṃ;
তেন চিত্তপ্পসাদেন, দুগ্গতিং নুপপজ্জহং॥
Tena cittappasādena, duggatiṃ nupapajjahaṃ.
‘‘একতিংসে কপ্পসতে, রাজা আসি মহারহো।
‘‘Ekatiṃse kappasate, rājā āsi mahāraho;
সত্তরতনসম্পন্নো, চক্কৰত্তী মহব্বলো॥
Sattaratanasampanno, cakkavattī mahabbalo.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা অত্তনো পটিপত্তিং পচ্চৰেক্খিত্ৰা সোমনস্সপ্পত্তো উদানৰসেন –
Arahattaṃ pana patvā attano paṭipattiṃ paccavekkhitvā somanassappatto udānavasena –
১০৭.
107.
‘‘পব্বজিং তুলযিত্ৰান, অগারস্মানগারিযং।
‘‘Pabbajiṃ tulayitvāna, agārasmānagāriyaṃ;
তিস্সো ৰিজ্জা অনুপ্পত্তা, কতং বুদ্ধস্স সাসন’’ন্তি॥ – গাথং অভাসি।
Tisso vijjā anuppattā, kataṃ buddhassa sāsana’’nti. – gāthaṃ abhāsi;
তত্থ পব্বজিং তুলযিত্ৰানাতি ‘‘সম্বাধো ঘরাৰাসো রজাপথো’’তিআদিনা (দী॰ নি॰ ১.১৯১; ম॰ নি॰ ২.১০; সং॰ নি॰ ২.১৫৪) ঘরাৰাসে, ‘‘অপ্পস্সাদা কামা বহুদুক্খা বহুপাযাসা’’তিআদিনা (পাচি॰ ৪১৭; ম॰ নি॰ ১.১৭৭) কামেসু আদীনৰং তপ্পটিপক্খতো নেক্খম্মে চ আনিসংসং তুলভূতায পঞ্ঞায ৰিচারেত্ৰা ৰীমংসিত্ৰাতি অত্থো। সেসং হেট্ঠা ৰুত্তনযমেৰ। ইদমেৰ চ থেরস্স অঞ্ঞাব্যাকরণং অহোসীতি।
Tattha pabbajiṃ tulayitvānāti ‘‘sambādho gharāvāso rajāpatho’’tiādinā (dī. ni. 1.191; ma. ni. 2.10; saṃ. ni. 2.154) gharāvāse, ‘‘appassādā kāmā bahudukkhā bahupāyāsā’’tiādinā (pāci. 417; ma. ni. 1.177) kāmesu ādīnavaṃ tappaṭipakkhato nekkhamme ca ānisaṃsaṃ tulabhūtāya paññāya vicāretvā vīmaṃsitvāti attho. Sesaṃ heṭṭhā vuttanayameva. Idameva ca therassa aññābyākaraṇaṃ ahosīti.
ধম্মসৰত্থেরগাথাৰণ্ণনা নিট্ঠিতা।
Dhammasavattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৭. ধম্মসৰত্থেরগাথা • 7. Dhammasavattheragāthā
