| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၄. ဓမ္မဋ္ဌိတိဉာဏနိဒ္ဒေသော
4. Dhammaṭṭhitiñāṇaniddeso
၄၅. ကထံ ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ? အဝိဇ္ဇာ သင္ခာရာနံ ဥပ္ပာဒဋ္ဌိတိ စ ပဝတ္တဋ္ဌိတိ စ နိမိတ္တဋ္ဌိတိ စ အာယူဟနဋ္ဌိတိ စ သညောဂဋ္ဌိတိ စ ပလိဗောဓဋ္ဌိတိ စ သမုဒယဋ္ဌိတိ စ ဟေတုဋ္ဌိတိ စ ပစ္စယဋ္ဌိတိ စ။ ဣမေဟိ နဝဟာကာရေဟိ အဝိဇ္ဇာ ပစ္စယော, သင္ခာရာ ပစ္စယသမုပ္ပန္နာ။ ဥဘောပေတေ ဓမ္မာ ပစ္စယသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။ အတီတမ္ပိ အဒ္ဓာနံ။ အနာဂတမ္ပိ အဒ္ဓာနံ အဝိဇ္ဇာ သင္ခာရာနံ ဥပ္ပာဒဋ္ဌိတိ စ ပဝတ္တဋ္ဌိတိ စ နိမိတ္တဋ္ဌိတိ စ အာယူဟနဋ္ဌိတိ စ သညောဂဋ္ဌိတိ စ ပလိဗောဓဋ္ဌိတိ စ သမုဒယဋ္ဌိတိ စ ဟေတုဋ္ဌိတိ စ ပစ္စယဋ္ဌိတိ စ။ ဣမေဟိ နဝဟာကာရေဟိ အဝိဇ္ဇာ ပစ္စယော, သင္ခာရာ ပစ္စယသမုပ္ပန္နာ။ ဥဘောပေတေ ဓမ္မာ ပစ္စယသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။
45. Kathaṃ paccayapariggahe paññā dhammaṭṭhitiñāṇaṃ? Avijjā saṅkhārānaṃ uppādaṭṭhiti ca pavattaṭṭhiti ca nimittaṭṭhiti ca āyūhanaṭṭhiti ca saññogaṭṭhiti ca palibodhaṭṭhiti ca samudayaṭṭhiti ca hetuṭṭhiti ca paccayaṭṭhiti ca. Imehi navahākārehi avijjā paccayo, saṅkhārā paccayasamuppannā. Ubhopete dhammā paccayasamuppannāti – paccayapariggahe paññā dhammaṭṭhitiñāṇaṃ. Atītampi addhānaṃ… anāgatampi addhānaṃ avijjā saṅkhārānaṃ uppādaṭṭhiti ca pavattaṭṭhiti ca nimittaṭṭhiti ca āyūhanaṭṭhiti ca saññogaṭṭhiti ca palibodhaṭṭhiti ca samudayaṭṭhiti ca hetuṭṭhiti ca paccayaṭṭhiti ca. Imehi navahākārehi avijjā paccayo, saṅkhārā paccayasamuppannā. Ubhopete dhammā paccayasamuppannāti – paccayapariggahe paññā dhammaṭṭhitiñāṇaṃ.
သင္ခာရာ ဝိညာဏသ္သ။ပေ.။ ဝိညာဏံ နာမရူပသ္သ။ နာမရူပံ သဠာယတနသ္သ။ သဠာယတနံ ဖသ္သသ္သ။ ဖသ္သော ဝေဒနာယ။ ဝေဒနာ တဏ္ဟာယ။ တဏ္ဟာ ဥပာဒာနသ္သ။ ဥပာဒာနံ ဘဝသ္သ။ ဘဝော ဇာတိယာ။ ဇာတိ ဇရာမရဏသ္သ ဥပ္ပာဒဋ္ဌိတိ စ ပဝတ္တဋ္ဌိတိ စ နိမိတ္တဋ္ဌိတိ စ အာယူဟနဋ္ဌိတိ စ သညောဂဋ္ဌိတိ စ ပလိဗောဓဋ္ဌိတိ စ သမုဒယဋ္ဌိတိ စ ဟေတုဋ္ဌိတိ စ ပစ္စယဋ္ဌိတိ စ။ ဣမေဟိ နဝဟာကာရေဟိ ဇာတိ ပစ္စယော, ဇရာမရဏံ ပစ္စယသမုပ္ပန္နံ။ ဥဘောပေတေ ဓမ္မာ ပစ္စယသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။ အတီတမ္ပိ အဒ္ဓာနံ။ အနာဂတမ္ပိ အဒ္ဓာနံ ဇာတိ ဇရာမရဏသ္သ ဥပ္ပာဒဋ္ဌိတိ စ ပဝတ္တဋ္ဌိတိ စ နိမိတ္တဋ္ဌိတိ စ အာယူဟနဋ္ဌိတိ စ သညောဂဋ္ဌိတိ စ ပလိဗောဓဋ္ဌိတိ စ သမုဒယဋ္ဌိတိ စ ဟေတုဋ္ဌိတိ စ ပစ္စယဋ္ဌိတိ စ။ ဣမေဟိ နဝဟာကာရေဟိ ဇာတိ ပစ္စယော, ဇရာမရဏံ ပစ္စယသမုပ္ပန္နံ။ ဥဘောပေတေ ဓမ္မာ ပစ္စယသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။
Saṅkhārā viññāṇassa…pe… viññāṇaṃ nāmarūpassa… nāmarūpaṃ saḷāyatanassa… saḷāyatanaṃ phassassa… phasso vedanāya… vedanā taṇhāya… taṇhā upādānassa… upādānaṃ bhavassa… bhavo jātiyā… jāti jarāmaraṇassa uppādaṭṭhiti ca pavattaṭṭhiti ca nimittaṭṭhiti ca āyūhanaṭṭhiti ca saññogaṭṭhiti ca palibodhaṭṭhiti ca samudayaṭṭhiti ca hetuṭṭhiti ca paccayaṭṭhiti ca. Imehi navahākārehi jāti paccayo, jarāmaraṇaṃ paccayasamuppannaṃ. Ubhopete dhammā paccayasamuppannāti – paccayapariggahe paññā dhammaṭṭhitiñāṇaṃ. Atītampi addhānaṃ… anāgatampi addhānaṃ jāti jarāmaraṇassa uppādaṭṭhiti ca pavattaṭṭhiti ca nimittaṭṭhiti ca āyūhanaṭṭhiti ca saññogaṭṭhiti ca palibodhaṭṭhiti ca samudayaṭṭhiti ca hetuṭṭhiti ca paccayaṭṭhiti ca. Imehi navahākārehi jāti paccayo, jarāmaraṇaṃ paccayasamuppannaṃ. Ubhopete dhammā paccayasamuppannāti – paccayapariggahe paññā dhammaṭṭhitiñāṇaṃ.
၄၆. အဝိဇ္ဇာ ဟေတု, သင္ခာရာ ဟေတုသမုပ္ပန္နာ။ ဥဘောပေတေ ဓမ္မာ ဟေတုသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။ အတီတမ္ပိ အဒ္ဓာနံ။ အနာဂတမ္ပိ အဒ္ဓာနံ အဝိဇ္ဇာ ဟေတု, သင္ခာရာ ဟေတုသမုပ္ပန္နာ။ ဥဘောပေတေ ဓမ္မာ ဟေတုသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။
46. Avijjā hetu, saṅkhārā hetusamuppannā. Ubhopete dhammā hetusamuppannāti – paccayapariggahe paññā dhammaṭṭhitiñāṇaṃ. Atītampi addhānaṃ… anāgatampi addhānaṃ avijjā hetu, saṅkhārā hetusamuppannā. Ubhopete dhammā hetusamuppannāti – paccayapariggahe paññā dhammaṭṭhitiñāṇaṃ.
သင္ခာရာ ဟေတု, ဝိညာဏံ ဟေတုသမုပ္ပန္နံ။ပေ.။ ဝိညာဏံ ဟေတု, နာမရူပံ ဟေတုသမုပ္ပန္နံ။ နာမရူပံ ဟေတု, သဠာယတနံ ဟေတုသမုပ္ပန္နံ။ သဠာယတနံ ဟေတု, ဖသ္သော ဟေတုသမုပ္ပန္နော။ ဖသ္သော ဟေတု, ဝေဒနာ ဟေတုသမုပ္ပန္နာ။ ဝေဒနာ ဟေတု, တဏ္ဟာ ဟေတုသမုပ္ပန္နာ။ တဏ္ဟာ ဟေတု, ဥပာဒာနံ ဟေတုသမုပ္ပန္နံ။ ဥပာဒာနံ ဟေတု, ဘဝော ဟေတုသမုပ္ပန္နော။ ဘဝော ဟေတု, ဇာတိ ဟေတုသမုပ္ပန္နာ။ ဇာတိ ဟေတု, ဇရာမရဏံ ဟေတုသမုပ္ပန္နံ။ ဥဘောပေတေ ဓမ္မာ ဟေတုသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။ အတီတမ္ပိ အဒ္ဓာနံ။ အနာဂတမ္ပိ အဒ္ဓာနံ ဇာတိ ဟေတု, ဇရာမရဏံ ဟေတုသမုပ္ပန္နံ။ ဥဘောပေတေ ဓမ္မာ ဟေတုသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။
Saṅkhārā hetu, viññāṇaṃ hetusamuppannaṃ…pe… viññāṇaṃ hetu, nāmarūpaṃ hetusamuppannaṃ… nāmarūpaṃ hetu, saḷāyatanaṃ hetusamuppannaṃ… saḷāyatanaṃ hetu, phasso hetusamuppanno… phasso hetu, vedanā hetusamuppannā… vedanā hetu, taṇhā hetusamuppannā… taṇhā hetu, upādānaṃ hetusamuppannaṃ… upādānaṃ hetu, bhavo hetusamuppanno… bhavo hetu, jāti hetusamuppannā… jāti hetu, jarāmaraṇaṃ hetusamuppannaṃ. Ubhopete dhammā hetusamuppannāti – paccayapariggahe paññā dhammaṭṭhitiñāṇaṃ. Atītampi addhānaṃ… anāgatampi addhānaṃ jāti hetu, jarāmaraṇaṃ hetusamuppannaṃ. Ubhopete dhammā hetusamuppannāti – paccayapariggahe paññā dhammaṭṭhitiñāṇaṃ.
အဝိဇ္ဇာ ပဋိစ္စာ, သင္ခာရာ ပဋိစ္စသမုပ္ပန္နာ။ ဥဘောပေတေ ဓမ္မာ ပဋိစ္စသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။ အတီတမ္ပိ အဒ္ဓာနံ။ အနာဂတမ္ပိ အဒ္ဓာနံ အဝိဇ္ဇာ ပဋိစ္စာ, သင္ခာရာ ပဋိစ္စသမုပ္ပန္နာ။ ဥဘောပေတေ ဓမ္မာ ပဋိစ္စသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။
Avijjā paṭiccā, saṅkhārā paṭiccasamuppannā. Ubhopete dhammā paṭiccasamuppannāti – paccayapariggahe paññā dhammaṭṭhitiñāṇaṃ. Atītampi addhānaṃ… anāgatampi addhānaṃ avijjā paṭiccā, saṅkhārā paṭiccasamuppannā. Ubhopete dhammā paṭiccasamuppannāti – paccayapariggahe paññā dhammaṭṭhitiñāṇaṃ.
သင္ခာရာ ပဋိစ္စာ, ဝိညာဏံ ပဋိစ္စသမုပ္ပန္နံ။ပေ.။ ဝိညာဏံ ပဋိစ္စာ, နာမရူပံ ပဋိစ္စသမုပ္ပန္နံ။ နာမရူပံ ပဋိစ္စာ, သဠာယတနံ ပဋိစ္စသမုပ္ပန္နံ။ သဠာယတနံ ပဋိစ္စာ, ဖသ္သော ပဋိစ္စသမုပ္ပန္နော။ ဖသ္သော ပဋိစ္စာ, ဝေဒနာ ပဋိစ္စသမုပ္ပန္နာ။ ဝေဒနာ ပဋိစ္စာ, တဏ္ဟာ ပဋိစ္စသမုပ္ပန္နာ။ တဏ္ဟာ ပဋိစ္စာ, ဥပာဒာနံ ပဋိစ္စသမုပ္ပန္နံ။ ဥပာဒာနံ ပဋိစ္စာ, ဘဝော ပဋိစ္စသမုပ္ပန္နော။ ဘဝော ပဋိစ္စာ, ဇာတိ ပဋိစ္စသမုပ္ပန္နာ။ ဇာတိ ပဋိစ္စာ, ဇရာမရဏံ ပဋိစ္စသမုပ္ပန္နံ။ ဥဘောပေတေ ဓမ္မာ ပဋိစ္စသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။ အတီတမ္ပိ အဒ္ဓာနံ။ အနာဂတမ္ပိ အဒ္ဓာနံ ဇာတိ ပဋိစ္စာ, ဇရာမရဏံ ပဋိစ္စသမုပ္ပန္နံ။ ဥဘောပေတေ ဓမ္မာ ပဋိစ္စသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။
Saṅkhārā paṭiccā, viññāṇaṃ paṭiccasamuppannaṃ…pe… viññāṇaṃ paṭiccā, nāmarūpaṃ paṭiccasamuppannaṃ… nāmarūpaṃ paṭiccā, saḷāyatanaṃ paṭiccasamuppannaṃ… saḷāyatanaṃ paṭiccā, phasso paṭiccasamuppanno… phasso paṭiccā, vedanā paṭiccasamuppannā… vedanā paṭiccā, taṇhā paṭiccasamuppannā… taṇhā paṭiccā, upādānaṃ paṭiccasamuppannaṃ… upādānaṃ paṭiccā, bhavo paṭiccasamuppanno… bhavo paṭiccā, jāti paṭiccasamuppannā… jāti paṭiccā, jarāmaraṇaṃ paṭiccasamuppannaṃ. Ubhopete dhammā paṭiccasamuppannāti – paccayapariggahe paññā dhammaṭṭhitiñāṇaṃ. Atītampi addhānaṃ… anāgatampi addhānaṃ jāti paṭiccā, jarāmaraṇaṃ paṭiccasamuppannaṃ. Ubhopete dhammā paṭiccasamuppannāti – paccayapariggahe paññā dhammaṭṭhitiñāṇaṃ.
အဝိဇ္ဇာ ပစ္စယော, သင္ခာရာ ပစ္စယသမုပ္ပန္နာ။ ဥဘောပေတေ ဓမ္မာ ပစ္စယသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ ။ အတီတမ္ပိ အဒ္ဓာနံ။ အနာဂတမ္ပိ အဒ္ဓာနံ အဝိဇ္ဇာ ပစ္စယော, သင္ခာရာ ပစ္စယသမုပ္ပန္နာ။ ဥဘောပေတေ ဓမ္မာ ပစ္စယသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။
Avijjā paccayo, saṅkhārā paccayasamuppannā. Ubhopete dhammā paccayasamuppannāti – paccayapariggahe paññā dhammaṭṭhitiñāṇaṃ . Atītampi addhānaṃ… anāgatampi addhānaṃ avijjā paccayo, saṅkhārā paccayasamuppannā. Ubhopete dhammā paccayasamuppannāti – paccayapariggahe paññā dhammaṭṭhitiñāṇaṃ.
သင္ခာရာ ပစ္စယာ, ဝိညာဏံ ပစ္စယသမုပ္ပန္နံ။ပေ.။ ဝိညာဏံ ပစ္စယော, နာမရူပံ ပစ္စယသမုပ္ပန္နံ။ နာမရူပံ ပစ္စယော, သဠာယတနံ ပစ္စယသမုပ္ပန္နံ။ သဠာယတနံ ပစ္စယော, ဖသ္သော ပစ္စယသမုပ္ပန္နော။ ဖသ္သော ပစ္စယော, ဝေဒနာ ပစ္စယသမုပ္ပန္နာ။ ဝေဒနာ ပစ္စယော, တဏ္ဟာ ပစ္စယသမုပ္ပန္နာ။ တဏ္ဟာ ပစ္စယော, ဥပာဒာနံ ပစ္စယသမုပ္ပန္နံ။ ဥပာဒာနံ ပစ္စယော, ဘဝော ပစ္စယသမုပ္ပန္နော။ ဘဝော ပစ္စယော, ဇာတိ ပစ္စယသမုပ္ပန္နာ။ ဇာတိ ပစ္စယော, ဇရာမရဏံ ပစ္စယသမုပ္ပန္နံ။ ဥဘောပေတေ ဓမ္မာ ပစ္စယသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။ အတီတမ္ပိ အဒ္ဓာနံ။ အနာဂတမ္ပိ အဒ္ဓာနံ ဇာတိ ပစ္စယော, ဇရာမရဏံ ပစ္စယသမုပ္ပန္နံ။ ဥဘောပေတေ ဓမ္မာ ပစ္စယသမုပ္ပန္နာတိ – ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ။
Saṅkhārā paccayā, viññāṇaṃ paccayasamuppannaṃ…pe… viññāṇaṃ paccayo, nāmarūpaṃ paccayasamuppannaṃ… nāmarūpaṃ paccayo, saḷāyatanaṃ paccayasamuppannaṃ… saḷāyatanaṃ paccayo, phasso paccayasamuppanno… phasso paccayo, vedanā paccayasamuppannā… vedanā paccayo, taṇhā paccayasamuppannā… taṇhā paccayo, upādānaṃ paccayasamuppannaṃ… upādānaṃ paccayo, bhavo paccayasamuppanno… bhavo paccayo, jāti paccayasamuppannā… jāti paccayo, jarāmaraṇaṃ paccayasamuppannaṃ. Ubhopete dhammā paccayasamuppannāti – paccayapariggahe paññā dhammaṭṭhitiñāṇaṃ. Atītampi addhānaṃ… anāgatampi addhānaṃ jāti paccayo, jarāmaraṇaṃ paccayasamuppannaṃ. Ubhopete dhammā paccayasamuppannāti – paccayapariggahe paññā dhammaṭṭhitiñāṇaṃ.
၄၇. ပုရိမကမ္မဘဝသ္မိံ မောဟော အဝိဇ္ဇာ, အာယူဟနာ သင္ခာရာ, နိကန္တိ တဏ္ဟာ, ဥပဂမနံ ဥပာဒာနံ, စေတနာ ဘဝော။ ဣမေ ပဉ္စ ဓမ္မာ ပုရိမကမ္မဘဝသ္မိံ ဣဓ ပဋိသန္ဓိယာ ပစ္စယာ။ ဣဓ ပဋိသန္ဓိ ဝိညာဏံ, ဩက္ကန္တိ နာမရူပံ, ပသာဒော အာယတနံ, ဖုဋ္ဌော ဖသ္သော, ဝေဒယိတံ ဝေဒနာ။ ဣမေ ပဉ္စ ဓမ္မာ ဣဓုပပတ္တိဘဝသ္မိံ ပုရေကတသ္သ ကမ္မသ္သ ပစ္စယာ။ ဣဓ ပရိပက္ကတ္တာ အာယတနာနံ မောဟော အဝိဇ္ဇာ, အာယူဟနာ သင္ခာရာ, နိကန္တိ တဏ္ဟာ ဥပဂမနံ ဥပာဒာနံ, စေတနာ ဘဝော။ ဣမေ ပဉ္စ ဓမ္မာ ဣဓ ကမ္မဘဝသ္မိံ အာယတိံ ပဋိသန္ဓိယာ ပစ္စယာ။ အာယတိံ ပဋိသန္ဓိ ဝိညာဏံ, ဩက္ကန္တိ နာမရူပံ, ပသာဒော အာယတနံ, ဖုဋ္ဌော ဖသ္သော, ဝေဒယိတံ ဝေဒနာ။ ဣမေ ပဉ္စ ဓမ္မာ အာယတိံ ဥပပတ္တိဘဝသ္မိံ ဣဓ ကတသ္သ ကမ္မသ္သ ပစ္စယာ။ ဣတိမေ စတုသင္ခေပေ တယော အဒ္ဓေ တိသန္ဓိံ ဝီသတိယာ အာကာရေဟိ ပဋိစ္စသမုပ္ပာဒံ ဇာနာတိ ပသ္သတိ အညာတိ ပဋိဝိဇ္ဈတိ။ တံ ဉာတဋ္ဌေန ဉာဏံ, ပဇာနနဋ္ဌေန ပညာ။ တေန ဝုစ္စတိ – ‘‘ပစ္စယပရိဂ္ဂဟေ ပညာ ဓမ္မဋ္ဌိတိဉာဏံ’’။
47. Purimakammabhavasmiṃ moho avijjā, āyūhanā saṅkhārā, nikanti taṇhā, upagamanaṃ upādānaṃ, cetanā bhavo. Ime pañca dhammā purimakammabhavasmiṃ idha paṭisandhiyā paccayā. Idha paṭisandhi viññāṇaṃ, okkanti nāmarūpaṃ, pasādo āyatanaṃ, phuṭṭho phasso, vedayitaṃ vedanā. Ime pañca dhammā idhupapattibhavasmiṃ purekatassa kammassa paccayā. Idha paripakkattā āyatanānaṃ moho avijjā, āyūhanā saṅkhārā, nikanti taṇhā upagamanaṃ upādānaṃ, cetanā bhavo. Ime pañca dhammā idha kammabhavasmiṃ āyatiṃ paṭisandhiyā paccayā. Āyatiṃ paṭisandhi viññāṇaṃ, okkanti nāmarūpaṃ, pasādo āyatanaṃ, phuṭṭho phasso, vedayitaṃ vedanā. Ime pañca dhammā āyatiṃ upapattibhavasmiṃ idha katassa kammassa paccayā. Itime catusaṅkhepe tayo addhe tisandhiṃ vīsatiyā ākārehi paṭiccasamuppādaṃ jānāti passati aññāti paṭivijjhati. Taṃ ñātaṭṭhena ñāṇaṃ, pajānanaṭṭhena paññā. Tena vuccati – ‘‘paccayapariggahe paññā dhammaṭṭhitiñāṇaṃ’’.
ဓမ္မဋ္ဌိတိဉာဏနိဒ္ဒေသော စတုတ္ထော။
Dhammaṭṭhitiñāṇaniddeso catuttho.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၄. ဓမ္မဋ္ဌိတိဉာဏနိဒ္ဒေသဝဏ္ဏနာ • 4. Dhammaṭṭhitiñāṇaniddesavaṇṇanā
