| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৯. ধম্মযমকং
9. Dhammayamakaṃ
১. পণ্ণত্তিউদ্দেসৰারৰণ্ণনা
1. Paṇṇattiuddesavāravaṇṇanā
১-১৬. ইদানি তেসঞ্ঞেৰ মূলযমকে দেসিতানং কুসলাদিধম্মানং মাতিকং ঠপেত্ৰা চিত্তযমকানন্তরং দেসিতস্স ধম্মযমকস্স ৰণ্ণনা হোতি। তত্থ খন্ধযমকে ৰুত্তনযেনেৰ পাল়িৰৰত্থানং ৰেদিতব্বং। যথা হি তত্থ পণ্ণত্তিৰারাদযো তযো মহাৰারা, অৰসেসা অন্তরৰারা চ হোন্তি, তথা ইধাপি। ‘‘যো কুসলং ধম্মং ভাৰেতি, সো অকুসলং ধম্মং পজহতী’’তি আগতত্তা পনেত্থ পরিঞ্ঞাৰারো, ভাৰনাৰারো নামাতি ৰেদিতব্বো। তত্থ যস্মা অব্যাকতো ধম্মো নেৰ ভাৰেতব্বো, ন পহাতব্বো, তস্মা তং পদমেৰ ন উদ্ধটং। পণ্ণত্তিৰারে পনেত্থ তিণ্ণং কুসলাদিধম্মানং ৰসেন পদসোধনৰারো, পদসোধনমূলচক্কৰারো, সুদ্ধধম্মৰারো, সুদ্ধধম্মমূলচক্কৰারোতি ইমেসু চতূসু ৰারেসু যমকগণনা ৰেদিতব্বা।
1-16. Idāni tesaññeva mūlayamake desitānaṃ kusalādidhammānaṃ mātikaṃ ṭhapetvā cittayamakānantaraṃ desitassa dhammayamakassa vaṇṇanā hoti. Tattha khandhayamake vuttanayeneva pāḷivavatthānaṃ veditabbaṃ. Yathā hi tattha paṇṇattivārādayo tayo mahāvārā, avasesā antaravārā ca honti, tathā idhāpi. ‘‘Yo kusalaṃ dhammaṃ bhāveti, so akusalaṃ dhammaṃ pajahatī’’ti āgatattā panettha pariññāvāro, bhāvanāvāro nāmāti veditabbo. Tattha yasmā abyākato dhammo neva bhāvetabbo, na pahātabbo, tasmā taṃ padameva na uddhaṭaṃ. Paṇṇattivāre panettha tiṇṇaṃ kusalādidhammānaṃ vasena padasodhanavāro, padasodhanamūlacakkavāro, suddhadhammavāro, suddhadhammamūlacakkavāroti imesu catūsu vāresu yamakagaṇanā veditabbā.
১. পণ্ণত্তিনিদ্দেসৰারৰণ্ণনা
1. Paṇṇattiniddesavāravaṇṇanā
১৭-৩২. পণ্ণত্তিৰারনিদ্দেসে পন কুসলা কুসলধম্মাতি কুসলানং একন্তেন কুসলধম্মত্তা ‘‘আমন্তা’’তি ৰুত্তং। সেসৰিস্সজ্জনেসুপি এসেৰ নযো। অৰসেসা ধম্মা ন অকুসলা ধম্মাতি অৰসেসা ধম্মা অকুসলা ন হোন্তি, ধম্মা পন হোন্তীতি অত্থো। ইমিনা নযেন সব্বৰিস্সজ্জনানি ৰেদিতব্বানি।
17-32. Paṇṇattivāraniddese pana kusalā kusaladhammāti kusalānaṃ ekantena kusaladhammattā ‘‘āmantā’’ti vuttaṃ. Sesavissajjanesupi eseva nayo. Avasesā dhammā na akusalā dhammāti avasesā dhammā akusalā na honti, dhammā pana hontīti attho. Iminā nayena sabbavissajjanāni veditabbāni.
পণ্ণত্তিৰারৰণ্ণনা।
Paṇṇattivāravaṇṇanā.
২. পৰত্তিৰারৰণ্ণনা
2. Pavattivāravaṇṇanā
৩৩-৩৪. পৰত্তিৰারে পনেত্থ পচ্চুপ্পন্নকালে পুগ্গলৰারস্স অনুলোমনযে ‘‘যস্স কুসলা ধম্মা উপ্পজ্জন্তি, তস্স অকুসলা ধম্মা উপ্পজ্জন্তি; যস্স ৰা পন অকুসলা ধম্মা উপ্পজ্জন্তি, তস্স কুসলা ধম্মা উপ্পজ্জন্তী’’তি কুসলধম্মমূলকানি দ্ৰে যমকানি, অকুসলধম্মমূলকং একন্তি তীণি যমকানি হোন্তি। তস্স পটিলোমনযেপি ওকাসৰারাদীসুপি এসেৰ নযো। এৰমেত্থ সব্বৰারেসু তিণ্ণং তিণ্ণং যমকানং ৰসেন যমকগণনা ৰেদিতব্বা। অত্থৰিনিচ্ছযে পনেত্থ ইদং লক্খণং – ইমস্স হি ধম্মযমকস্স পৰত্তিমহাৰারে ‘‘উপ্পজ্জন্তি নিরুজ্ঝন্তী’’তি ইমেসু উপ্পাদনিরোধেসু কুসলাকুসলধম্মা তাৰ একন্তেন পৰত্তিযংযেৰ লব্ভন্তি, ন চুতিপটিসন্ধীসু। অব্যাকতধম্মা পন পৰত্তে চ চুতিপটিসন্ধীসু চাতি তীসুপি কালেসু লব্ভন্তি। এৰমেত্থ যং যত্থ যত্থ লব্ভতি, তস্স ৰসেন তত্থ তত্থ ৰিনিচ্ছযো ৰেদিতব্বো।
33-34. Pavattivāre panettha paccuppannakāle puggalavārassa anulomanaye ‘‘yassa kusalā dhammā uppajjanti, tassa akusalā dhammā uppajjanti; yassa vā pana akusalā dhammā uppajjanti, tassa kusalā dhammā uppajjantī’’ti kusaladhammamūlakāni dve yamakāni, akusaladhammamūlakaṃ ekanti tīṇi yamakāni honti. Tassa paṭilomanayepi okāsavārādīsupi eseva nayo. Evamettha sabbavāresu tiṇṇaṃ tiṇṇaṃ yamakānaṃ vasena yamakagaṇanā veditabbā. Atthavinicchaye panettha idaṃ lakkhaṇaṃ – imassa hi dhammayamakassa pavattimahāvāre ‘‘uppajjanti nirujjhantī’’ti imesu uppādanirodhesu kusalākusaladhammā tāva ekantena pavattiyaṃyeva labbhanti, na cutipaṭisandhīsu. Abyākatadhammā pana pavatte ca cutipaṭisandhīsu cāti tīsupi kālesu labbhanti. Evamettha yaṃ yattha yattha labbhati, tassa vasena tattha tattha vinicchayo veditabbo.
তত্রিদং নযমুখং – কুসলাকুসলানং তাৰ একক্খণে অনুপ্পজ্জনতো ‘‘নো’’তি পটিসেধো কতো। অব্যাকতা চাতি চিত্তসমুট্ঠানরূপৰসেন ৰুত্তং।
Tatridaṃ nayamukhaṃ – kusalākusalānaṃ tāva ekakkhaṇe anuppajjanato ‘‘no’’ti paṭisedho kato. Abyākatā cāti cittasamuṭṭhānarūpavasena vuttaṃ.
৩৫-৩৬. যত্থ কুসলা ধম্মা নুপ্পজ্জন্তীতি অসঞ্ঞভৰং সন্ধায ৰুত্তং। তেনেৰেত্থ ‘‘আমন্তা’’তি ৰিস্সজ্জনং কতং। উপ্পজ্জন্তীতি ইদম্পি অসঞ্ঞভৰংযেৰ সন্ধায ৰুত্তং। অব্যাকতানং পন অনুপ্পত্তিট্ঠানস্স অভাৰা ‘‘নত্থী’’তি পটিক্খেপো কতো।
35-36. Yattha kusalā dhammā nuppajjantīti asaññabhavaṃ sandhāya vuttaṃ. Tenevettha ‘‘āmantā’’ti vissajjanaṃ kataṃ. Uppajjantīti idampi asaññabhavaṃyeva sandhāya vuttaṃ. Abyākatānaṃ pana anuppattiṭṭhānassa abhāvā ‘‘natthī’’ti paṭikkhepo kato.
৪৯. দুতিযে অকুসলেতি ভৰং অস্সাদেত্ৰা উপ্পন্নেসু নিকন্তিজৰনেসু দুতিযে জৰনচিত্তে। দুতিযে চিত্তে ৰত্তমানেতি পটিসন্ধিতো দুতিযে ভৰঙ্গচিত্তে ৰত্তমানে সহ ৰা পটিসন্ধিযা ভৰঙ্গং ৰিপাকৰসেন একমেৰ কত্ৰা ভৰনিকন্তিযা আৰজ্জনচিত্তে। তঞ্হি কিরিযচিত্তত্তা অব্যাকতজাতিযং ৰিপাকতো দুতিযং নাম হোতি।
49. Dutiye akusaleti bhavaṃ assādetvā uppannesu nikantijavanesu dutiye javanacitte. Dutiye citte vattamāneti paṭisandhito dutiye bhavaṅgacitte vattamāne saha vā paṭisandhiyā bhavaṅgaṃ vipākavasena ekameva katvā bhavanikantiyā āvajjanacitte. Tañhi kiriyacittattā abyākatajātiyaṃ vipākato dutiyaṃ nāma hoti.
৫৭. যস্স চিত্তস্স অনন্তরা অগ্গমগ্গন্তি গোত্রভুচিত্তং সন্ধায ৰুত্তং। কুসলা ধম্মা উপ্পজ্জিস্সন্তীতি তে অগ্গমগ্গধম্মেযেৰ সন্ধায ৰুত্তং।
57. Yassa cittassa anantarāaggamagganti gotrabhucittaṃ sandhāya vuttaṃ. Kusalā dhammā uppajjissantīti te aggamaggadhammeyeva sandhāya vuttaṃ.
৭৯. যস্স চিত্তস্স অনন্তরা অগ্গমগ্গং পটিলভিস্সন্তি, তস্স চিত্তস্স উপ্পাদক্খণেতি ইদং চিত্তজাতিৰসেন ৰুত্তং। তজ্জাতিকস্স হি একাৰজ্জনেন উপ্পন্নস্স ততো ওরিমচিত্তস্স উপ্পাদক্খণেপি এতং লক্খণং লব্ভতেৰ।
79. Yassacittassa anantarā aggamaggaṃ paṭilabhissanti, tassa cittassa uppādakkhaṇeti idaṃ cittajātivasena vuttaṃ. Tajjātikassa hi ekāvajjanena uppannassa tato orimacittassa uppādakkhaṇepi etaṃ lakkhaṇaṃ labbhateva.
৯৯. নিরোধৰারেপি কুসলাকুসলানং একতো অনিরুজ্ঝনতো ‘‘নো’’তি ৰুত্তং। ইমিনা নযমুখেন সব্বত্থ ৰিনিচ্ছযো ৰেদিতব্বোতি।
99. Nirodhavārepi kusalākusalānaṃ ekato anirujjhanato ‘‘no’’ti vuttaṃ. Iminā nayamukhena sabbattha vinicchayo veditabboti.
ধম্মযমকৰণ্ণনা নিট্ঠিতা।
Dhammayamakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / যমকপাল়ি • Yamakapāḷi / ৯. ধম্মযমকং • 9. Dhammayamakaṃ
