| Library / Tipiṭaka / তিপিটক • Tipiṭaka / পঞ্চপকরণ-অনুটীকা • Pañcapakaraṇa-anuṭīkā |
৯. ধম্মযমকং
9. Dhammayamakaṃ
১. পণ্ণত্তিৰারো
1. Paṇṇattivāro
উদ্দেসৰারৰণ্ণনা
Uddesavāravaṇṇanā
১-১৬. যথা মূলযমকে কুসলাদিধম্মা দেসিতাতি কুসলাকুসলাব্যাকতা ধম্মা কুসলকুসলমূলাদিৰিভাগতো মূলযমকে যমকৰসেন যথা দেসিতা। অঞ্ঞথাতি কুসলকুসলমূলাদিৰিভাগতো অঞ্ঞথা, খন্ধাদিৰসেনাতি অত্থো।
1-16. Yathāmūlayamake kusalādidhammā desitāti kusalākusalābyākatā dhammā kusalakusalamūlādivibhāgato mūlayamake yamakavasena yathā desitā. Aññathāti kusalakusalamūlādivibhāgato aññathā, khandhādivasenāti attho.
উদ্দেসৰারৰণ্ণনা নিট্ঠিতা।
Uddesavāravaṇṇanā niṭṭhitā.
২. পৰত্তিৰারৰণ্ণনা
2. Pavattivāravaṇṇanā
৩৩-৩৪. তং পন কম্মসমুট্ঠানাদিরূপং অগ্গহেত্ৰা। কেচীতি ধম্মসিরিত্থেরং সন্ধাযাহ। সো হি ‘‘চিত্তসমুট্ঠানরূপৰসেন ৰুত্ত’’ন্তি অট্ঠকথং আহরিত্ৰা ‘‘ইমস্মিং পঞ্হে কম্মসমুট্ঠানাদিরূপঞ্চ লব্ভতী’’তি অৰোচ। তথা চ ৰত্ৰা পটিলোমপাল়িং দস্সেত্ৰা ‘‘চিত্তসমুট্ঠানরূপমেৰ ইধাধিপ্পেতং। কম্মসমুট্ঠানাদিরূপে ন ৰিধানং, নাপি পটিসেধো’’তি আহ। তথাতি যথা ৰুত্তপ্পকারে পাঠে চিত্তসমুট্ঠানরূপমেৰ অধিপ্পেতং, তথা এত্থাপীতি অত্থো। নোতি ৰুত্তন্তি ৰদন্তীতি সম্বন্ধো। তং পনেতন্তি যথা উদ্ধটস্স পাঠস্স অত্থৰচনং, এৰং ন সক্কা ৰত্তুং। কস্মাতি আহ ‘‘চিত্তস্স ভঙ্গক্খণে…পে॰… পটিসেধসিদ্ধিতো’’তি। স্ৰাযং পটিসেধো হেট্ঠা দস্সিতোযেৰাতি অধিপ্পাযো।
33-34. Taṃ pana kammasamuṭṭhānādirūpaṃ aggahetvā. Kecīti dhammasirittheraṃ sandhāyāha. So hi ‘‘cittasamuṭṭhānarūpavasena vutta’’nti aṭṭhakathaṃ āharitvā ‘‘imasmiṃ pañhe kammasamuṭṭhānādirūpañca labbhatī’’ti avoca. Tathā ca vatvā paṭilomapāḷiṃ dassetvā ‘‘cittasamuṭṭhānarūpameva idhādhippetaṃ. Kammasamuṭṭhānādirūpe na vidhānaṃ, nāpi paṭisedho’’ti āha. Tathāti yathā vuttappakāre pāṭhe cittasamuṭṭhānarūpameva adhippetaṃ, tathā etthāpīti attho. Noti vuttanti vadantīti sambandho. Taṃ panetanti yathā uddhaṭassa pāṭhassa atthavacanaṃ, evaṃ na sakkā vattuṃ. Kasmāti āha ‘‘cittassa bhaṅgakkhaṇe…pe… paṭisedhasiddhito’’ti. Svāyaṃ paṭisedho heṭṭhā dassitoyevāti adhippāyo.
যে চ ৰদন্তীতি এত্থ যে চাতি ৰজিরবুদ্ধিত্থেরং সন্ধাযাহ। সো হি ‘‘সোতাপত্তিমগ্গক্খণে’’তিআদিনা পটিসম্ভিদামগ্গপাল়িং আহরিত্ৰা ‘‘যথা তত্থ সতিপি কম্মজাদিরূপে ঠপেত্ৰা চিত্তসমুট্ঠানরূপন্তি চিত্তপটিবদ্ধত্তা চিত্তজরূপমেৰ ঠপেতব্বভাৰেন উদ্ধটং, এৰমিধাপি চিত্তজরূপমেৰ কথিত’’ন্তি ৰদতি। তঞ্চ নেসং ৰচনং তথা ন হোতি, যথা তেহি উদাহটং, ৰিসমোযং উপঞ্ঞাসোতি অত্থো। যথা চ তং তথা ন হোতি, তং দস্সেতুং ‘‘যেসঞ্হী’’তিআদি ৰুত্তং। তেসন্তি কম্মজাদীনং। তস্সাতি মগ্গস্স। তেতি অব্যাকতা, যে উপ্পাদনিরোধৰন্তো। অৰিজ্জমানেসু চ উপ্পাদনিরোধেসু নিব্বানস্স ৰিয।
Ye ca vadantīti ettha ye cāti vajirabuddhittheraṃ sandhāyāha. So hi ‘‘sotāpattimaggakkhaṇe’’tiādinā paṭisambhidāmaggapāḷiṃ āharitvā ‘‘yathā tattha satipi kammajādirūpe ṭhapetvā cittasamuṭṭhānarūpanti cittapaṭibaddhattā cittajarūpameva ṭhapetabbabhāvena uddhaṭaṃ, evamidhāpi cittajarūpameva kathita’’nti vadati. Tañca nesaṃ vacanaṃ tathā na hoti, yathā tehi udāhaṭaṃ, visamoyaṃ upaññāsoti attho. Yathā ca taṃ tathā na hoti, taṃ dassetuṃ ‘‘yesañhī’’tiādi vuttaṃ. Tesanti kammajādīnaṃ. Tassāti maggassa. Teti abyākatā, ye uppādanirodhavanto. Avijjamānesu ca uppādanirodhesu nibbānassa viya.
সন্নিট্ঠানেন গহিতেসু পুগ্গলেসু। তেসু হি কেচি অকুসলাব্যাকতচিত্তানং উপ্পাদক্খণসমঙ্গিনো, কেচি অব্যাকতচিত্তস্স, কেচি কুসলাব্যাকতচিত্তস্স, তেসু পুরিমা দ্ৰে পঠমকোট্ঠাসেন সঙ্গহিতা তস্স কুসলুপ্পত্তিপটিসেধপরত্তা, তে পন ভৰৰসেন ৰিভজিত্ৰা ৰত্তব্বাতি দস্সেন্তো ‘‘পঞ্চৰোকারে’’তিআদিমাহ। এৰন্তি যথাৰুত্তনযেন। সব্বত্থাতি সব্বপঞ্হেসু।
Sanniṭṭhānenagahitesu puggalesu. Tesu hi keci akusalābyākatacittānaṃ uppādakkhaṇasamaṅgino, keci abyākatacittassa, keci kusalābyākatacittassa, tesu purimā dve paṭhamakoṭṭhāsena saṅgahitā tassa kusaluppattipaṭisedhaparattā, te pana bhavavasena vibhajitvā vattabbāti dassento ‘‘pañcavokāre’’tiādimāha. Evanti yathāvuttanayena. Sabbatthāti sabbapañhesu.
৭৯. ততোতি একাৰজ্জনৰীথিতো। পুরিমতরজৰনৰীথি যায ৰুট্ঠানগামিনী সঙ্গহিতা, তত্থ উপ্পন্নস্সপি চিত্তস্স। কুসলানাগতভাৰপরিযোসানেনাতি কুসলধম্মানং অনাগতভাৰস্স পরিযোসানভূতেন অগ্গমগ্গানন্তরপচ্চযত্তেন দীপিতং হোতি সমানলক্খণং সব্বং। কেন? তায এৰ সমানলক্খণতায। এস নযোতি যথা কুসলানুপ্পাদো কুসলানাগতভাৰস্স পরিযোসানভূততো ৰুত্তপরিচ্ছেদতো ওরম্পি লব্ভতীতি সো যথাৰুত্তপরিচ্ছেদো লক্খণমত্তন্তি স্ৰাযং নযো দস্সিতো। এস নযো অকুসলাতীতভাৰস্স আদিম্হি ‘‘দুতিযে অকুসলে’’তি ৰুত্তট্ঠানে, অব্যাকতাতীতভাৰস্স আদিম্হি ‘‘দুতিযে চিত্তে’’তি ৰুত্তট্ঠানেপীতি যোজনা। ইদানি ‘‘এস নযো’’তি যথাৰুত্তমতিদেসং ‘‘যথা হী’’তিআদিনা পাকটতরং করোতি। ভাৰনাপহানানি দস্সিতানি হোন্তি ‘‘অগ্গমগ্গসমঙ্গী কুসলঞ্চ ধম্মং ভাৰেতি, অকুসলঞ্চ পজহতী’’তি। ইধাতি ইমস্মিং পৰত্তিৰারে। তং তন্তি অকুসলাতীততাদি কুসলানাগততাদি চ। তেন তেনাতি ‘‘দুতিযে অকুসলে অগ্গমগ্গসমঙ্গী’’তি এৰমাদিনা অন্তেন চ।
79. Tatoti ekāvajjanavīthito. Purimatarajavanavīthi yāya vuṭṭhānagāminī saṅgahitā, tattha uppannassapi cittassa. Kusalānāgatabhāvapariyosānenāti kusaladhammānaṃ anāgatabhāvassa pariyosānabhūtena aggamaggānantarapaccayattena dīpitaṃ hoti samānalakkhaṇaṃ sabbaṃ. Kena? Tāya eva samānalakkhaṇatāya. Esa nayoti yathā kusalānuppādo kusalānāgatabhāvassa pariyosānabhūtato vuttaparicchedato orampi labbhatīti so yathāvuttaparicchedo lakkhaṇamattanti svāyaṃ nayo dassito. Esa nayo akusalātītabhāvassa ādimhi ‘‘dutiye akusale’’ti vuttaṭṭhāne, abyākatātītabhāvassa ādimhi ‘‘dutiye citte’’ti vuttaṭṭhānepīti yojanā. Idāni ‘‘esa nayo’’ti yathāvuttamatidesaṃ ‘‘yathā hī’’tiādinā pākaṭataraṃ karoti. Bhāvanāpahānāni dassitāni honti ‘‘aggamaggasamaṅgī kusalañca dhammaṃ bhāveti, akusalañca pajahatī’’ti. Idhāti imasmiṃ pavattivāre. Taṃ tanti akusalātītatādi kusalānāgatatādi ca. Tena tenāti ‘‘dutiye akusale aggamaggasamaṅgī’’ti evamādinā antena ca.
১০০. পটিসন্ধিচিত্ততোতি ইদং মরিযাদগ্গহণং, ন অভিৰিধিগ্গহণং, যতো ‘‘সোল়সম’’ন্তি আহ। অভিৰিধিগ্গহণমেৰ ৰা সোল়সচিত্তক্খণাযুকমেৰ রূপন্তি ইমস্মিং পক্খে অধিপ্পেতে পটিক্খিত্তোৰাযং ৰাদোতি দস্সেন্তো ‘‘ততো পরম্পি ৰা’’তি আহ। অযঞ্চ ৰিচারো হেট্ঠা দস্সিতো এৰ। ন ততো ওরন্তি ৰিঞ্ঞাযতি ততো ওরং অকুসলনিরোধসমকালং অব্যাকতনিরোধস্স অসম্ভৰতো।
100. Paṭisandhicittatoti idaṃ mariyādaggahaṇaṃ, na abhividhiggahaṇaṃ, yato ‘‘soḷasama’’nti āha. Abhividhiggahaṇameva vā soḷasacittakkhaṇāyukameva rūpanti imasmiṃ pakkhe adhippete paṭikkhittovāyaṃ vādoti dassento ‘‘tato parampi vā’’ti āha. Ayañca vicāro heṭṭhā dassito eva. Na tato oranti viññāyati tato oraṃ akusalanirodhasamakālaṃ abyākatanirodhassa asambhavato.
পৰত্তিৰারৰণ্ণনা নিট্ঠিতা।
Pavattivāravaṇṇanā niṭṭhitā.
ধম্মযমকৰণ্ণনা নিট্ঠিতা।
Dhammayamakavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / যমকপাল়ি • Yamakapāḷi / ৭. অনুসযযমকং • 7. Anusayayamakaṃ
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৯. ধম্মযমকং • 9. Dhammayamakaṃ
