| Library / Tipiṭaka / д̇ибидага • Tipiṭaka / бан̃жабагаран̣а-адтагат̇аа • Pañcapakaraṇa-aṭṭhakathā |
9. д̇хаммаяамагам̣
9. Dhammayamakaṃ
1. бан̣н̣ад̇д̇иуд̣̇д̣̇зсаваараван̣н̣анаа
1. Paṇṇattiuddesavāravaṇṇanā
1-16. ид̣̇аани д̇зсан̃н̃зва муулаяамагз д̣̇зсид̇аанам̣ гусалаад̣̇ид̇хаммаанам̣ маад̇игам̣ табзд̇ваа жид̇д̇аяамагаананд̇арам̣ д̣̇зсид̇асса д̇хаммаяамагасса ван̣н̣анаа ход̇и. д̇ад̇т̇а канд̇хаяамагз вуд̇д̇анаязнзва баал̣ивавад̇т̇аанам̣ взд̣̇ид̇аб̣б̣ам̣. яат̇аа хи д̇ад̇т̇а бан̣н̣ад̇д̇иваараад̣̇аяо д̇аяо махааваараа, авасзсаа анд̇араваараа жа хонд̇и, д̇ат̇аа ид̇хааби. ‘‘яо гусалам̣ д̇хаммам̣ бхаавзд̇и, со агусалам̣ д̇хаммам̣ баж̇ахад̇ий’’д̇и ааг̇ад̇ад̇д̇аа банзд̇т̇а барин̃н̃аавааро, бхааванаавааро наамаад̇и взд̣̇ид̇аб̣б̣о. д̇ад̇т̇а яасмаа аб̣яаагад̇о д̇хаммо нзва бхаавзд̇аб̣б̣о, на бахаад̇аб̣б̣о, д̇асмаа д̇ам̣ бад̣̇амзва на уд̣̇д̇хадам̣. бан̣н̣ад̇д̇иваарз банзд̇т̇а д̇ин̣н̣ам̣ гусалаад̣̇ид̇хаммаанам̣ васзна бад̣̇асод̇ханавааро, бад̣̇асод̇ханамуулажаггавааро, суд̣̇д̇хад̇хаммавааро, суд̣̇д̇хад̇хаммамуулажаггаваарод̇и имзсу жад̇уусу ваарзсу яамагаг̇ан̣анаа взд̣̇ид̇аб̣б̣аа.
1-16. Idāni tesaññeva mūlayamake desitānaṃ kusalādidhammānaṃ mātikaṃ ṭhapetvā cittayamakānantaraṃ desitassa dhammayamakassa vaṇṇanā hoti. Tattha khandhayamake vuttanayeneva pāḷivavatthānaṃ veditabbaṃ. Yathā hi tattha paṇṇattivārādayo tayo mahāvārā, avasesā antaravārā ca honti, tathā idhāpi. ‘‘Yo kusalaṃ dhammaṃ bhāveti, so akusalaṃ dhammaṃ pajahatī’’ti āgatattā panettha pariññāvāro, bhāvanāvāro nāmāti veditabbo. Tattha yasmā abyākato dhammo neva bhāvetabbo, na pahātabbo, tasmā taṃ padameva na uddhaṭaṃ. Paṇṇattivāre panettha tiṇṇaṃ kusalādidhammānaṃ vasena padasodhanavāro, padasodhanamūlacakkavāro, suddhadhammavāro, suddhadhammamūlacakkavāroti imesu catūsu vāresu yamakagaṇanā veditabbā.
1. бан̣н̣ад̇д̇инид̣̇д̣̇зсаваараван̣н̣анаа
1. Paṇṇattiniddesavāravaṇṇanā
17-32. бан̣н̣ад̇д̇ивааранид̣̇д̣̇зсз бана гусалаа гусалад̇хаммаад̇и гусалаанам̣ зганд̇зна гусалад̇хаммад̇д̇аа ‘‘ааманд̇аа’’д̇и вуд̇д̇ам̣. сзсависсаж̇ж̇анзсуби зсзва наяо. авасзсаа д̇хаммаа на агусалаа д̇хаммаад̇и авасзсаа д̇хаммаа агусалаа на хонд̇и, д̇хаммаа бана хонд̇ийд̇и ад̇т̇о. иминаа наязна саб̣б̣ависсаж̇ж̇анаани взд̣̇ид̇аб̣б̣аани.
17-32. Paṇṇattivāraniddese pana kusalā kusaladhammāti kusalānaṃ ekantena kusaladhammattā ‘‘āmantā’’ti vuttaṃ. Sesavissajjanesupi eseva nayo. Avasesā dhammā na akusalā dhammāti avasesā dhammā akusalā na honti, dhammā pana hontīti attho. Iminā nayena sabbavissajjanāni veditabbāni.
бан̣н̣ад̇д̇иваараван̣н̣анаа.
Paṇṇattivāravaṇṇanā.
2. бавад̇д̇иваараван̣н̣анаа
2. Pavattivāravaṇṇanā
33-34. бавад̇д̇иваарз банзд̇т̇а бажжуббаннагаалз буг̇г̇алаваарасса ануломанаяз ‘‘яасса гусалаа д̇хаммаа уббаж̇ж̇анд̇и, д̇асса агусалаа д̇хаммаа уббаж̇ж̇анд̇и; яасса ваа бана агусалаа д̇хаммаа уббаж̇ж̇анд̇и, д̇асса гусалаа д̇хаммаа уббаж̇ж̇анд̇ий’’д̇и гусалад̇хаммамуулагаани д̣̇вз яамагаани, агусалад̇хаммамуулагам̣ зганд̇и д̇ийн̣и яамагаани хонд̇и. д̇асса бадиломанаязби огаасаваараад̣̇ийсуби зсзва наяо. звамзд̇т̇а саб̣б̣аваарзсу д̇ин̣н̣ам̣ д̇ин̣н̣ам̣ яамагаанам̣ васзна яамагаг̇ан̣анаа взд̣̇ид̇аб̣б̣аа. ад̇т̇авинижчаяз банзд̇т̇а ид̣̇ам̣ лагкан̣ам̣ – имасса хи д̇хаммаяамагасса бавад̇д̇имахааваарз ‘‘уббаж̇ж̇анд̇и нируж̇жханд̇ий’’д̇и имзсу уббаад̣̇анирод̇хзсу гусалаагусалад̇хаммаа д̇аава зганд̇зна бавад̇д̇ияам̣язва лаб̣бханд̇и, на жуд̇ибадисанд̇хийсу. аб̣яаагад̇ад̇хаммаа бана бавад̇д̇з жа жуд̇ибадисанд̇хийсу жаад̇и д̇ийсуби гаалзсу лаб̣бханд̇и. звамзд̇т̇а яам̣ яад̇т̇а яад̇т̇а лаб̣бхад̇и, д̇асса васзна д̇ад̇т̇а д̇ад̇т̇а винижчаяо взд̣̇ид̇аб̣б̣о.
33-34. Pavattivāre panettha paccuppannakāle puggalavārassa anulomanaye ‘‘yassa kusalā dhammā uppajjanti, tassa akusalā dhammā uppajjanti; yassa vā pana akusalā dhammā uppajjanti, tassa kusalā dhammā uppajjantī’’ti kusaladhammamūlakāni dve yamakāni, akusaladhammamūlakaṃ ekanti tīṇi yamakāni honti. Tassa paṭilomanayepi okāsavārādīsupi eseva nayo. Evamettha sabbavāresu tiṇṇaṃ tiṇṇaṃ yamakānaṃ vasena yamakagaṇanā veditabbā. Atthavinicchaye panettha idaṃ lakkhaṇaṃ – imassa hi dhammayamakassa pavattimahāvāre ‘‘uppajjanti nirujjhantī’’ti imesu uppādanirodhesu kusalākusaladhammā tāva ekantena pavattiyaṃyeva labbhanti, na cutipaṭisandhīsu. Abyākatadhammā pana pavatte ca cutipaṭisandhīsu cāti tīsupi kālesu labbhanti. Evamettha yaṃ yattha yattha labbhati, tassa vasena tattha tattha vinicchayo veditabbo.
д̇ад̇рид̣̇ам̣ наяамукам̣ – гусалаагусалаанам̣ д̇аава згагкан̣з ануббаж̇ж̇анад̇о ‘‘но’’д̇и бадисзд̇хо гад̇о. аб̣яаагад̇аа жаад̇и жид̇д̇асамудтаанаруубавасзна вуд̇д̇ам̣.
Tatridaṃ nayamukhaṃ – kusalākusalānaṃ tāva ekakkhaṇe anuppajjanato ‘‘no’’ti paṭisedho kato. Abyākatā cāti cittasamuṭṭhānarūpavasena vuttaṃ.
35-36. яад̇т̇а гусалаа д̇хаммаа нуббаж̇ж̇анд̇ийд̇и асан̃н̃абхавам̣ санд̇хааяа вуд̇д̇ам̣. д̇знзвзд̇т̇а ‘‘ааманд̇аа’’д̇и виссаж̇ж̇анам̣ гад̇ам̣. уббаж̇ж̇анд̇ийд̇и ид̣̇амби асан̃н̃абхавам̣язва санд̇хааяа вуд̇д̇ам̣. аб̣яаагад̇аанам̣ бана ануббад̇д̇идтаанасса абхааваа ‘‘над̇т̇ий’’д̇и бадигкзбо гад̇о.
35-36. Yattha kusalā dhammā nuppajjantīti asaññabhavaṃ sandhāya vuttaṃ. Tenevettha ‘‘āmantā’’ti vissajjanaṃ kataṃ. Uppajjantīti idampi asaññabhavaṃyeva sandhāya vuttaṃ. Abyākatānaṃ pana anuppattiṭṭhānassa abhāvā ‘‘natthī’’ti paṭikkhepo kato.
49. д̣̇уд̇ияз агусалзд̇и бхавам̣ ассаад̣̇зд̇ваа уббаннзсу ниганд̇иж̇аванзсу д̣̇уд̇ияз ж̇аванажид̇д̇з. д̣̇уд̇ияз жид̇д̇з вад̇д̇амаанзд̇и бадисанд̇хид̇о д̣̇уд̇ияз бхаван̇г̇ажид̇д̇з вад̇д̇амаанз саха ваа бадисанд̇хияаа бхаван̇г̇ам̣ вибаагавасзна згамзва гад̇ваа бхаваниганд̇ияаа ааваж̇ж̇анажид̇д̇з. д̇ан̃хи гирияажид̇д̇ад̇д̇аа аб̣яаагад̇аж̇аад̇ияам̣ вибаагад̇о д̣̇уд̇ияам̣ наама ход̇и.
49. Dutiye akusaleti bhavaṃ assādetvā uppannesu nikantijavanesu dutiye javanacitte. Dutiye citte vattamāneti paṭisandhito dutiye bhavaṅgacitte vattamāne saha vā paṭisandhiyā bhavaṅgaṃ vipākavasena ekameva katvā bhavanikantiyā āvajjanacitte. Tañhi kiriyacittattā abyākatajātiyaṃ vipākato dutiyaṃ nāma hoti.
57. яасса жид̇д̇асса ананд̇араа аг̇г̇амаг̇г̇анд̇и г̇од̇рабхужид̇д̇ам̣ санд̇хааяа вуд̇д̇ам̣. гусалаа д̇хаммаа уббаж̇ж̇иссанд̇ийд̇и д̇з аг̇г̇амаг̇г̇ад̇хаммзязва санд̇хааяа вуд̇д̇ам̣.
57. Yassa cittassa anantarāaggamagganti gotrabhucittaṃ sandhāya vuttaṃ. Kusalā dhammā uppajjissantīti te aggamaggadhammeyeva sandhāya vuttaṃ.
79. яасса жид̇д̇асса ананд̇араа аг̇г̇амаг̇г̇ам̣ бадилабхиссанд̇и, д̇асса жид̇д̇асса уббаад̣̇агкан̣зд̇и ид̣̇ам̣ жид̇д̇аж̇аад̇ивасзна вуд̇д̇ам̣. д̇аж̇ж̇аад̇игасса хи згааваж̇ж̇анзна уббаннасса д̇ад̇о оримажид̇д̇асса уббаад̣̇агкан̣зби зд̇ам̣ лагкан̣ам̣ лаб̣бхад̇зва.
79. Yassacittassa anantarā aggamaggaṃ paṭilabhissanti, tassa cittassa uppādakkhaṇeti idaṃ cittajātivasena vuttaṃ. Tajjātikassa hi ekāvajjanena uppannassa tato orimacittassa uppādakkhaṇepi etaṃ lakkhaṇaṃ labbhateva.
99. нирод̇хаваарзби гусалаагусалаанам̣ згад̇о анируж̇жханад̇о ‘‘но’’д̇и вуд̇д̇ам̣. иминаа наяамукзна саб̣б̣ад̇т̇а винижчаяо взд̣̇ид̇аб̣б̣од̇и.
99. Nirodhavārepi kusalākusalānaṃ ekato anirujjhanato ‘‘no’’ti vuttaṃ. Iminā nayamukhena sabbattha vinicchayo veditabboti.
д̇хаммаяамагаван̣н̣анаа нидтид̇аа.
Dhammayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 9. д̇хаммаяамагам̣ • 9. Dhammayamakaṃ
