| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১২. ধম্মিকসুত্তং
12. Dhammikasuttaṃ
৫৪. একং সমযং ভগৰা রাজগহে ৰিহরতি গিজ্ঝকূটে পব্বতে। তেন খো পন সমযেন আযস্মা ধম্মিকো জাতিভূমিযং আৰাসিকো হোতি সব্বসো জাতিভূমিযং সত্তসু আৰাসেসু। তত্র সুদং আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায। তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি 1, রিঞ্চন্তি আৰাসং।
54. Ekaṃ samayaṃ bhagavā rājagahe viharati gijjhakūṭe pabbate. Tena kho pana samayena āyasmā dhammiko jātibhūmiyaṃ āvāsiko hoti sabbaso jātibhūmiyaṃ sattasu āvāsesu. Tatra sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti 2, riñcanti āvāsaṃ.
অথ খো জাতিভূমকানং 3 উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৰরপিণ্ডপাতসেনাসনগিলানপ্পচ্চযভেসজ্জপরিক্খারেন। অথ চ পন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাসং। কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায। তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি , ন সণ্ঠন্তি, রিঞ্চন্তি আৰাসং। যংনূন মযং আযস্মন্তং ধম্মিকং পব্বাজেয্যামা’’তি।
Atha kho jātibhūmakānaṃ 4 upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti, na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti , na saṇṭhanti, riñcanti āvāsaṃ. Yaṃnūna mayaṃ āyasmantaṃ dhammikaṃ pabbājeyyāmā’’ti.
অথ খো জাতিভূমকা উপাসকা যেন আযস্মা ধম্মিকো তেনুপসঙ্কমিংসু; উপসঙ্কমিত্ৰা আযস্মন্তং ধম্মিকং এতদৰোচুং – ‘‘পক্কমতু, ভন্তে, আযস্মা ধম্মিকো ইমম্হা আৰাসা; অলং তে ইধ ৰাসেনা’’তি। অথ খো আযস্মা ধম্মিকো তম্হা আৰাসা অঞ্ঞং আৰাসং অগমাসি। তত্রপি সুদং আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায। তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি, রিঞ্চন্তি আৰাসং।
Atha kho jātibhūmakā upāsakā yena āyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko imamhā āvāsā; alaṃ te idha vāsenā’’ti. Atha kho āyasmā dhammiko tamhā āvāsā aññaṃ āvāsaṃ agamāsi. Tatrapi sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ.
অথ খো জাতিভূমকানং উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৰরপিণ্ডপাতসেনাসনগিলানপ্পচ্চযভেসজ্জপরিক্খারেন। অথ চ পন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাসং। কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায। তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি, রিঞ্চন্তি আৰাসং। যংনূন মযং আযস্মন্তং ধম্মিকং পব্বাজেয্যামা’’তি।
Atha kho jātibhūmakānaṃ upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti, na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ. Yaṃnūna mayaṃ āyasmantaṃ dhammikaṃ pabbājeyyāmā’’ti.
অথ খো জাতিভূমকা উপাসকা যেনাযস্মা ধম্মিকো তেনুপসঙ্কমিংসু; উপসঙ্কমিত্ৰা আযস্মন্তং ধম্মিকং এতদৰোচুং – ‘‘পক্কমতু, ভন্তে, আযস্মা ধম্মিকো ইমম্হাপি আৰাসা; অলং তে ইধ ৰাসেনা’’তি। অথ খো আযস্মা ধম্মিকো তম্হাপি আৰাসা অঞ্ঞং আৰাসং অগমাসি । তত্রপি সুদং আযস্মা ধম্মিকো আগন্তুকে ভিক্খূ অক্কোসতি পরিভাসতি ৰিহিংসতি ৰিতুদতি রোসেতি ৰাচায। তে চ আগন্তুকা ভিক্খূ আযস্মতা ধম্মিকেন অক্কোসিযমানা পরিভাসিযমানা ৰিহেসিযমানা ৰিতুদিযমানা রোসিযমানা ৰাচায পক্কমন্তি, ন সণ্ঠন্তি, রিঞ্চন্তি আৰাসং।
Atha kho jātibhūmakā upāsakā yenāyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko imamhāpi āvāsā; alaṃ te idha vāsenā’’ti. Atha kho āyasmā dhammiko tamhāpi āvāsā aññaṃ āvāsaṃ agamāsi . Tatrapi sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ.
অথ খো জাতিভূমকানং উপাসকানং এতদহোসি – ‘‘মযং খো ভিক্খুসঙ্ঘং পচ্চুপট্ঠিতা চীৰরপিণ্ডপাতসেনাসনগিলানপ্পচ্চযভেসজ্জপরিক্খারেন। অথ চ পন আগন্তুকা ভিক্খূ পক্কমন্তি , ন সণ্ঠন্তি, রিঞ্চন্তি আৰাসং। কো নু খো হেতু কো পচ্চযো যেন আগন্তুকা ভিক্খূ পক্কমন্তি, ন সণ্ঠন্তি, রিঞ্চন্তি আৰাস’’ন্তি? অথ খো জাতিভূমকানং উপাসকানং এতদহোসি – ‘‘অযং খো আযস্মা ধম্মিকো আগন্তুকে ভিক্খূ অক্কোসতি…পে॰… । যংনূন মযং আযস্মন্তং ধম্মিকং পব্বাজেয্যাম সব্বসো জাতিভূমিযং সত্তহি আৰাসেহী’’তি। অথ খো জাতিভূমকা উপাসকা যেনাযস্মা ধম্মিকো তেনুপসঙ্কমিংসু; উপসঙ্কমিত্ৰা আযস্মন্তং ধম্মিকং এতদৰোচুং – ‘‘পক্কমতু, ভন্তে, আযস্মা ধম্মিকো সব্বসো জাতিভূমিযং সত্তহি আৰাসেহী’’তি। অথ খো আযস্মতো ধম্মিকস্স এতদহোসি – ‘‘পব্বাজিতো খোম্হি জাতিভূমকেহি উপাসকেহি সব্বসো জাতিভূমিযং সত্তহি আৰাসেহি। কহং নু খো দানি গচ্ছামী’’তি? অথ খো আযস্মতো ধম্মিকস্স এতদহোসি – ‘‘যংনূনাহং যেন ভগৰা তেনুপসঙ্কমেয্য’’ন্তি।
Atha kho jātibhūmakānaṃ upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti , na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati…pe… . Yaṃnūna mayaṃ āyasmantaṃ dhammikaṃ pabbājeyyāma sabbaso jātibhūmiyaṃ sattahi āvāsehī’’ti. Atha kho jātibhūmakā upāsakā yenāyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko sabbaso jātibhūmiyaṃ sattahi āvāsehī’’ti. Atha kho āyasmato dhammikassa etadahosi – ‘‘pabbājito khomhi jātibhūmakehi upāsakehi sabbaso jātibhūmiyaṃ sattahi āvāsehi. Kahaṃ nu kho dāni gacchāmī’’ti? Atha kho āyasmato dhammikassa etadahosi – ‘‘yaṃnūnāhaṃ yena bhagavā tenupasaṅkameyya’’nti.
অথ খো আযস্মা ধম্মিকো পত্তচীৰরমাদায যেন রাজগহং তেন পক্কামি। অনুপুব্বেন যেন রাজগহং গিজ্ঝকূটো পব্বতো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং ধম্মিকং ভগৰা এতদৰোচ – ‘‘হন্দ কুতো নু ত্ৰং, ব্রাহ্মণ ধম্মিক, আগচ্ছসী’’তি? ‘‘পব্বাজিতো অহং, ভন্তে, জাতিভূমকেহি উপাসকেহি সব্বসো জাতিভূমিযং সত্তহি আৰাসেহী’’তি। ‘‘অলং, ব্রাহ্মণ ধম্মিক, কিং তে ইমিনা, যং তং ততো ততো পব্বাজেন্তি, সো ত্ৰং ততো ততো পব্বাজিতো মমেৰ সন্তিকে আগচ্ছসি’’।
Atha kho āyasmā dhammiko pattacīvaramādāya yena rājagahaṃ tena pakkāmi. Anupubbena yena rājagahaṃ gijjhakūṭo pabbato yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ dhammikaṃ bhagavā etadavoca – ‘‘handa kuto nu tvaṃ, brāhmaṇa dhammika, āgacchasī’’ti? ‘‘Pabbājito ahaṃ, bhante, jātibhūmakehi upāsakehi sabbaso jātibhūmiyaṃ sattahi āvāsehī’’ti. ‘‘Alaṃ, brāhmaṇa dhammika, kiṃ te iminā, yaṃ taṃ tato tato pabbājenti, so tvaṃ tato tato pabbājito mameva santike āgacchasi’’.
‘‘ভূতপুব্বং, ব্রাহ্মণ ধম্মিক, সামুদ্দিকা ৰাণিজা তীরদস্সিং সকুণং গহেত্ৰা নাৰায সমুদ্দং অজ্ঝোগাহন্তি। তে অতীরদক্খিণিযা 5 নাৰায তীরদস্সিং সকুণং মুঞ্চন্তি। সো গচ্ছতেৰ পুরত্থিমং দিসং, গচ্ছতি পচ্ছিমং দিসং, গচ্ছতি উত্তরং দিসং, গচ্ছতি দক্খিণং দিসং, গচ্ছতি উদ্ধং, গচ্ছতি অনুদিসং। সচে সো সমন্তা তীরং পস্সতি, তথাগতকোৰ 6 হোতি। সচে পন সো সমন্তা তীরং ন পস্সতি তমেৰ নাৰং পচ্চাগচ্ছতি। এৰমেৰং খো, ব্রাহ্মণ ধম্মিক, যং তং ততো ততো পব্বাজেন্তি সো ত্ৰং ততো ততো পব্বাজিতো মমেৰ সন্তিকে আগচ্ছসি।
‘‘Bhūtapubbaṃ, brāhmaṇa dhammika, sāmuddikā vāṇijā tīradassiṃ sakuṇaṃ gahetvā nāvāya samuddaṃ ajjhogāhanti. Te atīradakkhiṇiyā 7 nāvāya tīradassiṃ sakuṇaṃ muñcanti. So gacchateva puratthimaṃ disaṃ, gacchati pacchimaṃ disaṃ, gacchati uttaraṃ disaṃ, gacchati dakkhiṇaṃ disaṃ, gacchati uddhaṃ, gacchati anudisaṃ. Sace so samantā tīraṃ passati, tathāgatakova 8 hoti. Sace pana so samantā tīraṃ na passati tameva nāvaṃ paccāgacchati. Evamevaṃ kho, brāhmaṇa dhammika, yaṃ taṃ tato tato pabbājenti so tvaṃ tato tato pabbājito mameva santike āgacchasi.
‘‘ভূতপুব্বং , ব্রাহ্মণ ধম্মিক, রঞ্ঞো কোরব্যস্স সুপ্পতিট্ঠো নাম নিগ্রোধরাজা অহোসি পঞ্চসাখো সীতচ্ছাযো মনোরমো। সুপ্পতিট্ঠস্স খো পন, ব্রাহ্মণ ধম্মিক, নিগ্রোধরাজস্স দ্ৰাদসযোজনানি অভিনিৰেসো অহোসি, পঞ্চ যোজনানি মূলসন্তানকানং। সুপ্পতিট্ঠস্স খো পন , ব্রাহ্মণ ধম্মিক, নিগ্রোধরাজস্স তাৰ মহন্তানি ফলানি অহেসুং; সেয্যথাপি নাম আল়্হকথালিকা। এৰমস্স সাদূনি ফলানি অহেসুং; সেয্যথাপি নাম খুদ্দং মধুং অনেলকং। সুপ্পতিট্ঠস্স খো পন, ব্রাহ্মণ ধম্মিক, নিগ্রোধরাজস্স একং খন্ধং রাজা পরিভুঞ্জতি সদ্ধিং ইত্থাগারেন, একং খন্ধং বলকাযো পরিভুঞ্জতি, একং খন্ধং নেগমজানপদা পরিভুঞ্জন্তি, একং খন্ধং সমণব্রাহ্মণা পরিভুঞ্জন্তি, একং খন্ধং মিগা 9 পরিভুঞ্জন্তি। সুপ্পতিট্ঠস্স খো পন, ব্রাহ্মণ ধম্মিক, নিগ্রোধরাজস্স ন কোচি ফলানি রক্খতি, ন চ সুদং 10 অঞ্ঞমঞ্ঞস্স ফলানি হিংসন্তি।
‘‘Bhūtapubbaṃ , brāhmaṇa dhammika, rañño korabyassa suppatiṭṭho nāma nigrodharājā ahosi pañcasākho sītacchāyo manoramo. Suppatiṭṭhassa kho pana, brāhmaṇa dhammika, nigrodharājassa dvādasayojanāni abhiniveso ahosi, pañca yojanāni mūlasantānakānaṃ. Suppatiṭṭhassa kho pana , brāhmaṇa dhammika, nigrodharājassa tāva mahantāni phalāni ahesuṃ; seyyathāpi nāma āḷhakathālikā. Evamassa sādūni phalāni ahesuṃ; seyyathāpi nāma khuddaṃ madhuṃ anelakaṃ. Suppatiṭṭhassa kho pana, brāhmaṇa dhammika, nigrodharājassa ekaṃ khandhaṃ rājā paribhuñjati saddhiṃ itthāgārena, ekaṃ khandhaṃ balakāyo paribhuñjati, ekaṃ khandhaṃ negamajānapadā paribhuñjanti, ekaṃ khandhaṃ samaṇabrāhmaṇā paribhuñjanti, ekaṃ khandhaṃ migā 11 paribhuñjanti. Suppatiṭṭhassa kho pana, brāhmaṇa dhammika, nigrodharājassa na koci phalāni rakkhati, na ca sudaṃ 12 aññamaññassa phalāni hiṃsanti.
‘‘অথ খো, ব্রাহ্মণ ধম্মিক, অঞ্ঞতরো পুরিসো সুপ্পতিট্ঠস্স নিগ্রোধরাজস্স যাৰদত্থং ফলানি ভক্খিত্ৰা সাখং ভঞ্জিত্ৰা পক্কামি। অথ খো, ব্রাহ্মণ ধম্মিক, সুপ্পতিট্ঠে নিগ্রোধরাজে অধিৰত্থায দেৰতায এতদহোসি – ‘অচ্ছরিযং ৰত, ভো, অব্ভুতং ৰত, ভো! যাৰ পাপো মনুস্সো 13, যত্র হি নাম সুপ্পতিট্ঠস্স নিগ্রোধরাজস্স যাৰদত্থং ফলানি ভক্খিত্ৰা সাখং ভঞ্জিত্ৰা পক্কমিস্সতি, যংনূন সুপ্পতিট্ঠো নিগ্রোধরাজা আযতিং ফলং ন দদেয্যা’তি। অথ খো, ব্রাহ্মণ ধম্মিক, সুপ্পতিট্ঠো নিগ্রোধরাজা আযতিং ফলং ন অদাসি।
‘‘Atha kho, brāhmaṇa dhammika, aññataro puriso suppatiṭṭhassa nigrodharājassa yāvadatthaṃ phalāni bhakkhitvā sākhaṃ bhañjitvā pakkāmi. Atha kho, brāhmaṇa dhammika, suppatiṭṭhe nigrodharāje adhivatthāya devatāya etadahosi – ‘acchariyaṃ vata, bho, abbhutaṃ vata, bho! Yāva pāpo manusso 14, yatra hi nāma suppatiṭṭhassa nigrodharājassa yāvadatthaṃ phalāni bhakkhitvā sākhaṃ bhañjitvā pakkamissati, yaṃnūna suppatiṭṭho nigrodharājā āyatiṃ phalaṃ na dadeyyā’ti. Atha kho, brāhmaṇa dhammika, suppatiṭṭho nigrodharājā āyatiṃ phalaṃ na adāsi.
‘‘অথ খো, ব্রাহ্মণ ধম্মিক, রাজা কোরব্যো যেন সক্কো দেৰানমিন্দো তেনুপসঙ্কমি; উপসঙ্কমিত্ৰা সক্কং দেৰানমিন্দং এতদৰোচ – ‘যগ্ঘে, মারিস, জানেয্যাসি সুপ্পতিট্ঠো নিগ্রোধরাজা ফলং ন দেতী’তি? অথ খো, ব্রাহ্মণ ধম্মিক, সক্কো দেৰানমিন্দো তথারূপং ইদ্ধাভিসঙ্খারং অভিসঙ্খাসি 15, যথা ভুসা ৰাতৰুট্ঠি আগন্ত্ৰা সুপ্পতিট্ঠং নিগ্রোধরাজং পৰত্তেসি 16 উম্মূলমকাসি। অথ খো, ব্রাহ্মণ ধম্মিক, সুপ্পতিট্ঠে নিগ্রোধরাজে অধিৰত্থা দেৰতা দুক্খী দুম্মনা অস্সুমুখী রুদমানা একমন্তং অট্ঠাসি।
‘‘Atha kho, brāhmaṇa dhammika, rājā korabyo yena sakko devānamindo tenupasaṅkami; upasaṅkamitvā sakkaṃ devānamindaṃ etadavoca – ‘yagghe, mārisa, jāneyyāsi suppatiṭṭho nigrodharājā phalaṃ na detī’ti? Atha kho, brāhmaṇa dhammika, sakko devānamindo tathārūpaṃ iddhābhisaṅkhāraṃ abhisaṅkhāsi 17, yathā bhusā vātavuṭṭhi āgantvā suppatiṭṭhaṃ nigrodharājaṃ pavattesi 18 ummūlamakāsi. Atha kho, brāhmaṇa dhammika, suppatiṭṭhe nigrodharāje adhivatthā devatā dukkhī dummanā assumukhī rudamānā ekamantaṃ aṭṭhāsi.
‘‘অথ খো, ব্রাহ্মণ ধম্মিক, সক্কো দেৰানমিন্দো যেন সুপ্পতিট্ঠে নিগ্রোধরাজে অধিৰত্থা দেৰতা তেনুপসঙ্কমি; উপসঙ্কমিত্ৰা সুপ্পতিট্ঠে নিগ্রোধরাজে অধিৰত্থং দেৰতং এতদৰোচ – ‘কিং নু ত্ৰং, দেৰতে, দুক্খী দুম্মনা অস্সুমুখী রুদমানা একমন্তং ঠিতা’তি? ‘তথা হি পন মে, মারিস, ভুসা ৰাতৰুট্ঠি আগন্ত্ৰা ভৰনং পৰত্তেসি উম্মূলমকাসী’তি। ‘অপি নু ত্ৰং, দেৰতে, রুক্খধম্মে ঠিতায ভুসা ৰাতৰুট্ঠি আগন্ত্ৰা ভৰনং পৰত্তেসি উম্মূলমকাসী’তি? ‘কথং পন, মারিস , রুক্খো রুক্খধম্মে ঠিতো হোতী’তি? ‘ইধ, দেৰতে, রুক্খস্স মূলং মূলত্থিকা হরন্তি, তচং তচত্থিকা হরন্তি, পত্তং পত্তত্থিকা হরন্তি, পুপ্ফং পুপ্ফত্থিকা হরন্তি, ফলং ফলত্থিকা হরন্তি। ন চ তেন দেৰতায অনত্তমনতা ৰা অনভিনন্দি 19 ৰা করণীযা। এৰং খো, দেৰতে, রুক্খো রুক্খধম্মে ঠিতো হোতী’তি। ‘অট্ঠিতাযেৰ খো মে, মারিস, রুক্খধম্মে ভুসা ৰাতৰুট্ঠি আগন্ত্ৰা ভৰনং পৰত্তেসি উম্মূলমকাসী’তি। ‘সচে খো ত্ৰং, দেৰতে, রুক্খধম্মে তিট্ঠেয্যাসি, সিযা 20 তে ভৰনং যথাপুরে’তি? ‘ঠস্সামহং, 21 মারিস , রুক্খধম্মে, হোতু মে ভৰনং যথাপুরে’’’তি।
‘‘Atha kho, brāhmaṇa dhammika, sakko devānamindo yena suppatiṭṭhe nigrodharāje adhivatthā devatā tenupasaṅkami; upasaṅkamitvā suppatiṭṭhe nigrodharāje adhivatthaṃ devataṃ etadavoca – ‘kiṃ nu tvaṃ, devate, dukkhī dummanā assumukhī rudamānā ekamantaṃ ṭhitā’ti? ‘Tathā hi pana me, mārisa, bhusā vātavuṭṭhi āgantvā bhavanaṃ pavattesi ummūlamakāsī’ti. ‘Api nu tvaṃ, devate, rukkhadhamme ṭhitāya bhusā vātavuṭṭhi āgantvā bhavanaṃ pavattesi ummūlamakāsī’ti? ‘Kathaṃ pana, mārisa , rukkho rukkhadhamme ṭhito hotī’ti? ‘Idha, devate, rukkhassa mūlaṃ mūlatthikā haranti, tacaṃ tacatthikā haranti, pattaṃ pattatthikā haranti, pupphaṃ pupphatthikā haranti, phalaṃ phalatthikā haranti. Na ca tena devatāya anattamanatā vā anabhinandi 22 vā karaṇīyā. Evaṃ kho, devate, rukkho rukkhadhamme ṭhito hotī’ti. ‘Aṭṭhitāyeva kho me, mārisa, rukkhadhamme bhusā vātavuṭṭhi āgantvā bhavanaṃ pavattesi ummūlamakāsī’ti. ‘Sace kho tvaṃ, devate, rukkhadhamme tiṭṭheyyāsi, siyā 23 te bhavanaṃ yathāpure’ti? ‘Ṭhassāmahaṃ, 24 mārisa , rukkhadhamme, hotu me bhavanaṃ yathāpure’’’ti.
‘‘অথ খো, ব্রাহ্মণ ধম্মিক, সক্কো দেৰানমিন্দো তথারূপং ইদ্ধাভিসঙ্খারং অভিসঙ্খাসি 25, যথা ভুসা ৰাতৰুট্ঠি আগন্ত্ৰা সুপ্পতিট্ঠং নিগ্রোধরাজং উস্সাপেসি, সচ্ছৰীনি মূলানি অহেসুং। এৰমেৰং খো, ব্রাহ্মণ ধম্মিক, অপি নু তং সমণধম্মে ঠিতং জাতিভূমকা উপাসকা পব্বাজেসুং সব্বসো জাতিভূমিযং সত্তহি আৰাসেহী’’তি? ‘‘কথং পন, ভন্তে, সমণো সমণধম্মে ঠিতো হোতী’’তি? ‘‘ইধ, ব্রাহ্মণ ধম্মিক, সমণো অক্কোসন্তং ন পচ্চক্কোসতি, রোসন্তং ন পটিরোসতি, ভণ্ডন্তং ন পটিভণ্ডতি। এৰং খো, ব্রাহ্মণ ধম্মিক, সমণো সমণধম্মে ঠিতো হোতী’’তি। ‘‘অট্ঠিতংযেৰ মং, ভন্তে, সমণধম্মে জাতিভূমকা উপাসকা পব্বাজেসুং সব্বসো জাতিভূমিযং সত্তহি আৰাসেহী’’তি।
‘‘Atha kho, brāhmaṇa dhammika, sakko devānamindo tathārūpaṃ iddhābhisaṅkhāraṃ abhisaṅkhāsi 26, yathā bhusā vātavuṭṭhi āgantvā suppatiṭṭhaṃ nigrodharājaṃ ussāpesi, sacchavīni mūlāni ahesuṃ. Evamevaṃ kho, brāhmaṇa dhammika, api nu taṃ samaṇadhamme ṭhitaṃ jātibhūmakā upāsakā pabbājesuṃ sabbaso jātibhūmiyaṃ sattahi āvāsehī’’ti? ‘‘Kathaṃ pana, bhante, samaṇo samaṇadhamme ṭhito hotī’’ti? ‘‘Idha, brāhmaṇa dhammika, samaṇo akkosantaṃ na paccakkosati, rosantaṃ na paṭirosati, bhaṇḍantaṃ na paṭibhaṇḍati. Evaṃ kho, brāhmaṇa dhammika, samaṇo samaṇadhamme ṭhito hotī’’ti. ‘‘Aṭṭhitaṃyeva maṃ, bhante, samaṇadhamme jātibhūmakā upāsakā pabbājesuṃ sabbaso jātibhūmiyaṃ sattahi āvāsehī’’ti.
27 ‘‘ভূতপুব্বং , ব্রাহ্মণ ধম্মিক, সুনেত্তো নাম সত্থা অহোসি তিত্থকরো কামেসু ৰীতরাগো। সুনেত্তস্স খো পন, ব্রাহ্মণ ধম্মিক, সত্থুনো অনেকানি সাৰকসতানি অহেসুং। সুনেত্তো সত্থা সাৰকানং ব্রহ্মলোকসহব্যতায ধম্মং দেসেসি। যে খো পন, ব্রাহ্মণ ধম্মিক, সুনেত্তস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি ন পসাদেসুং তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিংসু। যে খো পন, ব্রাহ্মণ ধম্মিক, সুনেত্তস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি পসাদেসুং তে কাযস্স ভেদা পরং মরণা সুগতিং সগ্গং লোকং উপপজ্জিংসু।
28 ‘‘Bhūtapubbaṃ , brāhmaṇa dhammika, sunetto nāma satthā ahosi titthakaro kāmesu vītarāgo. Sunettassa kho pana, brāhmaṇa dhammika, satthuno anekāni sāvakasatāni ahesuṃ. Sunetto satthā sāvakānaṃ brahmalokasahabyatāya dhammaṃ desesi. Ye kho pana, brāhmaṇa dhammika, sunettassa satthuno brahmalokasahabyatāya dhammaṃ desentassa cittāni na pasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, brāhmaṇa dhammika, sunettassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘ভূতপুব্বং, ব্রাহ্মণ ধম্মিক, মূগপক্খো নাম সত্থা অহোসি…পে॰… অরনেমি নাম সত্থা অহোসি… কুদ্দালকো নাম সত্থা অহোসি… হত্থিপালো নাম সত্থা অহোসি… জোতিপালো নাম সত্থা অহোসি তিত্থকরো কামেসু ৰীতরাগো। জোতিপালস্স খো পন, ব্রাহ্মণ ধম্মিক, সত্থুনো অনেকানি সাৰকসতানি অহেসুং। জোতিপালো সত্থা সাৰকানং ব্রহ্মলোকসহব্যতায ধম্মং দেসেসি। যে খো পন, ব্রাহ্মণ ধম্মিক, জোতিপালস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি ন পসাদেসুং তে কাযস্স ভেদা পরং মরণা অপাযং দুগ্গতিং ৰিনিপাতং নিরযং উপপজ্জিংসু। যে খো পন, ব্রাহ্মণ ধম্মিক, জোতিপালস্স সত্থুনো ব্রহ্মলোকসহব্যতায ধম্মং দেসেন্তস্স চিত্তানি পসাদেসুং তে কাযস্স ভেদা পরং মরণা সুগতিং সগ্গং লোকং উপপজ্জিংসু।
‘‘Bhūtapubbaṃ, brāhmaṇa dhammika, mūgapakkho nāma satthā ahosi…pe… aranemi nāma satthā ahosi… kuddālako nāma satthā ahosi… hatthipālo nāma satthā ahosi… jotipālo nāma satthā ahosi titthakaro kāmesu vītarāgo. Jotipālassa kho pana, brāhmaṇa dhammika, satthuno anekāni sāvakasatāni ahesuṃ. Jotipālo satthā sāvakānaṃ brahmalokasahabyatāya dhammaṃ desesi. Ye kho pana, brāhmaṇa dhammika, jotipālassa satthuno brahmalokasahabyatāya dhammaṃ desentassa cittāni na pasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, brāhmaṇa dhammika, jotipālassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘তং কিং মঞ্ঞসি, ব্রাহ্মণ ধম্মিক, যো ইমে ছ সত্থারে তিত্থকরে কামেসু ৰীতরাগে, অনেকসতপরিৰারে সসাৰকসঙ্ঘে পদুট্ঠচিত্তো অক্কোসেয্য পরিভাসেয্য, বহুং সো অপুঞ্ঞং পসৰেয্যা’’তি? ‘‘এৰং, ভন্তে’’। ‘‘যো খো, ব্রাহ্মণ ধম্মিক, ইমে ছ সত্থারে তিত্থকরে কামেসু ৰীতরাগে অনেকসতপরিৰারে সসাৰকসঙ্ঘে পদুট্ঠচিত্তো অক্কোসেয্য পরিভাসেয্য, বহুং সো অপুঞ্ঞং পসৰেয্য। যো একং দিট্ঠিসম্পন্নং পুগ্গলং পদুট্ঠচিত্তো অক্কোসতি পরিভাসতি, অযং ততো বহুতরং অপুঞ্ঞং পসৰতি। তং কিস্স হেতু? নাহং, ব্রাহ্মণ ধম্মিক, ইতো বহিদ্ধা এৰরূপিং খন্তিং 29 ৰদামি, যথামং সব্রহ্মচারীসু। তস্মাতিহ, ব্রাহ্মণ ধম্মিক , এৰং সিক্খিতব্বং – ‘ন নো সমসব্রহ্মচারীসু 30 চিত্তানি পদুট্ঠানি ভৰিস্সন্তী’’’তি। এৰঞ্হি তে, ব্রাহ্মণ ধম্মিক, সিক্খিতব্বন্তি।
‘‘Taṃ kiṃ maññasi, brāhmaṇa dhammika, yo ime cha satthāre titthakare kāmesu vītarāge, anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyyā’’ti? ‘‘Evaṃ, bhante’’. ‘‘Yo kho, brāhmaṇa dhammika, ime cha satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyya. Yo ekaṃ diṭṭhisampannaṃ puggalaṃ paduṭṭhacitto akkosati paribhāsati, ayaṃ tato bahutaraṃ apuññaṃ pasavati. Taṃ kissa hetu? Nāhaṃ, brāhmaṇa dhammika, ito bahiddhā evarūpiṃ khantiṃ 31 vadāmi, yathāmaṃ sabrahmacārīsu. Tasmātiha, brāhmaṇa dhammika , evaṃ sikkhitabbaṃ – ‘na no samasabrahmacārīsu 32 cittāni paduṭṭhāni bhavissantī’’’ti. Evañhi te, brāhmaṇa dhammika, sikkhitabbanti.
‘‘সুনেত্তো মূগপক্খো চ, অরনেমি চ ব্রাহ্মণো।
‘‘Sunetto mūgapakkho ca, aranemi ca brāhmaṇo;
কুদ্দালকো অহু সত্থা, হত্থিপালো চ মাণৰো॥
Kuddālako ahu satthā, hatthipālo ca māṇavo.
‘‘জোতিপালো চ গোৰিন্দো, অহু সত্তপুরোহিতো।
‘‘Jotipālo ca govindo, ahu sattapurohito;
‘‘অহেসুং সাৰকা তেসং, অনেকানি সতানিপি।
‘‘Ahesuṃ sāvakā tesaṃ, anekāni satānipi;
নিরামগন্ধা করুণেধিমুত্তা, কামসংযোজনাতিগা।
Nirāmagandhā karuṇedhimuttā, kāmasaṃyojanātigā;
‘‘যেতে ইসী বাহিরকে, ৰীতরাগে সমাহিতে।
‘‘Yete isī bāhirake, vītarāge samāhite;
পদুট্ঠমনসঙ্কপ্পো, যো নরো পরিভাসতি।
Paduṭṭhamanasaṅkappo, yo naro paribhāsati;
বহুঞ্চ সো পসৰতি, অপুঞ্ঞং তাদিসো নরো॥
Bahuñca so pasavati, apuññaṃ tādiso naro.
‘‘যো চেকং দিট্ঠিসম্পন্নং, ভিক্খুং বুদ্ধস্স সাৰকং।
‘‘Yo cekaṃ diṭṭhisampannaṃ, bhikkhuṃ buddhassa sāvakaṃ;
পদুট্ঠমনসঙ্কপ্পো , যো নরো পরিভাসতি।
Paduṭṭhamanasaṅkappo , yo naro paribhāsati;
অযং ততো বহুতরং, অপুঞ্ঞং পসৰে নরো॥
Ayaṃ tato bahutaraṃ, apuññaṃ pasave naro.
‘‘ন সাধুরূপং আসীদে, দিট্ঠিট্ঠানপ্পহাযিনং।
‘‘Na sādhurūpaṃ āsīde, diṭṭhiṭṭhānappahāyinaṃ;
সত্তমো পুগ্গলো এসো, অরিযসঙ্ঘস্স ৰুচ্চতি॥
Sattamo puggalo eso, ariyasaṅghassa vuccati.
‘‘অৰীতরাগো কামেসু, যস্স পঞ্চিন্দ্রিযা মুদূ।
‘‘Avītarāgo kāmesu, yassa pañcindriyā mudū;
সদ্ধা সতি চ ৰীরিযং, সমথো চ ৰিপস্সনা॥
Saddhā sati ca vīriyaṃ, samatho ca vipassanā.
‘‘তাদিসং ভিক্খুমাসজ্জ, পুব্বেৰ উপহঞ্ঞতি।
‘‘Tādisaṃ bhikkhumāsajja, pubbeva upahaññati;
অত্তানং উপহন্ত্ৰান, পচ্ছা অঞ্ঞং ৰিহিংসতি॥
Attānaṃ upahantvāna, pacchā aññaṃ vihiṃsati.
‘‘যো চ রক্খতি অত্তানং, রক্খিতো তস্স বাহিরো।
‘‘Yo ca rakkhati attānaṃ, rakkhito tassa bāhiro;
তস্মা রক্খেয্য অত্তানং, অক্খতো পণ্ডিতো সদা’’তি॥ দ্ৰাদসমং।
Tasmā rakkheyya attānaṃ, akkhato paṇḍito sadā’’ti. dvādasamaṃ;
ধম্মিকৰগ্গো পঞ্চমো।
Dhammikavaggo pañcamo.
তস্সুদ্দানং –
Tassuddānaṃ –
নাগমিগসালা ইণং, চুন্দং দ্ৰে সন্দিট্ঠিকা দুৰে।
Nāgamigasālā iṇaṃ, cundaṃ dve sandiṭṭhikā duve;
খেমইন্দ্রিয আনন্দ, খত্তিযা অপ্পমাদেন ধম্মিকোতি॥
Khemaindriya ānanda, khattiyā appamādena dhammikoti.
পঠমপণ্ণাসকং সমত্তং।
Paṭhamapaṇṇāsakaṃ samattaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১২. ধম্মিকসুত্তৰণ্ণনা • 12. Dhammikasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১২. ধম্মিকসুত্তৰণ্ণনা • 12. Dhammikasuttavaṇṇanā
