| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೨. ಧಮ್ಮಿಕಸುತ್ತಂ
12. Dhammikasuttaṃ
೫೪. ಏಕಂ ಸಮಯಂ ಭಗವಾ ರಾಜಗಹೇ ವಿಹರತಿ ಗಿಜ್ಝಕೂಟೇ ಪಬ್ಬತೇ। ತೇನ ಖೋ ಪನ ಸಮಯೇನ ಆಯಸ್ಮಾ ಧಮ್ಮಿಕೋ ಜಾತಿಭೂಮಿಯಂ ಆವಾಸಿಕೋ ಹೋತಿ ಸಬ್ಬಸೋ ಜಾತಿಭೂಮಿಯಂ ಸತ್ತಸು ಆವಾಸೇಸು। ತತ್ರ ಸುದಂ ಆಯಸ್ಮಾ ಧಮ್ಮಿಕೋ ಆಗನ್ತುಕೇ ಭಿಕ್ಖೂ ಅಕ್ಕೋಸತಿ ಪರಿಭಾಸತಿ ವಿಹಿಂಸತಿ ವಿತುದತಿ ರೋಸೇತಿ ವಾಚಾಯ। ತೇ ಚ ಆಗನ್ತುಕಾ ಭಿಕ್ಖೂ ಆಯಸ್ಮತಾ ಧಮ್ಮಿಕೇನ ಅಕ್ಕೋಸಿಯಮಾನಾ ಪರಿಭಾಸಿಯಮಾನಾ ವಿಹೇಸಿಯಮಾನಾ ವಿತುದಿಯಮಾನಾ ರೋಸಿಯಮಾನಾ ವಾಚಾಯ ಪಕ್ಕಮನ್ತಿ, ನ ಸಣ್ಠನ್ತಿ 1, ರಿಞ್ಚನ್ತಿ ಆವಾಸಂ।
54. Ekaṃ samayaṃ bhagavā rājagahe viharati gijjhakūṭe pabbate. Tena kho pana samayena āyasmā dhammiko jātibhūmiyaṃ āvāsiko hoti sabbaso jātibhūmiyaṃ sattasu āvāsesu. Tatra sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti 2, riñcanti āvāsaṃ.
ಅಥ ಖೋ ಜಾತಿಭೂಮಕಾನಂ 3 ಉಪಾಸಕಾನಂ ಏತದಹೋಸಿ – ‘‘ಮಯಂ ಖೋ ಭಿಕ್ಖುಸಙ್ಘಂ ಪಚ್ಚುಪಟ್ಠಿತಾ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರೇನ। ಅಥ ಚ ಪನ ಆಗನ್ತುಕಾ ಭಿಕ್ಖೂ ಪಕ್ಕಮನ್ತಿ, ನ ಸಣ್ಠನ್ತಿ, ರಿಞ್ಚನ್ತಿ ಆವಾಸಂ। ಕೋ ನು ಖೋ ಹೇತು ಕೋ ಪಚ್ಚಯೋ ಯೇನ ಆಗನ್ತುಕಾ ಭಿಕ್ಖೂ ಪಕ್ಕಮನ್ತಿ, ನ ಸಣ್ಠನ್ತಿ, ರಿಞ್ಚನ್ತಿ ಆವಾಸ’’ನ್ತಿ? ಅಥ ಖೋ ಜಾತಿಭೂಮಕಾನಂ ಉಪಾಸಕಾನಂ ಏತದಹೋಸಿ – ‘‘ಅಯಂ ಖೋ ಆಯಸ್ಮಾ ಧಮ್ಮಿಕೋ ಆಗನ್ತುಕೇ ಭಿಕ್ಖೂ ಅಕ್ಕೋಸತಿ ಪರಿಭಾಸತಿ ವಿಹಿಂಸತಿ ವಿತುದತಿ ರೋಸೇತಿ ವಾಚಾಯ। ತೇ ಚ ಆಗನ್ತುಕಾ ಭಿಕ್ಖೂ ಆಯಸ್ಮತಾ ಧಮ್ಮಿಕೇನ ಅಕ್ಕೋಸಿಯಮಾನಾ ಪರಿಭಾಸಿಯಮಾನಾ ವಿಹೇಸಿಯಮಾನಾ ವಿತುದಿಯಮಾನಾ ರೋಸಿಯಮಾನಾ ವಾಚಾಯ ಪಕ್ಕಮನ್ತಿ , ನ ಸಣ್ಠನ್ತಿ, ರಿಞ್ಚನ್ತಿ ಆವಾಸಂ। ಯಂನೂನ ಮಯಂ ಆಯಸ್ಮನ್ತಂ ಧಮ್ಮಿಕಂ ಪಬ್ಬಾಜೇಯ್ಯಾಮಾ’’ತಿ।
Atha kho jātibhūmakānaṃ 4 upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti, na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti , na saṇṭhanti, riñcanti āvāsaṃ. Yaṃnūna mayaṃ āyasmantaṃ dhammikaṃ pabbājeyyāmā’’ti.
ಅಥ ಖೋ ಜಾತಿಭೂಮಕಾ ಉಪಾಸಕಾ ಯೇನ ಆಯಸ್ಮಾ ಧಮ್ಮಿಕೋ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಆಯಸ್ಮನ್ತಂ ಧಮ್ಮಿಕಂ ಏತದವೋಚುಂ – ‘‘ಪಕ್ಕಮತು, ಭನ್ತೇ, ಆಯಸ್ಮಾ ಧಮ್ಮಿಕೋ ಇಮಮ್ಹಾ ಆವಾಸಾ; ಅಲಂ ತೇ ಇಧ ವಾಸೇನಾ’’ತಿ। ಅಥ ಖೋ ಆಯಸ್ಮಾ ಧಮ್ಮಿಕೋ ತಮ್ಹಾ ಆವಾಸಾ ಅಞ್ಞಂ ಆವಾಸಂ ಅಗಮಾಸಿ। ತತ್ರಪಿ ಸುದಂ ಆಯಸ್ಮಾ ಧಮ್ಮಿಕೋ ಆಗನ್ತುಕೇ ಭಿಕ್ಖೂ ಅಕ್ಕೋಸತಿ ಪರಿಭಾಸತಿ ವಿಹಿಂಸತಿ ವಿತುದತಿ ರೋಸೇತಿ ವಾಚಾಯ। ತೇ ಚ ಆಗನ್ತುಕಾ ಭಿಕ್ಖೂ ಆಯಸ್ಮತಾ ಧಮ್ಮಿಕೇನ ಅಕ್ಕೋಸಿಯಮಾನಾ ಪರಿಭಾಸಿಯಮಾನಾ ವಿಹೇಸಿಯಮಾನಾ ವಿತುದಿಯಮಾನಾ ರೋಸಿಯಮಾನಾ ವಾಚಾಯ ಪಕ್ಕಮನ್ತಿ, ನ ಸಣ್ಠನ್ತಿ, ರಿಞ್ಚನ್ತಿ ಆವಾಸಂ।
Atha kho jātibhūmakā upāsakā yena āyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko imamhā āvāsā; alaṃ te idha vāsenā’’ti. Atha kho āyasmā dhammiko tamhā āvāsā aññaṃ āvāsaṃ agamāsi. Tatrapi sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ.
ಅಥ ಖೋ ಜಾತಿಭೂಮಕಾನಂ ಉಪಾಸಕಾನಂ ಏತದಹೋಸಿ – ‘‘ಮಯಂ ಖೋ ಭಿಕ್ಖುಸಙ್ಘಂ ಪಚ್ಚುಪಟ್ಠಿತಾ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರೇನ। ಅಥ ಚ ಪನ ಆಗನ್ತುಕಾ ಭಿಕ್ಖೂ ಪಕ್ಕಮನ್ತಿ, ನ ಸಣ್ಠನ್ತಿ, ರಿಞ್ಚನ್ತಿ ಆವಾಸಂ। ಕೋ ನು ಖೋ ಹೇತು ಕೋ ಪಚ್ಚಯೋ ಯೇನ ಆಗನ್ತುಕಾ ಭಿಕ್ಖೂ ಪಕ್ಕಮನ್ತಿ, ನ ಸಣ್ಠನ್ತಿ, ರಿಞ್ಚನ್ತಿ ಆವಾಸ’’ನ್ತಿ? ಅಥ ಖೋ ಜಾತಿಭೂಮಕಾನಂ ಉಪಾಸಕಾನಂ ಏತದಹೋಸಿ – ‘‘ಅಯಂ ಖೋ ಆಯಸ್ಮಾ ಧಮ್ಮಿಕೋ ಆಗನ್ತುಕೇ ಭಿಕ್ಖೂ ಅಕ್ಕೋಸತಿ ಪರಿಭಾಸತಿ ವಿಹಿಂಸತಿ ವಿತುದತಿ ರೋಸೇತಿ ವಾಚಾಯ। ತೇ ಚ ಆಗನ್ತುಕಾ ಭಿಕ್ಖೂ ಆಯಸ್ಮತಾ ಧಮ್ಮಿಕೇನ ಅಕ್ಕೋಸಿಯಮಾನಾ ಪರಿಭಾಸಿಯಮಾನಾ ವಿಹೇಸಿಯಮಾನಾ ವಿತುದಿಯಮಾನಾ ರೋಸಿಯಮಾನಾ ವಾಚಾಯ ಪಕ್ಕಮನ್ತಿ, ನ ಸಣ್ಠನ್ತಿ, ರಿಞ್ಚನ್ತಿ ಆವಾಸಂ। ಯಂನೂನ ಮಯಂ ಆಯಸ್ಮನ್ತಂ ಧಮ್ಮಿಕಂ ಪಬ್ಬಾಜೇಯ್ಯಾಮಾ’’ತಿ।
Atha kho jātibhūmakānaṃ upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti, na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ. Yaṃnūna mayaṃ āyasmantaṃ dhammikaṃ pabbājeyyāmā’’ti.
ಅಥ ಖೋ ಜಾತಿಭೂಮಕಾ ಉಪಾಸಕಾ ಯೇನಾಯಸ್ಮಾ ಧಮ್ಮಿಕೋ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಆಯಸ್ಮನ್ತಂ ಧಮ್ಮಿಕಂ ಏತದವೋಚುಂ – ‘‘ಪಕ್ಕಮತು, ಭನ್ತೇ, ಆಯಸ್ಮಾ ಧಮ್ಮಿಕೋ ಇಮಮ್ಹಾಪಿ ಆವಾಸಾ; ಅಲಂ ತೇ ಇಧ ವಾಸೇನಾ’’ತಿ। ಅಥ ಖೋ ಆಯಸ್ಮಾ ಧಮ್ಮಿಕೋ ತಮ್ಹಾಪಿ ಆವಾಸಾ ಅಞ್ಞಂ ಆವಾಸಂ ಅಗಮಾಸಿ । ತತ್ರಪಿ ಸುದಂ ಆಯಸ್ಮಾ ಧಮ್ಮಿಕೋ ಆಗನ್ತುಕೇ ಭಿಕ್ಖೂ ಅಕ್ಕೋಸತಿ ಪರಿಭಾಸತಿ ವಿಹಿಂಸತಿ ವಿತುದತಿ ರೋಸೇತಿ ವಾಚಾಯ। ತೇ ಚ ಆಗನ್ತುಕಾ ಭಿಕ್ಖೂ ಆಯಸ್ಮತಾ ಧಮ್ಮಿಕೇನ ಅಕ್ಕೋಸಿಯಮಾನಾ ಪರಿಭಾಸಿಯಮಾನಾ ವಿಹೇಸಿಯಮಾನಾ ವಿತುದಿಯಮಾನಾ ರೋಸಿಯಮಾನಾ ವಾಚಾಯ ಪಕ್ಕಮನ್ತಿ, ನ ಸಣ್ಠನ್ತಿ, ರಿಞ್ಚನ್ತಿ ಆವಾಸಂ।
Atha kho jātibhūmakā upāsakā yenāyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko imamhāpi āvāsā; alaṃ te idha vāsenā’’ti. Atha kho āyasmā dhammiko tamhāpi āvāsā aññaṃ āvāsaṃ agamāsi . Tatrapi sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ.
ಅಥ ಖೋ ಜಾತಿಭೂಮಕಾನಂ ಉಪಾಸಕಾನಂ ಏತದಹೋಸಿ – ‘‘ಮಯಂ ಖೋ ಭಿಕ್ಖುಸಙ್ಘಂ ಪಚ್ಚುಪಟ್ಠಿತಾ ಚೀವರಪಿಣ್ಡಪಾತಸೇನಾಸನಗಿಲಾನಪ್ಪಚ್ಚಯಭೇಸಜ್ಜಪರಿಕ್ಖಾರೇನ। ಅಥ ಚ ಪನ ಆಗನ್ತುಕಾ ಭಿಕ್ಖೂ ಪಕ್ಕಮನ್ತಿ , ನ ಸಣ್ಠನ್ತಿ, ರಿಞ್ಚನ್ತಿ ಆವಾಸಂ। ಕೋ ನು ಖೋ ಹೇತು ಕೋ ಪಚ್ಚಯೋ ಯೇನ ಆಗನ್ತುಕಾ ಭಿಕ್ಖೂ ಪಕ್ಕಮನ್ತಿ, ನ ಸಣ್ಠನ್ತಿ, ರಿಞ್ಚನ್ತಿ ಆವಾಸ’’ನ್ತಿ? ಅಥ ಖೋ ಜಾತಿಭೂಮಕಾನಂ ಉಪಾಸಕಾನಂ ಏತದಹೋಸಿ – ‘‘ಅಯಂ ಖೋ ಆಯಸ್ಮಾ ಧಮ್ಮಿಕೋ ಆಗನ್ತುಕೇ ಭಿಕ್ಖೂ ಅಕ್ಕೋಸತಿ…ಪೇ॰… । ಯಂನೂನ ಮಯಂ ಆಯಸ್ಮನ್ತಂ ಧಮ್ಮಿಕಂ ಪಬ್ಬಾಜೇಯ್ಯಾಮ ಸಬ್ಬಸೋ ಜಾತಿಭೂಮಿಯಂ ಸತ್ತಹಿ ಆವಾಸೇಹೀ’’ತಿ। ಅಥ ಖೋ ಜಾತಿಭೂಮಕಾ ಉಪಾಸಕಾ ಯೇನಾಯಸ್ಮಾ ಧಮ್ಮಿಕೋ ತೇನುಪಸಙ್ಕಮಿಂಸು; ಉಪಸಙ್ಕಮಿತ್ವಾ ಆಯಸ್ಮನ್ತಂ ಧಮ್ಮಿಕಂ ಏತದವೋಚುಂ – ‘‘ಪಕ್ಕಮತು, ಭನ್ತೇ, ಆಯಸ್ಮಾ ಧಮ್ಮಿಕೋ ಸಬ್ಬಸೋ ಜಾತಿಭೂಮಿಯಂ ಸತ್ತಹಿ ಆವಾಸೇಹೀ’’ತಿ। ಅಥ ಖೋ ಆಯಸ್ಮತೋ ಧಮ್ಮಿಕಸ್ಸ ಏತದಹೋಸಿ – ‘‘ಪಬ್ಬಾಜಿತೋ ಖೋಮ್ಹಿ ಜಾತಿಭೂಮಕೇಹಿ ಉಪಾಸಕೇಹಿ ಸಬ್ಬಸೋ ಜಾತಿಭೂಮಿಯಂ ಸತ್ತಹಿ ಆವಾಸೇಹಿ। ಕಹಂ ನು ಖೋ ದಾನಿ ಗಚ್ಛಾಮೀ’’ತಿ? ಅಥ ಖೋ ಆಯಸ್ಮತೋ ಧಮ್ಮಿಕಸ್ಸ ಏತದಹೋಸಿ – ‘‘ಯಂನೂನಾಹಂ ಯೇನ ಭಗವಾ ತೇನುಪಸಙ್ಕಮೇಯ್ಯ’’ನ್ತಿ।
Atha kho jātibhūmakānaṃ upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti , na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati…pe… . Yaṃnūna mayaṃ āyasmantaṃ dhammikaṃ pabbājeyyāma sabbaso jātibhūmiyaṃ sattahi āvāsehī’’ti. Atha kho jātibhūmakā upāsakā yenāyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko sabbaso jātibhūmiyaṃ sattahi āvāsehī’’ti. Atha kho āyasmato dhammikassa etadahosi – ‘‘pabbājito khomhi jātibhūmakehi upāsakehi sabbaso jātibhūmiyaṃ sattahi āvāsehi. Kahaṃ nu kho dāni gacchāmī’’ti? Atha kho āyasmato dhammikassa etadahosi – ‘‘yaṃnūnāhaṃ yena bhagavā tenupasaṅkameyya’’nti.
ಅಥ ಖೋ ಆಯಸ್ಮಾ ಧಮ್ಮಿಕೋ ಪತ್ತಚೀವರಮಾದಾಯ ಯೇನ ರಾಜಗಹಂ ತೇನ ಪಕ್ಕಾಮಿ। ಅನುಪುಬ್ಬೇನ ಯೇನ ರಾಜಗಹಂ ಗಿಜ್ಝಕೂಟೋ ಪಬ್ಬತೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನಂ ಖೋ ಆಯಸ್ಮನ್ತಂ ಧಮ್ಮಿಕಂ ಭಗವಾ ಏತದವೋಚ – ‘‘ಹನ್ದ ಕುತೋ ನು ತ್ವಂ, ಬ್ರಾಹ್ಮಣ ಧಮ್ಮಿಕ, ಆಗಚ್ಛಸೀ’’ತಿ? ‘‘ಪಬ್ಬಾಜಿತೋ ಅಹಂ, ಭನ್ತೇ, ಜಾತಿಭೂಮಕೇಹಿ ಉಪಾಸಕೇಹಿ ಸಬ್ಬಸೋ ಜಾತಿಭೂಮಿಯಂ ಸತ್ತಹಿ ಆವಾಸೇಹೀ’’ತಿ। ‘‘ಅಲಂ, ಬ್ರಾಹ್ಮಣ ಧಮ್ಮಿಕ, ಕಿಂ ತೇ ಇಮಿನಾ, ಯಂ ತಂ ತತೋ ತತೋ ಪಬ್ಬಾಜೇನ್ತಿ, ಸೋ ತ್ವಂ ತತೋ ತತೋ ಪಬ್ಬಾಜಿತೋ ಮಮೇವ ಸನ್ತಿಕೇ ಆಗಚ್ಛಸಿ’’।
Atha kho āyasmā dhammiko pattacīvaramādāya yena rājagahaṃ tena pakkāmi. Anupubbena yena rājagahaṃ gijjhakūṭo pabbato yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ dhammikaṃ bhagavā etadavoca – ‘‘handa kuto nu tvaṃ, brāhmaṇa dhammika, āgacchasī’’ti? ‘‘Pabbājito ahaṃ, bhante, jātibhūmakehi upāsakehi sabbaso jātibhūmiyaṃ sattahi āvāsehī’’ti. ‘‘Alaṃ, brāhmaṇa dhammika, kiṃ te iminā, yaṃ taṃ tato tato pabbājenti, so tvaṃ tato tato pabbājito mameva santike āgacchasi’’.
‘‘ಭೂತಪುಬ್ಬಂ, ಬ್ರಾಹ್ಮಣ ಧಮ್ಮಿಕ, ಸಾಮುದ್ದಿಕಾ ವಾಣಿಜಾ ತೀರದಸ್ಸಿಂ ಸಕುಣಂ ಗಹೇತ್ವಾ ನಾವಾಯ ಸಮುದ್ದಂ ಅಜ್ಝೋಗಾಹನ್ತಿ। ತೇ ಅತೀರದಕ್ಖಿಣಿಯಾ 5 ನಾವಾಯ ತೀರದಸ್ಸಿಂ ಸಕುಣಂ ಮುಞ್ಚನ್ತಿ। ಸೋ ಗಚ್ಛತೇವ ಪುರತ್ಥಿಮಂ ದಿಸಂ, ಗಚ್ಛತಿ ಪಚ್ಛಿಮಂ ದಿಸಂ, ಗಚ್ಛತಿ ಉತ್ತರಂ ದಿಸಂ, ಗಚ್ಛತಿ ದಕ್ಖಿಣಂ ದಿಸಂ, ಗಚ್ಛತಿ ಉದ್ಧಂ, ಗಚ್ಛತಿ ಅನುದಿಸಂ। ಸಚೇ ಸೋ ಸಮನ್ತಾ ತೀರಂ ಪಸ್ಸತಿ, ತಥಾಗತಕೋವ 6 ಹೋತಿ। ಸಚೇ ಪನ ಸೋ ಸಮನ್ತಾ ತೀರಂ ನ ಪಸ್ಸತಿ ತಮೇವ ನಾವಂ ಪಚ್ಚಾಗಚ್ಛತಿ। ಏವಮೇವಂ ಖೋ, ಬ್ರಾಹ್ಮಣ ಧಮ್ಮಿಕ, ಯಂ ತಂ ತತೋ ತತೋ ಪಬ್ಬಾಜೇನ್ತಿ ಸೋ ತ್ವಂ ತತೋ ತತೋ ಪಬ್ಬಾಜಿತೋ ಮಮೇವ ಸನ್ತಿಕೇ ಆಗಚ್ಛಸಿ।
‘‘Bhūtapubbaṃ, brāhmaṇa dhammika, sāmuddikā vāṇijā tīradassiṃ sakuṇaṃ gahetvā nāvāya samuddaṃ ajjhogāhanti. Te atīradakkhiṇiyā 7 nāvāya tīradassiṃ sakuṇaṃ muñcanti. So gacchateva puratthimaṃ disaṃ, gacchati pacchimaṃ disaṃ, gacchati uttaraṃ disaṃ, gacchati dakkhiṇaṃ disaṃ, gacchati uddhaṃ, gacchati anudisaṃ. Sace so samantā tīraṃ passati, tathāgatakova 8 hoti. Sace pana so samantā tīraṃ na passati tameva nāvaṃ paccāgacchati. Evamevaṃ kho, brāhmaṇa dhammika, yaṃ taṃ tato tato pabbājenti so tvaṃ tato tato pabbājito mameva santike āgacchasi.
‘‘ಭೂತಪುಬ್ಬಂ , ಬ್ರಾಹ್ಮಣ ಧಮ್ಮಿಕ, ರಞ್ಞೋ ಕೋರಬ್ಯಸ್ಸ ಸುಪ್ಪತಿಟ್ಠೋ ನಾಮ ನಿಗ್ರೋಧರಾಜಾ ಅಹೋಸಿ ಪಞ್ಚಸಾಖೋ ಸೀತಚ್ಛಾಯೋ ಮನೋರಮೋ। ಸುಪ್ಪತಿಟ್ಠಸ್ಸ ಖೋ ಪನ, ಬ್ರಾಹ್ಮಣ ಧಮ್ಮಿಕ, ನಿಗ್ರೋಧರಾಜಸ್ಸ ದ್ವಾದಸಯೋಜನಾನಿ ಅಭಿನಿವೇಸೋ ಅಹೋಸಿ, ಪಞ್ಚ ಯೋಜನಾನಿ ಮೂಲಸನ್ತಾನಕಾನಂ। ಸುಪ್ಪತಿಟ್ಠಸ್ಸ ಖೋ ಪನ , ಬ್ರಾಹ್ಮಣ ಧಮ್ಮಿಕ, ನಿಗ್ರೋಧರಾಜಸ್ಸ ತಾವ ಮಹನ್ತಾನಿ ಫಲಾನಿ ಅಹೇಸುಂ; ಸೇಯ್ಯಥಾಪಿ ನಾಮ ಆಳ್ಹಕಥಾಲಿಕಾ। ಏವಮಸ್ಸ ಸಾದೂನಿ ಫಲಾನಿ ಅಹೇಸುಂ; ಸೇಯ್ಯಥಾಪಿ ನಾಮ ಖುದ್ದಂ ಮಧುಂ ಅನೇಲಕಂ। ಸುಪ್ಪತಿಟ್ಠಸ್ಸ ಖೋ ಪನ, ಬ್ರಾಹ್ಮಣ ಧಮ್ಮಿಕ, ನಿಗ್ರೋಧರಾಜಸ್ಸ ಏಕಂ ಖನ್ಧಂ ರಾಜಾ ಪರಿಭುಞ್ಜತಿ ಸದ್ಧಿಂ ಇತ್ಥಾಗಾರೇನ, ಏಕಂ ಖನ್ಧಂ ಬಲಕಾಯೋ ಪರಿಭುಞ್ಜತಿ, ಏಕಂ ಖನ್ಧಂ ನೇಗಮಜಾನಪದಾ ಪರಿಭುಞ್ಜನ್ತಿ, ಏಕಂ ಖನ್ಧಂ ಸಮಣಬ್ರಾಹ್ಮಣಾ ಪರಿಭುಞ್ಜನ್ತಿ, ಏಕಂ ಖನ್ಧಂ ಮಿಗಾ 9 ಪರಿಭುಞ್ಜನ್ತಿ। ಸುಪ್ಪತಿಟ್ಠಸ್ಸ ಖೋ ಪನ, ಬ್ರಾಹ್ಮಣ ಧಮ್ಮಿಕ, ನಿಗ್ರೋಧರಾಜಸ್ಸ ನ ಕೋಚಿ ಫಲಾನಿ ರಕ್ಖತಿ, ನ ಚ ಸುದಂ 10 ಅಞ್ಞಮಞ್ಞಸ್ಸ ಫಲಾನಿ ಹಿಂಸನ್ತಿ।
‘‘Bhūtapubbaṃ , brāhmaṇa dhammika, rañño korabyassa suppatiṭṭho nāma nigrodharājā ahosi pañcasākho sītacchāyo manoramo. Suppatiṭṭhassa kho pana, brāhmaṇa dhammika, nigrodharājassa dvādasayojanāni abhiniveso ahosi, pañca yojanāni mūlasantānakānaṃ. Suppatiṭṭhassa kho pana , brāhmaṇa dhammika, nigrodharājassa tāva mahantāni phalāni ahesuṃ; seyyathāpi nāma āḷhakathālikā. Evamassa sādūni phalāni ahesuṃ; seyyathāpi nāma khuddaṃ madhuṃ anelakaṃ. Suppatiṭṭhassa kho pana, brāhmaṇa dhammika, nigrodharājassa ekaṃ khandhaṃ rājā paribhuñjati saddhiṃ itthāgārena, ekaṃ khandhaṃ balakāyo paribhuñjati, ekaṃ khandhaṃ negamajānapadā paribhuñjanti, ekaṃ khandhaṃ samaṇabrāhmaṇā paribhuñjanti, ekaṃ khandhaṃ migā 11 paribhuñjanti. Suppatiṭṭhassa kho pana, brāhmaṇa dhammika, nigrodharājassa na koci phalāni rakkhati, na ca sudaṃ 12 aññamaññassa phalāni hiṃsanti.
‘‘ಅಥ ಖೋ, ಬ್ರಾಹ್ಮಣ ಧಮ್ಮಿಕ, ಅಞ್ಞತರೋ ಪುರಿಸೋ ಸುಪ್ಪತಿಟ್ಠಸ್ಸ ನಿಗ್ರೋಧರಾಜಸ್ಸ ಯಾವದತ್ಥಂ ಫಲಾನಿ ಭಕ್ಖಿತ್ವಾ ಸಾಖಂ ಭಞ್ಜಿತ್ವಾ ಪಕ್ಕಾಮಿ। ಅಥ ಖೋ, ಬ್ರಾಹ್ಮಣ ಧಮ್ಮಿಕ, ಸುಪ್ಪತಿಟ್ಠೇ ನಿಗ್ರೋಧರಾಜೇ ಅಧಿವತ್ಥಾಯ ದೇವತಾಯ ಏತದಹೋಸಿ – ‘ಅಚ್ಛರಿಯಂ ವತ, ಭೋ, ಅಬ್ಭುತಂ ವತ, ಭೋ! ಯಾವ ಪಾಪೋ ಮನುಸ್ಸೋ 13, ಯತ್ರ ಹಿ ನಾಮ ಸುಪ್ಪತಿಟ್ಠಸ್ಸ ನಿಗ್ರೋಧರಾಜಸ್ಸ ಯಾವದತ್ಥಂ ಫಲಾನಿ ಭಕ್ಖಿತ್ವಾ ಸಾಖಂ ಭಞ್ಜಿತ್ವಾ ಪಕ್ಕಮಿಸ್ಸತಿ, ಯಂನೂನ ಸುಪ್ಪತಿಟ್ಠೋ ನಿಗ್ರೋಧರಾಜಾ ಆಯತಿಂ ಫಲಂ ನ ದದೇಯ್ಯಾ’ತಿ। ಅಥ ಖೋ, ಬ್ರಾಹ್ಮಣ ಧಮ್ಮಿಕ, ಸುಪ್ಪತಿಟ್ಠೋ ನಿಗ್ರೋಧರಾಜಾ ಆಯತಿಂ ಫಲಂ ನ ಅದಾಸಿ।
‘‘Atha kho, brāhmaṇa dhammika, aññataro puriso suppatiṭṭhassa nigrodharājassa yāvadatthaṃ phalāni bhakkhitvā sākhaṃ bhañjitvā pakkāmi. Atha kho, brāhmaṇa dhammika, suppatiṭṭhe nigrodharāje adhivatthāya devatāya etadahosi – ‘acchariyaṃ vata, bho, abbhutaṃ vata, bho! Yāva pāpo manusso 14, yatra hi nāma suppatiṭṭhassa nigrodharājassa yāvadatthaṃ phalāni bhakkhitvā sākhaṃ bhañjitvā pakkamissati, yaṃnūna suppatiṭṭho nigrodharājā āyatiṃ phalaṃ na dadeyyā’ti. Atha kho, brāhmaṇa dhammika, suppatiṭṭho nigrodharājā āyatiṃ phalaṃ na adāsi.
‘‘ಅಥ ಖೋ, ಬ್ರಾಹ್ಮಣ ಧಮ್ಮಿಕ, ರಾಜಾ ಕೋರಬ್ಯೋ ಯೇನ ಸಕ್ಕೋ ದೇವಾನಮಿನ್ದೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಸಕ್ಕಂ ದೇವಾನಮಿನ್ದಂ ಏತದವೋಚ – ‘ಯಗ್ಘೇ, ಮಾರಿಸ, ಜಾನೇಯ್ಯಾಸಿ ಸುಪ್ಪತಿಟ್ಠೋ ನಿಗ್ರೋಧರಾಜಾ ಫಲಂ ನ ದೇತೀ’ತಿ? ಅಥ ಖೋ, ಬ್ರಾಹ್ಮಣ ಧಮ್ಮಿಕ, ಸಕ್ಕೋ ದೇವಾನಮಿನ್ದೋ ತಥಾರೂಪಂ ಇದ್ಧಾಭಿಸಙ್ಖಾರಂ ಅಭಿಸಙ್ಖಾಸಿ 15, ಯಥಾ ಭುಸಾ ವಾತವುಟ್ಠಿ ಆಗನ್ತ್ವಾ ಸುಪ್ಪತಿಟ್ಠಂ ನಿಗ್ರೋಧರಾಜಂ ಪವತ್ತೇಸಿ 16 ಉಮ್ಮೂಲಮಕಾಸಿ। ಅಥ ಖೋ, ಬ್ರಾಹ್ಮಣ ಧಮ್ಮಿಕ, ಸುಪ್ಪತಿಟ್ಠೇ ನಿಗ್ರೋಧರಾಜೇ ಅಧಿವತ್ಥಾ ದೇವತಾ ದುಕ್ಖೀ ದುಮ್ಮನಾ ಅಸ್ಸುಮುಖೀ ರುದಮಾನಾ ಏಕಮನ್ತಂ ಅಟ್ಠಾಸಿ।
‘‘Atha kho, brāhmaṇa dhammika, rājā korabyo yena sakko devānamindo tenupasaṅkami; upasaṅkamitvā sakkaṃ devānamindaṃ etadavoca – ‘yagghe, mārisa, jāneyyāsi suppatiṭṭho nigrodharājā phalaṃ na detī’ti? Atha kho, brāhmaṇa dhammika, sakko devānamindo tathārūpaṃ iddhābhisaṅkhāraṃ abhisaṅkhāsi 17, yathā bhusā vātavuṭṭhi āgantvā suppatiṭṭhaṃ nigrodharājaṃ pavattesi 18 ummūlamakāsi. Atha kho, brāhmaṇa dhammika, suppatiṭṭhe nigrodharāje adhivatthā devatā dukkhī dummanā assumukhī rudamānā ekamantaṃ aṭṭhāsi.
‘‘ಅಥ ಖೋ, ಬ್ರಾಹ್ಮಣ ಧಮ್ಮಿಕ, ಸಕ್ಕೋ ದೇವಾನಮಿನ್ದೋ ಯೇನ ಸುಪ್ಪತಿಟ್ಠೇ ನಿಗ್ರೋಧರಾಜೇ ಅಧಿವತ್ಥಾ ದೇವತಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಸುಪ್ಪತಿಟ್ಠೇ ನಿಗ್ರೋಧರಾಜೇ ಅಧಿವತ್ಥಂ ದೇವತಂ ಏತದವೋಚ – ‘ಕಿಂ ನು ತ್ವಂ, ದೇವತೇ, ದುಕ್ಖೀ ದುಮ್ಮನಾ ಅಸ್ಸುಮುಖೀ ರುದಮಾನಾ ಏಕಮನ್ತಂ ಠಿತಾ’ತಿ? ‘ತಥಾ ಹಿ ಪನ ಮೇ, ಮಾರಿಸ, ಭುಸಾ ವಾತವುಟ್ಠಿ ಆಗನ್ತ್ವಾ ಭವನಂ ಪವತ್ತೇಸಿ ಉಮ್ಮೂಲಮಕಾಸೀ’ತಿ। ‘ಅಪಿ ನು ತ್ವಂ, ದೇವತೇ, ರುಕ್ಖಧಮ್ಮೇ ಠಿತಾಯ ಭುಸಾ ವಾತವುಟ್ಠಿ ಆಗನ್ತ್ವಾ ಭವನಂ ಪವತ್ತೇಸಿ ಉಮ್ಮೂಲಮಕಾಸೀ’ತಿ? ‘ಕಥಂ ಪನ, ಮಾರಿಸ , ರುಕ್ಖೋ ರುಕ್ಖಧಮ್ಮೇ ಠಿತೋ ಹೋತೀ’ತಿ? ‘ಇಧ, ದೇವತೇ, ರುಕ್ಖಸ್ಸ ಮೂಲಂ ಮೂಲತ್ಥಿಕಾ ಹರನ್ತಿ, ತಚಂ ತಚತ್ಥಿಕಾ ಹರನ್ತಿ, ಪತ್ತಂ ಪತ್ತತ್ಥಿಕಾ ಹರನ್ತಿ, ಪುಪ್ಫಂ ಪುಪ್ಫತ್ಥಿಕಾ ಹರನ್ತಿ, ಫಲಂ ಫಲತ್ಥಿಕಾ ಹರನ್ತಿ। ನ ಚ ತೇನ ದೇವತಾಯ ಅನತ್ತಮನತಾ ವಾ ಅನಭಿನನ್ದಿ 19 ವಾ ಕರಣೀಯಾ। ಏವಂ ಖೋ, ದೇವತೇ, ರುಕ್ಖೋ ರುಕ್ಖಧಮ್ಮೇ ಠಿತೋ ಹೋತೀ’ತಿ। ‘ಅಟ್ಠಿತಾಯೇವ ಖೋ ಮೇ, ಮಾರಿಸ, ರುಕ್ಖಧಮ್ಮೇ ಭುಸಾ ವಾತವುಟ್ಠಿ ಆಗನ್ತ್ವಾ ಭವನಂ ಪವತ್ತೇಸಿ ಉಮ್ಮೂಲಮಕಾಸೀ’ತಿ। ‘ಸಚೇ ಖೋ ತ್ವಂ, ದೇವತೇ, ರುಕ್ಖಧಮ್ಮೇ ತಿಟ್ಠೇಯ್ಯಾಸಿ, ಸಿಯಾ 20 ತೇ ಭವನಂ ಯಥಾಪುರೇ’ತಿ? ‘ಠಸ್ಸಾಮಹಂ, 21 ಮಾರಿಸ , ರುಕ್ಖಧಮ್ಮೇ, ಹೋತು ಮೇ ಭವನಂ ಯಥಾಪುರೇ’’’ತಿ।
‘‘Atha kho, brāhmaṇa dhammika, sakko devānamindo yena suppatiṭṭhe nigrodharāje adhivatthā devatā tenupasaṅkami; upasaṅkamitvā suppatiṭṭhe nigrodharāje adhivatthaṃ devataṃ etadavoca – ‘kiṃ nu tvaṃ, devate, dukkhī dummanā assumukhī rudamānā ekamantaṃ ṭhitā’ti? ‘Tathā hi pana me, mārisa, bhusā vātavuṭṭhi āgantvā bhavanaṃ pavattesi ummūlamakāsī’ti. ‘Api nu tvaṃ, devate, rukkhadhamme ṭhitāya bhusā vātavuṭṭhi āgantvā bhavanaṃ pavattesi ummūlamakāsī’ti? ‘Kathaṃ pana, mārisa , rukkho rukkhadhamme ṭhito hotī’ti? ‘Idha, devate, rukkhassa mūlaṃ mūlatthikā haranti, tacaṃ tacatthikā haranti, pattaṃ pattatthikā haranti, pupphaṃ pupphatthikā haranti, phalaṃ phalatthikā haranti. Na ca tena devatāya anattamanatā vā anabhinandi 22 vā karaṇīyā. Evaṃ kho, devate, rukkho rukkhadhamme ṭhito hotī’ti. ‘Aṭṭhitāyeva kho me, mārisa, rukkhadhamme bhusā vātavuṭṭhi āgantvā bhavanaṃ pavattesi ummūlamakāsī’ti. ‘Sace kho tvaṃ, devate, rukkhadhamme tiṭṭheyyāsi, siyā 23 te bhavanaṃ yathāpure’ti? ‘Ṭhassāmahaṃ, 24 mārisa , rukkhadhamme, hotu me bhavanaṃ yathāpure’’’ti.
‘‘ಅಥ ಖೋ, ಬ್ರಾಹ್ಮಣ ಧಮ್ಮಿಕ, ಸಕ್ಕೋ ದೇವಾನಮಿನ್ದೋ ತಥಾರೂಪಂ ಇದ್ಧಾಭಿಸಙ್ಖಾರಂ ಅಭಿಸಙ್ಖಾಸಿ 25, ಯಥಾ ಭುಸಾ ವಾತವುಟ್ಠಿ ಆಗನ್ತ್ವಾ ಸುಪ್ಪತಿಟ್ಠಂ ನಿಗ್ರೋಧರಾಜಂ ಉಸ್ಸಾಪೇಸಿ, ಸಚ್ಛವೀನಿ ಮೂಲಾನಿ ಅಹೇಸುಂ। ಏವಮೇವಂ ಖೋ, ಬ್ರಾಹ್ಮಣ ಧಮ್ಮಿಕ, ಅಪಿ ನು ತಂ ಸಮಣಧಮ್ಮೇ ಠಿತಂ ಜಾತಿಭೂಮಕಾ ಉಪಾಸಕಾ ಪಬ್ಬಾಜೇಸುಂ ಸಬ್ಬಸೋ ಜಾತಿಭೂಮಿಯಂ ಸತ್ತಹಿ ಆವಾಸೇಹೀ’’ತಿ? ‘‘ಕಥಂ ಪನ, ಭನ್ತೇ, ಸಮಣೋ ಸಮಣಧಮ್ಮೇ ಠಿತೋ ಹೋತೀ’’ತಿ? ‘‘ಇಧ, ಬ್ರಾಹ್ಮಣ ಧಮ್ಮಿಕ, ಸಮಣೋ ಅಕ್ಕೋಸನ್ತಂ ನ ಪಚ್ಚಕ್ಕೋಸತಿ, ರೋಸನ್ತಂ ನ ಪಟಿರೋಸತಿ, ಭಣ್ಡನ್ತಂ ನ ಪಟಿಭಣ್ಡತಿ। ಏವಂ ಖೋ, ಬ್ರಾಹ್ಮಣ ಧಮ್ಮಿಕ, ಸಮಣೋ ಸಮಣಧಮ್ಮೇ ಠಿತೋ ಹೋತೀ’’ತಿ। ‘‘ಅಟ್ಠಿತಂಯೇವ ಮಂ, ಭನ್ತೇ, ಸಮಣಧಮ್ಮೇ ಜಾತಿಭೂಮಕಾ ಉಪಾಸಕಾ ಪಬ್ಬಾಜೇಸುಂ ಸಬ್ಬಸೋ ಜಾತಿಭೂಮಿಯಂ ಸತ್ತಹಿ ಆವಾಸೇಹೀ’’ತಿ।
‘‘Atha kho, brāhmaṇa dhammika, sakko devānamindo tathārūpaṃ iddhābhisaṅkhāraṃ abhisaṅkhāsi 26, yathā bhusā vātavuṭṭhi āgantvā suppatiṭṭhaṃ nigrodharājaṃ ussāpesi, sacchavīni mūlāni ahesuṃ. Evamevaṃ kho, brāhmaṇa dhammika, api nu taṃ samaṇadhamme ṭhitaṃ jātibhūmakā upāsakā pabbājesuṃ sabbaso jātibhūmiyaṃ sattahi āvāsehī’’ti? ‘‘Kathaṃ pana, bhante, samaṇo samaṇadhamme ṭhito hotī’’ti? ‘‘Idha, brāhmaṇa dhammika, samaṇo akkosantaṃ na paccakkosati, rosantaṃ na paṭirosati, bhaṇḍantaṃ na paṭibhaṇḍati. Evaṃ kho, brāhmaṇa dhammika, samaṇo samaṇadhamme ṭhito hotī’’ti. ‘‘Aṭṭhitaṃyeva maṃ, bhante, samaṇadhamme jātibhūmakā upāsakā pabbājesuṃ sabbaso jātibhūmiyaṃ sattahi āvāsehī’’ti.
27 ‘‘ಭೂತಪುಬ್ಬಂ , ಬ್ರಾಹ್ಮಣ ಧಮ್ಮಿಕ, ಸುನೇತ್ತೋ ನಾಮ ಸತ್ಥಾ ಅಹೋಸಿ ತಿತ್ಥಕರೋ ಕಾಮೇಸು ವೀತರಾಗೋ। ಸುನೇತ್ತಸ್ಸ ಖೋ ಪನ, ಬ್ರಾಹ್ಮಣ ಧಮ್ಮಿಕ, ಸತ್ಥುನೋ ಅನೇಕಾನಿ ಸಾವಕಸತಾನಿ ಅಹೇಸುಂ। ಸುನೇತ್ತೋ ಸತ್ಥಾ ಸಾವಕಾನಂ ಬ್ರಹ್ಮಲೋಕಸಹಬ್ಯತಾಯ ಧಮ್ಮಂ ದೇಸೇಸಿ। ಯೇ ಖೋ ಪನ, ಬ್ರಾಹ್ಮಣ ಧಮ್ಮಿಕ, ಸುನೇತ್ತಸ್ಸ ಸತ್ಥುನೋ ಬ್ರಹ್ಮಲೋಕಸಹಬ್ಯತಾಯ ಧಮ್ಮಂ ದೇಸೇನ್ತಸ್ಸ ಚಿತ್ತಾನಿ ನ ಪಸಾದೇಸುಂ ತೇ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜಿಂಸು। ಯೇ ಖೋ ಪನ, ಬ್ರಾಹ್ಮಣ ಧಮ್ಮಿಕ, ಸುನೇತ್ತಸ್ಸ ಸತ್ಥುನೋ ಬ್ರಹ್ಮಲೋಕಸಹಬ್ಯತಾಯ ಧಮ್ಮಂ ದೇಸೇನ್ತಸ್ಸ ಚಿತ್ತಾನಿ ಪಸಾದೇಸುಂ ತೇ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜಿಂಸು।
28 ‘‘Bhūtapubbaṃ , brāhmaṇa dhammika, sunetto nāma satthā ahosi titthakaro kāmesu vītarāgo. Sunettassa kho pana, brāhmaṇa dhammika, satthuno anekāni sāvakasatāni ahesuṃ. Sunetto satthā sāvakānaṃ brahmalokasahabyatāya dhammaṃ desesi. Ye kho pana, brāhmaṇa dhammika, sunettassa satthuno brahmalokasahabyatāya dhammaṃ desentassa cittāni na pasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, brāhmaṇa dhammika, sunettassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘ಭೂತಪುಬ್ಬಂ, ಬ್ರಾಹ್ಮಣ ಧಮ್ಮಿಕ, ಮೂಗಪಕ್ಖೋ ನಾಮ ಸತ್ಥಾ ಅಹೋಸಿ…ಪೇ॰… ಅರನೇಮಿ ನಾಮ ಸತ್ಥಾ ಅಹೋಸಿ… ಕುದ್ದಾಲಕೋ ನಾಮ ಸತ್ಥಾ ಅಹೋಸಿ… ಹತ್ಥಿಪಾಲೋ ನಾಮ ಸತ್ಥಾ ಅಹೋಸಿ… ಜೋತಿಪಾಲೋ ನಾಮ ಸತ್ಥಾ ಅಹೋಸಿ ತಿತ್ಥಕರೋ ಕಾಮೇಸು ವೀತರಾಗೋ। ಜೋತಿಪಾಲಸ್ಸ ಖೋ ಪನ, ಬ್ರಾಹ್ಮಣ ಧಮ್ಮಿಕ, ಸತ್ಥುನೋ ಅನೇಕಾನಿ ಸಾವಕಸತಾನಿ ಅಹೇಸುಂ। ಜೋತಿಪಾಲೋ ಸತ್ಥಾ ಸಾವಕಾನಂ ಬ್ರಹ್ಮಲೋಕಸಹಬ್ಯತಾಯ ಧಮ್ಮಂ ದೇಸೇಸಿ। ಯೇ ಖೋ ಪನ, ಬ್ರಾಹ್ಮಣ ಧಮ್ಮಿಕ, ಜೋತಿಪಾಲಸ್ಸ ಸತ್ಥುನೋ ಬ್ರಹ್ಮಲೋಕಸಹಬ್ಯತಾಯ ಧಮ್ಮಂ ದೇಸೇನ್ತಸ್ಸ ಚಿತ್ತಾನಿ ನ ಪಸಾದೇಸುಂ ತೇ ಕಾಯಸ್ಸ ಭೇದಾ ಪರಂ ಮರಣಾ ಅಪಾಯಂ ದುಗ್ಗತಿಂ ವಿನಿಪಾತಂ ನಿರಯಂ ಉಪಪಜ್ಜಿಂಸು। ಯೇ ಖೋ ಪನ, ಬ್ರಾಹ್ಮಣ ಧಮ್ಮಿಕ, ಜೋತಿಪಾಲಸ್ಸ ಸತ್ಥುನೋ ಬ್ರಹ್ಮಲೋಕಸಹಬ್ಯತಾಯ ಧಮ್ಮಂ ದೇಸೇನ್ತಸ್ಸ ಚಿತ್ತಾನಿ ಪಸಾದೇಸುಂ ತೇ ಕಾಯಸ್ಸ ಭೇದಾ ಪರಂ ಮರಣಾ ಸುಗತಿಂ ಸಗ್ಗಂ ಲೋಕಂ ಉಪಪಜ್ಜಿಂಸು।
‘‘Bhūtapubbaṃ, brāhmaṇa dhammika, mūgapakkho nāma satthā ahosi…pe… aranemi nāma satthā ahosi… kuddālako nāma satthā ahosi… hatthipālo nāma satthā ahosi… jotipālo nāma satthā ahosi titthakaro kāmesu vītarāgo. Jotipālassa kho pana, brāhmaṇa dhammika, satthuno anekāni sāvakasatāni ahesuṃ. Jotipālo satthā sāvakānaṃ brahmalokasahabyatāya dhammaṃ desesi. Ye kho pana, brāhmaṇa dhammika, jotipālassa satthuno brahmalokasahabyatāya dhammaṃ desentassa cittāni na pasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, brāhmaṇa dhammika, jotipālassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘ತಂ ಕಿಂ ಮಞ್ಞಸಿ, ಬ್ರಾಹ್ಮಣ ಧಮ್ಮಿಕ, ಯೋ ಇಮೇ ಛ ಸತ್ಥಾರೇ ತಿತ್ಥಕರೇ ಕಾಮೇಸು ವೀತರಾಗೇ, ಅನೇಕಸತಪರಿವಾರೇ ಸಸಾವಕಸಙ್ಘೇ ಪದುಟ್ಠಚಿತ್ತೋ ಅಕ್ಕೋಸೇಯ್ಯ ಪರಿಭಾಸೇಯ್ಯ, ಬಹುಂ ಸೋ ಅಪುಞ್ಞಂ ಪಸವೇಯ್ಯಾ’’ತಿ? ‘‘ಏವಂ, ಭನ್ತೇ’’। ‘‘ಯೋ ಖೋ, ಬ್ರಾಹ್ಮಣ ಧಮ್ಮಿಕ, ಇಮೇ ಛ ಸತ್ಥಾರೇ ತಿತ್ಥಕರೇ ಕಾಮೇಸು ವೀತರಾಗೇ ಅನೇಕಸತಪರಿವಾರೇ ಸಸಾವಕಸಙ್ಘೇ ಪದುಟ್ಠಚಿತ್ತೋ ಅಕ್ಕೋಸೇಯ್ಯ ಪರಿಭಾಸೇಯ್ಯ, ಬಹುಂ ಸೋ ಅಪುಞ್ಞಂ ಪಸವೇಯ್ಯ। ಯೋ ಏಕಂ ದಿಟ್ಠಿಸಮ್ಪನ್ನಂ ಪುಗ್ಗಲಂ ಪದುಟ್ಠಚಿತ್ತೋ ಅಕ್ಕೋಸತಿ ಪರಿಭಾಸತಿ, ಅಯಂ ತತೋ ಬಹುತರಂ ಅಪುಞ್ಞಂ ಪಸವತಿ। ತಂ ಕಿಸ್ಸ ಹೇತು? ನಾಹಂ, ಬ್ರಾಹ್ಮಣ ಧಮ್ಮಿಕ, ಇತೋ ಬಹಿದ್ಧಾ ಏವರೂಪಿಂ ಖನ್ತಿಂ 29 ವದಾಮಿ, ಯಥಾಮಂ ಸಬ್ರಹ್ಮಚಾರೀಸು। ತಸ್ಮಾತಿಹ, ಬ್ರಾಹ್ಮಣ ಧಮ್ಮಿಕ , ಏವಂ ಸಿಕ್ಖಿತಬ್ಬಂ – ‘ನ ನೋ ಸಮಸಬ್ರಹ್ಮಚಾರೀಸು 30 ಚಿತ್ತಾನಿ ಪದುಟ್ಠಾನಿ ಭವಿಸ್ಸನ್ತೀ’’’ತಿ। ಏವಞ್ಹಿ ತೇ, ಬ್ರಾಹ್ಮಣ ಧಮ್ಮಿಕ, ಸಿಕ್ಖಿತಬ್ಬನ್ತಿ।
‘‘Taṃ kiṃ maññasi, brāhmaṇa dhammika, yo ime cha satthāre titthakare kāmesu vītarāge, anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyyā’’ti? ‘‘Evaṃ, bhante’’. ‘‘Yo kho, brāhmaṇa dhammika, ime cha satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyya. Yo ekaṃ diṭṭhisampannaṃ puggalaṃ paduṭṭhacitto akkosati paribhāsati, ayaṃ tato bahutaraṃ apuññaṃ pasavati. Taṃ kissa hetu? Nāhaṃ, brāhmaṇa dhammika, ito bahiddhā evarūpiṃ khantiṃ 31 vadāmi, yathāmaṃ sabrahmacārīsu. Tasmātiha, brāhmaṇa dhammika , evaṃ sikkhitabbaṃ – ‘na no samasabrahmacārīsu 32 cittāni paduṭṭhāni bhavissantī’’’ti. Evañhi te, brāhmaṇa dhammika, sikkhitabbanti.
‘‘ಸುನೇತ್ತೋ ಮೂಗಪಕ್ಖೋ ಚ, ಅರನೇಮಿ ಚ ಬ್ರಾಹ್ಮಣೋ।
‘‘Sunetto mūgapakkho ca, aranemi ca brāhmaṇo;
ಕುದ್ದಾಲಕೋ ಅಹು ಸತ್ಥಾ, ಹತ್ಥಿಪಾಲೋ ಚ ಮಾಣವೋ॥
Kuddālako ahu satthā, hatthipālo ca māṇavo.
‘‘ಜೋತಿಪಾಲೋ ಚ ಗೋವಿನ್ದೋ, ಅಹು ಸತ್ತಪುರೋಹಿತೋ।
‘‘Jotipālo ca govindo, ahu sattapurohito;
‘‘ಅಹೇಸುಂ ಸಾವಕಾ ತೇಸಂ, ಅನೇಕಾನಿ ಸತಾನಿಪಿ।
‘‘Ahesuṃ sāvakā tesaṃ, anekāni satānipi;
ನಿರಾಮಗನ್ಧಾ ಕರುಣೇಧಿಮುತ್ತಾ, ಕಾಮಸಂಯೋಜನಾತಿಗಾ।
Nirāmagandhā karuṇedhimuttā, kāmasaṃyojanātigā;
‘‘ಯೇತೇ ಇಸೀ ಬಾಹಿರಕೇ, ವೀತರಾಗೇ ಸಮಾಹಿತೇ।
‘‘Yete isī bāhirake, vītarāge samāhite;
ಪದುಟ್ಠಮನಸಙ್ಕಪ್ಪೋ, ಯೋ ನರೋ ಪರಿಭಾಸತಿ।
Paduṭṭhamanasaṅkappo, yo naro paribhāsati;
ಬಹುಞ್ಚ ಸೋ ಪಸವತಿ, ಅಪುಞ್ಞಂ ತಾದಿಸೋ ನರೋ॥
Bahuñca so pasavati, apuññaṃ tādiso naro.
‘‘ಯೋ ಚೇಕಂ ದಿಟ್ಠಿಸಮ್ಪನ್ನಂ, ಭಿಕ್ಖುಂ ಬುದ್ಧಸ್ಸ ಸಾವಕಂ।
‘‘Yo cekaṃ diṭṭhisampannaṃ, bhikkhuṃ buddhassa sāvakaṃ;
ಪದುಟ್ಠಮನಸಙ್ಕಪ್ಪೋ , ಯೋ ನರೋ ಪರಿಭಾಸತಿ।
Paduṭṭhamanasaṅkappo , yo naro paribhāsati;
ಅಯಂ ತತೋ ಬಹುತರಂ, ಅಪುಞ್ಞಂ ಪಸವೇ ನರೋ॥
Ayaṃ tato bahutaraṃ, apuññaṃ pasave naro.
‘‘ನ ಸಾಧುರೂಪಂ ಆಸೀದೇ, ದಿಟ್ಠಿಟ್ಠಾನಪ್ಪಹಾಯಿನಂ।
‘‘Na sādhurūpaṃ āsīde, diṭṭhiṭṭhānappahāyinaṃ;
ಸತ್ತಮೋ ಪುಗ್ಗಲೋ ಏಸೋ, ಅರಿಯಸಙ್ಘಸ್ಸ ವುಚ್ಚತಿ॥
Sattamo puggalo eso, ariyasaṅghassa vuccati.
‘‘ಅವೀತರಾಗೋ ಕಾಮೇಸು, ಯಸ್ಸ ಪಞ್ಚಿನ್ದ್ರಿಯಾ ಮುದೂ।
‘‘Avītarāgo kāmesu, yassa pañcindriyā mudū;
ಸದ್ಧಾ ಸತಿ ಚ ವೀರಿಯಂ, ಸಮಥೋ ಚ ವಿಪಸ್ಸನಾ॥
Saddhā sati ca vīriyaṃ, samatho ca vipassanā.
‘‘ತಾದಿಸಂ ಭಿಕ್ಖುಮಾಸಜ್ಜ, ಪುಬ್ಬೇವ ಉಪಹಞ್ಞತಿ।
‘‘Tādisaṃ bhikkhumāsajja, pubbeva upahaññati;
ಅತ್ತಾನಂ ಉಪಹನ್ತ್ವಾನ, ಪಚ್ಛಾ ಅಞ್ಞಂ ವಿಹಿಂಸತಿ॥
Attānaṃ upahantvāna, pacchā aññaṃ vihiṃsati.
‘‘ಯೋ ಚ ರಕ್ಖತಿ ಅತ್ತಾನಂ, ರಕ್ಖಿತೋ ತಸ್ಸ ಬಾಹಿರೋ।
‘‘Yo ca rakkhati attānaṃ, rakkhito tassa bāhiro;
ತಸ್ಮಾ ರಕ್ಖೇಯ್ಯ ಅತ್ತಾನಂ, ಅಕ್ಖತೋ ಪಣ್ಡಿತೋ ಸದಾ’’ತಿ॥ ದ್ವಾದಸಮಂ।
Tasmā rakkheyya attānaṃ, akkhato paṇḍito sadā’’ti. dvādasamaṃ;
ಧಮ್ಮಿಕವಗ್ಗೋ ಪಞ್ಚಮೋ।
Dhammikavaggo pañcamo.
ತಸ್ಸುದ್ದಾನಂ –
Tassuddānaṃ –
ನಾಗಮಿಗಸಾಲಾ ಇಣಂ, ಚುನ್ದಂ ದ್ವೇ ಸನ್ದಿಟ್ಠಿಕಾ ದುವೇ।
Nāgamigasālā iṇaṃ, cundaṃ dve sandiṭṭhikā duve;
ಖೇಮಇನ್ದ್ರಿಯ ಆನನ್ದ, ಖತ್ತಿಯಾ ಅಪ್ಪಮಾದೇನ ಧಮ್ಮಿಕೋತಿ॥
Khemaindriya ānanda, khattiyā appamādena dhammikoti.
ಪಠಮಪಣ್ಣಾಸಕಂ ಸಮತ್ತಂ।
Paṭhamapaṇṇāsakaṃ samattaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೨. ಧಮ್ಮಿಕಸುತ್ತವಣ್ಣನಾ • 12. Dhammikasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೨. ಧಮ್ಮಿಕಸುತ್ತವಣ್ಣನಾ • 12. Dhammikasuttavaṇṇanā
