| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༡༢. དྷམྨིཀསུཏྟཾ
12. Dhammikasuttaṃ
༥༤. ཨེཀཾ སམཡཾ བྷགཝཱ རཱཛགཧེ ཝིཧརཏི གིཛ྄ཛྷཀཱུཊེ པབྦཏེ། ཏེན ཁོ པན སམཡེན ཨཱཡསྨཱ དྷམྨིཀོ ཛཱཏིབྷཱུམིཡཾ ཨཱཝཱསིཀོ ཧོཏི སབྦསོ ཛཱཏིབྷཱུམིཡཾ སཏྟསུ ཨཱཝཱསེསུ། ཏཏྲ སུདཾ ཨཱཡསྨཱ དྷམྨིཀོ ཨཱགནྟུཀེ བྷིཀྑཱུ ཨཀྐོསཏི པརིབྷཱསཏི ཝིཧིཾསཏི ཝིཏུདཏི རོསེཏི ཝཱཙཱཡ། ཏེ ཙ ཨཱགནྟུཀཱ བྷིཀྑཱུ ཨཱཡསྨཏཱ དྷམྨིཀེན ཨཀྐོསིཡམཱནཱ པརིབྷཱསིཡམཱནཱ ཝིཧེསིཡམཱནཱ ཝིཏུདིཡམཱནཱ རོསིཡམཱནཱ ཝཱཙཱཡ པཀྐམནྟི, ན སཎྛནྟི 1, རིཉྩནྟི ཨཱཝཱསཾ།
54. Ekaṃ samayaṃ bhagavā rājagahe viharati gijjhakūṭe pabbate. Tena kho pana samayena āyasmā dhammiko jātibhūmiyaṃ āvāsiko hoti sabbaso jātibhūmiyaṃ sattasu āvāsesu. Tatra sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti 2, riñcanti āvāsaṃ.
ཨཐ ཁོ ཛཱཏིབྷཱུམཀཱནཾ 3 ཨུཔཱསཀཱནཾ ཨེཏདཧོསི – ‘‘མཡཾ ཁོ བྷིཀྑུསངྒྷཾ པཙྩུཔཊྛིཏཱ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརེན། ཨཐ ཙ པན ཨཱགནྟུཀཱ བྷིཀྑཱུ པཀྐམནྟི, ན སཎྛནྟི, རིཉྩནྟི ཨཱཝཱསཾ། ཀོ ནུ ཁོ ཧེཏུ ཀོ པཙྩཡོ ཡེན ཨཱགནྟུཀཱ བྷིཀྑཱུ པཀྐམནྟི, ན སཎྛནྟི, རིཉྩནྟི ཨཱཝཱས’’ནྟི? ཨཐ ཁོ ཛཱཏིབྷཱུམཀཱནཾ ཨུཔཱསཀཱནཾ ཨེཏདཧོསི – ‘‘ཨཡཾ ཁོ ཨཱཡསྨཱ དྷམྨིཀོ ཨཱགནྟུཀེ བྷིཀྑཱུ ཨཀྐོསཏི པརིབྷཱསཏི ཝིཧིཾསཏི ཝིཏུདཏི རོསེཏི ཝཱཙཱཡ། ཏེ ཙ ཨཱགནྟུཀཱ བྷིཀྑཱུ ཨཱཡསྨཏཱ དྷམྨིཀེན ཨཀྐོསིཡམཱནཱ པརིབྷཱསིཡམཱནཱ ཝིཧེསིཡམཱནཱ ཝིཏུདིཡམཱནཱ རོསིཡམཱནཱ ཝཱཙཱཡ པཀྐམནྟི , ན སཎྛནྟི, རིཉྩནྟི ཨཱཝཱསཾ། ཡཾནཱུན མཡཾ ཨཱཡསྨནྟཾ དྷམྨིཀཾ པབྦཱཛེཡྻཱམཱ’’ཏི།
Atha kho jātibhūmakānaṃ 4 upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti, na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti , na saṇṭhanti, riñcanti āvāsaṃ. Yaṃnūna mayaṃ āyasmantaṃ dhammikaṃ pabbājeyyāmā’’ti.
ཨཐ ཁོ ཛཱཏིབྷཱུམཀཱ ཨུཔཱསཀཱ ཡེན ཨཱཡསྨཱ དྷམྨིཀོ ཏེནུཔསངྐམིཾསུ; ཨུཔསངྐམིཏྭཱ ཨཱཡསྨནྟཾ དྷམྨིཀཾ ཨེཏདཝོཙུཾ – ‘‘པཀྐམཏུ, བྷནྟེ, ཨཱཡསྨཱ དྷམྨིཀོ ཨིམམྷཱ ཨཱཝཱསཱ; ཨལཾ ཏེ ཨིདྷ ཝཱསེནཱ’’ཏི། ཨཐ ཁོ ཨཱཡསྨཱ དྷམྨིཀོ ཏམྷཱ ཨཱཝཱསཱ ཨཉྙཾ ཨཱཝཱསཾ ཨགམཱསི། ཏཏྲཔི སུདཾ ཨཱཡསྨཱ དྷམྨིཀོ ཨཱགནྟུཀེ བྷིཀྑཱུ ཨཀྐོསཏི པརིབྷཱསཏི ཝིཧིཾསཏི ཝིཏུདཏི རོསེཏི ཝཱཙཱཡ། ཏེ ཙ ཨཱགནྟུཀཱ བྷིཀྑཱུ ཨཱཡསྨཏཱ དྷམྨིཀེན ཨཀྐོསིཡམཱནཱ པརིབྷཱསིཡམཱནཱ ཝིཧེསིཡམཱནཱ ཝིཏུདིཡམཱནཱ རོསིཡམཱནཱ ཝཱཙཱཡ པཀྐམནྟི, ན སཎྛནྟི, རིཉྩནྟི ཨཱཝཱསཾ།
Atha kho jātibhūmakā upāsakā yena āyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko imamhā āvāsā; alaṃ te idha vāsenā’’ti. Atha kho āyasmā dhammiko tamhā āvāsā aññaṃ āvāsaṃ agamāsi. Tatrapi sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ.
ཨཐ ཁོ ཛཱཏིབྷཱུམཀཱནཾ ཨུཔཱསཀཱནཾ ཨེཏདཧོསི – ‘‘མཡཾ ཁོ བྷིཀྑུསངྒྷཾ པཙྩུཔཊྛིཏཱ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརེན། ཨཐ ཙ པན ཨཱགནྟུཀཱ བྷིཀྑཱུ པཀྐམནྟི, ན སཎྛནྟི, རིཉྩནྟི ཨཱཝཱསཾ། ཀོ ནུ ཁོ ཧེཏུ ཀོ པཙྩཡོ ཡེན ཨཱགནྟུཀཱ བྷིཀྑཱུ པཀྐམནྟི, ན སཎྛནྟི, རིཉྩནྟི ཨཱཝཱས’’ནྟི? ཨཐ ཁོ ཛཱཏིབྷཱུམཀཱནཾ ཨུཔཱསཀཱནཾ ཨེཏདཧོསི – ‘‘ཨཡཾ ཁོ ཨཱཡསྨཱ དྷམྨིཀོ ཨཱགནྟུཀེ བྷིཀྑཱུ ཨཀྐོསཏི པརིབྷཱསཏི ཝིཧིཾསཏི ཝིཏུདཏི རོསེཏི ཝཱཙཱཡ། ཏེ ཙ ཨཱགནྟུཀཱ བྷིཀྑཱུ ཨཱཡསྨཏཱ དྷམྨིཀེན ཨཀྐོསིཡམཱནཱ པརིབྷཱསིཡམཱནཱ ཝིཧེསིཡམཱནཱ ཝིཏུདིཡམཱནཱ རོསིཡམཱནཱ ཝཱཙཱཡ པཀྐམནྟི, ན སཎྛནྟི, རིཉྩནྟི ཨཱཝཱསཾ། ཡཾནཱུན མཡཾ ཨཱཡསྨནྟཾ དྷམྨིཀཾ པབྦཱཛེཡྻཱམཱ’’ཏི།
Atha kho jātibhūmakānaṃ upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti, na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ. Yaṃnūna mayaṃ āyasmantaṃ dhammikaṃ pabbājeyyāmā’’ti.
ཨཐ ཁོ ཛཱཏིབྷཱུམཀཱ ཨུཔཱསཀཱ ཡེནཱཡསྨཱ དྷམྨིཀོ ཏེནུཔསངྐམིཾསུ; ཨུཔསངྐམིཏྭཱ ཨཱཡསྨནྟཾ དྷམྨིཀཾ ཨེཏདཝོཙུཾ – ‘‘པཀྐམཏུ, བྷནྟེ, ཨཱཡསྨཱ དྷམྨིཀོ ཨིམམྷཱཔི ཨཱཝཱསཱ; ཨལཾ ཏེ ཨིདྷ ཝཱསེནཱ’’ཏི། ཨཐ ཁོ ཨཱཡསྨཱ དྷམྨིཀོ ཏམྷཱཔི ཨཱཝཱསཱ ཨཉྙཾ ཨཱཝཱསཾ ཨགམཱསི ། ཏཏྲཔི སུདཾ ཨཱཡསྨཱ དྷམྨིཀོ ཨཱགནྟུཀེ བྷིཀྑཱུ ཨཀྐོསཏི པརིབྷཱསཏི ཝིཧིཾསཏི ཝིཏུདཏི རོསེཏི ཝཱཙཱཡ། ཏེ ཙ ཨཱགནྟུཀཱ བྷིཀྑཱུ ཨཱཡསྨཏཱ དྷམྨིཀེན ཨཀྐོསིཡམཱནཱ པརིབྷཱསིཡམཱནཱ ཝིཧེསིཡམཱནཱ ཝིཏུདིཡམཱནཱ རོསིཡམཱནཱ ཝཱཙཱཡ པཀྐམནྟི, ན སཎྛནྟི, རིཉྩནྟི ཨཱཝཱསཾ།
Atha kho jātibhūmakā upāsakā yenāyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko imamhāpi āvāsā; alaṃ te idha vāsenā’’ti. Atha kho āyasmā dhammiko tamhāpi āvāsā aññaṃ āvāsaṃ agamāsi . Tatrapi sudaṃ āyasmā dhammiko āgantuke bhikkhū akkosati paribhāsati vihiṃsati vitudati roseti vācāya. Te ca āgantukā bhikkhū āyasmatā dhammikena akkosiyamānā paribhāsiyamānā vihesiyamānā vitudiyamānā rosiyamānā vācāya pakkamanti, na saṇṭhanti, riñcanti āvāsaṃ.
ཨཐ ཁོ ཛཱཏིབྷཱུམཀཱནཾ ཨུཔཱསཀཱནཾ ཨེཏདཧོསི – ‘‘མཡཾ ཁོ བྷིཀྑུསངྒྷཾ པཙྩུཔཊྛིཏཱ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརེན། ཨཐ ཙ པན ཨཱགནྟུཀཱ བྷིཀྑཱུ པཀྐམནྟི , ན སཎྛནྟི, རིཉྩནྟི ཨཱཝཱསཾ། ཀོ ནུ ཁོ ཧེཏུ ཀོ པཙྩཡོ ཡེན ཨཱགནྟུཀཱ བྷིཀྑཱུ པཀྐམནྟི, ན སཎྛནྟི, རིཉྩནྟི ཨཱཝཱས’’ནྟི? ཨཐ ཁོ ཛཱཏིབྷཱུམཀཱནཾ ཨུཔཱསཀཱནཾ ཨེཏདཧོསི – ‘‘ཨཡཾ ཁོ ཨཱཡསྨཱ དྷམྨིཀོ ཨཱགནྟུཀེ བྷིཀྑཱུ ཨཀྐོསཏི…པེ॰… ། ཡཾནཱུན མཡཾ ཨཱཡསྨནྟཾ དྷམྨིཀཾ པབྦཱཛེཡྻཱམ སབྦསོ ཛཱཏིབྷཱུམིཡཾ སཏྟཧི ཨཱཝཱསེཧཱི’’ཏི། ཨཐ ཁོ ཛཱཏིབྷཱུམཀཱ ཨུཔཱསཀཱ ཡེནཱཡསྨཱ དྷམྨིཀོ ཏེནུཔསངྐམིཾསུ; ཨུཔསངྐམིཏྭཱ ཨཱཡསྨནྟཾ དྷམྨིཀཾ ཨེཏདཝོཙུཾ – ‘‘པཀྐམཏུ, བྷནྟེ, ཨཱཡསྨཱ དྷམྨིཀོ སབྦསོ ཛཱཏིབྷཱུམིཡཾ སཏྟཧི ཨཱཝཱསེཧཱི’’ཏི། ཨཐ ཁོ ཨཱཡསྨཏོ དྷམྨིཀསྶ ཨེཏདཧོསི – ‘‘པབྦཱཛིཏོ ཁོམྷི ཛཱཏིབྷཱུམཀེཧི ཨུཔཱསཀེཧི སབྦསོ ཛཱཏིབྷཱུམིཡཾ སཏྟཧི ཨཱཝཱསེཧི། ཀཧཾ ནུ ཁོ དཱནི གཙྪཱམཱི’’ཏི? ཨཐ ཁོ ཨཱཡསྨཏོ དྷམྨིཀསྶ ཨེཏདཧོསི – ‘‘ཡཾནཱུནཱཧཾ ཡེན བྷགཝཱ ཏེནུཔསངྐམེཡྻ’’ནྟི།
Atha kho jātibhūmakānaṃ upāsakānaṃ etadahosi – ‘‘mayaṃ kho bhikkhusaṅghaṃ paccupaṭṭhitā cīvarapiṇḍapātasenāsanagilānappaccayabhesajjaparikkhārena. Atha ca pana āgantukā bhikkhū pakkamanti , na saṇṭhanti, riñcanti āvāsaṃ. Ko nu kho hetu ko paccayo yena āgantukā bhikkhū pakkamanti, na saṇṭhanti, riñcanti āvāsa’’nti? Atha kho jātibhūmakānaṃ upāsakānaṃ etadahosi – ‘‘ayaṃ kho āyasmā dhammiko āgantuke bhikkhū akkosati…pe… . Yaṃnūna mayaṃ āyasmantaṃ dhammikaṃ pabbājeyyāma sabbaso jātibhūmiyaṃ sattahi āvāsehī’’ti. Atha kho jātibhūmakā upāsakā yenāyasmā dhammiko tenupasaṅkamiṃsu; upasaṅkamitvā āyasmantaṃ dhammikaṃ etadavocuṃ – ‘‘pakkamatu, bhante, āyasmā dhammiko sabbaso jātibhūmiyaṃ sattahi āvāsehī’’ti. Atha kho āyasmato dhammikassa etadahosi – ‘‘pabbājito khomhi jātibhūmakehi upāsakehi sabbaso jātibhūmiyaṃ sattahi āvāsehi. Kahaṃ nu kho dāni gacchāmī’’ti? Atha kho āyasmato dhammikassa etadahosi – ‘‘yaṃnūnāhaṃ yena bhagavā tenupasaṅkameyya’’nti.
ཨཐ ཁོ ཨཱཡསྨཱ དྷམྨིཀོ པཏྟཙཱིཝརམཱདཱཡ ཡེན རཱཛགཧཾ ཏེན པཀྐཱམི། ཨནུཔུབྦེན ཡེན རཱཛགཧཾ གིཛ྄ཛྷཀཱུཊོ པབྦཏོ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཱཡསྨནྟཾ དྷམྨིཀཾ བྷགཝཱ ཨེཏདཝོཙ – ‘‘ཧནྡ ཀུཏོ ནུ ཏྭཾ, བྲཱཧྨཎ དྷམྨིཀ, ཨཱགཙྪསཱི’’ཏི? ‘‘པབྦཱཛིཏོ ཨཧཾ, བྷནྟེ, ཛཱཏིབྷཱུམཀེཧི ཨུཔཱསཀེཧི སབྦསོ ཛཱཏིབྷཱུམིཡཾ སཏྟཧི ཨཱཝཱསེཧཱི’’ཏི། ‘‘ཨལཾ, བྲཱཧྨཎ དྷམྨིཀ, ཀིཾ ཏེ ཨིམིནཱ, ཡཾ ཏཾ ཏཏོ ཏཏོ པབྦཱཛེནྟི, སོ ཏྭཾ ཏཏོ ཏཏོ པབྦཱཛིཏོ མམེཝ སནྟིཀེ ཨཱགཙྪསི’’།
Atha kho āyasmā dhammiko pattacīvaramādāya yena rājagahaṃ tena pakkāmi. Anupubbena yena rājagahaṃ gijjhakūṭo pabbato yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ dhammikaṃ bhagavā etadavoca – ‘‘handa kuto nu tvaṃ, brāhmaṇa dhammika, āgacchasī’’ti? ‘‘Pabbājito ahaṃ, bhante, jātibhūmakehi upāsakehi sabbaso jātibhūmiyaṃ sattahi āvāsehī’’ti. ‘‘Alaṃ, brāhmaṇa dhammika, kiṃ te iminā, yaṃ taṃ tato tato pabbājenti, so tvaṃ tato tato pabbājito mameva santike āgacchasi’’.
‘‘བྷཱུཏཔུབྦཾ, བྲཱཧྨཎ དྷམྨིཀ, སཱམུདྡིཀཱ ཝཱཎིཛཱ ཏཱིརདསྶིཾ སཀུཎཾ གཧེཏྭཱ ནཱཝཱཡ སམུདྡཾ ཨཛ྄ཛྷོགཱཧནྟི། ཏེ ཨཏཱིརདཀྑིཎིཡཱ 5 ནཱཝཱཡ ཏཱིརདསྶིཾ སཀུཎཾ མུཉྩནྟི། སོ གཙྪཏེཝ པུརཏྠིམཾ དིསཾ, གཙྪཏི པཙྪིམཾ དིསཾ, གཙྪཏི ཨུཏྟརཾ དིསཾ, གཙྪཏི དཀྑིཎཾ དིསཾ, གཙྪཏི ཨུདྡྷཾ, གཙྪཏི ཨནུདིསཾ། སཙེ སོ སམནྟཱ ཏཱིརཾ པསྶཏི, ཏཐཱགཏཀོཝ 6 ཧོཏི། སཙེ པན སོ སམནྟཱ ཏཱིརཾ ན པསྶཏི ཏམེཝ ནཱཝཾ པཙྩཱགཙྪཏི། ཨེཝམེཝཾ ཁོ, བྲཱཧྨཎ དྷམྨིཀ, ཡཾ ཏཾ ཏཏོ ཏཏོ པབྦཱཛེནྟི སོ ཏྭཾ ཏཏོ ཏཏོ པབྦཱཛིཏོ མམེཝ སནྟིཀེ ཨཱགཙྪསི།
‘‘Bhūtapubbaṃ, brāhmaṇa dhammika, sāmuddikā vāṇijā tīradassiṃ sakuṇaṃ gahetvā nāvāya samuddaṃ ajjhogāhanti. Te atīradakkhiṇiyā 7 nāvāya tīradassiṃ sakuṇaṃ muñcanti. So gacchateva puratthimaṃ disaṃ, gacchati pacchimaṃ disaṃ, gacchati uttaraṃ disaṃ, gacchati dakkhiṇaṃ disaṃ, gacchati uddhaṃ, gacchati anudisaṃ. Sace so samantā tīraṃ passati, tathāgatakova 8 hoti. Sace pana so samantā tīraṃ na passati tameva nāvaṃ paccāgacchati. Evamevaṃ kho, brāhmaṇa dhammika, yaṃ taṃ tato tato pabbājenti so tvaṃ tato tato pabbājito mameva santike āgacchasi.
‘‘བྷཱུཏཔུབྦཾ , བྲཱཧྨཎ དྷམྨིཀ, རཉྙོ ཀོརབྱསྶ སུཔྤཏིཊྛོ ནཱམ ནིགྲོདྷརཱཛཱ ཨཧོསི པཉྩསཱཁོ སཱིཏཙྪཱཡོ མནོརམོ། སུཔྤཏིཊྛསྶ ཁོ པན, བྲཱཧྨཎ དྷམྨིཀ, ནིགྲོདྷརཱཛསྶ དྭཱདསཡོཛནཱནི ཨབྷིནིཝེསོ ཨཧོསི, པཉྩ ཡོཛནཱནི མཱུལསནྟཱནཀཱནཾ། སུཔྤཏིཊྛསྶ ཁོ པན , བྲཱཧྨཎ དྷམྨིཀ, ནིགྲོདྷརཱཛསྶ ཏཱཝ མཧནྟཱནི ཕལཱནི ཨཧེསུཾ; སེཡྻཐཱཔི ནཱམ ཨཱལ༹ྷཀཐཱལིཀཱ། ཨེཝམསྶ སཱདཱུནི ཕལཱནི ཨཧེསུཾ; སེཡྻཐཱཔི ནཱམ ཁུདྡཾ མདྷུཾ ཨནེལཀཾ། སུཔྤཏིཊྛསྶ ཁོ པན, བྲཱཧྨཎ དྷམྨིཀ, ནིགྲོདྷརཱཛསྶ ཨེཀཾ ཁནྡྷཾ རཱཛཱ པརིབྷུཉྫཏི སདྡྷིཾ ཨིཏྠཱགཱརེན, ཨེཀཾ ཁནྡྷཾ བལཀཱཡོ པརིབྷུཉྫཏི, ཨེཀཾ ཁནྡྷཾ ནེགམཛཱནཔདཱ པརིབྷུཉྫནྟི, ཨེཀཾ ཁནྡྷཾ སམཎབྲཱཧྨཎཱ པརིབྷུཉྫནྟི, ཨེཀཾ ཁནྡྷཾ མིགཱ 9 པརིབྷུཉྫནྟི། སུཔྤཏིཊྛསྶ ཁོ པན, བྲཱཧྨཎ དྷམྨིཀ, ནིགྲོདྷརཱཛསྶ ན ཀོཙི ཕལཱནི རཀྑཏི, ན ཙ སུདཾ 10 ཨཉྙམཉྙསྶ ཕལཱནི ཧིཾསནྟི།
‘‘Bhūtapubbaṃ , brāhmaṇa dhammika, rañño korabyassa suppatiṭṭho nāma nigrodharājā ahosi pañcasākho sītacchāyo manoramo. Suppatiṭṭhassa kho pana, brāhmaṇa dhammika, nigrodharājassa dvādasayojanāni abhiniveso ahosi, pañca yojanāni mūlasantānakānaṃ. Suppatiṭṭhassa kho pana , brāhmaṇa dhammika, nigrodharājassa tāva mahantāni phalāni ahesuṃ; seyyathāpi nāma āḷhakathālikā. Evamassa sādūni phalāni ahesuṃ; seyyathāpi nāma khuddaṃ madhuṃ anelakaṃ. Suppatiṭṭhassa kho pana, brāhmaṇa dhammika, nigrodharājassa ekaṃ khandhaṃ rājā paribhuñjati saddhiṃ itthāgārena, ekaṃ khandhaṃ balakāyo paribhuñjati, ekaṃ khandhaṃ negamajānapadā paribhuñjanti, ekaṃ khandhaṃ samaṇabrāhmaṇā paribhuñjanti, ekaṃ khandhaṃ migā 11 paribhuñjanti. Suppatiṭṭhassa kho pana, brāhmaṇa dhammika, nigrodharājassa na koci phalāni rakkhati, na ca sudaṃ 12 aññamaññassa phalāni hiṃsanti.
‘‘ཨཐ ཁོ, བྲཱཧྨཎ དྷམྨིཀ, ཨཉྙཏརོ པུརིསོ སུཔྤཏིཊྛསྶ ནིགྲོདྷརཱཛསྶ ཡཱཝདཏྠཾ ཕལཱནི བྷཀྑིཏྭཱ སཱཁཾ བྷཉྫིཏྭཱ པཀྐཱམི། ཨཐ ཁོ, བྲཱཧྨཎ དྷམྨིཀ, སུཔྤཏིཊྛེ ནིགྲོདྷརཱཛེ ཨདྷིཝཏྠཱཡ དེཝཏཱཡ ཨེཏདཧོསི – ‘ཨཙྪརིཡཾ ཝཏ, བྷོ, ཨབྦྷུཏཾ ཝཏ, བྷོ! ཡཱཝ པཱཔོ མནུསྶོ 13, ཡཏྲ ཧི ནཱམ སུཔྤཏིཊྛསྶ ནིགྲོདྷརཱཛསྶ ཡཱཝདཏྠཾ ཕལཱནི བྷཀྑིཏྭཱ སཱཁཾ བྷཉྫིཏྭཱ པཀྐམིསྶཏི, ཡཾནཱུན སུཔྤཏིཊྛོ ནིགྲོདྷརཱཛཱ ཨཱཡཏིཾ ཕལཾ ན དདེཡྻཱ’ཏི། ཨཐ ཁོ, བྲཱཧྨཎ དྷམྨིཀ, སུཔྤཏིཊྛོ ནིགྲོདྷརཱཛཱ ཨཱཡཏིཾ ཕལཾ ན ཨདཱསི།
‘‘Atha kho, brāhmaṇa dhammika, aññataro puriso suppatiṭṭhassa nigrodharājassa yāvadatthaṃ phalāni bhakkhitvā sākhaṃ bhañjitvā pakkāmi. Atha kho, brāhmaṇa dhammika, suppatiṭṭhe nigrodharāje adhivatthāya devatāya etadahosi – ‘acchariyaṃ vata, bho, abbhutaṃ vata, bho! Yāva pāpo manusso 14, yatra hi nāma suppatiṭṭhassa nigrodharājassa yāvadatthaṃ phalāni bhakkhitvā sākhaṃ bhañjitvā pakkamissati, yaṃnūna suppatiṭṭho nigrodharājā āyatiṃ phalaṃ na dadeyyā’ti. Atha kho, brāhmaṇa dhammika, suppatiṭṭho nigrodharājā āyatiṃ phalaṃ na adāsi.
‘‘ཨཐ ཁོ, བྲཱཧྨཎ དྷམྨིཀ, རཱཛཱ ཀོརབྱོ ཡེན སཀྐོ དེཝཱནམིནྡོ ཏེནུཔསངྐམི; ཨུཔསངྐམིཏྭཱ སཀྐཾ དེཝཱནམིནྡཾ ཨེཏདཝོཙ – ‘ཡགྒྷེ, མཱརིས, ཛཱནེཡྻཱསི སུཔྤཏིཊྛོ ནིགྲོདྷརཱཛཱ ཕལཾ ན དེཏཱི’ཏི? ཨཐ ཁོ, བྲཱཧྨཎ དྷམྨིཀ, སཀྐོ དེཝཱནམིནྡོ ཏཐཱརཱུཔཾ ཨིདྡྷཱབྷིསངྑཱརཾ ཨབྷིསངྑཱསི 15, ཡཐཱ བྷུསཱ ཝཱཏཝུཊྛི ཨཱགནྟྭཱ སུཔྤཏིཊྛཾ ནིགྲོདྷརཱཛཾ པཝཏྟེསི 16 ཨུམྨཱུལམཀཱསི། ཨཐ ཁོ, བྲཱཧྨཎ དྷམྨིཀ, སུཔྤཏིཊྛེ ནིགྲོདྷརཱཛེ ཨདྷིཝཏྠཱ དེཝཏཱ དུཀྑཱི དུམྨནཱ ཨསྶུམུཁཱི རུདམཱནཱ ཨེཀམནྟཾ ཨཊྛཱསི།
‘‘Atha kho, brāhmaṇa dhammika, rājā korabyo yena sakko devānamindo tenupasaṅkami; upasaṅkamitvā sakkaṃ devānamindaṃ etadavoca – ‘yagghe, mārisa, jāneyyāsi suppatiṭṭho nigrodharājā phalaṃ na detī’ti? Atha kho, brāhmaṇa dhammika, sakko devānamindo tathārūpaṃ iddhābhisaṅkhāraṃ abhisaṅkhāsi 17, yathā bhusā vātavuṭṭhi āgantvā suppatiṭṭhaṃ nigrodharājaṃ pavattesi 18 ummūlamakāsi. Atha kho, brāhmaṇa dhammika, suppatiṭṭhe nigrodharāje adhivatthā devatā dukkhī dummanā assumukhī rudamānā ekamantaṃ aṭṭhāsi.
‘‘ཨཐ ཁོ, བྲཱཧྨཎ དྷམྨིཀ, སཀྐོ དེཝཱནམིནྡོ ཡེན སུཔྤཏིཊྛེ ནིགྲོདྷརཱཛེ ཨདྷིཝཏྠཱ དེཝཏཱ ཏེནུཔསངྐམི; ཨུཔསངྐམིཏྭཱ སུཔྤཏིཊྛེ ནིགྲོདྷརཱཛེ ཨདྷིཝཏྠཾ དེཝཏཾ ཨེཏདཝོཙ – ‘ཀིཾ ནུ ཏྭཾ, དེཝཏེ, དུཀྑཱི དུམྨནཱ ཨསྶུམུཁཱི རུདམཱནཱ ཨེཀམནྟཾ ཋིཏཱ’ཏི? ‘ཏཐཱ ཧི པན མེ, མཱརིས, བྷུསཱ ཝཱཏཝུཊྛི ཨཱགནྟྭཱ བྷཝནཾ པཝཏྟེསི ཨུམྨཱུལམཀཱསཱི’ཏི། ‘ཨཔི ནུ ཏྭཾ, དེཝཏེ, རུཀྑདྷམྨེ ཋིཏཱཡ བྷུསཱ ཝཱཏཝུཊྛི ཨཱགནྟྭཱ བྷཝནཾ པཝཏྟེསི ཨུམྨཱུལམཀཱསཱི’ཏི? ‘ཀཐཾ པན, མཱརིས , རུཀྑོ རུཀྑདྷམྨེ ཋིཏོ ཧོཏཱི’ཏི? ‘ཨིདྷ, དེཝཏེ, རུཀྑསྶ མཱུལཾ མཱུལཏྠིཀཱ ཧརནྟི, ཏཙཾ ཏཙཏྠིཀཱ ཧརནྟི, པཏྟཾ པཏྟཏྠིཀཱ ཧརནྟི, པུཔྥཾ པུཔྥཏྠིཀཱ ཧརནྟི, ཕལཾ ཕལཏྠིཀཱ ཧརནྟི། ན ཙ ཏེན དེཝཏཱཡ ཨནཏྟམནཏཱ ཝཱ ཨནབྷིནནྡི 19 ཝཱ ཀརཎཱིཡཱ། ཨེཝཾ ཁོ, དེཝཏེ, རུཀྑོ རུཀྑདྷམྨེ ཋིཏོ ཧོཏཱི’ཏི། ‘ཨཊྛིཏཱཡེཝ ཁོ མེ, མཱརིས, རུཀྑདྷམྨེ བྷུསཱ ཝཱཏཝུཊྛི ཨཱགནྟྭཱ བྷཝནཾ པཝཏྟེསི ཨུམྨཱུལམཀཱསཱི’ཏི། ‘སཙེ ཁོ ཏྭཾ, དེཝཏེ, རུཀྑདྷམྨེ ཏིཊྛེཡྻཱསི, སིཡཱ 20 ཏེ བྷཝནཾ ཡཐཱཔུརེ’ཏི? ‘ཋསྶཱམཧཾ, 21 མཱརིས , རུཀྑདྷམྨེ, ཧོཏུ མེ བྷཝནཾ ཡཐཱཔུརེ’’’ཏི།
‘‘Atha kho, brāhmaṇa dhammika, sakko devānamindo yena suppatiṭṭhe nigrodharāje adhivatthā devatā tenupasaṅkami; upasaṅkamitvā suppatiṭṭhe nigrodharāje adhivatthaṃ devataṃ etadavoca – ‘kiṃ nu tvaṃ, devate, dukkhī dummanā assumukhī rudamānā ekamantaṃ ṭhitā’ti? ‘Tathā hi pana me, mārisa, bhusā vātavuṭṭhi āgantvā bhavanaṃ pavattesi ummūlamakāsī’ti. ‘Api nu tvaṃ, devate, rukkhadhamme ṭhitāya bhusā vātavuṭṭhi āgantvā bhavanaṃ pavattesi ummūlamakāsī’ti? ‘Kathaṃ pana, mārisa , rukkho rukkhadhamme ṭhito hotī’ti? ‘Idha, devate, rukkhassa mūlaṃ mūlatthikā haranti, tacaṃ tacatthikā haranti, pattaṃ pattatthikā haranti, pupphaṃ pupphatthikā haranti, phalaṃ phalatthikā haranti. Na ca tena devatāya anattamanatā vā anabhinandi 22 vā karaṇīyā. Evaṃ kho, devate, rukkho rukkhadhamme ṭhito hotī’ti. ‘Aṭṭhitāyeva kho me, mārisa, rukkhadhamme bhusā vātavuṭṭhi āgantvā bhavanaṃ pavattesi ummūlamakāsī’ti. ‘Sace kho tvaṃ, devate, rukkhadhamme tiṭṭheyyāsi, siyā 23 te bhavanaṃ yathāpure’ti? ‘Ṭhassāmahaṃ, 24 mārisa , rukkhadhamme, hotu me bhavanaṃ yathāpure’’’ti.
‘‘ཨཐ ཁོ, བྲཱཧྨཎ དྷམྨིཀ, སཀྐོ དེཝཱནམིནྡོ ཏཐཱརཱུཔཾ ཨིདྡྷཱབྷིསངྑཱརཾ ཨབྷིསངྑཱསི 25, ཡཐཱ བྷུསཱ ཝཱཏཝུཊྛི ཨཱགནྟྭཱ སུཔྤཏིཊྛཾ ནིགྲོདྷརཱཛཾ ཨུསྶཱཔེསི, སཙྪཝཱིནི མཱུལཱནི ཨཧེསུཾ། ཨེཝམེཝཾ ཁོ, བྲཱཧྨཎ དྷམྨིཀ, ཨཔི ནུ ཏཾ སམཎདྷམྨེ ཋིཏཾ ཛཱཏིབྷཱུམཀཱ ཨུཔཱསཀཱ པབྦཱཛེསུཾ སབྦསོ ཛཱཏིབྷཱུམིཡཾ སཏྟཧི ཨཱཝཱསེཧཱི’’ཏི? ‘‘ཀཐཾ པན, བྷནྟེ, སམཎོ སམཎདྷམྨེ ཋིཏོ ཧོཏཱི’’ཏི? ‘‘ཨིདྷ, བྲཱཧྨཎ དྷམྨིཀ, སམཎོ ཨཀྐོསནྟཾ ན པཙྩཀྐོསཏི, རོསནྟཾ ན པཊིརོསཏི, བྷཎྜནྟཾ ན པཊིབྷཎྜཏི། ཨེཝཾ ཁོ, བྲཱཧྨཎ དྷམྨིཀ, སམཎོ སམཎདྷམྨེ ཋིཏོ ཧོཏཱི’’ཏི། ‘‘ཨཊྛིཏཾཡེཝ མཾ, བྷནྟེ, སམཎདྷམྨེ ཛཱཏིབྷཱུམཀཱ ཨུཔཱསཀཱ པབྦཱཛེསུཾ སབྦསོ ཛཱཏིབྷཱུམིཡཾ སཏྟཧི ཨཱཝཱསེཧཱི’’ཏི།
‘‘Atha kho, brāhmaṇa dhammika, sakko devānamindo tathārūpaṃ iddhābhisaṅkhāraṃ abhisaṅkhāsi 26, yathā bhusā vātavuṭṭhi āgantvā suppatiṭṭhaṃ nigrodharājaṃ ussāpesi, sacchavīni mūlāni ahesuṃ. Evamevaṃ kho, brāhmaṇa dhammika, api nu taṃ samaṇadhamme ṭhitaṃ jātibhūmakā upāsakā pabbājesuṃ sabbaso jātibhūmiyaṃ sattahi āvāsehī’’ti? ‘‘Kathaṃ pana, bhante, samaṇo samaṇadhamme ṭhito hotī’’ti? ‘‘Idha, brāhmaṇa dhammika, samaṇo akkosantaṃ na paccakkosati, rosantaṃ na paṭirosati, bhaṇḍantaṃ na paṭibhaṇḍati. Evaṃ kho, brāhmaṇa dhammika, samaṇo samaṇadhamme ṭhito hotī’’ti. ‘‘Aṭṭhitaṃyeva maṃ, bhante, samaṇadhamme jātibhūmakā upāsakā pabbājesuṃ sabbaso jātibhūmiyaṃ sattahi āvāsehī’’ti.
27 ‘‘བྷཱུཏཔུབྦཾ , བྲཱཧྨཎ དྷམྨིཀ, སུནེཏྟོ ནཱམ སཏྠཱ ཨཧོསི ཏིཏྠཀརོ ཀཱམེསུ ཝཱིཏརཱགོ། སུནེཏྟསྶ ཁོ པན, བྲཱཧྨཎ དྷམྨིཀ, སཏྠུནོ ཨནེཀཱནི སཱཝཀསཏཱནི ཨཧེསུཾ། སུནེཏྟོ སཏྠཱ སཱཝཀཱནཾ བྲཧྨལོཀསཧབྱཏཱཡ དྷམྨཾ དེསེསི། ཡེ ཁོ པན, བྲཱཧྨཎ དྷམྨིཀ, སུནེཏྟསྶ སཏྠུནོ བྲཧྨལོཀསཧབྱཏཱཡ དྷམྨཾ དེསེནྟསྶ ཙིཏྟཱནི ན པསཱདེསུཾ ཏེ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫིཾསུ། ཡེ ཁོ པན, བྲཱཧྨཎ དྷམྨིཀ, སུནེཏྟསྶ སཏྠུནོ བྲཧྨལོཀསཧབྱཏཱཡ དྷམྨཾ དེསེནྟསྶ ཙིཏྟཱནི པསཱདེསུཾ ཏེ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫིཾསུ།
28 ‘‘Bhūtapubbaṃ , brāhmaṇa dhammika, sunetto nāma satthā ahosi titthakaro kāmesu vītarāgo. Sunettassa kho pana, brāhmaṇa dhammika, satthuno anekāni sāvakasatāni ahesuṃ. Sunetto satthā sāvakānaṃ brahmalokasahabyatāya dhammaṃ desesi. Ye kho pana, brāhmaṇa dhammika, sunettassa satthuno brahmalokasahabyatāya dhammaṃ desentassa cittāni na pasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, brāhmaṇa dhammika, sunettassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘བྷཱུཏཔུབྦཾ, བྲཱཧྨཎ དྷམྨིཀ, མཱུགཔཀྑོ ནཱམ སཏྠཱ ཨཧོསི…པེ॰… ཨརནེམི ནཱམ སཏྠཱ ཨཧོསི… ཀུདྡཱལཀོ ནཱམ སཏྠཱ ཨཧོསི… ཧཏྠིཔཱལོ ནཱམ སཏྠཱ ཨཧོསི… ཛོཏིཔཱལོ ནཱམ སཏྠཱ ཨཧོསི ཏིཏྠཀརོ ཀཱམེསུ ཝཱིཏརཱགོ། ཛོཏིཔཱལསྶ ཁོ པན, བྲཱཧྨཎ དྷམྨིཀ, སཏྠུནོ ཨནེཀཱནི སཱཝཀསཏཱནི ཨཧེསུཾ། ཛོཏིཔཱལོ སཏྠཱ སཱཝཀཱནཾ བྲཧྨལོཀསཧབྱཏཱཡ དྷམྨཾ དེསེསི། ཡེ ཁོ པན, བྲཱཧྨཎ དྷམྨིཀ, ཛོཏིཔཱལསྶ སཏྠུནོ བྲཧྨལོཀསཧབྱཏཱཡ དྷམྨཾ དེསེནྟསྶ ཙིཏྟཱནི ན པསཱདེསུཾ ཏེ ཀཱཡསྶ བྷེདཱ པརཾ མརཎཱ ཨཔཱཡཾ དུགྒཏིཾ ཝིནིཔཱཏཾ ནིརཡཾ ཨུཔཔཛྫིཾསུ། ཡེ ཁོ པན, བྲཱཧྨཎ དྷམྨིཀ, ཛོཏིཔཱལསྶ སཏྠུནོ བྲཧྨལོཀསཧབྱཏཱཡ དྷམྨཾ དེསེནྟསྶ ཙིཏྟཱནི པསཱདེསུཾ ཏེ ཀཱཡསྶ བྷེདཱ པརཾ མརཎཱ སུགཏིཾ སགྒཾ ལོཀཾ ཨུཔཔཛྫིཾསུ།
‘‘Bhūtapubbaṃ, brāhmaṇa dhammika, mūgapakkho nāma satthā ahosi…pe… aranemi nāma satthā ahosi… kuddālako nāma satthā ahosi… hatthipālo nāma satthā ahosi… jotipālo nāma satthā ahosi titthakaro kāmesu vītarāgo. Jotipālassa kho pana, brāhmaṇa dhammika, satthuno anekāni sāvakasatāni ahesuṃ. Jotipālo satthā sāvakānaṃ brahmalokasahabyatāya dhammaṃ desesi. Ye kho pana, brāhmaṇa dhammika, jotipālassa satthuno brahmalokasahabyatāya dhammaṃ desentassa cittāni na pasādesuṃ te kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjiṃsu. Ye kho pana, brāhmaṇa dhammika, jotipālassa satthuno brahmalokasahabyatāya dhammaṃ desentassa cittāni pasādesuṃ te kāyassa bhedā paraṃ maraṇā sugatiṃ saggaṃ lokaṃ upapajjiṃsu.
‘‘ཏཾ ཀིཾ མཉྙསི, བྲཱཧྨཎ དྷམྨིཀ, ཡོ ཨིམེ ཚ སཏྠཱརེ ཏིཏྠཀརེ ཀཱམེསུ ཝཱིཏརཱགེ, ཨནེཀསཏཔརིཝཱརེ སསཱཝཀསངྒྷེ པདུཊྛཙིཏྟོ ཨཀྐོསེཡྻ པརིབྷཱསེཡྻ, བཧུཾ སོ ཨཔུཉྙཾ པསཝེཡྻཱ’’ཏི? ‘‘ཨེཝཾ, བྷནྟེ’’། ‘‘ཡོ ཁོ, བྲཱཧྨཎ དྷམྨིཀ, ཨིམེ ཚ སཏྠཱརེ ཏིཏྠཀརེ ཀཱམེསུ ཝཱིཏརཱགེ ཨནེཀསཏཔརིཝཱརེ སསཱཝཀསངྒྷེ པདུཊྛཙིཏྟོ ཨཀྐོསེཡྻ པརིབྷཱསེཡྻ, བཧུཾ སོ ཨཔུཉྙཾ པསཝེཡྻ། ཡོ ཨེཀཾ དིཊྛིསམྤནྣཾ པུགྒལཾ པདུཊྛཙིཏྟོ ཨཀྐོསཏི པརིབྷཱསཏི, ཨཡཾ ཏཏོ བཧུཏརཾ ཨཔུཉྙཾ པསཝཏི། ཏཾ ཀིསྶ ཧེཏུ? ནཱཧཾ, བྲཱཧྨཎ དྷམྨིཀ, ཨིཏོ བཧིདྡྷཱ ཨེཝརཱུཔིཾ ཁནྟིཾ 29 ཝདཱམི, ཡཐཱམཾ སབྲཧྨཙཱརཱིསུ། ཏསྨཱཏིཧ, བྲཱཧྨཎ དྷམྨིཀ , ཨེཝཾ སིཀྑིཏབྦཾ – ‘ན ནོ སམསབྲཧྨཙཱརཱིསུ 30 ཙིཏྟཱནི པདུཊྛཱནི བྷཝིསྶནྟཱི’’’ཏི། ཨེཝཉྷི ཏེ, བྲཱཧྨཎ དྷམྨིཀ, སིཀྑིཏབྦནྟི།
‘‘Taṃ kiṃ maññasi, brāhmaṇa dhammika, yo ime cha satthāre titthakare kāmesu vītarāge, anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyyā’’ti? ‘‘Evaṃ, bhante’’. ‘‘Yo kho, brāhmaṇa dhammika, ime cha satthāre titthakare kāmesu vītarāge anekasataparivāre sasāvakasaṅghe paduṭṭhacitto akkoseyya paribhāseyya, bahuṃ so apuññaṃ pasaveyya. Yo ekaṃ diṭṭhisampannaṃ puggalaṃ paduṭṭhacitto akkosati paribhāsati, ayaṃ tato bahutaraṃ apuññaṃ pasavati. Taṃ kissa hetu? Nāhaṃ, brāhmaṇa dhammika, ito bahiddhā evarūpiṃ khantiṃ 31 vadāmi, yathāmaṃ sabrahmacārīsu. Tasmātiha, brāhmaṇa dhammika , evaṃ sikkhitabbaṃ – ‘na no samasabrahmacārīsu 32 cittāni paduṭṭhāni bhavissantī’’’ti. Evañhi te, brāhmaṇa dhammika, sikkhitabbanti.
‘‘སུནེཏྟོ མཱུགཔཀྑོ ཙ, ཨརནེམི ཙ བྲཱཧྨཎོ།
‘‘Sunetto mūgapakkho ca, aranemi ca brāhmaṇo;
ཀུདྡཱལཀོ ཨཧུ སཏྠཱ, ཧཏྠིཔཱལོ ཙ མཱཎཝོ༎
Kuddālako ahu satthā, hatthipālo ca māṇavo.
‘‘ཛོཏིཔཱལོ ཙ གོཝིནྡོ, ཨཧུ སཏྟཔུརོཧིཏོ།
‘‘Jotipālo ca govindo, ahu sattapurohito;
‘‘ཨཧེསུཾ སཱཝཀཱ ཏེསཾ, ཨནེཀཱནི སཏཱནིཔི།
‘‘Ahesuṃ sāvakā tesaṃ, anekāni satānipi;
ནིརཱམགནྡྷཱ ཀརུཎེདྷིམུཏྟཱ, ཀཱམསཾཡོཛནཱཏིགཱ།
Nirāmagandhā karuṇedhimuttā, kāmasaṃyojanātigā;
‘‘ཡེཏེ ཨིསཱི བཱཧིརཀེ, ཝཱིཏརཱགེ སམཱཧིཏེ།
‘‘Yete isī bāhirake, vītarāge samāhite;
པདུཊྛམནསངྐཔྤོ, ཡོ ནརོ པརིབྷཱསཏི།
Paduṭṭhamanasaṅkappo, yo naro paribhāsati;
བཧུཉྩ སོ པསཝཏི, ཨཔུཉྙཾ ཏཱདིསོ ནརོ༎
Bahuñca so pasavati, apuññaṃ tādiso naro.
‘‘ཡོ ཙེཀཾ དིཊྛིསམྤནྣཾ, བྷིཀྑུཾ བུདྡྷསྶ སཱཝཀཾ།
‘‘Yo cekaṃ diṭṭhisampannaṃ, bhikkhuṃ buddhassa sāvakaṃ;
པདུཊྛམནསངྐཔྤོ , ཡོ ནརོ པརིབྷཱསཏི།
Paduṭṭhamanasaṅkappo , yo naro paribhāsati;
ཨཡཾ ཏཏོ བཧུཏརཾ, ཨཔུཉྙཾ པསཝེ ནརོ༎
Ayaṃ tato bahutaraṃ, apuññaṃ pasave naro.
‘‘ན སཱདྷུརཱུཔཾ ཨཱསཱིདེ, དིཊྛིཊྛཱནཔྤཧཱཡིནཾ།
‘‘Na sādhurūpaṃ āsīde, diṭṭhiṭṭhānappahāyinaṃ;
སཏྟམོ པུགྒལོ ཨེསོ, ཨརིཡསངྒྷསྶ ཝུཙྩཏི༎
Sattamo puggalo eso, ariyasaṅghassa vuccati.
‘‘ཨཝཱིཏརཱགོ ཀཱམེསུ, ཡསྶ པཉྩིནྡྲིཡཱ མུདཱུ།
‘‘Avītarāgo kāmesu, yassa pañcindriyā mudū;
སདྡྷཱ སཏི ཙ ཝཱིརིཡཾ, སམཐོ ཙ ཝིཔསྶནཱ༎
Saddhā sati ca vīriyaṃ, samatho ca vipassanā.
‘‘ཏཱདིསཾ བྷིཀྑུམཱསཛྫ, པུབྦེཝ ཨུཔཧཉྙཏི།
‘‘Tādisaṃ bhikkhumāsajja, pubbeva upahaññati;
ཨཏྟཱནཾ ཨུཔཧནྟྭཱན, པཙྪཱ ཨཉྙཾ ཝིཧིཾསཏི༎
Attānaṃ upahantvāna, pacchā aññaṃ vihiṃsati.
‘‘ཡོ ཙ རཀྑཏི ཨཏྟཱནཾ, རཀྑིཏོ ཏསྶ བཱཧིརོ།
‘‘Yo ca rakkhati attānaṃ, rakkhito tassa bāhiro;
ཏསྨཱ རཀྑེཡྻ ཨཏྟཱནཾ, ཨཀྑཏོ པཎྜིཏོ སདཱ’’ཏི༎ དྭཱདསམཾ།
Tasmā rakkheyya attānaṃ, akkhato paṇḍito sadā’’ti. dvādasamaṃ;
དྷམྨིཀཝགྒོ པཉྩམོ།
Dhammikavaggo pañcamo.
ཏསྶུདྡཱནཾ –
Tassuddānaṃ –
ནཱགམིགསཱལཱ ཨིཎཾ, ཙུནྡཾ དྭེ སནྡིཊྛིཀཱ དུཝེ།
Nāgamigasālā iṇaṃ, cundaṃ dve sandiṭṭhikā duve;
ཁེམཨིནྡྲིཡ ཨཱནནྡ, ཁཏྟིཡཱ ཨཔྤམཱདེན དྷམྨིཀོཏི༎
Khemaindriya ānanda, khattiyā appamādena dhammikoti.
པཋམཔཎྞཱསཀཾ སམཏྟཾ།
Paṭhamapaṇṇāsakaṃ samattaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༡༢. དྷམྨིཀསུཏྟཝཎྞནཱ • 12. Dhammikasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༢. དྷམྨིཀསུཏྟཝཎྞནཱ • 12. Dhammikasuttavaṇṇanā
