| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
12. த⁴ம்மிகஸுத்தவண்ணனா
12. Dhammikasuttavaṇṇanā
54. த்³வாத³ஸமே ஸப்³ப³ஸோதி ஸப்³பே³ஸு. ஸத்தஸு விஹாரேஸூதி ஸத்தஸு பரிவேணேஸு. பரிபா⁴ஸதீதி பரிப⁴வதி ப⁴யங் உபத³ங்ஸேதி. விஹிங்ஸதீதி விஹேடே²தி. விதுத³தீதி விஜ்ஜ²தி. ரோஸேதி வாசாயாதி வாசாய க⁴ட்டேதி. பக்கமந்தீதி தி³ஸா பக்கமந்தி. ந ஸண்ட²ஹந்தீதி நப்பதிட்ட²ஹந்தி. ரிஞ்சந்தீதி ச²ட்³டெ³ந்தி விஸ்ஸஜ்ஜெந்தி. பப்³பா³ஜெய்யாமாதி நீஹரெய்யாம. ஹந்தா³தி வவஸ்ஸக்³க³த்தே² நிபாதோ. அலந்தி யுத்தமேதங், யங் தங் பப்³பா³ஜெய்யுந்தி அத்தோ². கிங் தே இமினாதி கிங் தவ இமினா ஜாதிபூ⁴மியங் வாஸேன. தீரத³ஸ்ஸிங் ஸகுணந்தி தி³ஸாகாகங். முஞ்சந்தீதி தி³ஸாத³ஸ்ஸனத்த²ங் விஸ்ஸஜ்ஜெந்தி. ஸாமந்தாதி அவிதூ³ரே. ஸமந்தாதிபி பாடோ², ஸமந்ததோதி அத்தோ². அபி⁴னிவேஸோதி பத்த²ரித்வா டி²தஸாகா²னங் நிவேஸோ. மூலஸந்தானகானந்தி மூலானங் நிவேஸோ.
54. Dvādasame sabbasoti sabbesu. Sattasu vihāresūti sattasu pariveṇesu. Paribhāsatīti paribhavati bhayaṃ upadaṃseti. Vihiṃsatīti viheṭheti. Vitudatīti vijjhati. Roseti vācāyāti vācāya ghaṭṭeti. Pakkamantīti disā pakkamanti. Na saṇṭhahantīti nappatiṭṭhahanti. Riñcantīti chaḍḍenti vissajjenti. Pabbājeyyāmāti nīhareyyāma. Handāti vavassaggatthe nipāto. Alanti yuttametaṃ, yaṃ taṃ pabbājeyyunti attho. Kiṃ te imināti kiṃ tava iminā jātibhūmiyaṃ vāsena. Tīradassiṃ sakuṇanti disākākaṃ. Muñcantīti disādassanatthaṃ vissajjenti. Sāmantāti avidūre. Samantātipi pāṭho, samantatoti attho. Abhinivesoti pattharitvā ṭhitasākhānaṃ niveso. Mūlasantānakānanti mūlānaṃ niveso.
ஆள்ஹகதா²லிகாதி தண்டு³லாள்ஹகஸ்ஸ ப⁴த்தபசனதா²லிகா. கு²த்³த³ங் மது⁴ந்தி கு²த்³த³மக்கி²காஹி கதங் த³ண்ட³கமது⁴ங். அனேலகந்தி நித்³தோ³ஸங். ந ச ஸுத³ங் அஞ்ஞமஞ்ஞஸ்ஸ ப²லானி ஹிங்ஸந்தீதி அஞ்ஞமஞ்ஞஸ்ஸ கொட்டா²ஸே ப²லானி ந ஹிங்ஸந்தி. அத்தனோ கொட்டா²ஸேஹி மூலங் வா தசங் வா பத்தங் வா சி²ந்த³ந்தோ நாம நத்தி², அத்தனோ அத்தனோ ஸாகா²ய ஹெட்டா² பதிதானேவ பரிபு⁴ஞ்ஜந்தி. அஞ்ஞஸ்ஸ கொட்டா²ஸதோ அஞ்ஞஸ கொட்டா²ஸங் பரிவத்தித்வா க³தம்பி ‘‘ந அம்ஹாகங் ஸாகா²ய ப²ல’’ந்தி ஞத்வா நோ கா²த³ந்தி. யாவத³த்த²ங் ப⁴க்கி²த்வாதி கண்ட²ப்பமாணேன கா²தி³த்வா. ஸாக²ங் ப⁴ஞ்ஜித்வாதி ச²த்தப்பமாணமத்தங் சி²ந்தி³த்வா சா²யங் கத்வா பக்காமி. யத்ர ஹி நாமாதி யோ ஹி நாம. பக்கமிஸ்ஸதீதி பக்கந்தோ. நாதா³ஸீதி தே³வதாய ஆனுபா⁴வேன ப²லமேவ ந க³ண்ஹி. ஏவஞ்ஹி ஸா அதி⁴ட்டா²ஸி.
Āḷhakathālikāti taṇḍulāḷhakassa bhattapacanathālikā. Khuddaṃ madhunti khuddamakkhikāhi kataṃ daṇḍakamadhuṃ. Anelakanti niddosaṃ. Na ca sudaṃ aññamaññassa phalāni hiṃsantīti aññamaññassa koṭṭhāse phalāni na hiṃsanti. Attano koṭṭhāsehi mūlaṃ vā tacaṃ vā pattaṃ vā chindanto nāma natthi, attano attano sākhāya heṭṭhā patitāneva paribhuñjanti. Aññassa koṭṭhāsato aññasa koṭṭhāsaṃ parivattitvā gatampi ‘‘na amhākaṃ sākhāya phala’’nti ñatvā no khādanti. Yāvadatthaṃ bhakkhitvāti kaṇṭhappamāṇena khāditvā. Sākhaṃ bhañjitvāti chattappamāṇamattaṃ chinditvā chāyaṃ katvā pakkāmi. Yatra hi nāmāti yo hi nāma. Pakkamissatīti pakkanto. Nādāsīti devatāya ānubhāvena phalameva na gaṇhi. Evañhi sā adhiṭṭhāsi.
தேனுபஸங்கமீதி ஜனபத³வாஸீஹி க³ந்த்வா, ‘‘மஹாராஜ, ருக்கோ² ப²லங் ந க³ண்ஹி, அம்ஹாகங் நு கோ² தோ³ஸோ தும்ஹாக’’ந்தி வுத்தே ‘‘நேவ மய்ஹங் தோ³ஸோ அத்தி², ந ஜானபதா³னங், அம்ஹாகங் விஜிதே அத⁴ம்மோ நாம ந வத்ததி, கேன நு கோ² காரணேன ருக்கோ² ந ப²லிதோ, ஸக்கங் உபஸங்கமித்வா புச்சி²ஸ்ஸாமீ’’தி சிந்தெத்வா யேன ஸக்கோ தே³வானமிந்தோ³ தேனுபஸங்கமி. பவத்தேஸீதி பரிவத்தேஸி. உம்மூலமகாஸீதி உத்³த⁴ங்மூலங் அகாஸி. அபி நு த்வந்தி அபி நு தவ. அட்டி²தாயேவாதி அட்டி²தாய ஏவ. ஸச்ச²வீனீதி ஸமானச்ச²வீனி பகதிட்டா²னே டி²தானி. ந பச்சக்கோஸதீதி நப்படிக்கோஸதி. ரோஸந்தந்தி க⁴ட்டெந்தங். ப⁴ண்ட³ந்தந்தி பஹரந்தங்.
Tenupasaṅkamīti janapadavāsīhi gantvā, ‘‘mahārāja, rukkho phalaṃ na gaṇhi, amhākaṃ nu kho doso tumhāka’’nti vutte ‘‘neva mayhaṃ doso atthi, na jānapadānaṃ, amhākaṃ vijite adhammo nāma na vattati, kena nu kho kāraṇena rukkho na phalito, sakkaṃ upasaṅkamitvā pucchissāmī’’ti cintetvā yena sakko devānamindo tenupasaṅkami. Pavattesīti parivattesi. Ummūlamakāsīti uddhaṃmūlaṃ akāsi. Api nu tvanti api nu tava. Aṭṭhitāyevāti aṭṭhitāya eva. Sacchavīnīti samānacchavīni pakatiṭṭhāne ṭhitāni. Na paccakkosatīti nappaṭikkosati. Rosantanti ghaṭṭentaṃ. Bhaṇḍantanti paharantaṃ.
ஸுனெத்தோதி நெத்தா வுச்சந்தி அக்கீ²னி, தேஸங் ஸுந்த³ரதாய ஸுனெத்தோ. தித்த²கரோதி ஸுக³திஓகா³ஹனதித்த²ஸ்ஸ காரகோ. வீதராகோ³தி விக்க²ம்ப⁴னவஸேன விக³தராகோ³. பஸவதீதி படிலப⁴தி. தி³ட்டி²ஸம்பன்னந்தி த³ஸ்ஸனஸம்பன்னங், ஸோதாபன்னந்தி அத்தோ². க²ந்திந்தி அத்தனோ கு³ணக²ணனங். யதா²மங் ஸப்³ரஹ்மசாரீஸூதி யதா² இமங் ஸப்³ரஹ்மசாரீஸு அக்கோஸனபரிபா⁴ஸனங், அஞ்ஞங் ஏவரூபங் கு³ணக²ந்திங் ந வதா³மீதி அத்தோ². ந நோ ஸமஸப்³ரஹ்மசாரீஸூதி எத்த² ஸமஜனோ நாம ஸகஜனோ வுச்சதி. தஸ்மா ந நோ ஸகேஸு ஸமானப்³ரஹ்மசாரீஸு சித்தானி பது³ட்டா²னி ப⁴விஸ்ஸந்தீதி அயமெத்த² அத்தோ².
Sunettoti nettā vuccanti akkhīni, tesaṃ sundaratāya sunetto. Titthakaroti sugatiogāhanatitthassa kārako. Vītarāgoti vikkhambhanavasena vigatarāgo. Pasavatīti paṭilabhati. Diṭṭhisampannanti dassanasampannaṃ, sotāpannanti attho. Khantinti attano guṇakhaṇanaṃ. Yathāmaṃ sabrahmacārīsūti yathā imaṃ sabrahmacārīsu akkosanaparibhāsanaṃ, aññaṃ evarūpaṃ guṇakhantiṃ na vadāmīti attho. Na no samasabrahmacārīsūti ettha samajano nāma sakajano vuccati. Tasmā na no sakesu samānabrahmacārīsu cittāni paduṭṭhāni bhavissantīti ayamettha attho.
ஜோதிபாலோ ச கோ³விந்தோ³தி நாமேன ஜோதிபாலோ டா²னேன மஹாகோ³விந்தோ³. ஸத்தபுரோஹிதோதி ரேணுஆதீ³னங் ஸத்தன்னங் ராஜூனங் புரோஹிதோ. அஹிங்ஸகா அதீதங்ஸேதி ஏதே ச² ஸத்தா²ரோ அதீதங்ஸே அஹிங்ஸகா அஹேஸுங். நிராமக³ந்தா⁴தி கோதா⁴மக³ந்தே⁴ன நிராமக³ந்தா⁴. கருணேவிமுத்தாதி கருணஜ்ஜா²னே அதி⁴முத்தா, கருணாய ச கருணாபுப்³ப³பா⁴கே³ ச டி²தா. யேதேதி ஏதே, அயமேவ வா பாடோ². ந ஸாது⁴ரூபங் ஆஸீதே³தி ஸாது⁴ஸபா⁴வங் ந க⁴ட்டெய்ய. தி³ட்டி²ட்டா²னப்பஹாயினந்தி த்³வாஸட்டி²தி³ட்டி²க³தப்பஹாயினங். ஸத்தமோதி அரஹத்ததோ பட்டா²ய ஸத்தமோ. அவீதராகோ³தி அவிக³தராகோ³. ஏதேன அனாகா³மிபா⁴வங் படிக்கி²பதி. பஞ்சிந்த்³ரியா முதூ³தி பஞ்ச விபஸ்ஸனிந்த்³ரியானி முதூ³னி. தஸ்ஸ ஹி தானி ஸகதா³கா³மிங் உபாதா³ய முதூ³னி நாம ஹொந்தி. விபஸ்ஸனாதி ஸங்கா²ரபரிக்³க³ஹஞாணங். புப்³பே³வ உபஹஞ்ஞதீதி பட²மதரஞ்ஞேவ உபஹஞ்ஞதி. அக்க²தோதி கு³ணக²ணனேன அக்க²தோ அனுபஹதோ ஹுத்வா. ஸேஸங் ஸப்³ப³த்த² உத்தானமேவாதி.
Jotipālo ca govindoti nāmena jotipālo ṭhānena mahāgovindo. Sattapurohitoti reṇuādīnaṃ sattannaṃ rājūnaṃ purohito. Ahiṃsakā atītaṃseti ete cha satthāro atītaṃse ahiṃsakā ahesuṃ. Nirāmagandhāti kodhāmagandhena nirāmagandhā. Karuṇevimuttāti karuṇajjhāne adhimuttā, karuṇāya ca karuṇāpubbabhāge ca ṭhitā. Yeteti ete, ayameva vā pāṭho. Na sādhurūpaṃ āsīdeti sādhusabhāvaṃ na ghaṭṭeyya. Diṭṭhiṭṭhānappahāyinanti dvāsaṭṭhidiṭṭhigatappahāyinaṃ. Sattamoti arahattato paṭṭhāya sattamo. Avītarāgoti avigatarāgo. Etena anāgāmibhāvaṃ paṭikkhipati. Pañcindriyā mudūti pañca vipassanindriyāni mudūni. Tassa hi tāni sakadāgāmiṃ upādāya mudūni nāma honti. Vipassanāti saṅkhārapariggahañāṇaṃ. Pubbeva upahaññatīti paṭhamataraññeva upahaññati. Akkhatoti guṇakhaṇanena akkhato anupahato hutvā. Sesaṃ sabbattha uttānamevāti.
த⁴ம்மிகவக்³கோ³ பஞ்சமோ.
Dhammikavaggo pañcamo.
பட²மபண்ணாஸகங் நிட்டி²தங்.
Paṭhamapaṇṇāsakaṃ niṭṭhitaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 12. த⁴ம்மிகஸுத்தங் • 12. Dhammikasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 12. த⁴ம்மிகஸுத்தவண்ணனா • 12. Dhammikasuttavaṇṇanā
