| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
২. ধম্মুদ্ধচ্চৰারনিদ্দেসো
2. Dhammuddhaccavāraniddeso
৬. কথং ধম্মুদ্ধচ্চৰিগ্গহিতং মানসং হোতি? অনিচ্চতো মনসিকরোতো ওভাসো উপ্পজ্জতি, ওভাসো ধম্মোতি ওভাসং আৰজ্জতি, ততো ৰিক্খেপো উদ্ধচ্চং। তেন উদ্ধচ্চেন ৰিগ্গহিতমানসো অনিচ্চতো উপট্ঠানং যথাভূতং নপ্পজানাতি, দুক্খতো উপট্ঠানং যথাভূতং নপ্পজানাতি, অনত্ততো উপট্ঠানং যথাভূতং নপ্পজানাতি। তেন ৰুচ্চতি – ‘‘ধম্মুদ্ধচ্চৰিগ্গহিতমানসো হোতি সো সমযো, যং তং চিত্তং অজ্ঝত্তমেৰ সন্তিট্ঠতি সন্নিসীদতি একোদি হোতি সমাধিযতি । তস্স মগ্গো সঞ্জাযতী’’তি কথং মগ্গো সঞ্জাযতি…পে॰… এৰং মগ্গো সঞ্জাযতি, এৰং সঞ্ঞোজনানি পহীযন্তি, অনুসযা ব্যন্তীহোন্তি।
6. Kathaṃ dhammuddhaccaviggahitaṃ mānasaṃ hoti? Aniccato manasikaroto obhāso uppajjati, obhāso dhammoti obhāsaṃ āvajjati, tato vikkhepo uddhaccaṃ. Tena uddhaccena viggahitamānaso aniccato upaṭṭhānaṃ yathābhūtaṃ nappajānāti, dukkhato upaṭṭhānaṃ yathābhūtaṃ nappajānāti, anattato upaṭṭhānaṃ yathābhūtaṃ nappajānāti. Tena vuccati – ‘‘dhammuddhaccaviggahitamānaso hoti so samayo, yaṃ taṃ cittaṃ ajjhattameva santiṭṭhati sannisīdati ekodi hoti samādhiyati . Tassa maggo sañjāyatī’’ti kathaṃ maggo sañjāyati…pe… evaṃ maggo sañjāyati, evaṃ saññojanāni pahīyanti, anusayā byantīhonti.
অনিচ্চতো মনসিকরোতো ঞাণং উপ্পজ্জতি, পীতি উপ্পজ্জতি, পস্সদ্ধি উপ্পজ্জতি, সুখং উপ্পজ্জতি, অধিমোক্খো উপ্পজ্জতি, পগ্গহো উপ্পজ্জতি, উপট্ঠানং উপ্পজ্জতি, উপেক্খা উপ্পজ্জতি, নিকন্তি উপ্পজ্জতি, ‘নিকন্তি ধম্মো’তি নিকন্তিং আৰজ্জতি। ততো ৰিক্খেপো উদ্ধচ্চং। তেন উদ্ধচ্চেন ৰিগ্গহিতমানসো অনিচ্চতো উপট্ঠানং যথাভূতং নপ্পজানাতি, দুক্খতো উপট্ঠানং যথাভূতং নপ্পজানাতি, অনত্ততো উপট্ঠানং যথাভূতং নপ্পজানাতি। তেন ৰুচ্চতি – ‘‘ধম্মুদ্ধচ্চৰিগ্গহিতমানসো হোতি সো সমযো, যং তং চিত্তং অজ্ঝত্তমেৰ সন্তিট্ঠতি সন্নিসীদতি একোদি হোতি সমাধিযতি। তস্স মগ্গো সঞ্জাযতী’’তি। কথং মগ্গো সঞ্জাযতি…পে॰… এৰং মগ্গো সঞ্জাযতি, এৰং সঞ্ঞোজনানি পহীযন্তি, অনুসযা ব্যন্তীহোন্তি।
Aniccato manasikaroto ñāṇaṃ uppajjati, pīti uppajjati, passaddhi uppajjati, sukhaṃ uppajjati, adhimokkho uppajjati, paggaho uppajjati, upaṭṭhānaṃ uppajjati, upekkhā uppajjati, nikanti uppajjati, ‘nikanti dhammo’ti nikantiṃ āvajjati. Tato vikkhepo uddhaccaṃ. Tena uddhaccena viggahitamānaso aniccato upaṭṭhānaṃ yathābhūtaṃ nappajānāti, dukkhato upaṭṭhānaṃ yathābhūtaṃ nappajānāti, anattato upaṭṭhānaṃ yathābhūtaṃ nappajānāti. Tena vuccati – ‘‘dhammuddhaccaviggahitamānaso hoti so samayo, yaṃ taṃ cittaṃ ajjhattameva santiṭṭhati sannisīdati ekodi hoti samādhiyati. Tassa maggo sañjāyatī’’ti. Kathaṃ maggo sañjāyati…pe… evaṃ maggo sañjāyati, evaṃ saññojanāni pahīyanti, anusayā byantīhonti.
দুক্খতো মনসিকরোতো…পে॰… অনত্ততো মনসিকরোতো ওভাসো উপ্পজ্জতি…পে॰… ঞাণং উপ্পজ্জতি, পীতি উপ্পজ্জতি, পস্সদ্ধি উপ্পজ্জতি, সুখং উপ্পজ্জতি, অধিমোক্খো উপ্পজ্জতি, পগ্গহো উপ্পজ্জতি, উপট্ঠানং উপ্পজ্জতি, উপেক্খা উপ্পজ্জতি, নিকন্তি উপ্পজ্জতি, ‘নিকন্তি ধম্মো’তি নিকন্তিং আৰজ্জতি। ততো ৰিক্খেপো উদ্ধচ্চং। তেন উদ্ধচ্চেন ৰিগ্গহিতমানসো অনত্ততো উপট্ঠানং, অনিচ্চতো উপট্ঠানং, দুক্খতো উপট্ঠানং যথাভূতং নপ্পজানাতি । তেন ৰুচ্চতি – ‘‘ধম্মুদ্ধচ্চৰিগ্গহিতমানসো…পে॰… এৰং সঞ্ঞোজনানি পহীযন্তি, অনুসযা ব্যন্তীহোন্তি’’।
Dukkhato manasikaroto…pe… anattato manasikaroto obhāso uppajjati…pe… ñāṇaṃ uppajjati, pīti uppajjati, passaddhi uppajjati, sukhaṃ uppajjati, adhimokkho uppajjati, paggaho uppajjati, upaṭṭhānaṃ uppajjati, upekkhā uppajjati, nikanti uppajjati, ‘nikanti dhammo’ti nikantiṃ āvajjati. Tato vikkhepo uddhaccaṃ. Tena uddhaccena viggahitamānaso anattato upaṭṭhānaṃ, aniccato upaṭṭhānaṃ, dukkhato upaṭṭhānaṃ yathābhūtaṃ nappajānāti . Tena vuccati – ‘‘dhammuddhaccaviggahitamānaso…pe… evaṃ saññojanāni pahīyanti, anusayā byantīhonti’’.
রূপং অনিচ্চতো মনসিকরোতো…পে॰… রূপং দুক্খতো মনসিকরোতো… রূপং অনত্ততো মনসিকরোতো… ৰেদনং…পে॰… সঞ্ঞং… সঙ্খারে… ৰিঞ্ঞাণং… চক্খুং…পে॰… জরামরণং অনিচ্চতো মনসিকরোতো…পে॰… জরামরণং দুক্খতো মনসিকরোতো, জরামরণং অনত্ততো মনসিকরোতো ওভাসো উপ্পজ্জতি…পে॰… ঞাণং উপ্পজ্জতি, পীতি উপ্পজ্জতি, পস্সদ্ধি উপ্পজ্জতি, সুখং উপ্পজ্জতি, অধিমোক্খো উপ্পজ্জতি, পগ্গহো উপ্পজ্জতি, উপট্ঠানং উপ্পজ্জতি, উপেক্খা উপ্পজ্জতি, নিকন্তি উপ্পজ্জতি, ‘নিকন্তি ধম্মো’তি নিকন্তিং আৰজ্জতি। ততো ৰিক্খেপো উদ্ধচ্চং। তেন উদ্ধচ্চেন ৰিগ্গহিতমানসো। জরামরণং অনত্ততো উপট্ঠানং যথাভূতং নপ্পজানাতি। জরামরণং অনিচ্চতো উপট্ঠানং যথাভূতং নপ্পজানাতি, জরামরণং দুক্খতো উপট্ঠানং যথাভূতং নপ্পজানাতি। তেন ৰুচ্চতি – ‘‘ধম্মুদ্ধচ্চৰিগ্গহিতমানসো হোতি। সো সমযো, যং তং চিত্তং অজ্ঝত্তমেৰ সন্তিট্ঠতি সন্নিসীদতি একোদি হোতি সমাধিযতি। তস্স মগ্গো সঞ্জাযতী’’তি। কথং মগ্গো সঞ্জাযতি…পে॰… এৰং মগ্গো সঞ্জাযতি। এৰং সঞ্ঞোজনানি পহীযন্তি, অনুসযা ব্যন্তীহোন্তি। এৰং ধম্মুদ্ধচ্চৰিগ্গহিতং মানসং হোতি।
Rūpaṃ aniccato manasikaroto…pe… rūpaṃ dukkhato manasikaroto… rūpaṃ anattato manasikaroto… vedanaṃ…pe… saññaṃ… saṅkhāre… viññāṇaṃ… cakkhuṃ…pe… jarāmaraṇaṃ aniccato manasikaroto…pe… jarāmaraṇaṃ dukkhato manasikaroto, jarāmaraṇaṃ anattato manasikaroto obhāso uppajjati…pe… ñāṇaṃ uppajjati, pīti uppajjati, passaddhi uppajjati, sukhaṃ uppajjati, adhimokkho uppajjati, paggaho uppajjati, upaṭṭhānaṃ uppajjati, upekkhā uppajjati, nikanti uppajjati, ‘nikanti dhammo’ti nikantiṃ āvajjati. Tato vikkhepo uddhaccaṃ. Tena uddhaccena viggahitamānaso. Jarāmaraṇaṃ anattato upaṭṭhānaṃ yathābhūtaṃ nappajānāti. Jarāmaraṇaṃ aniccato upaṭṭhānaṃ yathābhūtaṃ nappajānāti, jarāmaraṇaṃ dukkhato upaṭṭhānaṃ yathābhūtaṃ nappajānāti. Tena vuccati – ‘‘dhammuddhaccaviggahitamānaso hoti. So samayo, yaṃ taṃ cittaṃ ajjhattameva santiṭṭhati sannisīdati ekodi hoti samādhiyati. Tassa maggo sañjāyatī’’ti. Kathaṃ maggo sañjāyati…pe… evaṃ maggo sañjāyati. Evaṃ saññojanāni pahīyanti, anusayā byantīhonti. Evaṃ dhammuddhaccaviggahitaṃ mānasaṃ hoti.
৭.
7.
ওভাসে চেৰ ঞাণে চ, পীতিযা চ ৰিকম্পতি।
Obhāse ceva ñāṇe ca, pītiyā ca vikampati;
পস্সদ্ধিযা সুখে চেৰ, যেহি চিত্তং পৰেধতি॥
Passaddhiyā sukhe ceva, yehi cittaṃ pavedhati.
অধিমোক্খে চ পগ্গাহে, উপট্ঠানে চ কম্পতি।
Adhimokkhe ca paggāhe, upaṭṭhāne ca kampati;
উপেক্খাৰজ্জনায চেৰ, উপেক্খায চ নিকন্তিযা॥
Upekkhāvajjanāya ceva, upekkhāya ca nikantiyā.
ইমানি দস ঠানানি, পঞ্ঞা যস্স পরিচ্চিতা।
Imāni dasa ṭhānāni, paññā yassa pariccitā;
ধম্মুদ্ধচ্চকুসলো হোতি, ন চ সম্মোহ গচ্ছতি॥
Dhammuddhaccakusalo hoti, na ca sammoha gacchati.
ৰিক্খিপতি চেৰ কিলিস্সতি চ, চৰতি চিত্তভাৰনা।
Vikkhipati ceva kilissati ca, cavati cittabhāvanā;
ৰিক্খিপতি ন কিলিস্সতি, ভাৰনা পরিহাযতি॥
Vikkhipati na kilissati, bhāvanā parihāyati.
ৰিক্খিপতি ন কিলিস্সতি, ভাৰনা ন পরিহাযতি।
Vikkhipati na kilissati, bhāvanā na parihāyati;
ন চ ৰিক্খিপতে চিত্তং ন কিলিস্সতি, ন চৰতি চিত্তভাৰনা॥
Na ca vikkhipate cittaṃ na kilissati, na cavati cittabhāvanā.
ইমেহি চতূহি ঠানেহি চিত্তস্স সঙ্খেপৰিক্খেপৰিগ্গহিতং 1 দস ঠানে সম্পজানাতীতি।
Imehi catūhi ṭhānehi cittassa saṅkhepavikkhepaviggahitaṃ 2 dasa ṭhāne sampajānātīti.
যুগনদ্ধকথা নিট্ঠিতা।
Yuganaddhakathā niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ২. ধম্মুদ্ধচ্চৰারনিদ্দেসৰণ্ণনা • 2. Dhammuddhaccavāraniddesavaṇṇanā
