| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. ப்³ராஹ்மணஸங்யுத்தங்
7. Brāhmaṇasaṃyuttaṃ
1. அரஹந்தவக்³கோ³
1. Arahantavaggo
1. த⁴னஞ்ஜானீஸுத்தவண்ணனா
1. Dhanañjānīsuttavaṇṇanā
187. ப்³ராஹ்மணஸங்யுத்தஸ்ஸ பட²மே த⁴னஞ்ஜானீதி த⁴னஞ்ஜானிகொ³த்தா. உக்கட்ட²கொ³த்தா கிரேஸா. ஸேஸப்³ராஹ்மணா கிர ப்³ரஹ்முனோ முக²தோ ஜாதா, த⁴னஞ்ஜானிகொ³த்தா மத்த²கங் பி⁴ந்தி³த்வா நிக்க²ந்தாதி தேஸங் லத்³தி⁴. உதா³னங் உதா³னேஸீதி கஸ்மா உதா³னேஸி? ஸோ கிர ப்³ராஹ்மணோ மிச்சா²தி³ட்டி²கோ ‘‘பு³த்³தோ⁴ த⁴ம்மோ ஸங்கோ⁴’’தி வுத்தே கண்ணே பித³ஹதி, த²த்³தோ⁴ க²தி³ரகா²ணுஸதி³ஸோ. ப்³ராஹ்மணீ பன ஸோதாபன்னா அரியஸாவிகா. ப்³ராஹ்மணோ தா³னங் தெ³ந்தோ பஞ்சஸதானங் ப்³ராஹ்மணானங் அப்போத³கங் பாயாஸங் தே³தி, ப்³ராஹ்மணீ பு³த்³த⁴ப்பமுக²ஸ்ஸ ஸங்க⁴ஸ்ஸ நானாரஸபோ⁴ஜனங். ப்³ராஹ்மணஸ்ஸ தா³னதி³வஸே ப்³ராஹ்மணீ தஸ்ஸ வஸவத்திதாய பஹீனமச்சே²ரதாய ச ஸஹத்தா² பரிவிஸதி. ப்³ராஹ்மணியா பன தா³னதி³வஸே ப்³ராஹ்மணோ பாதோவ க⁴ரா நிக்க²மித்வா பலாயதி. அதே²கதி³வஸங் ப்³ராஹ்மணோ ப்³ராஹ்மணியா ஸத்³தி⁴ங் அஸம்மந்தெத்வா பஞ்சஸதே ப்³ராஹ்மணே நிமந்தெத்வா ப்³ராஹ்மணிங் ஆஹ – ‘‘ஸ்வே போ⁴தி அம்ஹாகங் க⁴ரே பஞ்சஸதா ப்³ராஹ்மணா பு⁴ஞ்ஜிஸ்ஸந்தீ’’தி. மயா கிங் காதப்³ப³ங் ப்³ராஹ்மணாதி? தயா அஞ்ஞங் கிஞ்சி காதப்³ப³ங் நத்தி², ஸப்³ப³ங் பசனபரிவேஸனங் அஞ்ஞே கரிஸ்ஸந்தி. யங் பன த்வங் டி²தாபி நிஸின்னாபி கி²பித்வாபி உக்காஸித்வாபி ‘‘நமோ பு³த்³த⁴ஸ்ஸா’’தி தஸ்ஸ முண்ட³கஸ்ஸ ஸமணகஸ்ஸ நமக்காரங் கரோஸி, தங் ஸ்வே ஏகதி³வஸமத்தங் மா அகாஸி. தங் ஹி ஸுத்வா ப்³ராஹ்மணா அனத்தமனா ஹொந்தி, மா மங் ப்³ராஹ்மணேஹி பி⁴ந்த³ஸீதி. த்வங் ப்³ராஹ்மணேஹி வா பி⁴ஜ்ஜ தே³வேஹி வா, அஹங் பன ஸத்தா²ரங் அனுஸ்ஸரித்வா ந ஸக்கோமி அனமஸ்ஸமானா ஸண்டா²துந்தி. போ⁴தி குலஸதிகே கா³மே கா³மத்³வாரம்பி தாவ பித³ஹிதுங் வாயமந்தி, த்வங் த்³வீஹங்கு³லேஹி பித³ஹிதப்³ப³ங் முக²ங் ப்³ராஹ்மணானங் போ⁴ஜனகாலமத்தங் பித³ஹிதுங் ந ஸக்கோஸீதி. ஏவங் புனப்புனங் கதெ²த்வாபி ஸோ நிவாரேதுங் அஸக்கொந்தோ உஸ்ஸீஸகே ட²பிதங் மண்ட³லக்³க³க²க்³க³ங் க³ஹெத்வா – ‘‘போ⁴தி ஸசே ஸ்வே ப்³ராஹ்மணேஸு நிஸின்னேஸு தங் முண்ட³ஸமணகங் நமஸ்ஸஸி, இமினா தங் க²க்³கே³ன பாத³தலதோ பட்டா²ய யாவ கேஸமத்த²கா களீரங் விய கொட்டெத்வா ராஸிங் கரிஸ்ஸாமீ’’தி இமங் கா³த²ங் அபா⁴ஸி –
187. Brāhmaṇasaṃyuttassa paṭhame dhanañjānīti dhanañjānigottā. Ukkaṭṭhagottā kiresā. Sesabrāhmaṇā kira brahmuno mukhato jātā, dhanañjānigottā matthakaṃ bhinditvā nikkhantāti tesaṃ laddhi. Udānaṃ udānesīti kasmā udānesi? So kira brāhmaṇo micchādiṭṭhiko ‘‘buddho dhammo saṅgho’’ti vutte kaṇṇe pidahati, thaddho khadirakhāṇusadiso. Brāhmaṇī pana sotāpannā ariyasāvikā. Brāhmaṇo dānaṃ dento pañcasatānaṃ brāhmaṇānaṃ appodakaṃ pāyāsaṃ deti, brāhmaṇī buddhappamukhassa saṅghassa nānārasabhojanaṃ. Brāhmaṇassa dānadivase brāhmaṇī tassa vasavattitāya pahīnamaccheratāya ca sahatthā parivisati. Brāhmaṇiyā pana dānadivase brāhmaṇo pātova gharā nikkhamitvā palāyati. Athekadivasaṃ brāhmaṇo brāhmaṇiyā saddhiṃ asammantetvā pañcasate brāhmaṇe nimantetvā brāhmaṇiṃ āha – ‘‘sve bhoti amhākaṃ ghare pañcasatā brāhmaṇā bhuñjissantī’’ti. Mayā kiṃ kātabbaṃ brāhmaṇāti? Tayā aññaṃ kiñci kātabbaṃ natthi, sabbaṃ pacanaparivesanaṃ aññe karissanti. Yaṃ pana tvaṃ ṭhitāpi nisinnāpi khipitvāpi ukkāsitvāpi ‘‘namo buddhassā’’ti tassa muṇḍakassa samaṇakassa namakkāraṃ karosi, taṃ sve ekadivasamattaṃ mā akāsi. Taṃ hi sutvā brāhmaṇā anattamanā honti, mā maṃ brāhmaṇehi bhindasīti. Tvaṃ brāhmaṇehi vā bhijja devehi vā, ahaṃ pana satthāraṃ anussaritvā na sakkomi anamassamānā saṇṭhātunti. Bhoti kulasatike gāme gāmadvārampi tāva pidahituṃ vāyamanti, tvaṃ dvīhaṅgulehi pidahitabbaṃ mukhaṃ brāhmaṇānaṃ bhojanakālamattaṃ pidahituṃ na sakkosīti. Evaṃ punappunaṃ kathetvāpi so nivāretuṃ asakkonto ussīsake ṭhapitaṃ maṇḍalaggakhaggaṃ gahetvā – ‘‘bhoti sace sve brāhmaṇesu nisinnesu taṃ muṇḍasamaṇakaṃ namassasi, iminā taṃ khaggena pādatalato paṭṭhāya yāva kesamatthakā kaḷīraṃ viya koṭṭetvā rāsiṃ karissāmī’’ti imaṃ gāthaṃ abhāsi –
‘‘இமினா மண்ட³லக்³கே³ன, பாத³தோ யாவ மத்த²கா;
‘‘Iminā maṇḍalaggena, pādato yāva matthakā;
களீரமிவ சே²ஜ்ஜாமி, யதி³ மிச்ச²ங் ந காஹஸி.
Kaḷīramiva chejjāmi, yadi micchaṃ na kāhasi.
‘‘ஸசே பு³த்³தோ⁴தி ப⁴ணஸி, ஸசே த⁴ம்மோதி பா⁴ஸஸி;
‘‘Sace buddhoti bhaṇasi, sace dhammoti bhāsasi;
ஸசே ஸங்கோ⁴தி கித்தேஸி, ஜீவந்தீ மே நிவேஸனே’’தி.
Sace saṅghoti kittesi, jīvantī me nivesane’’ti.
அரியஸாவிகா பன பத²வீ விய து³ப்பகம்பா, ஸினேரு விய து³ப்பரிவத்தியா. ஸா தேன நங் ஏவமாஹ –
Ariyasāvikā pana pathavī viya duppakampā, sineru viya dupparivattiyā. Sā tena naṃ evamāha –
‘‘ஸசே மே அங்க³மங்கா³னி, காமங் சே²ஜ்ஜஸி ப்³ராஹ்மண;
‘‘Sace me aṅgamaṅgāni, kāmaṃ chejjasi brāhmaṇa;
நேவாஹங் விரமிஸ்ஸாமி, பு³த்³த⁴ஸெட்ட²ஸ்ஸ ஸாஸனா.
Nevāhaṃ viramissāmi, buddhaseṭṭhassa sāsanā.
‘‘நாஹங் ஓக்கா வரத⁴ரா, ஸக்கா ரோத⁴யிதுங் ஜினா;
‘‘Nāhaṃ okkā varadharā, sakkā rodhayituṃ jinā;
தீ⁴தாஹங் பு³த்³த⁴ஸெட்ட²ஸ்ஸ, சி²ந்த³ வா மங் வத⁴ஸ்ஸு வா’’தி.
Dhītāhaṃ buddhaseṭṭhassa, chinda vā maṃ vadhassu vā’’ti.
ஏவங் த⁴னஞ்ஜானிக³ஜ்ஜிதங் நாம க³ஜ்ஜந்தீ பஞ்ச கா³தா²ஸதானி அபா⁴ஸி. ப்³ராஹ்மணோ ப்³ராஹ்மணிங் பராமஸிதுங் வா பஹரிதுங் வா அஸக்கொந்தோ ‘‘போ⁴தி யங் தே ருச்சதி, தங் கரோஹீ’’தி வத்வா க²க்³க³ங் ஸயனே கி²பி. புனதி³வஸே கே³ஹங் ஹரிதுபலித்தங் காராபெத்வா லாஜாபுண்ணக⁴டமாலாக³ந்தா⁴தீ³ஹி தத்த² தத்த² அலங்காராபெத்வா பஞ்சன்னங் ப்³ராஹ்மணஸதானங் நவஸப்பிஸக்க²ரமது⁴யுத்தங் அப்போத³கபாயாஸங் படியாதா³பெத்வா காலங் ஆரோசாபேஸி.
Evaṃ dhanañjānigajjitaṃ nāma gajjantī pañca gāthāsatāni abhāsi. Brāhmaṇo brāhmaṇiṃ parāmasituṃ vā paharituṃ vā asakkonto ‘‘bhoti yaṃ te ruccati, taṃ karohī’’ti vatvā khaggaṃ sayane khipi. Punadivase gehaṃ haritupalittaṃ kārāpetvā lājāpuṇṇaghaṭamālāgandhādīhi tattha tattha alaṅkārāpetvā pañcannaṃ brāhmaṇasatānaṃ navasappisakkharamadhuyuttaṃ appodakapāyāsaṃ paṭiyādāpetvā kālaṃ ārocāpesi.
ப்³ராஹ்மணீபி பாதோவ க³ந்தோ⁴த³கேன ஸயங் ந்ஹாயித்வா ஸஹஸ்ஸக்³க⁴னகங் அஹதவத்த²ங் நிவாஸெத்வா பஞ்சஸதக்³க⁴னகங் ஏகங்ஸங் கத்வா ஸப்³பா³லங்காரபடிமண்டி³தா ஸுவண்ணகடச்சு²ங் க³ஹெத்வா ப⁴த்தக்³கே³ ப்³ராஹ்மணே பரிவிஸமானா தேஹி ஸத்³தி⁴ங் ஏகபந்தியங் நிஸின்னஸ்ஸ தஸ்ஸ ப்³ராஹ்மணஸ்ஸ ப⁴த்தங் உபஸங்ஹரந்தீ து³ன்னிக்கி²த்தே தா³ருப⁴ண்டே³ பக்க²லி. பக்க²லனக⁴ட்டனாய து³க்கா² வேத³னா உப்பஜ்ஜி. தஸ்மிங் ஸமயே த³ஸப³லங் ஸரி. ஸதிஸம்பன்னதாய பன பாயாஸபாதிங் அச²ட்³டெ³த்வா ஸணிகங் ஓதாரெத்வா பூ⁴மியங் ஸண்ட²பெத்வா பஞ்சன்னங் ப்³ராஹ்மணஸதானங் மஜ்ஜே² ஸிரஸி அஞ்ஜலிங் ட²பெத்வா யேன வேளுவனங், தேனஞ்ஜலிங் பணாமெத்வா இமங் உதா³னங் உதா³னேஸி.
Brāhmaṇīpi pātova gandhodakena sayaṃ nhāyitvā sahassagghanakaṃ ahatavatthaṃ nivāsetvā pañcasatagghanakaṃ ekaṃsaṃ katvā sabbālaṅkārapaṭimaṇḍitā suvaṇṇakaṭacchuṃ gahetvā bhattagge brāhmaṇe parivisamānā tehi saddhiṃ ekapantiyaṃ nisinnassa tassa brāhmaṇassa bhattaṃ upasaṃharantī dunnikkhitte dārubhaṇḍe pakkhali. Pakkhalanaghaṭṭanāya dukkhā vedanā uppajji. Tasmiṃ samaye dasabalaṃ sari. Satisampannatāya pana pāyāsapātiṃ achaḍḍetvā saṇikaṃ otāretvā bhūmiyaṃ saṇṭhapetvā pañcannaṃ brāhmaṇasatānaṃ majjhe sirasi añjaliṃ ṭhapetvā yena veḷuvanaṃ, tenañjaliṃ paṇāmetvā imaṃ udānaṃ udānesi.
தஸ்மிஞ்ச ஸமயே தேஸு ப்³ராஹ்மணேஸு கேசி பு⁴த்தா ஹொந்தி, கேசி பு⁴ஞ்ஜமானா, கேசி ஹத்தே² ஓதாரிதமத்தா, கேஸஞ்சி போ⁴ஜனங் புரதோ ட²பிதமத்தங் ஹோதி. தே தங் ஸத்³த³ங் ஸுத்வாவ ஸினேருமத்தேன முக்³க³ரேன ஸீஸே பஹடா விய கண்ணேஸு ஸூலேன வித்³தா⁴ விய து³க்க²தோ³மனஸ்ஸங் படிஸங்வேதி³யமானா ‘‘இமினா அஞ்ஞலத்³தி⁴கேன மயங் க⁴ரங் பவேஸிதா’’தி குஜ்ஜி²த்வா ஹத்தே² பிண்ட³ங் ச²ட்³டெ³த்வா முகே²ன க³ஹிதங் நிட்டு²பி⁴த்வா த⁴னுங் தி³ஸ்வா காகா விய ப்³ராஹ்மணங் அக்கோஸமானா தி³ஸாவிதி³ஸா பக்கமிங்ஸு. ப்³ராஹ்மணோ ஏவங் பி⁴ஜ்ஜித்வா க³ச்ச²ந்தே ப்³ராஹ்மணே தி³ஸ்வா ப்³ராஹ்மணிங் ஸீஸதோ பட்டா²ய ஓலோகெத்வா, ‘‘இத³மேவ ப⁴யங் ஸம்பஸ்ஸமானா மயங் ஹிய்யோ பட்டா²ய போ⁴திங் யாசந்தா ந லபி⁴ம்ஹா’’தி நானப்பகாரேஹி ப்³ராஹ்மணிங் அக்கோஸித்வா, ஏதங் ‘‘ஏவமேவங் பனா’’திஆதி³வசனங் அவோச.
Tasmiñca samaye tesu brāhmaṇesu keci bhuttā honti, keci bhuñjamānā, keci hatthe otāritamattā, kesañci bhojanaṃ purato ṭhapitamattaṃ hoti. Te taṃ saddaṃ sutvāva sinerumattena muggarena sīse pahaṭā viya kaṇṇesu sūlena viddhā viya dukkhadomanassaṃ paṭisaṃvediyamānā ‘‘iminā aññaladdhikena mayaṃ gharaṃ pavesitā’’ti kujjhitvā hatthe piṇḍaṃ chaḍḍetvā mukhena gahitaṃ niṭṭhubhitvā dhanuṃ disvā kākā viya brāhmaṇaṃ akkosamānā disāvidisā pakkamiṃsu. Brāhmaṇo evaṃ bhijjitvā gacchante brāhmaṇe disvā brāhmaṇiṃ sīsato paṭṭhāya oloketvā, ‘‘idameva bhayaṃ sampassamānā mayaṃ hiyyo paṭṭhāya bhotiṃ yācantā na labhimhā’’ti nānappakārehi brāhmaṇiṃ akkositvā, etaṃ ‘‘evamevaṃ panā’’tiādivacanaṃ avoca.
உபஸங்கமீதி ‘‘ஸமணோ கோ³தமோ கா³மனிக³மரட்ட²பூஜிதோ, ந ஸக்கா க³ந்த்வா யங் வா தங் வா வத்வா ஸந்தஜ்ஜேதுங், ஏகமேவ நங் பஞ்ஹங் புச்சி²ஸ்ஸாமீ’’தி க³ச்ச²ந்தோவ ‘‘கிங்ஸு செ²த்வா’’தி கா³த²ங் அபி⁴ஸங்க²ரித்வா – ‘‘ஸசே ‘அஸுகஸ்ஸ நாம வத⁴ங் ரோசேமீ’தி வக்க²தி, அத² நங் ‘யே துய்ஹங் ந ருச்சந்தி, தே மாரேதுகாமோஸி, லோகவதா⁴ய உப்பன்னோ, கிங் துய்ஹங் ஸமணபா⁴வேனா’தி? நிக்³க³ஹெஸ்ஸாமி. ஸசே ‘ந கஸ்ஸசி வத⁴ங் ரோசேமீ’தி வக்க²தி, அத² நங் ‘த்வங் ராகா³தீ³னம்பி வத⁴ங் ந இச்ச²ஸி. கஸ்மா ஸமணோ ஹுத்வா ஆஹிண்ட³ஸீ’தி? நிக்³க³ஹெஸ்ஸாமீ. இதி இமங் உப⁴தோகோடிகங் பஞ்ஹங் ஸமணோ கோ³தமோ நேவ கி³லிதுங் ந உக்³கி³லிதுங் ஸக்கி²ஸ்ஸதீ’’தி சிந்தெத்வா உபஸங்கமி . ஸம்மோதீ³தி அத்தனோ பண்டி³ததாய குத்³த⁴பா⁴வங் அத³ஸ்ஸெத்வா மது⁴ரகத²ங் கதெ²ந்தோ ஸம்மோதி³. பஞ்ஹோ தே³வதாஸங்யுத்தே கதி²தோ. ஸேஸம்பி ஹெட்டா² வித்தா²ரிதமேவாதி. பட²மங்.
Upasaṅkamīti ‘‘samaṇo gotamo gāmanigamaraṭṭhapūjito, na sakkā gantvā yaṃ vā taṃ vā vatvā santajjetuṃ, ekameva naṃ pañhaṃ pucchissāmī’’ti gacchantova ‘‘kiṃsu chetvā’’ti gāthaṃ abhisaṅkharitvā – ‘‘sace ‘asukassa nāma vadhaṃ rocemī’ti vakkhati, atha naṃ ‘ye tuyhaṃ na ruccanti, te māretukāmosi, lokavadhāya uppanno, kiṃ tuyhaṃ samaṇabhāvenā’ti? Niggahessāmi. Sace ‘na kassaci vadhaṃ rocemī’ti vakkhati, atha naṃ ‘tvaṃ rāgādīnampi vadhaṃ na icchasi. Kasmā samaṇo hutvā āhiṇḍasī’ti? Niggahessāmī. Iti imaṃ ubhatokoṭikaṃ pañhaṃ samaṇo gotamo neva gilituṃ na uggilituṃ sakkhissatī’’ti cintetvā upasaṅkami . Sammodīti attano paṇḍitatāya kuddhabhāvaṃ adassetvā madhurakathaṃ kathento sammodi. Pañho devatāsaṃyutte kathito. Sesampi heṭṭhā vitthāritamevāti. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. த⁴னஞ்ஜானீஸுத்தங் • 1. Dhanañjānīsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. த⁴னஞ்ஜானீஸுத்தவண்ணனா • 1. Dhanañjānīsuttavaṇṇanā
