| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
7. த⁴னஞ்ஜானிஸுத்தவண்ணனா
7. Dhanañjānisuttavaṇṇanā
445. ராஜக³ஹங் பரிக்கி²பித்வா டி²தபப்³ப³தஸ்ஸாதி பண்ட³வபப்³ப³தங் ஸந்தா⁴யாஹ. ராஜக³ஹனக³ரஸ்ஸ த³க்கி²ணதி³ஸாபா⁴கே³ பப்³ப³தஸ்ஸ ஸமீபே டி²தோ ஜனபதோ³ த³க்கி²ணாகி³ரி. தண்டு³லபுடகானங் பாலி எத்தா²தி தண்டு³லபாலி. தஸ்ஸ கிர த்³வாரஸமீபே தண்டு³லவாணிஜா தண்டு³லபஸிப்³ப³கே விவரித்வா படிபாடியா ட²பெத்வா நிஸீத³ந்தி, தேனஸ்ஸ ‘‘தண்டு³லபாலித்³வார’’ந்தி ஸமஞ்ஞா அஹோஸி. ஸப்³ப³மேவ ஸஸ்ஸங் க³ண்ஹாதீதி த³லித்³த³கஸ்ஸகானங் தி³வஸபரிப்³ப³யமத்தமேவ விஸ்ஸஜ்ஜெத்வா ஸப்³ப³மேவ ஆயதோ நிப்ப²ன்னங் த⁴ஞ்ஞங் க³ண்ஹாதி. மந்த³ஸஸ்ஸானீதி மந்த³னிப்ப²த்திகானி ஸஸ்ஸானி.
445.Rājagahaṃparikkhipitvā ṭhitapabbatassāti paṇḍavapabbataṃ sandhāyāha. Rājagahanagarassa dakkhiṇadisābhāge pabbatassa samīpe ṭhito janapado dakkhiṇāgiri. Taṇḍulapuṭakānaṃ pāli etthāti taṇḍulapāli. Tassa kira dvārasamīpe taṇḍulavāṇijā taṇḍulapasibbake vivaritvā paṭipāṭiyā ṭhapetvā nisīdanti, tenassa ‘‘taṇḍulapālidvāra’’nti samaññā ahosi. Sabbameva sassaṃ gaṇhātīti daliddakassakānaṃ divasaparibbayamattameva vissajjetvā sabbameva āyato nipphannaṃ dhaññaṃ gaṇhāti. Mandasassānīti mandanipphattikāni sassāni.
446. இமினா நயேனாதி தா³ஸகம்மகரஸ்ஸ நிவாஸனப⁴த்தவெத்தனானுப்பதா³னேன மங்க³லதி³வஸேஸு த⁴னவத்தா²லங்காரானுப்பதா³னாதி³னா ச போஸேதப்³போ³. மித்தாமச்சானங் பியவசனஅத்த²சரியாஸமானத்ததாதி³ மித்தாமச்சகரணீயங் கத்தப்³ப³ங், ததா² ஞாதிஸாலோஹிதானங். தத்த² ஆவாஹவிவாஹஸம்ப³த்³தே⁴ன ‘‘அம்ஹாகங் இமே’’தி ஞாயந்தீதி ஞாதீ, மாதாபிதாதி³ஸம்ப³த்³த⁴தாய ஸமானலோஹிதாதி ஸாலோஹிதா. ஸம்மா த³த³ந்தேஸுபி அஸஜ்ஜனதோ நத்தி² ஏதேஸங் திதீ²தி அதிதி², தேஸங் அத்தனா ஸமானபரிபோ⁴க³வஸேன அதிதி²கரணீயங் காதப்³ப³ங், அதிதி²ப³லீதி அத்தோ². ஞாதகபூ⁴தபுப்³பா³ பெத்திவிஸயங் உபக³தா புப்³ப³பேதா, த³க்கி²ணெய்யேஸு காலேன காலங் தா³னங் த³த்வா தேஸங் உத்³தி³ஸனங் புப்³ப³பேதகரணீயங், பேதப³லீதி அத்தோ². க³ந்த⁴புப்ப²விலேபனஜாலாப⁴த்தேஹி காலேன காலங் தே³வதானங் பூஜா தே³வதாகரணீயங், தே³வதாப³லீதி அத்தோ², ராஜகிச்சகரணங் உபட்டா²னங் ராஜகரணீயங். அயம்பி காயோதி அத்தனோ காயங் ஸந்தா⁴ய வத³தி. இமமத்த²ங் ஸந்தா⁴யாஹ ‘‘இமினா நயேன அத்தோ² வேதி³தப்³போ³’’தி.
446.Iminā nayenāti dāsakammakarassa nivāsanabhattavettanānuppadānena maṅgaladivasesu dhanavatthālaṅkārānuppadānādinā ca posetabbo. Mittāmaccānaṃ piyavacanaatthacariyāsamānattatādi mittāmaccakaraṇīyaṃ kattabbaṃ, tathā ñātisālohitānaṃ. Tattha āvāhavivāhasambaddhena ‘‘amhākaṃ ime’’ti ñāyantīti ñātī, mātāpitādisambaddhatāya samānalohitāti sālohitā. Sammā dadantesupi asajjanato natthi etesaṃ tithīti atithi, tesaṃ attanā samānaparibhogavasena atithikaraṇīyaṃ kātabbaṃ, atithibalīti attho. Ñātakabhūtapubbā pettivisayaṃ upagatā pubbapetā, dakkhiṇeyyesu kālena kālaṃ dānaṃ datvā tesaṃ uddisanaṃ pubbapetakaraṇīyaṃ, petabalīti attho. Gandhapupphavilepanajālābhattehi kālena kālaṃ devatānaṃ pūjā devatākaraṇīyaṃ, devatābalīti attho, rājakiccakaraṇaṃ upaṭṭhānaṃ rājakaraṇīyaṃ. Ayampi kāyoti attano kāyaṃ sandhāya vadati. Imamatthaṃ sandhāyāha ‘‘iminā nayena attho veditabbo’’ti.
447. பஞ்ச து³ஸ்ஸீல்யகம்மானீதி நிச்சஸீலபடிபக்க²த⁴ம்மா. த³ஸ அகுஸலகம்மபத²த⁴ம்மா த³ஸ து³ஸ்ஸீல்யகம்மானி. அத⁴ம்மசாரீ ஏவ விஸமசாரீ காயவிஸமாதி³சரணதோதி விஸமசாரீபத³ஸ்ஸ அத்தோ² விஸுங் ந வுத்தோ.
447.Pañca dussīlyakammānīti niccasīlapaṭipakkhadhammā. Dasa akusalakammapathadhammā dasa dussīlyakammāni. Adhammacārī eva visamacārī kāyavisamādicaraṇatoti visamacārīpadassa attho visuṃ na vutto.
448-453. ஓஸரந்தி அபஸக்கந்தி, கீ²யந்தீதி அத்தோ². தேனாஹ ‘‘பரிஹாயந்தீ’’தி. அபி⁴ஸரந்தீதி அபி⁴வட்³ட⁴னவஸேன பவத்தந்தி. தேனாஹ ‘‘வட்³ட⁴ந்தீ’’தி. தத்ராதி ப்³ரஹ்மலோகே. அஸ்ஸாதி ப்³ரஹ்மலோகே உப்பன்னஸ்ஸ த⁴னஞ்ஜானிஸ்ஸ. ததோ பட்டா²யாதி யதா³ ப⁴க³வதா ‘‘ஏஸோ, பி⁴க்க²வே, ஸாரிபுத்தோ’’திஆதி³ வுத்தங், ததோ பட்டா²ய. சதுஸச்சவினிமுத்தந்தி நித்³தா⁴ரெத்வா விப⁴ஜித்வா வுச்சமானேஹி ஸச்சேஹி விமுத்தங். அத்த²தோ பன ததோ புப்³பே³பி ஸச்சவிமுத்தங் கத²ங் ந கதே²ஸியேவ ஸச்சவிமுத்தஸ்ஸ நிய்யானஸ்ஸ அபா⁴வதோ.
448-453.Osaranti apasakkanti, khīyantīti attho. Tenāha ‘‘parihāyantī’’ti. Abhisarantīti abhivaḍḍhanavasena pavattanti. Tenāha ‘‘vaḍḍhantī’’ti. Tatrāti brahmaloke. Assāti brahmaloke uppannassa dhanañjānissa. Tato paṭṭhāyāti yadā bhagavatā ‘‘eso, bhikkhave, sāriputto’’tiādi vuttaṃ, tato paṭṭhāya. Catusaccavinimuttanti niddhāretvā vibhajitvā vuccamānehi saccehi vimuttaṃ. Atthato pana tato pubbepi saccavimuttaṃ kathaṃ na kathesiyeva saccavimuttassa niyyānassa abhāvato.
த⁴னஞ்ஜானிஸுத்தவண்ணனாய லீனத்த²ப்பகாஸனா ஸமத்தா.
Dhanañjānisuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 7. த⁴னஞ்ஜானிஸுத்தங் • 7. Dhanañjānisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 7. த⁴னஞ்ஜானிஸுத்தவண்ணனா • 7. Dhanañjānisuttavaṇṇanā
