| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৭. ধনঞ্জানিসুত্তৰণ্ণনা
7. Dhanañjānisuttavaṇṇanā
৪৪৫. এৰং মে সুতন্তি ধনঞ্জানিসুত্তং। তত্থ দক্খিণাগিরিস্মিন্তি গিরীতি পব্বতো, রাজগহং পরিক্খিপিত্ৰা ঠিতপব্বতস্স দক্খিণদিসাভাগে জনপদস্সেতং নামং। তণ্ডুলপালিদ্ৰারাযাতি রাজগহস্স কির দ্ৰত্তিংসমহাদ্ৰারানি চতুসট্ঠিখুদ্দকদ্ৰারানি, তেসু একং তণ্ডুলপালিদ্ৰারং নাম, তং সন্ধাযেৰমাহ। রাজানং নিস্সাযাতি ‘‘গচ্ছ মনুস্সে অপীল়েত্ৰা সস্সভাগং গণ্হাহী’’তি রঞ্ঞা পেসিতো গন্ত্ৰা সব্বমেৰ সস্সং গণ্হাতি, ‘‘মা নো, ভন্তে, নাসেহী’’তি চ ৰুত্তে – ‘‘রাজকুলে ৰুত্তং মন্দং, অহং রঞ্ঞা আগমনকালেযেৰ এৰং আণত্তো, মা কন্দিত্থা’’তি এৰং রাজানং নিস্সায ব্রাহ্মণগহপতিকে ৰিলুম্পতি। ধঞ্ঞং যেভুয্যেন অত্তনো ঘরং পৰেসেত্ৰা অপ্পকং রাজকুলে পৰেসেতি। কিং ব্রাহ্মণগহপতিকানং ন পীল়ং অকাসীতি চ ৰুত্তো – ‘‘আম, মহারাজ, ইমস্মিং ৰারে খেত্তানি মন্দসস্সানি অহেসুং, তস্মা অপীল়েন্তস্স মে গণ্হতো ন বহুং জাত’’ন্তি এৰং ব্রাহ্মণগহপতিকে নিস্সায রাজানং ৰিলুম্পতি।
445.Evaṃme sutanti dhanañjānisuttaṃ. Tattha dakkhiṇāgirisminti girīti pabbato, rājagahaṃ parikkhipitvā ṭhitapabbatassa dakkhiṇadisābhāge janapadassetaṃ nāmaṃ. Taṇḍulapālidvārāyāti rājagahassa kira dvattiṃsamahādvārāni catusaṭṭhikhuddakadvārāni, tesu ekaṃ taṇḍulapālidvāraṃ nāma, taṃ sandhāyevamāha. Rājānaṃ nissāyāti ‘‘gaccha manusse apīḷetvā sassabhāgaṃ gaṇhāhī’’ti raññā pesito gantvā sabbameva sassaṃ gaṇhāti, ‘‘mā no, bhante, nāsehī’’ti ca vutte – ‘‘rājakule vuttaṃ mandaṃ, ahaṃ raññā āgamanakāleyeva evaṃ āṇatto, mā kanditthā’’ti evaṃ rājānaṃ nissāya brāhmaṇagahapatike vilumpati. Dhaññaṃ yebhuyyena attano gharaṃ pavesetvā appakaṃ rājakule paveseti. Kiṃ brāhmaṇagahapatikānaṃ na pīḷaṃ akāsīti ca vutto – ‘‘āma, mahārāja, imasmiṃ vāre khettāni mandasassāni ahesuṃ, tasmā apīḷentassa me gaṇhato na bahuṃ jāta’’nti evaṃ brāhmaṇagahapatike nissāya rājānaṃ vilumpati.
৪৪৬. পযো পীযতন্তি তরুণখীরং পিৰতু। তাৰ ভত্তস্সাতি যাৰ খীরং পিৰিত্ৰা নিসীদিস্সথ, তাৰদেৰ ভত্তস্স কালো ভৰিস্সতি। ইধেৰ হি নো পাতরাসভত্তং আহরিস্সন্তীতি দস্সেতি। মাতাপিতরোতিআদীসু মহল্লকা মাতাপিতরো মুদুকানি অত্থরণপাৰুরণানি সুখুমানি ৰত্থানি মধুরভোজনং সুগন্ধগন্ধমালাদীনি চ পরিযেসিত্ৰা পোসেতব্বা। পুত্তধীতানং নামকরণমঙ্গলাদীনি সব্বকিচ্চানি করোন্তেন পুত্তদারো পোসেতব্বো। এৰঞ্হি অকরিযমানে গরহা উপ্পজ্জতীতি ইমিনা নযেন অত্থো ৰেদিতব্বো।
446.Payo pīyatanti taruṇakhīraṃ pivatu. Tāva bhattassāti yāva khīraṃ pivitvā nisīdissatha, tāvadeva bhattassa kālo bhavissati. Idheva hi no pātarāsabhattaṃ āharissantīti dasseti. Mātāpitarotiādīsu mahallakā mātāpitaro mudukāni attharaṇapāvuraṇāni sukhumāni vatthāni madhurabhojanaṃ sugandhagandhamālādīni ca pariyesitvā posetabbā. Puttadhītānaṃ nāmakaraṇamaṅgalādīni sabbakiccāni karontena puttadāro posetabbo. Evañhi akariyamāne garahā uppajjatīti iminā nayena attho veditabbo.
৪৪৭. অধম্মচারীতি পঞ্চ দুস্সীল্যকম্মানি ৰা দস দুস্সীল্যকম্মানি ৰা ইধ অধম্মো নাম। উপকড্ঢেয্যুন্তি পঞ্চৰিধবন্ধনাদিকম্মকরণত্থং তং তং নিরযং কড্ঢেয্যুং।
447.Adhammacārīti pañca dussīlyakammāni vā dasa dussīlyakammāni vā idha adhammo nāma. Upakaḍḍheyyunti pañcavidhabandhanādikammakaraṇatthaṃ taṃ taṃ nirayaṃ kaḍḍheyyuṃ.
৪৪৮. ধম্মচারীতি ধম্মিকসিৰৰিজ্জাদিকম্মকারী। পটিক্কমন্তীতি ওসরন্তি পরিহাযন্তি। অভিক্কমন্তীতি অভিসরন্তি ৰড্ঢন্তি। সেয্যোতি ৰরতরং। হীনেতি নিহীনে লামকে। কালঙ্কতো চ সারিপুত্তাতি ইদং ভগৰা ‘‘তত্রস্স গন্ত্ৰা দেসেহী’’তি অধিপ্পাযেন থেরমাহ। থেরোপি তংখণংযেৰ গন্ত্ৰা মহাব্রহ্মুনো ধম্মং দেসেসি, ততো পট্ঠায চাতুপ্পদিকং গাথং কথেন্তোপি চতুসচ্চৰিমুত্তং নাম ন কথেসীতি।
448.Dhammacārīti dhammikasivavijjādikammakārī. Paṭikkamantīti osaranti parihāyanti. Abhikkamantīti abhisaranti vaḍḍhanti. Seyyoti varataraṃ. Hīneti nihīne lāmake. Kālaṅkato ca sāriputtāti idaṃ bhagavā ‘‘tatrassa gantvā desehī’’ti adhippāyena theramāha. Theropi taṃkhaṇaṃyeva gantvā mahābrahmuno dhammaṃ desesi, tato paṭṭhāya cātuppadikaṃ gāthaṃ kathentopi catusaccavimuttaṃ nāma na kathesīti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
ধনঞ্জানিসুত্তৰণ্ণনা নিট্ঠিতা।
Dhanañjānisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. ধনঞ্জানিসুত্তং • 7. Dhanañjānisuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৭. ধনঞ্জানিসুত্তৰণ্ণনা • 7. Dhanañjānisuttavaṇṇanā
