| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৭. ধনঞ্জানিসুত্তৰণ্ণনা
7. Dhanañjānisuttavaṇṇanā
৪৪৫. রাজগহং পরিক্খিপিত্ৰা ঠিতপব্বতস্সাতি পণ্ডৰপব্বতং সন্ধাযাহ। রাজগহনগরস্স দক্খিণদিসাভাগে পব্বতস্স সমীপে ঠিতো জনপদো দক্খিণাগিরি। তণ্ডুলপুটকানং পালি এত্থাতি তণ্ডুলপালি। তস্স কির দ্ৰারসমীপে তণ্ডুলৰাণিজা তণ্ডুলপসিব্বকে ৰিৰরিত্ৰা পটিপাটিযা ঠপেত্ৰা নিসীদন্তি, তেনস্স ‘‘তণ্ডুলপালিদ্ৰার’’ন্তি সমঞ্ঞা অহোসি। সব্বমেৰ সস্সং গণ্হাতীতি দলিদ্দকস্সকানং দিৰসপরিব্বযমত্তমেৰ ৰিস্সজ্জেত্ৰা সব্বমেৰ আযতো নিপ্ফন্নং ধঞ্ঞং গণ্হাতি। মন্দসস্সানীতি মন্দনিপ্ফত্তিকানি সস্সানি।
445.Rājagahaṃparikkhipitvā ṭhitapabbatassāti paṇḍavapabbataṃ sandhāyāha. Rājagahanagarassa dakkhiṇadisābhāge pabbatassa samīpe ṭhito janapado dakkhiṇāgiri. Taṇḍulapuṭakānaṃ pāli etthāti taṇḍulapāli. Tassa kira dvārasamīpe taṇḍulavāṇijā taṇḍulapasibbake vivaritvā paṭipāṭiyā ṭhapetvā nisīdanti, tenassa ‘‘taṇḍulapālidvāra’’nti samaññā ahosi. Sabbameva sassaṃ gaṇhātīti daliddakassakānaṃ divasaparibbayamattameva vissajjetvā sabbameva āyato nipphannaṃ dhaññaṃ gaṇhāti. Mandasassānīti mandanipphattikāni sassāni.
৪৪৬. ইমিনা নযেনাতি দাসকম্মকরস্স নিৰাসনভত্তৰেত্তনানুপ্পদানেন মঙ্গলদিৰসেসু ধনৰত্থালঙ্কারানুপ্পদানাদিনা চ পোসেতব্বো। মিত্তামচ্চানং পিযৰচনঅত্থচরিযাসমানত্ততাদি মিত্তামচ্চকরণীযং কত্তব্বং, তথা ঞাতিসালোহিতানং। তত্থ আৰাহৰিৰাহসম্বদ্ধেন ‘‘অম্হাকং ইমে’’তি ঞাযন্তীতি ঞাতী, মাতাপিতাদিসম্বদ্ধতায সমানলোহিতাতি সালোহিতা। সম্মা দদন্তেসুপি অসজ্জনতো নত্থি এতেসং তিথীতি অতিথি, তেসং অত্তনা সমানপরিভোগৰসেন অতিথিকরণীযং কাতব্বং, অতিথিবলীতি অত্থো। ঞাতকভূতপুব্বা পেত্তিৰিসযং উপগতা পুব্বপেতা, দক্খিণেয্যেসু কালেন কালং দানং দত্ৰা তেসং উদ্দিসনং পুব্বপেতকরণীযং, পেতবলীতি অত্থো। গন্ধপুপ্ফৰিলেপনজালাভত্তেহি কালেন কালং দেৰতানং পূজা দেৰতাকরণীযং, দেৰতাবলীতি অত্থো, রাজকিচ্চকরণং উপট্ঠানং রাজকরণীযং। অযম্পি কাযোতি অত্তনো কাযং সন্ধায ৰদতি। ইমমত্থং সন্ধাযাহ ‘‘ইমিনা নযেন অত্থো ৰেদিতব্বো’’তি।
446.Iminā nayenāti dāsakammakarassa nivāsanabhattavettanānuppadānena maṅgaladivasesu dhanavatthālaṅkārānuppadānādinā ca posetabbo. Mittāmaccānaṃ piyavacanaatthacariyāsamānattatādi mittāmaccakaraṇīyaṃ kattabbaṃ, tathā ñātisālohitānaṃ. Tattha āvāhavivāhasambaddhena ‘‘amhākaṃ ime’’ti ñāyantīti ñātī, mātāpitādisambaddhatāya samānalohitāti sālohitā. Sammā dadantesupi asajjanato natthi etesaṃ tithīti atithi, tesaṃ attanā samānaparibhogavasena atithikaraṇīyaṃ kātabbaṃ, atithibalīti attho. Ñātakabhūtapubbā pettivisayaṃ upagatā pubbapetā, dakkhiṇeyyesu kālena kālaṃ dānaṃ datvā tesaṃ uddisanaṃ pubbapetakaraṇīyaṃ, petabalīti attho. Gandhapupphavilepanajālābhattehi kālena kālaṃ devatānaṃ pūjā devatākaraṇīyaṃ, devatābalīti attho, rājakiccakaraṇaṃ upaṭṭhānaṃ rājakaraṇīyaṃ. Ayampi kāyoti attano kāyaṃ sandhāya vadati. Imamatthaṃ sandhāyāha ‘‘iminā nayena attho veditabbo’’ti.
৪৪৭. পঞ্চ দুস্সীল্যকম্মানীতি নিচ্চসীলপটিপক্খধম্মা। দস অকুসলকম্মপথধম্মা দস দুস্সীল্যকম্মানি। অধম্মচারী এৰ ৰিসমচারী কাযৰিসমাদিচরণতোতি ৰিসমচারীপদস্স অত্থো ৰিসুং ন ৰুত্তো।
447.Pañca dussīlyakammānīti niccasīlapaṭipakkhadhammā. Dasa akusalakammapathadhammā dasa dussīlyakammāni. Adhammacārī eva visamacārī kāyavisamādicaraṇatoti visamacārīpadassa attho visuṃ na vutto.
৪৪৮-৪৫৩. ওসরন্তি অপসক্কন্তি, খীযন্তীতি অত্থো। তেনাহ ‘‘পরিহাযন্তী’’তি। অভিসরন্তীতি অভিৰড্ঢনৰসেন পৰত্তন্তি। তেনাহ ‘‘ৰড্ঢন্তী’’তি। তত্রাতি ব্রহ্মলোকে। অস্সাতি ব্রহ্মলোকে উপ্পন্নস্স ধনঞ্জানিস্স। ততো পট্ঠাযাতি যদা ভগৰতা ‘‘এসো, ভিক্খৰে, সারিপুত্তো’’তিআদি ৰুত্তং, ততো পট্ঠায। চতুসচ্চৰিনিমুত্তন্তি নিদ্ধারেত্ৰা ৰিভজিত্ৰা ৰুচ্চমানেহি সচ্চেহি ৰিমুত্তং। অত্থতো পন ততো পুব্বেপি সচ্চৰিমুত্তং কথং ন কথেসিযেৰ সচ্চৰিমুত্তস্স নিয্যানস্স অভাৰতো।
448-453.Osaranti apasakkanti, khīyantīti attho. Tenāha ‘‘parihāyantī’’ti. Abhisarantīti abhivaḍḍhanavasena pavattanti. Tenāha ‘‘vaḍḍhantī’’ti. Tatrāti brahmaloke. Assāti brahmaloke uppannassa dhanañjānissa. Tato paṭṭhāyāti yadā bhagavatā ‘‘eso, bhikkhave, sāriputto’’tiādi vuttaṃ, tato paṭṭhāya. Catusaccavinimuttanti niddhāretvā vibhajitvā vuccamānehi saccehi vimuttaṃ. Atthato pana tato pubbepi saccavimuttaṃ kathaṃ na kathesiyeva saccavimuttassa niyyānassa abhāvato.
ধনঞ্জানিসুত্তৰণ্ণনায লীনত্থপ্পকাসনা সমত্তা।
Dhanañjānisuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৭. ধনঞ্জানিসুত্তং • 7. Dhanañjānisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৭. ধনঞ্জানিসুত্তৰণ্ণনা • 7. Dhanañjānisuttavaṇṇanā
