| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. ব্রাহ্মণসংযুত্তং
7. Brāhmaṇasaṃyuttaṃ
১. অরহন্তৰগ্গো
1. Arahantavaggo
১. ধনঞ্জানীসুত্তৰণ্ণনা
1. Dhanañjānīsuttavaṇṇanā
১৮৭. ধনঞ্জানিগোত্তাতি এত্থ পুব্বপুরিসতো আগতস্স কুলৰংসস্স নামাভিধানসঙ্খাতং গং তাযতীতি গোত্তং। (কিং পন তন্তি? অঞ্ঞকুলপরম্পরাসাধারণং তস্স কুলস্স আদিপুরিসসমুদাগতং তংকুলপরিযাপন্নসাধারণং সামঞ্ঞরূপন্তি দট্ঠব্বং।) ধনঞ্জানিগোত্তং এতিস্সন্তি ধনঞ্জানিগোত্তা। তস্সা উদানস্স কারণং পুচ্ছিত্ৰা আদিতো পট্ঠায ৰিভাৰেতুং ‘‘সো কিরা’’তিআদি ৰুত্তং। নানারসভোজনং দেতীতি যোজনা। পঞ্চগোরসসম্পাদিতং সালিভত্তং সূপসাকব্যঞ্জনং নানারসং ব্রাহ্মণভোজনং। মণ্ডলগ্গখগ্গন্তি মণ্ডলগ্গসঙ্খাতং খগ্গং। দুৰিধো হি খগ্গো মণ্ডলগ্গো দীঘগ্গোতি। তত্থ যস্স অগ্গো মণ্ডলাকারেন ঠিতো, সো মণ্ডলগ্গো। যস্স পন অসিপুত্তিকা ৰিয দীঘো, সো দীঘগ্গো।
187.Dhanañjānigottāti ettha pubbapurisato āgatassa kulavaṃsassa nāmābhidhānasaṅkhātaṃ gaṃ tāyatīti gottaṃ. (Kiṃ pana tanti? Aññakulaparamparāsādhāraṇaṃ tassa kulassa ādipurisasamudāgataṃ taṃkulapariyāpannasādhāraṇaṃ sāmaññarūpanti daṭṭhabbaṃ.) Dhanañjānigottaṃ etissanti dhanañjānigottā. Tassā udānassa kāraṇaṃ pucchitvā ādito paṭṭhāya vibhāvetuṃ ‘‘so kirā’’tiādi vuttaṃ. Nānārasabhojanaṃ detīti yojanā. Pañcagorasasampāditaṃ sālibhattaṃ sūpasākabyañjanaṃ nānārasaṃ brāhmaṇabhojanaṃ. Maṇḍalaggakhagganti maṇḍalaggasaṅkhātaṃ khaggaṃ. Duvidho hi khaggo maṇḍalaggo dīghaggoti. Tattha yassa aggo maṇḍalākārena ṭhito, so maṇḍalaggo. Yassa pana asiputtikā viya dīgho, so dīghaggo.
সাসনাতি অনুসাসনা। ‘‘নমো…পে॰… সম্বুদ্ধস্সা’’তি এৰং ৰুত্তা পঞ্চপদিকগাথা। সত্থুসাসনে হি লোকিযচ্ছন্দং অনপেক্খিত্ৰা এসা পঞ্চপদিকগাথাতি দট্ঠব্বা। ওক্কাৰরধরাতি পুব্বপুরিসসঙ্খাতউক্কাকৰংসৰরধারিকা। সক্কাতি সক্কুণেয্যং।
Sāsanāti anusāsanā. ‘‘Namo…pe… sambuddhassā’’ti evaṃ vuttā pañcapadikagāthā. Satthusāsane hi lokiyacchandaṃ anapekkhitvā esā pañcapadikagāthāti daṭṭhabbā. Okkāvaradharāti pubbapurisasaṅkhātaukkākavaṃsavaradhārikā. Sakkāti sakkuṇeyyaṃ.
এৰন্তি ‘‘সচে মে অঙ্গমঙ্গানী’’তিআদিনা ইমিনা পকারেন। ‘‘পঞ্চ গাথাসতানি পন অট্ঠকথং আরুল়্হানি, ইধ পন দ্ৰে এৰ উদ্ধটা’’তি ৰদন্তি। পহরিতুং ৰাতি একৰারম্পি হত্থেন ৰা পাদেন ৰা পহরিতুম্পি পরামসিতুম্পি অসক্কোন্তোতি অত্থো। সো হি তস্সা অরিযসাৰিকায আনুভাৰেন অত্তনো সামত্থিযেন ৰসে ৰত্তাপনত্থং সন্তজ্জিত্ৰাপি তদনুৰত্তন্তো নিব্বিসো অহোসি। তেনাহ ‘‘ভোতী’’তিআদি।
Evanti ‘‘sace me aṅgamaṅgānī’’tiādinā iminā pakārena. ‘‘Pañca gāthāsatāni pana aṭṭhakathaṃ āruḷhāni, idha pana dve eva uddhaṭā’’ti vadanti. Paharituṃ vāti ekavārampi hatthena vā pādena vā paharitumpi parāmasitumpi asakkontoti attho. So hi tassā ariyasāvikāya ānubhāvena attano sāmatthiyena vase vattāpanatthaṃ santajjitvāpi tadanuvattanto nibbiso ahosi. Tenāha ‘‘bhotī’’tiādi.
তস্স ব্রাহ্মণস্সাতি অত্তনো সামিকব্রাহ্মণস্স। উপসংহরন্তীতি উপনেন্তী। তস্মিং সমযেতি তস্মিং দুক্খুপ্পত্তিকালে ‘‘সব্বে সঙ্খারা দুক্খা’’তি ভগৰতো ৰচনং অনুস্সরিত্ৰা ‘‘দসবলস্স ভগৰতো’’তিআদীসু যথাপরিচিতং গুণপদং অনুস্সরি। তেনাহ ‘‘দসবলং সরী’’তি।
Tassa brāhmaṇassāti attano sāmikabrāhmaṇassa. Upasaṃharantīti upanentī. Tasmiṃ samayeti tasmiṃ dukkhuppattikāle ‘‘sabbe saṅkhārā dukkhā’’ti bhagavato vacanaṃ anussaritvā ‘‘dasabalassa bhagavato’’tiādīsu yathāparicitaṃ guṇapadaṃ anussari. Tenāha ‘‘dasabalaṃ sarī’’ti.
খন্তিসোরচ্চরহিততায কুজ্ঝিত্ৰা। ভিজ্জিত্ৰাতি সংযতাভাৰতো তস্স ব্রাহ্মণস্স অন্তরে মেত্তিভেদেন ভিজ্জিত্ৰা। এৰমেৰাতি যথা এতরহি অকারণেন, এৰমেৰ অঞ্ঞদাপি অকারণেনাতি অত্থো। নিক্কারণতাদীপনে এৰং-সদ্দো, এৰ-সদ্দো পন অৰধারণত্থো। নিক্কারণতা চ নাম নিরত্থকতা, নিরত্থকৰিপ্পলাপভাৰেনেত্থ এৰং-সদ্দস্স গহণে পৰত্তি গৰেসিতব্বা। গরহত্থো ৰাযং এৰং-সদ্দো অনেকত্থত্তা নিপাতানং। গরহত্থতা চস্স ৰসলিসদ্দসন্নিধানতো পাকটা এৰ।
Khantisoraccarahitatāya kujjhitvā. Bhijjitvāti saṃyatābhāvato tassa brāhmaṇassa antare mettibhedena bhijjitvā. Evamevāti yathā etarahi akāraṇena, evameva aññadāpi akāraṇenāti attho. Nikkāraṇatādīpane evaṃ-saddo, eva-saddo pana avadhāraṇattho. Nikkāraṇatā ca nāma niratthakatā, niratthakavippalāpabhāvenettha evaṃ-saddassa gahaṇe pavatti gavesitabbā. Garahattho vāyaṃ evaṃ-saddo anekatthattā nipātānaṃ. Garahatthatā cassa vasalisaddasannidhānato pākaṭā eva.
গামনিগমরট্ঠপূজিতোতি ইমিনা গামনিগমরট্ঠসামিকেহি পূজিতভাৰো দীপিতো গামাদীনং তেসং ৰসে ৰত্তনতো। অসুকস্স নাম পুগ্গলস্স। সেসন্তি অভিক্কন্তন্তিআদি, যম্পি চঞ্ঞং ইধাগতং হেট্ঠা ৰণ্ণিতঞ্চ।
Gāmanigamaraṭṭhapūjitoti iminā gāmanigamaraṭṭhasāmikehi pūjitabhāvo dīpito gāmādīnaṃ tesaṃ vase vattanato. Asukassa nāma puggalassa. Sesanti abhikkantantiādi, yampi caññaṃ idhāgataṃ heṭṭhā vaṇṇitañca.
ধনঞ্জানীসুত্তৰণ্ণনা নিট্ঠিতা।
Dhanañjānīsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. ধনঞ্জানীসুত্তং • 1. Dhanañjānīsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. ধনঞ্জানীসুত্তৰণ্ণনা • 1. Dhanañjānīsuttavaṇṇanā
