| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
த⁴னியவத்து²வண்ணனா
Dhaniyavatthuvaṇṇanā
84. ராஜூஹி க³ஹிதந்தி ராஜக³ஹந்தி ஆஹ ‘‘மந்தா⁴தூ’’தி. ராஜபுரோஹிதேன பரிக்³க³ஹிதம்பி ராஜபரிக்³க³ஹிதமேவாதி மஹாகோ³விந்த³க்³க³ஹணங், நக³ரஸத்³தா³பெக்கா²ய செத்த² ‘‘ராஜக³ஹ’’ந்தி நபுங்ஸகனித்³தே³ஸோ. அஞ்ஞேபெத்த² பகாரேதி ஸுஸங்விஹிதாரக்க²த்தா ராஜூனங் க³ஹங் கே³ஹபூ⁴தந்தி ராஜக³ஹந்திஆதி³கே பகாரே. வஸந்தவனந்தி கீளாவனங், வஸந்தகாலே கீளாய யேபு⁴ய்யத்தா பன வஸந்தவனந்தி வுத்தங்.
84. Rājūhi gahitanti rājagahanti āha ‘‘mandhātū’’ti. Rājapurohitena pariggahitampi rājapariggahitamevāti mahāgovindaggahaṇaṃ, nagarasaddāpekkhāya cettha ‘‘rājagaha’’nti napuṃsakaniddeso. Aññepettha pakāreti susaṃvihitārakkhattā rājūnaṃ gahaṃ gehabhūtanti rājagahantiādike pakāre. Vasantavananti kīḷāvanaṃ, vasantakāle kīḷāya yebhuyyattā pana vasantavananti vuttaṃ.
ஸத்³வாரப³ந்தா⁴தி வஸ்ஸூபக³மனயொக்³க³தாத³ஸ்ஸனங். நாலகபடிபத³ந்தி ஸுத்தனிபாதே (ஸு॰ நி॰ 684 ஆத³யோ) நாலகத்தே²ரஸ்ஸ தே³ஸிதங் மோனெய்யபடிபத³ங். பஞ்சன்னங் ச²த³னானந்தி திணபண்ணஇட்ட²கஸிலாஸுதா⁴ஸங்கா²தானங் பஞ்சன்னங். நோ சே லப⁴தி…பே॰… ஸாமம்பி காதப்³ப³ந்தி இமினா நாவாஸத்த²வஜே ட²பெத்வா அஞ்ஞத்த² ‘‘அஸேனாஸனிகோ அஹ’’ந்தி ஆலயகரணமத்தேன உபக³மனங் ந வட்டதி. ஸேனாஸனங் பரியேஸித்வா வசீபே⁴த³ங் கத்வா வஸ்ஸங் உபக³ந்தப்³ப³மேவாதி த³ஸ்ஸேதி. ‘‘ந, பி⁴க்க²வே, அஸேனாஸனிகேனா’’திஆதி³னா (மஹாவ॰ 204) ஹி பாளியங் ‘‘நாலகபடிபத³ங் படிபன்னேனாபீ’’தி அட்ட²கதா²யஞ்ச அவிஸேஸேன த³ள்ஹங் கத்வா வுத்தங், நாவாஸத்த²வஜேஸுயேவ ச ‘‘அனுஜானாமி, பி⁴க்க²வே, நாவாய வஸ்ஸங் உபக³ந்து’’ந்திஆதி³னா (மஹாவ॰ 203) அஸதிபி ஸேனாஸனே ஆலயகரணவஸேன வஸ்ஸூபக³மனங் அனுஞ்ஞாதங், நாஞ்ஞத்தா²தி க³ஹேதப்³ப³ங். அயமனுத⁴ம்மதாதி ஸாமீசிவத்தங். கதிகவத்தானீதி ப⁴ஸ்ஸாராமதாதி³ங் விஹாய ஸப்³ப³தா³ அப்பமத்தேஹி ப⁴விதப்³ப³ந்திஆதி³கதிகவத்தானி. க²ந்த⁴கவத்தானீதி ‘‘ஆக³ந்துகாதி³க²ந்த⁴கவத்தங் பூரேதப்³ப³’’ந்தி ஏவங் க²ந்த⁴கவத்தானி ச அதி⁴ட்ட²ஹித்வா.
Sadvārabandhāti vassūpagamanayoggatādassanaṃ. Nālakapaṭipadanti suttanipāte (su. ni. 684 ādayo) nālakattherassa desitaṃ moneyyapaṭipadaṃ. Pañcannaṃ chadanānanti tiṇapaṇṇaiṭṭhakasilāsudhāsaṅkhātānaṃ pañcannaṃ. No ce labhati…pe… sāmampi kātabbanti iminā nāvāsatthavaje ṭhapetvā aññattha ‘‘asenāsaniko aha’’nti ālayakaraṇamattena upagamanaṃ na vaṭṭati. Senāsanaṃ pariyesitvā vacībhedaṃ katvā vassaṃ upagantabbamevāti dasseti. ‘‘Na, bhikkhave, asenāsanikenā’’tiādinā (mahāva. 204) hi pāḷiyaṃ ‘‘nālakapaṭipadaṃ paṭipannenāpī’’ti aṭṭhakathāyañca avisesena daḷhaṃ katvā vuttaṃ, nāvāsatthavajesuyeva ca ‘‘anujānāmi, bhikkhave, nāvāya vassaṃ upagantu’’ntiādinā (mahāva. 203) asatipi senāsane ālayakaraṇavasena vassūpagamanaṃ anuññātaṃ, nāññatthāti gahetabbaṃ. Ayamanudhammatāti sāmīcivattaṃ. Katikavattānīti bhassārāmatādiṃ vihāya sabbadā appamattehi bhavitabbantiādikatikavattāni. Khandhakavattānīti ‘‘āgantukādikhandhakavattaṃ pūretabba’’nti evaṃ khandhakavattāni ca adhiṭṭhahitvā.
வஸ்ஸங்வுத்தா²தி பத³ஸ்ஸ அட்ட²கதா²யங் ‘‘புரிமிகாய உபக³தா மஹாபவாரணாய பவாரிதா பாடிபத³தி³வஸதோ பட்டா²ய ‘வுத்த²வஸ்ஸா’தி வுச்சந்தீ’’தி வுத்தத்தா மஹாபவாரணாதி³வஸே பவாரெத்வா வா அப்பவாரெத்வா வா அஞ்ஞத்த² க³ச்ச²ந்தேஹி ஸத்தாஹகரணீயனிமித்தே ஸதி ஏவ க³ந்தப்³ப³ங், நாஸதி, இதரதா² வஸ்ஸச்சே²தோ³ து³க்கடஞ்ச ஹோதீதி வேதி³தப்³ப³ங். ‘‘இமங் தேமாஸங் வஸ்ஸங் உபேமீ’’தி ஹி ‘‘ந, பி⁴க்க²வே, வஸ்ஸங் உபக³ந்த்வா புரிமங் வா தேமாஸங் பச்சி²மங் வா தேமாஸங் அவஸித்வா சாரிகா பக்கமிதப்³பா³’’தி (மஹாவ॰ 185) ச வுத்தங். இதே⁴வ ச வஸ்ஸங்வுத்தா² தேமாஸச்சயேன…பே॰… பக்கமிங்ஸூதி வுத்தங். பவாரணாதி³வஸோபி தேமாஸபரியாபன்னோவ. கேசி பன ‘‘அனுஜானாமி, பி⁴க்க²வே, வஸ்ஸங்வுத்தா²னங் பி⁴க்கூ²னங் தீஹி டா²னேஹி பவாரேதுந்தி (மஹாவ॰ 209) பவாரணாகம்மஸ்ஸ புப்³பே³யேவ வஸ்ஸங்வுத்தா²னந்தி வுத்த²வஸ்ஸதாய வுத்தத்தா மஹாபவாரணாதி³வஸே ஸத்தாஹகரணீயனிமித்தங் வினாபி யதா²ஸுக²ங் க³ந்துங் வட்டதீ’’தி வத³ந்தி, தங் தேஸங் மதிமத்தங், வுத்த²வஸ்ஸானஞ்ஹி பவாரணானுஜானநங் அனுபக³தசி²ன்னவஸ்ஸாதீ³னங் நிவத்தனத்த²ங் கதங், ந பன பவாரணாதி³வஸே அவஸித்வா பக்கமிதப்³ப³ந்தி த³ஸ்ஸனத்த²ங் தத³த்த²ஸ்ஸ இத⁴ பஸங்கா³பா⁴வா, பவாரணங் காதுங் அனுச்ச²விகானங் பவாரணா இத⁴ விதீ⁴யதி, யே ச வஸ்ஸங் உபக³ந்த்வா வஸ்ஸச்சே²த³ஞ்ச அகத்வா யாவ பவாரணாதி³வஸா வஸிங்ஸு, தே தத்தகேன பவாரணாகம்மங் பதி பரியாயதோ வுத்த²வஸ்ஸாதி வுச்சந்தி, அப்பகங் ஊனமதி⁴கங் வா க³ணனூபக³ங் ந ஹோதீதி ஞாயதோ, ந கதி²னகம்மங் பதி தேமாஸஸ்ஸ அபரிபுண்ணத்தா, இதரதா² தஸ்மிங் மஹாபவாரணாதி³வஸேபி கதி²னத்தா²ரப்பஸங்க³தோ. ‘‘அனுஜானாமி, பி⁴க்க²வே, வஸ்ஸங்வுத்தா²னங் பி⁴க்கூ²னங் கதி²னங் அத்த²ரிது’’ந்தி (மஹாவ॰ 306) இத³ங் பன ‘‘ந, பி⁴க்க²வே, வஸ்ஸங் உபக³ந்த்வா புரிமங் வா தேமாஸங் பச்சி²மங் வா தேமாஸங் அவஸித்வா சாரிகா பக்கமிதப்³பா³’’திஆதி³ (மஹாவ॰ 185) ச நிப்பரியாயதோ மஹாபவாரணாய அனந்தரபாடிபத³தி³வஸதோ பட்டா²ய கதி²னத்தா²ரங் பக்கமனஞ்ச ஸந்தா⁴ய வுத்தங், பரிவாரே ச ‘‘கதி²னஸ்ஸ அத்தா²ரமாஸோ ஜானிதப்³போ³’’தி (பரி॰ 412) வத்வா ‘‘வஸ்ஸானஸ்ஸ பச்சி²மோ மாஸோ ஜானிதப்³போ³’’தி (பரி॰ 412) வுத்தங். யோ ஹி கதி²னத்தா²ரஸ்ஸ காலோ, ததோ பட்டா²யேவ சாரிகாபக்கமனஸ்ஸாபி காலோ, ந ததோ புரே வஸ்ஸங்வுத்தா²னங்யேவ கதி²னத்தா²ராரஹத்தா. யத³க்³கே³ன ஹி பவாரணாதி³வஸே கதி²னத்தா²ரோ ந வட்டதி, தத³க்³கே³ன பி⁴க்கூ²பி வுத்த²வஸ்ஸா ந ஹொந்தி பவாரணாதி³வஸஸ்ஸ அவுத்த²த்தா.
Vassaṃvutthāti padassa aṭṭhakathāyaṃ ‘‘purimikāya upagatā mahāpavāraṇāya pavāritā pāṭipadadivasato paṭṭhāya ‘vutthavassā’ti vuccantī’’ti vuttattā mahāpavāraṇādivase pavāretvā vā appavāretvā vā aññattha gacchantehi sattāhakaraṇīyanimitte sati eva gantabbaṃ, nāsati, itarathā vassacchedo dukkaṭañca hotīti veditabbaṃ. ‘‘Imaṃ temāsaṃ vassaṃ upemī’’ti hi ‘‘na, bhikkhave, vassaṃ upagantvā purimaṃ vā temāsaṃ pacchimaṃ vā temāsaṃ avasitvā cārikā pakkamitabbā’’ti (mahāva. 185) ca vuttaṃ. Idheva ca vassaṃvutthā temāsaccayena…pe… pakkamiṃsūti vuttaṃ. Pavāraṇādivasopi temāsapariyāpannova. Keci pana ‘‘anujānāmi, bhikkhave, vassaṃvutthānaṃ bhikkhūnaṃ tīhi ṭhānehi pavāretunti (mahāva. 209) pavāraṇākammassa pubbeyeva vassaṃvutthānanti vutthavassatāya vuttattā mahāpavāraṇādivase sattāhakaraṇīyanimittaṃ vināpi yathāsukhaṃ gantuṃ vaṭṭatī’’ti vadanti, taṃ tesaṃ matimattaṃ, vutthavassānañhi pavāraṇānujānanaṃ anupagatachinnavassādīnaṃ nivattanatthaṃ kataṃ, na pana pavāraṇādivase avasitvā pakkamitabbanti dassanatthaṃ tadatthassa idha pasaṅgābhāvā, pavāraṇaṃ kātuṃ anucchavikānaṃ pavāraṇā idha vidhīyati, ye ca vassaṃ upagantvā vassacchedañca akatvā yāva pavāraṇādivasā vasiṃsu, te tattakena pavāraṇākammaṃ pati pariyāyato vutthavassāti vuccanti, appakaṃ ūnamadhikaṃ vā gaṇanūpagaṃ na hotīti ñāyato, na kathinakammaṃ pati temāsassa aparipuṇṇattā, itarathā tasmiṃ mahāpavāraṇādivasepi kathinatthārappasaṅgato. ‘‘Anujānāmi, bhikkhave, vassaṃvutthānaṃ bhikkhūnaṃ kathinaṃ attharitu’’nti (mahāva. 306) idaṃ pana ‘‘na, bhikkhave, vassaṃ upagantvā purimaṃ vā temāsaṃ pacchimaṃ vā temāsaṃ avasitvā cārikā pakkamitabbā’’tiādi (mahāva. 185) ca nippariyāyato mahāpavāraṇāya anantarapāṭipadadivasato paṭṭhāya kathinatthāraṃ pakkamanañca sandhāya vuttaṃ, parivāre ca ‘‘kathinassa atthāramāso jānitabbo’’ti (pari. 412) vatvā ‘‘vassānassa pacchimo māso jānitabbo’’ti (pari. 412) vuttaṃ. Yo hi kathinatthārassa kālo, tato paṭṭhāyeva cārikāpakkamanassāpi kālo, na tato pure vassaṃvutthānaṃyeva kathinatthārārahattā. Yadaggena hi pavāraṇādivase kathinatthāro na vaṭṭati, tadaggena bhikkhūpi vutthavassā na honti pavāraṇādivasassa avutthattā.
யங் பன ஸாரத்த²தீ³பனியங் (ஸாரத்த²॰ டீ॰ பாராஜிககண்ட³ 2.84) ‘‘ஏகதே³ஸேன அவுத்த²ம்பி தங் தி³வஸங் வுத்த²பா⁴கா³பெக்கா²ய வுத்த²மேவ ஹோதீ’’திஆதி³ வுத்தங், தங் ந யுத்தங், தங்தி³வஸபரியோஸானே அருணுக்³க³மனகாலே வஸந்தோவ ஹி தங் தி³வஸங் வுத்தோ² நாம ஹோதி பரிவாஸஅரஞ்ஞவாஸாதீ³ஸு விய, அயஞ்ச விசாரணா உபரி வஸ்ஸூபனாயிகக்க²ந்த⁴கே ஆவி ப⁴விஸ்ஸதீதி தத்தே²வ தங் பாகடங் கரிஸ்ஸாம.
Yaṃ pana sāratthadīpaniyaṃ (sārattha. ṭī. pārājikakaṇḍa 2.84) ‘‘ekadesena avutthampi taṃ divasaṃ vutthabhāgāpekkhāya vutthameva hotī’’tiādi vuttaṃ, taṃ na yuttaṃ, taṃdivasapariyosāne aruṇuggamanakāle vasantova hi taṃ divasaṃ vuttho nāma hoti parivāsaaraññavāsādīsu viya, ayañca vicāraṇā upari vassūpanāyikakkhandhake āvi bhavissatīti tattheva taṃ pākaṭaṃ karissāma.
மஹாபவாரணாய பவாரிதாதி புரிமிகாய வஸ்ஸங் உபக³ந்த்வா அச்சி²ன்னவஸ்ஸதாத³ஸ்ஸனபரங் ஏதங் கேனசி அந்தராயேன அப்பவாரிதானம்பி வுத்த²வஸ்ஸத்தா. ந ஓவஸ்ஸியதீதி அனோவஸ்ஸகந்தி கம்மஸாத⁴னங் த³ட்ட²ப்³ப³ங், யதா² ந தேமியதி, ததா² கத்வாதி அத்தோ². அனவயோதி எத்த² அனுஸத்³தோ³ விச்சா²யங் வத்ததீதி ஆஹ அனு அனு அவயோதிஆதி³. ஆசரியஸ்ஸ கம்மங் ஆசரியகந்தி ஆஹ ‘‘ஆசரியகம்மே’’தி. கட்ட²கம்மங் த²ம்பா⁴தி³. தேலதம்ப³மத்திகாயாதி தேலமிஸ்ஸாய தம்ப³மத்திகாய.
Mahāpavāraṇāyapavāritāti purimikāya vassaṃ upagantvā acchinnavassatādassanaparaṃ etaṃ kenaci antarāyena appavāritānampi vutthavassattā. Na ovassiyatīti anovassakanti kammasādhanaṃ daṭṭhabbaṃ, yathā na temiyati, tathā katvāti attho. Anavayoti ettha anusaddo vicchāyaṃ vattatīti āha anu anu avayotiādi. Ācariyassa kammaṃ ācariyakanti āha ‘‘ācariyakamme’’ti. Kaṭṭhakammaṃ thambhādi. Telatambamattikāyāti telamissāya tambamattikāya.
85. குடிகாய கரணபா⁴வந்தி குடியா கதபா⁴வங். கிங்-ஸத்³த³ப்பயோகே³ அனாக³தப்பச்சயவிதா⁴னங் ஸந்தா⁴ய தஸ்ஸ லக்க²ணந்திஆதி³ வுத்தங். கிஞ்சாபி தே²ரஸ்ஸ பாணகா⁴தாதி⁴ப்பாயோ நத்தி², அனுபபரிக்கி²த்வா கரணேன பன ப³ஹூனங் பாணானங் மரணத்தா பாணே ப்³யாபா³தெ⁴ந்தஸ்ஸாதிஆதி³ வுத்தங். பாதப்³யபா⁴வந்தி வினாஸேதப்³ப³தங். பாணாதிபாதங் கரொந்தானந்தி தே²ரேன அகதேபி பாணாதிபாதே பாணகானங் மரணமத்தேன பச்சி²மானங் லேஸேன க³ஹணாகாரங் த³ஸ்ஸேதி, தேன ச ‘‘மம தாதி³ஸங் அகுஸலங் நத்தீ²’’தி பச்சி²மானங் விபல்லாஸலேஸக்³க³ஹணனிமித்தகிச்சங் ந கத்தப்³ப³ந்தி தீ³பிதங் ஹோதி. தி³ட்டா²னுக³திந்தி தி³ட்ட²ஸ்ஸ கம்மஸ்ஸ அனுபக³மனங் அனுகிரியங், தி³ட்டி²யா வா லத்³தி⁴யா அனுக³மனங் கா³ஹங். க⁴ங்ஸிதப்³பே³தி மத்³தி³தப்³பே³, வினாஸிதப்³பே³தி அத்தோ². கதங் லபி⁴த்வா தத்த² வஸந்தானம்பி து³க்கடமேவாதி இத³ங் ப⁴க³வதா குடியா பே⁴தா³பனவசனேன ஸித்³த⁴ங், ஸாபி திணத³ப்³ப³ஸம்பா⁴ரேஹி துலாத²ம்பா⁴தீ³ஹி அமிஸ்ஸா ஸுத்³த⁴மத்திகாமயாபி இட்ட²காஹி கதா வட்டதி. கேசி ஹி இட்ட²காஹியேவ த²ம்பே⁴ சினித்வா தது³பரி இட்ட²காஹியேவ விதானாதி³ஸண்டா²னேன துலாதி³தா³ருஸம்பா⁴ரவிரஹிதங் ச²த³னம்பி ப³ந்தி⁴த்வா இட்ட²காமயமேவ ஆவஸத²ங் கரொந்தி, தாதி³ஸங் வட்டதி. கி³ஞ்ஜகாவஸத²ஸங்கே²பேன கதாதி எத்த² கி³ஞ்ஜகா வுச்சந்தி இட்ட²கா, தாஹியேவ கதோ ஆவஸதோ² கி³ஞ்ஜகாவஸதோ². வயகம்மம்பீதி மத்திகுத்³தா⁴ரணஇட்ட²கதா³ருச்சே²த³னாதி³காரகானங் தி³ன்னப⁴த்தவெத்தனாதி³வத்து²ப்³ப³யேன நிப்ப²ன்னகம்மம்பி அத்தி², ஏதேன குடிபே⁴த³கானங் கீ³வாதி³பா⁴வங் பரிஸங்கதி. தித்தி²யத⁴ஜோதி தித்தி²யானமேவ ஸஞ்ஞாணபூ⁴தத்தா வுத்தங். தே ஹி ஈதி³ஸேஸு சாடிஆதீ³ஸு வஸந்தி. அஞ்ஞானிபீதி பி-ஸத்³தே³ன அத்தனா வுத்தகாரணத்³வயம்பி மஹாஅட்ட²கதா²யமேவ வுத்தந்தி த³ஸ்ஸேதி. யஸ்மா ஸப்³ப³மத்திகாமயா குடி ஸீதகாலே அதிஸீதா உண்ஹகாலே ச உண்ஹா ஸுகரா ச ஹோதி சோரேஹி பி⁴ந்தி³துங், தஸ்மா தத்த² ட²பிதபத்தசீவராதி³கங் ஸீதுண்ஹசோராதீ³ஹி வினஸ்ஸதீதி வுத்தங் ‘‘பத்தசீவரகு³த்தத்தா²யா’’தி. சி²ந்தா³பெய்ய வா பி⁴ந்தா³பெய்ய வா அனுபவஜ்ஜோதி இத³ங் அயங் குடி விய ஸப்³ப³தா² அனுபயோகா³ரஹங் ஸந்தா⁴ய வுத்தங். யங் பன பஞ்சவண்ணஸுத்தேஹி வினத்³த⁴ச²த்தாதி³கங், தத்த² அகப்பியபா⁴கோ³வ சி²ந்தி³தப்³போ³, ந தத³வஸேஸோ தஸ்ஸ கப்பியத்தா, தங் சி²ந்த³ந்தோ உபவஜ்ஜோவ ஹோதி. தேனேவ வக்க²தி ‘‘க⁴டகம்பி வாளரூபம்பி பி⁴ந்தி³த்வா தா⁴ரேதப்³ப³’’ந்திஆதி³.
85.Kuṭikāya karaṇabhāvanti kuṭiyā katabhāvaṃ. Kiṃ-saddappayoge anāgatappaccayavidhānaṃ sandhāya tassa lakkhaṇantiādi vuttaṃ. Kiñcāpi therassa pāṇaghātādhippāyo natthi, anupaparikkhitvā karaṇena pana bahūnaṃ pāṇānaṃ maraṇattā pāṇe byābādhentassātiādi vuttaṃ. Pātabyabhāvanti vināsetabbataṃ. Pāṇātipātaṃ karontānanti therena akatepi pāṇātipāte pāṇakānaṃ maraṇamattena pacchimānaṃ lesena gahaṇākāraṃ dasseti, tena ca ‘‘mama tādisaṃ akusalaṃ natthī’’ti pacchimānaṃ vipallāsalesaggahaṇanimittakiccaṃ na kattabbanti dīpitaṃ hoti. Diṭṭhānugatinti diṭṭhassa kammassa anupagamanaṃ anukiriyaṃ, diṭṭhiyā vā laddhiyā anugamanaṃ gāhaṃ. Ghaṃsitabbeti madditabbe, vināsitabbeti attho. Kataṃ labhitvā tattha vasantānampi dukkaṭamevāti idaṃ bhagavatā kuṭiyā bhedāpanavacanena siddhaṃ, sāpi tiṇadabbasambhārehi tulāthambhādīhi amissā suddhamattikāmayāpi iṭṭhakāhi katā vaṭṭati. Keci hi iṭṭhakāhiyeva thambhe cinitvā tadupari iṭṭhakāhiyeva vitānādisaṇṭhānena tulādidārusambhāravirahitaṃ chadanampi bandhitvā iṭṭhakāmayameva āvasathaṃ karonti, tādisaṃ vaṭṭati. Giñjakāvasathasaṅkhepena katāti ettha giñjakā vuccanti iṭṭhakā, tāhiyeva kato āvasatho giñjakāvasatho. Vayakammampīti mattikuddhāraṇaiṭṭhakadārucchedanādikārakānaṃ dinnabhattavettanādivatthubbayena nipphannakammampi atthi, etena kuṭibhedakānaṃ gīvādibhāvaṃ parisaṅkati. Titthiyadhajoti titthiyānameva saññāṇabhūtattā vuttaṃ. Te hi īdisesu cāṭiādīsu vasanti. Aññānipīti pi-saddena attanā vuttakāraṇadvayampi mahāaṭṭhakathāyameva vuttanti dasseti. Yasmā sabbamattikāmayā kuṭi sītakāle atisītā uṇhakāle ca uṇhā sukarā ca hoti corehi bhindituṃ, tasmā tattha ṭhapitapattacīvarādikaṃ sītuṇhacorādīhi vinassatīti vuttaṃ ‘‘pattacīvaraguttatthāyā’’ti. Chindāpeyya vā bhindāpeyya vā anupavajjoti idaṃ ayaṃ kuṭi viya sabbathā anupayogārahaṃ sandhāya vuttaṃ. Yaṃ pana pañcavaṇṇasuttehi vinaddhachattādikaṃ, tattha akappiyabhāgova chinditabbo, na tadavaseso tassa kappiyattā, taṃ chindanto upavajjova hoti. Teneva vakkhati ‘‘ghaṭakampi vāḷarūpampi bhinditvā dhāretabba’’ntiādi.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / த⁴னியவத்து²வண்ணனா • Dhaniyavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / த⁴னியவத்து²வண்ணனா • Dhaniyavatthuvaṇṇanā
