| Library / Tipiṭaka / д̇ибидага • Tipiṭaka / важ̇ираб̣уд̣̇д̇хи-дийгаа • Vajirabuddhi-ṭīkā |
2. д̣̇уд̇ияабаарааж̇игам̣
2. Dutiyapārājikaṃ
д̇ханияавад̇т̇уван̣н̣анаа
Dhaniyavatthuvaṇṇanā
84. д̣̇уд̇ияз рааж̇уухи зва бариг̇г̇ахид̇ад̇д̇аа ‘‘рааж̇аг̇аха’’нд̇и лад̣̇д̇ханаамагз самийбад̇т̇зна, ад̇хигаран̣ад̇т̇зна жа бадилад̣̇д̇хабхуммавибхад̇д̇игз г̇иж̇жхагуудз баб̣б̣ад̇з жад̇уухи вихаарзхи вихаранд̇од̇и ад̇хиббааяо. д̇асса ‘‘вассам̣ убаг̇ажчим̣суу’’д̇и иминаа самб̣анд̇хо взд̣̇ид̇аб̣б̣о. д̇аяо зва хи н̃ад̇д̇им̣ табзд̇ваа г̇ан̣агаммам̣ гаронд̇и, на д̇ад̇о уунаа ад̇хигаа ваа агирияад̇д̇аа. д̇ад̇т̇а винаяабарияааязна сан̇гхаг̇ан̣абуг̇г̇алагаммагосаллад̇т̇ам̣ ид̣̇ам̣ багин̣н̣агам̣ взд̣̇ид̇аб̣б̣ам̣ – ад̇т̇и сан̇гхагаммам̣ сан̇гхо зва гарод̇и, на г̇ан̣о на буг̇г̇ало, д̇ам̣ абалоганагаммасса гаммалагкан̣згад̣̇зсам̣ табзд̇ваа ид̇арам̣ жад̇уб̣б̣ид̇хамби гаммам̣ взд̣̇ид̇аб̣б̣ам̣. ад̇т̇и сан̇гхагаммам̣ сан̇гхо жа гарод̇и, г̇ан̣о жа гарод̇и, буг̇г̇ало жа гарод̇и. гин̃жаад̇и? яам̣ буб̣б̣з табид̇ам̣. вуд̇д̇ан̃хзд̇ам̣ бариваарадтагат̇ааяам̣ ‘‘яасмим̣ вихаарз д̣̇вз д̇аяо ж̇анаа васанд̇и , д̇зхи нисийд̣̇ид̇ваа гад̇амби сан̇гхзна гад̇асад̣̇исамзва. яасмим̣ бана вихаарз зго бхигку ход̇и, д̇зна бхигкунаа убосат̇ад̣̇ивасз буб̣б̣агаран̣абуб̣б̣агижжам̣ гад̇ваа нисиннзна гад̇амби гад̇игавад̇д̇ам̣ сан̇гхзна гад̇асад̣̇исамзва ход̇ий’’д̇и (бари. адта. 495-496). бунаби вуд̇д̇ам̣ ‘‘згабхигкугз бана вихаарз згзна саавид̇зби буримагад̇игаа бадиббассамбхад̇и зваа’’д̇и. ад̇т̇и г̇ан̣агаммам̣ сан̇гхо гарод̇и, г̇ан̣о гарод̇и, буг̇г̇ало гарод̇и, д̇ам̣ д̇аяо баарисуд̣̇д̇хиубосат̇аа ан̃н̃зсам̣ санд̇игз гарийяанд̇и, д̇асса васзна взд̣̇ид̇аб̣б̣ам̣. ад̇т̇и г̇ан̣агаммам̣ г̇ан̣ова гарод̇и, на сан̇гхо на буг̇г̇ало, д̇ам̣ баарисуд̣̇д̇хиубосат̇о ан̃н̃аман̃н̃ам̣ аарожанавасзна гарийяад̇и, д̇асса васзна взд̣̇ид̇аб̣б̣ам̣. ад̇т̇и буг̇г̇алагаммам̣ буг̇г̇алова гарод̇и, на сан̇гхо на г̇ан̣о, д̇ам̣ ад̇хидтаанубосат̇авасзна взд̣̇ид̇аб̣б̣ам̣. ад̇т̇и г̇ан̣агаммам̣ згажжова г̇ан̣о гарод̇и, згажжо на гарод̇и, д̇ад̇т̇а ан̃ад̇д̇игам̣ д̣̇вз зва гаронд̇и, на д̇аяо. сан̃ад̇д̇игам̣ д̇аяова гаронд̇и, на д̇ад̇о уунаа ад̇хигаа ваа, д̇зна вуд̇д̇ам̣ ‘‘д̇аяо зва хи н̃ад̇д̇им̣ табзд̇ваа г̇ан̣агаммам̣ гаронд̇и, на д̇ад̇о уунаа ад̇хигаа ваа агирияад̇д̇аа’’д̇и. д̇асмаа д̇аяова винаяабарияааязна самбахулаа, на д̇ад̇о уд̣̇д̇ханд̇и взд̣̇ид̇аб̣б̣ам̣. ануг̇ан̣тибад̣̇з бана ‘‘гин̃жааби гаммалагкан̣ам̣ д̇аяова гаронд̇и, ат̇а ко д̇зхи гад̇ам̣ сан̇гхзна гад̇асад̣̇исанд̇и вуд̇д̇ад̇д̇аа згзна барияааязна д̇аяо ж̇анаа винаяабарияааязнаби сан̇гхо’’д̇и вуд̇д̇ам̣, ид̣̇ам̣ саб̣б̣амби винаяагаммам̣ убаад̣̇ааяа вуд̇д̇ам̣, лаабхам̣ бана убаад̣̇ааяа анд̇амасо згоби анубасамбанноби ‘‘сан̇гхо’’д̇и сан̇кяам̣ г̇ажчад̇и гира. бавааран̣аад̣̇ивасасса арун̣уг̇г̇аманасамананд̇арамзва ‘‘вуд̇т̇аг̇ассаа’’д̇и вужжанд̇и, уггам̣санаязна ‘‘баадибад̣̇ад̣̇ивасад̇о бадтааяаа’’д̇и вуд̇д̇ам̣, д̇знзва ‘‘махаабавааран̣ааяа баваарид̇аа’’д̇и вуд̇д̇ам̣. ан̃н̃ат̇аа анд̇арааязна абаваарид̇аа ‘‘вуд̇т̇авассаа’’д̇и на вужжанд̇ийд̇и аабаж̇ж̇ад̇и. т̇амбхаад̣̇и гадтагамманд̇и взд̣̇ид̇аб̣б̣ам̣. гзжи д̇анугам̣ д̣̇ааруд̇т̇амбхам̣ анд̇огад̇ваа мад̇д̇игаамаяам̣ т̇амбхам̣ гаронд̇и, аяам̣ бана д̇ат̇аа на агааси, д̇зна вуд̇д̇ам̣ ‘‘саб̣б̣амад̇д̇игаамаяам̣ гудигам̣ гарид̇ваа’’д̇и. д̇зламиссааяа д̇амб̣амад̇д̇игааяа.
84. Dutiye rājūhi eva pariggahitattā ‘‘rājagaha’’nti laddhanāmake samīpatthena, adhikaraṇatthena ca paṭiladdhabhummavibhattike gijjhakūṭe pabbate catūhi vihārehi viharantoti adhippāyo. Tassa ‘‘vassaṃ upagacchiṃsū’’ti iminā sambandho veditabbo. Tayo eva hi ñattiṃ ṭhapetvā gaṇakammaṃ karonti, na tato ūnā adhikā vā akiriyattā. Tattha vinayapariyāyena saṅghagaṇapuggalakammakosallatthaṃ idaṃ pakiṇṇakaṃ veditabbaṃ – atthi saṅghakammaṃ saṅgho eva karoti, na gaṇo na puggalo, taṃ apalokanakammassa kammalakkhaṇekadesaṃ ṭhapetvā itaraṃ catubbidhampi kammaṃ veditabbaṃ. Atthi saṅghakammaṃ saṅgho ca karoti, gaṇo ca karoti, puggalo ca karoti. Kiñcāti? Yaṃ pubbe ṭhapitaṃ. Vuttañhetaṃ parivāraṭṭhakathāyaṃ ‘‘yasmiṃ vihāre dve tayo janā vasanti , tehi nisīditvā katampi saṅghena katasadisameva. Yasmiṃ pana vihāre eko bhikkhu hoti, tena bhikkhunā uposathadivase pubbakaraṇapubbakiccaṃ katvā nisinnena katampi katikavattaṃ saṅghena katasadisameva hotī’’ti (pari. aṭṭha. 495-496). Punapi vuttaṃ ‘‘ekabhikkhuke pana vihāre ekena sāvitepi purimakatikā paṭippassambhati evā’’ti. Atthi gaṇakammaṃ saṅgho karoti, gaṇo karoti, puggalo karoti, taṃ tayo pārisuddhiuposathā aññesaṃ santike karīyanti, tassa vasena veditabbaṃ. Atthi gaṇakammaṃ gaṇova karoti, na saṅgho na puggalo, taṃ pārisuddhiuposatho aññamaññaṃ ārocanavasena karīyati, tassa vasena veditabbaṃ. Atthi puggalakammaṃ puggalova karoti, na saṅgho na gaṇo, taṃ adhiṭṭhānuposathavasena veditabbaṃ. Atthi gaṇakammaṃ ekaccova gaṇo karoti, ekacco na karoti, tattha añattikaṃ dve eva karonti, na tayo. Sañattikaṃ tayova karonti, na tato ūnā adhikā vā, tena vuttaṃ ‘‘tayo eva hi ñattiṃ ṭhapetvā gaṇakammaṃ karonti, na tato ūnā adhikā vā akiriyattā’’ti. Tasmā tayova vinayapariyāyena sampahulā, na tato uddhanti veditabbaṃ. Anugaṇṭhipade pana ‘‘kiñcāpi kammalakkhaṇaṃ tayova karonti, atha kho tehi kataṃ saṅghena katasadisanti vuttattā ekena pariyāyena tayo janā vinayapariyāyenapi saṅgho’’ti vuttaṃ, idaṃ sabbampi vinayakammaṃ upādāya vuttaṃ, lābhaṃ pana upādāya antamaso ekopi anupasampannopi ‘‘saṅgho’’ti saṅkhyaṃ gacchati kira. Pavāraṇādivasassa aruṇuggamanasamanantarameva ‘‘vutthagassā’’ti vuccanti, ukkaṃsanayena ‘‘pāṭipadadivasato paṭṭhāyā’’ti vuttaṃ, teneva ‘‘mahāpavāraṇāya pavāritā’’ti vuttaṃ. Aññathā antarāyena apavāritā ‘‘vutthavassā’’ti na vuccantīti āpajjati. Thambhādi kaṭṭhakammanti veditabbaṃ. Keci tanukaṃ dārutthambhaṃ antokatvā mattikāmayaṃ thambhaṃ karonti, ayaṃ pana tathā na akāsi, tena vuttaṃ ‘‘sabbamattikāmayaṃ kuṭikaṃ karitvā’’ti. Telamissāya tambamattikāya.
85. ‘‘маа бажчимаа ж̇анад̇аа баан̣зсу баад̇аб̣яад̇ам̣ аабаж̇ж̇ий’’д̇и иминаа ануд̣̇д̣̇зсасигкаабад̣̇зна яад̇т̇а идтагабажана бад̇д̇абажана гудигаран̣а вихаарагаараабана навагаммагаран̣а кан̣д̣апуллабадисан̇каран̣а вихаарасаммаж̇ж̇ана бадаг̇г̇ид̣̇аана гуубабогкаран̣ийкан̣аабанаад̣̇ийсу баад̇аб̣яад̇ам̣ ж̇аананд̇зна бхигкунаа габбияаважанамби на вад̇д̇аб̣б̣анд̇и д̣̇ассзд̇и, д̇знзва барияааяам̣ авад̇ваа д̇зсам̣ сигкаабад̣̇аанам̣ анаабад̇д̇иваарзсу ‘‘анаабад̇д̇и асад̇ияаа аж̇аананд̇ассаа’’д̇и вуд̇д̇ам̣. ‘‘анд̇араабад̇д̇исигкаабад̣̇а’’нд̇иби зд̇асса наамамзва. ‘‘г̇ажчат̇зд̇ам̣, бхигкавз, гудигам̣ бхинд̣̇ат̇аа’’д̇и иминаа гад̇ам̣ лабхид̇ваа д̇ад̇т̇а васанд̇аанамби д̣̇уггадамзваад̇и жа сид̣̇д̇хам̣. ан̃н̃ат̇аа хи бхаг̇аваа на бхинд̣̇аабзяяа. зса наяо бхзд̣̇анагам̣ чзд̣̇анагам̣ уд̣̇д̣̇ааланаганд̇и зд̇т̇ааби, аабад̇д̇ибхзд̣̇аава. д̇ад̇о зва хи бхзд̣̇анагасигкаабад̣̇аад̣̇ийсу вияа ‘‘ан̃н̃зна гад̇ам̣ бадилабхид̇ваа барибхун̃ж̇ад̇и, аабад̇д̇и д̣̇уггадассаа’’д̇и на вуд̇д̇ам̣, д̇ат̇аа ан̃н̃ассад̇т̇ааяа гарод̇и, жзд̇ияаад̣̇ийнам̣ ад̇т̇ааяа гарод̇и, д̣̇уггадамзваад̇и жа сид̣̇д̇хам̣, ан̃н̃ат̇аа гудигаарасигкаабад̣̇аад̣̇ийсу вияа ‘‘ан̃н̃ассад̇т̇ааяа ваасааг̇аарам̣ табзд̇ваа саб̣б̣ад̇т̇а, анаабад̇д̇ий’’д̇и наяамзва вад̣̇зяяа, на бхинд̣̇аабзяяа. саб̣б̣амад̇д̇игаамаяабхаавам̣ бана можзд̇ваа гадтабаасаан̣аад̣̇имиссам̣ гад̇ваа барибхун̃ж̇ад̇и, анаабад̇д̇и. д̇ат̇аа хи чзд̣̇анагасигкаабад̣̇аад̣̇ийсу бхаг̇авад̇аа наяо д̣̇инно ‘‘ан̃н̃зна гад̇ам̣ бамаан̣аад̇игганд̇ам̣ бадилабхид̇ваа чинд̣̇ид̇ваа барибхун̃ж̇ад̇ий’’д̇иаад̣̇ийсу. гзжи бана ‘‘ваяагаммамбийд̇и зд̇зна муулам̣ д̣̇ад̇ваа гаараабид̇амби ад̇т̇и, д̇зна д̇ам̣ ан̃н̃зна гад̇амби на ваддад̇ийд̇и сид̣̇д̇ха’’нд̇и вад̣̇анд̇и, д̇ам̣ на сунд̣̇арам̣. гасмаа? самбхаарз гин̣ид̇ваа саяамзва гаронд̇ассааби ваяагаммасамбхавад̇о. гим̣ ваа баал̣илзсз сад̇и адтагат̇аалзсанаяо. идтагаахи г̇ин̃ж̇агаавасат̇асан̇кзбзна гад̇аа ваддад̇ийд̇и зд̇т̇а багад̇иидтагаахи жинид̇ваа гад̇д̇аб̣б̣аавасат̇о г̇ин̃ж̇агаавасат̇о наама. саа хи ‘‘мад̇д̇игаамаяаа’’д̇и на вужжад̇и, ‘‘идтагагудигаа’’д̇взва вужжад̇и, д̇асмаа т̇усаг̇омаяад̇ин̣абалааламиссаа мад̇д̇игаамаяааби абаггидтагамаяааби ‘‘саб̣б̣амад̇д̇игаамаяаа’’д̇взва вужжад̇ийд̇и но канд̇ийд̇и аажарияо, бхасмаад̣̇аяо хи мад̇д̇игааяа д̣̇ал̣хибхаавад̇т̇амзва аад̣̇ийяанд̇и, абаггидтагамаяааби г̇ин̃ж̇агаавасат̇асан̇кяам̣ на г̇ажчад̇и, на жа ааяасмаа д̇ханияо згаббахаарзнзва гумбхагааро вияа гумбхам̣ д̇ам̣ гудигам̣ нидтаабзси, ануггамзна бана сугкаабзд̇ваа сугкаабзд̇ваа мад̇д̇игаабин̣д̣зхи жинид̇ваа нидтаабзси, абаггидтагамаяаа гуди вияа саб̣б̣амад̇д̇игаамаяаа гуди згааб̣ад̣̇д̇хаа ход̇и, на д̇ат̇аа баггидтагамаяаа, д̇асмаа саа габбад̇ийд̇и згз. саб̣б̣амад̇д̇игаамаяааяа гудияаа б̣ахи жз д̇ин̣агудигаад̣̇им̣ гад̇ваа анд̇о васад̇и, д̣̇уггадамзва. сажз д̇ад̇т̇а д̇ад̇т̇а чид̣̇д̣̇ам̣ гад̇ваа б̣анд̇хид̇ваа згааб̣ад̣̇д̇хам̣ гарод̇и, ваддад̇и. анд̇о жз д̇ин̣агудигаад̣̇им̣ гад̇ваа анд̇о васад̇и, ваддад̇и. гаараго зва жз васад̇и, гаран̣абажжаяаа д̣̇уггадам̣ аабаж̇ж̇ад̇и, на васанабажжаяаа. сажз анд̇о ваа б̣ахи ваа убхаяад̇т̇а ваа суд̇хааяа лимбад̇и, ваддад̇и. яасмаа саб̣б̣амад̇д̇игаамаяаа гуди сугараа бхинд̣̇ид̇ум̣, д̇асмаа д̇ад̇т̇а табид̇ам̣ бад̇д̇ажийвараад̣̇и аг̇уд̇д̇ам̣ ход̇и, жораад̣̇ийхи авахарид̇ум̣ саггаа, д̇зна вуд̇д̇ам̣ ‘‘бад̇д̇ажийвараг̇уд̇д̇ад̇т̇ааяаа’’д̇и.
85. ‘‘Mā pacchimā janatā pāṇesu pātabyataṃ āpajjī’’ti iminā anuddesasikkhāpadena yattha iṭṭhakapacana pattapacana kuṭikaraṇa vihārakārāpana navakammakaraṇa khaṇḍaphullapaṭisaṅkharaṇa vihārasammajjana paṭaggidāna kūpapokkharaṇīkhaṇāpanādīsu pātabyataṃ jānantena bhikkhunā kappiyavacanampi na vattabbanti dasseti, teneva pariyāyaṃ avatvā tesaṃ sikkhāpadānaṃ anāpattivāresu ‘‘anāpatti asatiyā ajānantassā’’ti vuttaṃ. ‘‘Antarāpattisikkhāpada’’ntipi etassa nāmameva. ‘‘Gacchathetaṃ, bhikkhave, kuṭikaṃ bhindathā’’ti iminā kataṃ labhitvā tattha vasantānampi dukkaṭamevāti ca siddhaṃ. Aññathā hi bhagavā na bhindāpeyya. Esa nayo bhedanakaṃ chedanakaṃ uddālanakanti etthāpi, āpattibhedāva. Tato eva hi bhedanakasikkhāpadādīsu viya ‘‘aññena kataṃ paṭilabhitvā paribhuñjati, āpatti dukkaṭassā’’ti na vuttaṃ, tathā aññassatthāya karoti, cetiyādīnaṃ atthāya karoti, dukkaṭamevāti ca siddhaṃ, aññathā kuṭikārasikkhāpadādīsu viya ‘‘aññassatthāya vāsāgāraṃ ṭhapetvā sabbattha, anāpattī’’ti nayameva vadeyya, na bhindāpeyya. Sabbamattikāmayabhāvaṃ pana mocetvā kaṭṭhapāsāṇādimissaṃ katvā paribhuñjati, anāpatti. Tathā hi chedanakasikkhāpadādīsu bhagavatā nayo dinno ‘‘aññena kataṃ pamāṇātikkantaṃ paṭilabhitvā chinditvā paribhuñjatī’’tiādīsu. Keci pana ‘‘vayakammampīti etena mūlaṃ datvā kārāpitampi atthi, tena taṃ aññena katampi na vaṭṭatīti siddha’’nti vadanti, taṃ na sundaraṃ. Kasmā? Sambhāre kiṇitvā sayameva karontassāpi vayakammasambhavato. Kiṃ vā pāḷilese sati aṭṭhakathālesanayo. Iṭṭhakāhi giñjakāvasathasaṅkhepena katā vaṭṭatīti ettha pakatiiṭṭhakāhi cinitvā kattabbāvasatho giñjakāvasatho nāma. Sā hi ‘‘mattikāmayā’’ti na vuccati, ‘‘iṭṭhakakuṭikā’’tveva vuccati, tasmā thusagomayatiṇapalālamissā mattikāmayāpi apakkiṭṭhakamayāpi ‘‘sabbamattikāmayā’’tveva vuccatīti no khantīti ācariyo, bhasmādayo hi mattikāya daḷhibhāvatthameva ādīyanti, apakkiṭṭhakamayāpi giñjakāvasathasaṅkhyaṃ na gacchati, na ca āyasmā dhaniyo ekappahāreneva kumbhakāro viya kumbhaṃ taṃ kuṭikaṃ niṭṭhāpesi, anukkamena pana sukkhāpetvā sukkhāpetvā mattikāpiṇḍehi cinitvā niṭṭhāpesi, apakkiṭṭhakamayā kuṭi viya sabbamattikāmayā kuṭi ekābaddhā hoti, na tathā pakkiṭṭhakamayā, tasmā sā kappatīti eke. Sabbamattikāmayāya kuṭiyā bahi ce tiṇakuṭikādiṃ katvā anto vasati, dukkaṭameva. Sace tattha tattha chiddaṃ katvā bandhitvā ekābaddhaṃ karoti, vaṭṭati. Anto ce tiṇakuṭikādiṃ katvā anto vasati, vaṭṭati. Kārako eva ce vasati, karaṇapaccayā dukkaṭaṃ āpajjati, na vasanapaccayā. Sace anto vā bahi vā ubhayattha vā sudhāya limpati, vaṭṭati. Yasmā sabbamattikāmayā kuṭi sukarā bhindituṃ, tasmā tattha ṭhapitaṃ pattacīvarādi aguttaṃ hoti, corādīhi avaharituṃ sakkā, tena vuttaṃ ‘‘pattacīvaraguttatthāyā’’ti.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 2. д̣̇уд̇ияабаарааж̇игам̣ • 2. Dutiyapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 2. д̣̇уд̇ияабаарааж̇игам̣ • 2. Dutiyapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / д̇ханияавад̇т̇уван̣н̣анаа • Dhaniyavatthuvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / д̇ханияавад̇т̇уван̣н̣анаа • Dhaniyavatthuvaṇṇanā
