| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
6. д̇хануг̇г̇ахасуд̇д̇аван̣н̣анаа
6. Dhanuggahasuttavaṇṇanā
228. д̣̇ал̣хад̇ханунод̇и т̇ирад̇арад̇хануно. ид̣̇аани д̇асса т̇ирад̇арабхаавам̣ барижчзд̣̇ад̇о д̣̇ассзд̇ум̣ ‘‘д̣̇ал̣хад̇хануу’’д̇иаад̣̇и вуд̇д̇ам̣. д̇ад̇т̇а д̣̇висахассат̇ааманд̇и балаанам̣ д̣̇висахассат̇аамам̣. вуд̇д̇амзвад̇т̇ам̣ баагадад̇арам̣ гад̇ваа д̣̇ассзд̇ум̣ ‘‘яассаа’’д̇иаад̣̇имааха. д̇ад̇т̇а яассаад̇и д̇хануно. ааробид̇ассаад̇и ж̇ияам̣ ааробид̇асса. ж̇ияааб̣ад̣̇д̇ход̇и ж̇ияааяа б̣ад̣̇д̇хо. бат̇авид̇о мужжад̇и, зд̇ам̣ ‘‘д̣̇висахассат̇аама’’нд̇и взд̣̇ид̇аб̣б̣ам̣ . лохасийсаад̣̇ийнанд̇и гаал̣алохад̇амб̣алохасийсаад̣̇ийнам̣. бхаарод̇и бурисабхааро, со бана маж̇жхимабурисасса васзна зд̣̇исам̣ д̇асса б̣алам̣ д̣̇адтаб̣б̣ам̣. уг̇г̇ахид̇асиббаа д̇ханувзд̣̇асигкаавасзна. жин̣н̣авасийбхааваа лагкзсу авираж̇жханасарагкзбавасзна. гад̇ам̣ рааж̇агулаад̣̇ийсу убаг̇анд̇ваа асанам̣ сарагкзбо зд̇зхийд̇и гад̇уубасанаад̇и ааха ‘‘рааж̇агулаад̣̇ийсу д̣̇ассид̇асиббаа’’д̇и.
228.Daḷhadhanunoti thirataradhanuno. Idāni tassa thiratarabhāvaṃ paricchedato dassetuṃ ‘‘daḷhadhanū’’tiādi vuttaṃ. Tattha dvisahassathāmanti palānaṃ dvisahassathāmaṃ. Vuttamevatthaṃ pākaṭataraṃ katvā dassetuṃ ‘‘yassā’’tiādimāha. Tattha yassāti dhanuno. Āropitassāti jiyaṃ āropitassa. Jiyābaddhoti jiyāya baddho. Pathavito muccati, etaṃ ‘‘dvisahassathāma’’nti veditabbaṃ . Lohasīsādīnanti kāḷalohatambalohasīsādīnaṃ. Bhāroti purisabhāro, so pana majjhimapurisassa vasena edisaṃ tassa balaṃ daṭṭhabbaṃ. Uggahitasippā dhanuvedasikkhāvasena. Ciṇṇavasībhāvā lakkhesu avirajjhanasarakkhepavasena. Kataṃ rājakulādīsu upagantvā asanaṃ sarakkhepo etehīti katūpasanāti āha ‘‘rājakulādīsu dassitasippā’’ti.
‘‘б̣од̇хисад̇д̇о жад̇д̇аари ган̣д̣аани аахарий’’д̇и вад̇ваа д̇амзва ад̇т̇ам̣ вид̇т̇аарад̇о д̣̇ассзнд̇о ‘‘д̇ад̣̇аа гираа’’д̇иаад̣̇имааха. д̇ад̇т̇а ж̇ависсаамаад̇и д̇хаависсаама. аг̇г̇и удтахийд̇и сийгхабад̇анасанд̇аабзна жа суурияарасмисанд̇аабасса аасаннабхаавзна жа усумаа удтахи. багкабан̃ж̇арзнаад̇и багкаж̇ааланд̇арзна.
‘‘Bodhisatto cattāri kaṇḍāni āharī’’ti vatvā tameva atthaṃ vitthārato dassento ‘‘tadā kirā’’tiādimāha. Tattha javissāmāti dhāvissāma. Aggi uṭṭhahīti sīghapatanasantāpena ca sūriyarasmisantāpassa āsannabhāvena ca usumā uṭṭhahi. Pakkhapañjarenāti pakkhajālantarena.
нивад̇д̇ид̇ваад̇и ‘‘ниббаяож̇анамид̣̇ам̣ ж̇авана’’нд̇и нивад̇д̇ид̇ваа. бад̇д̇агадаахзна од̇т̇адабад̇д̇о вияаад̇и бихид̇абад̇д̇о вияа ахоси, взг̇асаа бад̇анзна наг̇арасса убари аагаасасса ниригкан̣ам̣ ахоси. сан̃жаарид̇ад̇д̇аа анзгахам̣сасахассасад̣̇исо бан̃н̃ааяи сзяяат̇ааби б̣од̇хисад̇д̇асса д̇хануг̇г̇ахагаалз сарагуудаад̣̇ид̣̇ассанз.
Nivattitvāti ‘‘nippayojanamidaṃ javana’’nti nivattitvā. Pattakaṭāhena otthaṭapatto viyāti pihitapatto viya ahosi, vegasā patanena nagarassa upari ākāsassa nirikkhaṇaṃ ahosi. Sañcāritattā anekahaṃsasahassasadiso paññāyi seyyathāpi bodhisattassa dhanuggahakāle sarakūṭādidassane.
д̣̇уггаранд̇и д̇асса ад̣̇ассанам̣ санд̇хааяааха, на ад̇д̇ано бад̇анам̣. суурияаман̣д̣алан̃хи ад̇исийгхзна ж̇авзна г̇ажчанд̇амби бан̃н̃аасаяож̇анааяаамавид̇т̇ад̇ам̣ ад̇д̇ано вибулад̇ааяа бабхассарад̇ааяа жа сад̇д̇аанам̣ жагкусса г̇ожарабхаавам̣ г̇ажчад̇и, ж̇аванахам̣со бана д̇аад̣̇исзна сууриязна сад̣̇д̇хим̣ ж̇авзна г̇ажчанд̇о на бан̃н̃ааязяяа. д̇асмаа вуд̇д̇ам̣ ‘‘на саггаа д̇аяаа бассид̇у’’нд̇и. жад̇д̇ааро агкан̣авзд̇хино. г̇анд̇ваа г̇ахид̇з сод̇ум̣ гхан̣д̣ам̣ бил̣анд̇хаабзд̇ваа саяам̣ бурад̇т̇аабхимуко нисинно. бурад̇т̇имад̣̇исаабхимукам̣ г̇ад̇аган̣д̣ам̣ санд̇хааяааха ‘‘батамаган̣д̣знзва сад̣̇д̇хим̣ уббад̇ид̇ваа’’д̇и. д̇з жад̇д̇аари ган̣д̣аани згагкан̣зязва кибим̣су.
Dukkaranti tassa adassanaṃ sandhāyāha, na attano patanaṃ. Sūriyamaṇḍalañhi atisīghena javena gacchantampi paññāsayojanāyāmavitthataṃ attano vipulatāya pabhassaratāya ca sattānaṃ cakkhussa gocarabhāvaṃ gacchati, javanahaṃso pana tādisena sūriyena saddhiṃ javena gacchanto na paññāyeyya. Tasmā vuttaṃ ‘‘na sakkā tayā passitu’’nti. Cattāro akkhaṇavedhino. Gantvā gahite sotuṃ ghaṇḍaṃ piḷandhāpetvā sayaṃ puratthābhimukho nisinno. Puratthimadisābhimukhaṃ gatakaṇḍaṃ sandhāyāha ‘‘paṭhamakaṇḍeneva saddhiṃ uppatitvā’’ti. Te cattāri kaṇḍāni ekakkhaṇeyeva khipiṃsu.
ааяум̣ сан̇карод̇и зд̇знаад̇и ааяусан̇кааро. яат̇аа хи гаммаж̇аруубаанам̣ бавад̇д̇и ж̇ийвид̇инд̣̇рияабадиб̣ад̣̇д̇хаа, звам̣ ад̇д̇абхаавасса бавад̇д̇и д̇аббадиб̣ад̣̇д̇хаад̇и. б̣ахуважананид̣̇д̣̇зсо бана баал̣ияам̣ згасмим̣ кан̣з анзгасад̇асан̇касса ж̇ийвид̇инд̣̇рияасса убалаб̣бханад̇о. д̇ам̣ ж̇ийвид̇инд̣̇рияам̣. д̇ад̇о яат̇аавуд̇д̇ад̣̇звад̇аанам̣ ж̇авад̇о сийгхад̇арам̣ кийяад̇и ид̇д̇аракан̣ад̇д̇аа. вуд̇д̇ан̃хзд̇ам̣ –
Āyuṃ saṅkharoti etenāti āyusaṅkhāro. Yathā hi kammajarūpānaṃ pavatti jīvitindriyapaṭibaddhā, evaṃ attabhāvassa pavatti tappaṭibaddhāti. Bahuvacananiddeso pana pāḷiyaṃ ekasmiṃ khaṇe anekasatasaṅkhassa jīvitindriyassa upalabbhanato. Taṃ jīvitindriyaṃ. Tato yathāvuttadevatānaṃ javato sīghataraṃ khīyati ittarakhaṇattā. Vuttañhetaṃ –
‘‘ж̇ийвид̇ам̣ ад̇д̇абхааво жа, сукад̣̇угкаа жа гзвалаа;
‘‘Jīvitaṃ attabhāvo ca, sukhadukkhā ca kevalā;
згажид̇д̇асамааяуд̇д̇аа, лахусо вад̇д̇ад̇з кан̣о’’д̇и. (махаани. 10);
Ekacittasamāyuttā, lahuso vattate khaṇo’’ti. (mahāni. 10);
бхзд̣̇од̇и бхан̇г̇о. на саггаа бан̃н̃аабзд̇ум̣ д̇ад̇оби ад̇ивияа ид̇д̇аракан̣ад̇д̇аа.
Bhedoti bhaṅgo. Na sakkā paññāpetuṃ tatopi ativiya ittarakhaṇattā.
д̇хануг̇г̇ахасуд̇д̇аван̣н̣анаа нидтид̇аа.
Dhanuggahasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 6. д̇хануг̇г̇ахасуд̇д̇ам̣ • 6. Dhanuggahasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 6. д̇хануг̇г̇ахасуд̇д̇аван̣н̣анаа • 6. Dhanuggahasuttavaṇṇanā
