| Library / Tipiṭaka / তিপিটক • Tipiṭaka / বুদ্ধৰংসপাল়ি • Buddhavaṃsapāḷi |
২৯. ধাতুভাজনীযকথা
29. Dhātubhājanīyakathā
১.
1.
মহাগোতমো জিনৰরো, কুসিনারম্হি নিব্বুতো।
Mahāgotamo jinavaro, kusināramhi nibbuto;
ধাতুৰিত্থারিকং আসি, তেসু তেসু পদেসতো॥
Dhātuvitthārikaṃ āsi, tesu tesu padesato.
২.
2.
একো অজাতসত্তুস্স, একো ৰেসালিযা পুরে।
Eko ajātasattussa, eko vesāliyā pure;
একো কপিলৰত্থুস্মিং, একো চ অল্লকপ্পকে॥
Eko kapilavatthusmiṃ, eko ca allakappake.
৩.
3.
একো চ রামগামম্হি, একো চ ৰেঠদীপকে।
Eko ca rāmagāmamhi, eko ca veṭhadīpake;
একো পাৰেয্যকে মল্লে, একো চ কোসিনারকে॥
Eko pāveyyake malle, eko ca kosinārake.
৪.
4.
কুম্ভস্স থূপং কারেসি, ব্রাহ্মণো দোণসৰ্হযো।
Kumbhassa thūpaṃ kāresi, brāhmaṇo doṇasavhayo;
অঙ্গারথূপং কারেসুং, মোরিযা তুট্ঠমানসা॥
Aṅgārathūpaṃ kāresuṃ, moriyā tuṭṭhamānasā.
৫.
5.
অট্ঠ সারীরিকা থূপা, নৰমো কুম্ভচেতিযো।
Aṭṭha sārīrikā thūpā, navamo kumbhacetiyo;
অঙ্গারথূপো দসমো, তদাযেৰ পতিট্ঠিতো॥
Aṅgārathūpo dasamo, tadāyeva patiṭṭhito.
৬.
6.
উণ্হীসং চতস্সো দাঠা, অক্খকা দ্ৰে চ ধাতুযো।
Uṇhīsaṃ catasso dāṭhā, akkhakā dve ca dhātuyo;
অসম্ভিন্না ইমা সত্ত, সেসা ভিন্নাৰ ধাতুযো॥
Asambhinnā imā satta, sesā bhinnāva dhātuyo.
৭.
7.
খুদ্দকা সাসপমত্তা চ, নানাৰণ্ণা চ ধাতুযো॥
Khuddakā sāsapamattā ca, nānāvaṇṇā ca dhātuyo.
৮.
8.
মহন্তা সুৰণ্ণৰণ্ণা চ, মুত্তৰণ্ণা চ মজ্ঝিমা।
Mahantā suvaṇṇavaṇṇā ca, muttavaṇṇā ca majjhimā;
খুদ্দকা মকুলৰণ্ণা চ, সোল়সদোণমত্তিকা॥
Khuddakā makulavaṇṇā ca, soḷasadoṇamattikā.
৯.
9.
মহন্তা পঞ্চ নাল়িযো, নাল়িযো পঞ্চ মজ্ঝিমা।
Mahantā pañca nāḷiyo, nāḷiyo pañca majjhimā;
খুদ্দকা ছ নাল়ী চেৰ, এতা সব্বাপি ধাতুযো॥
Khuddakā cha nāḷī ceva, etā sabbāpi dhātuyo.
১০.
10.
উণ্হীসং সীহল়ে দীপে, ব্রহ্মলোকে চ ৰামকং।
Uṇhīsaṃ sīhaḷe dīpe, brahmaloke ca vāmakaṃ;
সীহল়ে দক্খিণক্খঞ্চ, সব্বাপেতা পতিট্ঠিতা॥
Sīhaḷe dakkhiṇakkhañca, sabbāpetā patiṭṭhitā.
১১.
11.
একা দাঠা তিদসপুরে, একা নাগপুরে অহু।
Ekā dāṭhā tidasapure, ekā nāgapure ahu;
একা গন্ধারৰিসযে, একা কলিঙ্গরাজিনো॥
Ekā gandhāravisaye, ekā kaliṅgarājino.
১২.
12.
চত্তালীসসমা দন্তা, কেসা লোমা চ সব্বসো।
Cattālīsasamā dantā, kesā lomā ca sabbaso;
দেৰা হরিংসু একেকং, চক্কৰাল়পরম্পরা॥
Devā hariṃsu ekekaṃ, cakkavāḷaparamparā.
১৩.
13.
ৰজিরাযং ভগৰতো, পত্তো দণ্ডঞ্চ চীৰরং।
Vajirāyaṃ bhagavato, patto daṇḍañca cīvaraṃ;
১৪.
14.
পাটলিপুত্তপুরম্হি, করণং কাযবন্ধনং।
Pāṭaliputtapuramhi, karaṇaṃ kāyabandhanaṃ;
চম্পাযুদকসাটিযং, উণ্ণলোমঞ্চ কোসলে॥
Campāyudakasāṭiyaṃ, uṇṇalomañca kosale.
১৫.
15.
কাসাৰং ব্রহ্মলোকে চ, ৰেঠনং তিদসে পুরে।
Kāsāvaṃ brahmaloke ca, veṭhanaṃ tidase pure;
১৬.
16.
অরণী চ মিথিলাযং, ৰিদেহে পরিসাৰনং।
Araṇī ca mithilāyaṃ, videhe parisāvanaṃ;
ৰাসি সূচিঘরঞ্চাপি, ইন্দপত্থপুরে তদা॥
Vāsi sūcigharañcāpi, indapatthapure tadā.
১৭.
17.
পরিক্খারা অৰসেসা, জনপদে অপরন্তকে।
Parikkhārā avasesā, janapade aparantake;
পরিভুত্তানি মুনিনা, অকংসু মনুজা তদা॥
Paribhuttāni muninā, akaṃsu manujā tadā.
১৮.
18.
ধাতুৰিত্থারিকং আসি, গোতমস্স মহেসিনো।
Dhātuvitthārikaṃ āsi, gotamassa mahesino;
পাণীনং অনুকম্পায, অহু পোরাণিকং তদাতি॥
Pāṇīnaṃ anukampāya, ahu porāṇikaṃ tadāti.
ধাতুভাজনীযকথা নিট্ঠিতা।
Dhātubhājanīyakathā niṭṭhitā.
বুদ্ধৰংসোনিট্ঠিতো।
Buddhavaṃsoniṭṭhito.
Footnotes:
