| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৯. ধাতুসোসংসন্দনসুত্তং
9. Dhātusosaṃsandanasuttaṃ
৭৮. ৰুত্তঞ্হেতং ভগৰতা, ৰুত্তমরহতাতি মে সুতং –
78. Vuttañhetaṃ bhagavatā, vuttamarahatāti me sutaṃ –
‘‘ধাতুসো, ভিক্খৰে, সত্তা সত্তেহি সদ্ধিং সংসন্দন্তি সমেন্তি। হীনাধিমুত্তিকা সত্তা হীনাধিমুত্তিকেহি সত্তেহি সদ্ধিং সংসন্দন্তি সমেন্তি, কল্যাণাধিমুত্তিকা সত্তা কল্যাণাধিমুত্তিকেহি সত্তেহি সদ্ধিং সংসন্দন্তি সমেন্তি।
‘‘Dhātuso, bhikkhave, sattā sattehi saddhiṃ saṃsandanti samenti. Hīnādhimuttikā sattā hīnādhimuttikehi sattehi saddhiṃ saṃsandanti samenti, kalyāṇādhimuttikā sattā kalyāṇādhimuttikehi sattehi saddhiṃ saṃsandanti samenti.
‘‘অতীতম্পি, ভিক্খৰে, অদ্ধানং ধাতুসোৰ সত্তা সত্তেহি সদ্ধিং সংসন্দিংসু সমিংসু। হীনাধিমুত্তিকা সত্তা হীনাধিমুত্তিকেহি সত্তেহি সদ্ধিং সংসন্দিংসু সমিংসু, কল্যাণাধিমুত্তিকা সত্তা কল্যাণাধিমুত্তিকেহি সত্তেহি সদ্ধিং সংসন্দিংসু সমিংসু।
‘‘Atītampi, bhikkhave, addhānaṃ dhātusova sattā sattehi saddhiṃ saṃsandiṃsu samiṃsu. Hīnādhimuttikā sattā hīnādhimuttikehi sattehi saddhiṃ saṃsandiṃsu samiṃsu, kalyāṇādhimuttikā sattā kalyāṇādhimuttikehi sattehi saddhiṃ saṃsandiṃsu samiṃsu.
‘‘অনাগতম্পি , ভিক্খৰে, অদ্ধানং ধাতুসোৰ সত্তা সত্তেহি সদ্ধিং সংসন্দিস্সন্তি সমেস্সন্তি। হীনাধিমুত্তিকা সত্তা হীনাধিমুত্তিকেহি সত্তেহি সদ্ধিং সংসন্দিস্সন্তি সমেস্সন্তি, কল্যাণাধিমুত্তিকা সত্তা কল্যাণাধিমুত্তিকেহি সত্তেহি সদ্ধিং সংসন্দিস্সন্তি সমেস্সন্তি।
‘‘Anāgatampi , bhikkhave, addhānaṃ dhātusova sattā sattehi saddhiṃ saṃsandissanti samessanti. Hīnādhimuttikā sattā hīnādhimuttikehi sattehi saddhiṃ saṃsandissanti samessanti, kalyāṇādhimuttikā sattā kalyāṇādhimuttikehi sattehi saddhiṃ saṃsandissanti samessanti.
‘‘এতরহিপি, ভিক্খৰে, পচ্চুপ্পনং অদ্ধানং ধাতুসোৰ সত্তা সত্তেহি সদ্ধিং সংসন্দন্তি সমেন্তি। হীনাধিমুত্তিকা সত্তা হীনাধিমুত্তিকেহি সত্তেহি সদ্ধিং সংসন্দন্তি সমেন্তি, কল্যাণাধিমুত্তিকা সত্তা কল্যাণাধিমুত্তিকেহি সত্তেহি সদ্ধিং সংসন্দন্তি সমেন্তী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Etarahipi, bhikkhave, paccuppanaṃ addhānaṃ dhātusova sattā sattehi saddhiṃ saṃsandanti samenti. Hīnādhimuttikā sattā hīnādhimuttikehi sattehi saddhiṃ saṃsandanti samenti, kalyāṇādhimuttikā sattā kalyāṇādhimuttikehi sattehi saddhiṃ saṃsandanti samentī’’ti. Etamatthaṃ bhagavā avoca. Tatthetaṃ iti vuccati –
‘‘সংসগ্গা ৰনথো জাতো, অসংসগ্গেন ছিজ্জতি।
‘‘Saṃsaggā vanatho jāto, asaṃsaggena chijjati;
পরিত্তং দারুমারুয্হ, যথা সীদে মহণ্ণৰে॥
Parittaṃ dārumāruyha, yathā sīde mahaṇṇave.
‘‘এৰং কুসীতমাগম্ম, সাধুজীৰীপি সীদতি।
‘‘Evaṃ kusītamāgamma, sādhujīvīpi sīdati;
তস্মা তং পরিৰজ্জেয্য, কুসীতং হীনৰীরিযং॥
Tasmā taṃ parivajjeyya, kusītaṃ hīnavīriyaṃ.
‘‘পৰিৰিত্তেহি অরিযেহি, পহিতত্তেহি ঝাযিভি।
‘‘Pavivittehi ariyehi, pahitattehi jhāyibhi;
নিচ্চং আরদ্ধৰীরিযেহি, পণ্ডিতেহি সহাৰসে’’তি॥
Niccaṃ āraddhavīriyehi, paṇḍitehi sahāvase’’ti.
অযম্পি অত্থো ৰুত্তো ভগৰতা, ইতি মে সুতন্তি। নৰমং।
Ayampi attho vutto bhagavatā, iti me sutanti. Navamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৯. ধাতুসোসংসন্দনসুত্তৰণ্ণনা • 9. Dhātusosaṃsandanasuttavaṇṇanā
