| Library / Tipiṭaka / ติปิฎก • Tipiṭaka / อิติวุตฺตกปาฬิ • Itivuttakapāḷi |
๙. ธาตุโสสํสนฺทนสุตฺตํ
9. Dhātusosaṃsandanasuttaṃ
๗๘. วุตฺตเญฺหตํ ภควตา, วุตฺตมรหตาติ เม สุตํ –
78. Vuttañhetaṃ bhagavatā, vuttamarahatāti me sutaṃ –
‘‘ธาตุโส, ภิกฺขเว, สตฺตา สเตฺตหิ สทฺธิํ สํสนฺทนฺติ สเมนฺติฯ หีนาธิมุตฺติกา สตฺตา หีนาธิมุตฺติเกหิ สเตฺตหิ สทฺธิํ สํสนฺทนฺติ สเมนฺติ, กลฺยาณาธิมุตฺติกา สตฺตา กลฺยาณาธิมุตฺติเกหิ สเตฺตหิ สทฺธิํ สํสนฺทนฺติ สเมนฺติฯ
‘‘Dhātuso, bhikkhave, sattā sattehi saddhiṃ saṃsandanti samenti. Hīnādhimuttikā sattā hīnādhimuttikehi sattehi saddhiṃ saṃsandanti samenti, kalyāṇādhimuttikā sattā kalyāṇādhimuttikehi sattehi saddhiṃ saṃsandanti samenti.
‘‘อตีตมฺปิ, ภิกฺขเว, อทฺธานํ ธาตุโสว สตฺตา สเตฺตหิ สทฺธิํ สํสนฺทิํสุ สมิํสุฯ หีนาธิมุตฺติกา สตฺตา หีนาธิมุตฺติเกหิ สเตฺตหิ สทฺธิํ สํสนฺทิํสุ สมิํสุ, กลฺยาณาธิมุตฺติกา สตฺตา กลฺยาณาธิมุตฺติเกหิ สเตฺตหิ สทฺธิํ สํสนฺทิํสุ สมิํสุฯ
‘‘Atītampi, bhikkhave, addhānaṃ dhātusova sattā sattehi saddhiṃ saṃsandiṃsu samiṃsu. Hīnādhimuttikā sattā hīnādhimuttikehi sattehi saddhiṃ saṃsandiṃsu samiṃsu, kalyāṇādhimuttikā sattā kalyāṇādhimuttikehi sattehi saddhiṃ saṃsandiṃsu samiṃsu.
‘‘อนาคตมฺปิ , ภิกฺขเว, อทฺธานํ ธาตุโสว สตฺตา สเตฺตหิ สทฺธิํ สํสนฺทิสฺสนฺติ สเมสฺสนฺติฯ หีนาธิมุตฺติกา สตฺตา หีนาธิมุตฺติเกหิ สเตฺตหิ สทฺธิํ สํสนฺทิสฺสนฺติ สเมสฺสนฺติ, กลฺยาณาธิมุตฺติกา สตฺตา กลฺยาณาธิมุตฺติเกหิ สเตฺตหิ สทฺธิํ สํสนฺทิสฺสนฺติ สเมสฺสนฺติฯ
‘‘Anāgatampi , bhikkhave, addhānaṃ dhātusova sattā sattehi saddhiṃ saṃsandissanti samessanti. Hīnādhimuttikā sattā hīnādhimuttikehi sattehi saddhiṃ saṃsandissanti samessanti, kalyāṇādhimuttikā sattā kalyāṇādhimuttikehi sattehi saddhiṃ saṃsandissanti samessanti.
‘‘เอตรหิปิ, ภิกฺขเว, ปจฺจุปฺปนํ อทฺธานํ ธาตุโสว สตฺตา สเตฺตหิ สทฺธิํ สํสนฺทนฺติ สเมนฺติฯ หีนาธิมุตฺติกา สตฺตา หีนาธิมุตฺติเกหิ สเตฺตหิ สทฺธิํ สํสนฺทนฺติ สเมนฺติ, กลฺยาณาธิมุตฺติกา สตฺตา กลฺยาณาธิมุตฺติเกหิ สเตฺตหิ สทฺธิํ สํสนฺทนฺติ สเมนฺตี’’ติฯ เอตมตฺถํ ภควา อโวจฯ ตเตฺถตํ อิติ วุจฺจติ –
‘‘Etarahipi, bhikkhave, paccuppanaṃ addhānaṃ dhātusova sattā sattehi saddhiṃ saṃsandanti samenti. Hīnādhimuttikā sattā hīnādhimuttikehi sattehi saddhiṃ saṃsandanti samenti, kalyāṇādhimuttikā sattā kalyāṇādhimuttikehi sattehi saddhiṃ saṃsandanti samentī’’ti. Etamatthaṃ bhagavā avoca. Tatthetaṃ iti vuccati –
‘‘สํสคฺคา วนโถ ชาโต, อสํสเคฺคน ฉิชฺชติ;
‘‘Saṃsaggā vanatho jāto, asaṃsaggena chijjati;
ปริตฺตํ ทารุมารุยฺห, ยถา สีเท มหณฺณเวฯ
Parittaṃ dārumāruyha, yathā sīde mahaṇṇave.
‘‘เอวํ กุสีตมาคมฺม, สาธุชีวีปิ สีทติ;
‘‘Evaṃ kusītamāgamma, sādhujīvīpi sīdati;
ตสฺมา ตํ ปริวเชฺชยฺย, กุสีตํ หีนวีริยํฯ
Tasmā taṃ parivajjeyya, kusītaṃ hīnavīriyaṃ.
‘‘ปวิวิเตฺตหิ อริเยหิ, ปหิตเตฺตหิ ฌายิภิ;
‘‘Pavivittehi ariyehi, pahitattehi jhāyibhi;
นิจฺจํ อารทฺธวีริเยหิ, ปณฺฑิเตหิ สหาวเส’’ติฯ
Niccaṃ āraddhavīriyehi, paṇḍitehi sahāvase’’ti.
อยมฺปิ อโตฺถ วุโตฺต ภควตา, อิติ เม สุตนฺติฯ นวมํฯ
Ayampi attho vutto bhagavatā, iti me sutanti. Navamaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อิติวุตฺตก-อฎฺฐกถา • Itivuttaka-aṭṭhakathā / ๙. ธาตุโสสํสนฺทนสุตฺตวณฺณนา • 9. Dhātusosaṃsandanasuttavaṇṇanā
