| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៩. ធាតុសោសំសន្ទនសុត្តំ
9. Dhātusosaṃsandanasuttaṃ
៧៨. វុត្តញ្ហេតំ ភគវតា, វុត្តមរហតាតិ មេ សុតំ –
78. Vuttañhetaṃ bhagavatā, vuttamarahatāti me sutaṃ –
‘‘ធាតុសោ, ភិក្ខវេ, សត្តា សត្តេហិ សទ្ធិំ សំសន្ទន្តិ សមេន្តិ។ ហីនាធិមុត្តិកា សត្តា ហីនាធិមុត្តិកេហិ សត្តេហិ សទ្ធិំ សំសន្ទន្តិ សមេន្តិ, កល្យាណាធិមុត្តិកា សត្តា កល្យាណាធិមុត្តិកេហិ សត្តេហិ សទ្ធិំ សំសន្ទន្តិ សមេន្តិ។
‘‘Dhātuso, bhikkhave, sattā sattehi saddhiṃ saṃsandanti samenti. Hīnādhimuttikā sattā hīnādhimuttikehi sattehi saddhiṃ saṃsandanti samenti, kalyāṇādhimuttikā sattā kalyāṇādhimuttikehi sattehi saddhiṃ saṃsandanti samenti.
‘‘អតីតម្បិ, ភិក្ខវេ, អទ្ធានំ ធាតុសោវ សត្តា សត្តេហិ សទ្ធិំ សំសន្ទិំសុ សមិំសុ។ ហីនាធិមុត្តិកា សត្តា ហីនាធិមុត្តិកេហិ សត្តេហិ សទ្ធិំ សំសន្ទិំសុ សមិំសុ, កល្យាណាធិមុត្តិកា សត្តា កល្យាណាធិមុត្តិកេហិ សត្តេហិ សទ្ធិំ សំសន្ទិំសុ សមិំសុ។
‘‘Atītampi, bhikkhave, addhānaṃ dhātusova sattā sattehi saddhiṃ saṃsandiṃsu samiṃsu. Hīnādhimuttikā sattā hīnādhimuttikehi sattehi saddhiṃ saṃsandiṃsu samiṃsu, kalyāṇādhimuttikā sattā kalyāṇādhimuttikehi sattehi saddhiṃ saṃsandiṃsu samiṃsu.
‘‘អនាគតម្បិ , ភិក្ខវេ, អទ្ធានំ ធាតុសោវ សត្តា សត្តេហិ សទ្ធិំ សំសន្ទិស្សន្តិ សមេស្សន្តិ។ ហីនាធិមុត្តិកា សត្តា ហីនាធិមុត្តិកេហិ សត្តេហិ សទ្ធិំ សំសន្ទិស្សន្តិ សមេស្សន្តិ, កល្យាណាធិមុត្តិកា សត្តា កល្យាណាធិមុត្តិកេហិ សត្តេហិ សទ្ធិំ សំសន្ទិស្សន្តិ សមេស្សន្តិ។
‘‘Anāgatampi , bhikkhave, addhānaṃ dhātusova sattā sattehi saddhiṃ saṃsandissanti samessanti. Hīnādhimuttikā sattā hīnādhimuttikehi sattehi saddhiṃ saṃsandissanti samessanti, kalyāṇādhimuttikā sattā kalyāṇādhimuttikehi sattehi saddhiṃ saṃsandissanti samessanti.
‘‘ឯតរហិបិ, ភិក្ខវេ, បច្ចុប្បនំ អទ្ធានំ ធាតុសោវ សត្តា សត្តេហិ សទ្ធិំ សំសន្ទន្តិ សមេន្តិ។ ហីនាធិមុត្តិកា សត្តា ហីនាធិមុត្តិកេហិ សត្តេហិ សទ្ធិំ សំសន្ទន្តិ សមេន្តិ, កល្យាណាធិមុត្តិកា សត្តា កល្យាណាធិមុត្តិកេហិ សត្តេហិ សទ្ធិំ សំសន្ទន្តិ សមេន្តី’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Etarahipi, bhikkhave, paccuppanaṃ addhānaṃ dhātusova sattā sattehi saddhiṃ saṃsandanti samenti. Hīnādhimuttikā sattā hīnādhimuttikehi sattehi saddhiṃ saṃsandanti samenti, kalyāṇādhimuttikā sattā kalyāṇādhimuttikehi sattehi saddhiṃ saṃsandanti samentī’’ti. Etamatthaṃ bhagavā avoca. Tatthetaṃ iti vuccati –
‘‘សំសគ្គា វនថោ ជាតោ, អសំសគ្គេន ឆិជ្ជតិ;
‘‘Saṃsaggā vanatho jāto, asaṃsaggena chijjati;
បរិត្តំ ទារុមារុយ្ហ, យថា សីទេ មហណ្ណវេ។
Parittaṃ dārumāruyha, yathā sīde mahaṇṇave.
‘‘ឯវំ កុសីតមាគម្ម, សាធុជីវីបិ សីទតិ;
‘‘Evaṃ kusītamāgamma, sādhujīvīpi sīdati;
តស្មា តំ បរិវជ្ជេយ្យ, កុសីតំ ហីនវីរិយំ។
Tasmā taṃ parivajjeyya, kusītaṃ hīnavīriyaṃ.
‘‘បវិវិត្តេហិ អរិយេហិ, បហិតត្តេហិ ឈាយិភិ;
‘‘Pavivittehi ariyehi, pahitattehi jhāyibhi;
និច្ចំ អារទ្ធវីរិយេហិ, បណ្ឌិតេហិ សហាវសេ’’តិ។
Niccaṃ āraddhavīriyehi, paṇḍitehi sahāvase’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ នវមំ។
Ayampi attho vutto bhagavatā, iti me sutanti. Navamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៩. ធាតុសោសំសន្ទនសុត្តវណ្ណនា • 9. Dhātusosaṃsandanasuttavaṇṇanā
