| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
২. ধাতুসুত্তৰণ্ণনা
2. Dhātusuttavaṇṇanā
৫১. দুতিযে ধাতুযোতি অত্তনো ফলস্স সভাৰস্স চ ধারণট্ঠেন ধাতুযো। যঞ্চেত্থ ফলনিব্বত্তকং, তং অত্তনো ফলস্স সভাৰস্স চ, ইতরং সভাৰস্সেৰ ধারণট্ঠেন ধাতু। রূপধাতূতি রূপভৰো। ধাতুযা আগতট্ঠানে ভৰেন পরিচ্ছিন্দিতব্বং, ভৰস্স আগতট্ঠানে ধাতুযা পরিচ্ছিন্দিতব্বন্তি ইধ ভৰেন পরিচ্ছেদো কথিতো। তস্মা –
51. Dutiye dhātuyoti attano phalassa sabhāvassa ca dhāraṇaṭṭhena dhātuyo. Yañcettha phalanibbattakaṃ, taṃ attano phalassa sabhāvassa ca, itaraṃ sabhāvasseva dhāraṇaṭṭhena dhātu. Rūpadhātūti rūpabhavo. Dhātuyā āgataṭṭhāne bhavena paricchinditabbaṃ, bhavassa āgataṭṭhāne dhātuyā paricchinditabbanti idha bhavena paricchedo kathito. Tasmā –
‘‘কতমে ধম্মা রূপাৰচরা? হেট্ঠতো ব্রহ্মলোকং পরিযন্তং করিত্ৰা উপরিতো অকনিট্ঠে দেৰে অন্তো করিত্ৰা এত্থাৰচরা এত্থ পরিযাপন্না খন্ধধাতুআযতনা, ইমে ধম্মা রূপাৰচরা’’তি (ধ॰ স॰ ১২৮৯) –
‘‘Katame dhammā rūpāvacarā? Heṭṭhato brahmalokaṃ pariyantaṃ karitvā uparito akaniṭṭhe deve anto karitvā etthāvacarā ettha pariyāpannā khandhadhātuāyatanā, ime dhammā rūpāvacarā’’ti (dha. sa. 1289) –
এৰং ৰুত্তা রূপাৰচরধম্মা রূপধাতু। অরূপধাতূতি অরূপভৰো। ইধাপি ভৰেন পরিচ্ছেদো কথিতোতি –
Evaṃ vuttā rūpāvacaradhammā rūpadhātu. Arūpadhātūti arūpabhavo. Idhāpi bhavena paricchedo kathitoti –
‘‘কতমে ধম্মা অরূপাৰচরা? হেট্ঠতো আকাসানঞ্চাযতনূপগে দেৰে অন্তো করিত্ৰা, উপরিতো নেৰসঞ্ঞানাসঞ্ঞাযতনূপগে দেৰে অন্তো করিত্ৰা, এত্থাৰচরা এত্থ পরিযাপন্না খন্ধধাতুআযতনা, ইমে ধম্মা অরূপাৰচরা’’তি (ধ॰ স॰ ১২৯১) –
‘‘Katame dhammā arūpāvacarā? Heṭṭhato ākāsānañcāyatanūpage deve anto karitvā, uparito nevasaññānāsaññāyatanūpage deve anto karitvā, etthāvacarā ettha pariyāpannā khandhadhātuāyatanā, ime dhammā arūpāvacarā’’ti (dha. sa. 1291) –
এৰং ৰুত্তা অরূপাৰচরধম্মা অরূপধাতু। নিরোধধাতূতি নিব্বানং ৰেদিতব্বং।
Evaṃ vuttā arūpāvacaradhammā arūpadhātu. Nirodhadhātūti nibbānaṃ veditabbaṃ.
অপরো নযো – রূপসহিতা, রূপপটিবদ্ধা, ধম্মপ্পৰত্তি রূপধাতু, পঞ্চৰোকারভৰো, একৰোকারভৰো চ, তেন সকলো কামভৰো রূপভৰো চ সঙ্গহিতো। রূপরহিতা ধম্মপ্পৰত্তি অরূপধাতু, চতুৰোকারভৰো, তেন অরূপভৰো সঙ্গহিতো। ইতি দ্ৰীহি পদেহি তযো ভৰা সব্বা সংসারপ্পৰত্তি দস্সিতা। ততিযপদেন পন অসঙ্খতধাতুযেৰ সঙ্গহিতাতি মগ্গফলানি ইধ তিকৰিনিমুত্তধম্মা নাম জাতা। কেচি পন ‘‘রূপধাতূতি রূপসভাৰা ধম্মা, অরূপধাতূতি অরূপসভাৰা ধম্মাতি পদদ্ৰযেন অনৰসেসতো পঞ্চক্খন্ধা গহিতা’’তি। ‘‘রূপতণ্হায ৰিসযভূতা ধম্মা রূপধাতু, অরূপতণ্হায ৰিসযভূতা অরূপধাতূ’’তি চ ৰদন্তি, তং সব্বং ইধ নাধিপ্পেতং। তস্মা ৰুত্তনযেনেৰ অত্থো ৰেদিতব্বো।
Aparo nayo – rūpasahitā, rūpapaṭibaddhā, dhammappavatti rūpadhātu, pañcavokārabhavo, ekavokārabhavo ca, tena sakalo kāmabhavo rūpabhavo ca saṅgahito. Rūparahitā dhammappavatti arūpadhātu, catuvokārabhavo, tena arūpabhavo saṅgahito. Iti dvīhi padehi tayo bhavā sabbā saṃsārappavatti dassitā. Tatiyapadena pana asaṅkhatadhātuyeva saṅgahitāti maggaphalāni idha tikavinimuttadhammā nāma jātā. Keci pana ‘‘rūpadhātūti rūpasabhāvā dhammā, arūpadhātūti arūpasabhāvā dhammāti padadvayena anavasesato pañcakkhandhā gahitā’’ti. ‘‘Rūpataṇhāya visayabhūtā dhammā rūpadhātu, arūpataṇhāya visayabhūtā arūpadhātū’’ti ca vadanti, taṃ sabbaṃ idha nādhippetaṃ. Tasmā vuttanayeneva attho veditabbo.
গাথাসু রূপধাতুং পরিঞ্ঞাযাতি রূপপটিবদ্ধধম্মপৰত্তিং ঞাতপরিঞ্ঞাদীহি তীহি পরিঞ্ঞাহি পরিজানিত্ৰা। আরুপ্পেসু অসণ্ঠিতাতি অরূপাৰচরধম্মেসু ভৰরাগৰসেন ভৰদিট্ঠিৰসেন চ ন পতিট্ঠিতা অনল্লীনা। ‘‘অরূপেসু অসণ্ঠিতা’’তি চ পঠন্তি, সো এৰ অত্থো। এত্তাৰতা তেভূমকধম্মানং পরিঞ্ঞা ৰুত্তা। নিরোধে যে ৰিমুচ্চন্তীতি যে নিব্বানে আরম্মণভূতে অগ্গমগ্গফলৰসেন সমুচ্ছেদপটিপ্পস্সদ্ধীহি অনৰসেসকিলেসতো ৰিমুচ্চন্তি। তে জনা মচ্চুহাযিনোতি তে খীণাসৰজনা মরণং সমতীতা।
Gāthāsu rūpadhātuṃ pariññāyāti rūpapaṭibaddhadhammapavattiṃ ñātapariññādīhi tīhi pariññāhi parijānitvā. Āruppesu asaṇṭhitāti arūpāvacaradhammesu bhavarāgavasena bhavadiṭṭhivasena ca na patiṭṭhitā anallīnā. ‘‘Arūpesu asaṇṭhitā’’ti ca paṭhanti, so eva attho. Ettāvatā tebhūmakadhammānaṃ pariññā vuttā. Nirodhe ye vimuccantīti ye nibbāne ārammaṇabhūte aggamaggaphalavasena samucchedapaṭippassaddhīhi anavasesakilesato vimuccanti. Te janā maccuhāyinoti te khīṇāsavajanā maraṇaṃ samatītā.
এৰং ধাতুত্তযসমতিক্কমেন অমতাধিগমং দস্সেত্ৰা ‘‘অযঞ্চ পটিপদা মযা গতমগ্গো চ তুম্হাকং দস্সিতো’’তি তত্থ নেসং উস্সাহং জনেন্তো দুতিযং গাথমাহ। তত্থ কাযেনাতি নামকাযেন মগ্গফলেহি। ফুসযিত্ৰাতি পত্ৰা। নিরূপধিন্তি খন্ধাদিসব্বূপধিরহিতং। উপধিপ্পটিনিস্সগ্গন্তি তেসংযেৰ চ উপধীনং পটিনিস্সজ্জনকারণং। নিব্বানস্স হি মগ্গঞাণেন সচ্ছিকিরিযায সব্বে উপধযো পটিনিস্সট্ঠা হোন্তীতি তং তেসং পটিনিস্সজ্জনকারণং। সচ্ছিকত্ৰাতি কালেন কালং ফলসমাপত্তিসমাপজ্জনেন অত্তপচ্চক্খং কত্ৰা অনাসৰো সম্মাসম্বুদ্ধো তমেৰ অসোকং ৰিরজং নিব্বানপদং দেসেতি। তস্মা তদধিগমায উস্সুক্কং কাতব্বন্তি।
Evaṃ dhātuttayasamatikkamena amatādhigamaṃ dassetvā ‘‘ayañca paṭipadā mayā gatamaggo ca tumhākaṃ dassito’’ti tattha nesaṃ ussāhaṃ janento dutiyaṃ gāthamāha. Tattha kāyenāti nāmakāyena maggaphalehi. Phusayitvāti patvā. Nirūpadhinti khandhādisabbūpadhirahitaṃ. Upadhippaṭinissagganti tesaṃyeva ca upadhīnaṃ paṭinissajjanakāraṇaṃ. Nibbānassa hi maggañāṇena sacchikiriyāya sabbe upadhayo paṭinissaṭṭhā hontīti taṃ tesaṃ paṭinissajjanakāraṇaṃ. Sacchikatvāti kālena kālaṃ phalasamāpattisamāpajjanena attapaccakkhaṃ katvā anāsavo sammāsambuddho tameva asokaṃ virajaṃ nibbānapadaṃ deseti. Tasmā tadadhigamāya ussukkaṃ kātabbanti.
দুতিযসুত্তৰণ্ণনা নিট্ঠিতা।
Dutiyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ২. ধাতুসুত্তং • 2. Dhātusuttaṃ
