| Library / Tipiṭaka / ਤਿਪਿਟਕ • Tipiṭaka / ਪੇਤવਤ੍ਥੁ-ਅਟ੍ਠਕਥਾ • Petavatthu-aṭṭhakathā |
੧੦. ਧਾਤੁવਿવਣ੍ਣਪੇਤવਤ੍ਥੁવਣ੍ਣਨਾ
10. Dhātuvivaṇṇapetavatthuvaṇṇanā
ਅਨ੍ਤਲਿਕ੍ਖਸ੍ਮਿਂ ਤਿਟ੍ਠਨ੍ਤੋਤਿ ਇਦਂ ਧਾਤੁવਿવਣ੍ਣਪੇਤવਤ੍ਥੁ। ਭਗવਤਿ ਕੁਸਿਨਾਰਾਯਂ ਉਪવਤ੍ਤਨੇ ਮਲ੍ਲਾਨਂ ਸਾਲવਨੇ ਯਮਕਸਾਲਾਨਮਨ੍ਤਰੇ ਪਰਿਨਿਬ੍ਬੁਤੇ ਧਾਤੁવਿਭਾਗੇ ਚ ਕਤੇ ਰਾਜਾ ਅਜਾਤਸਤ੍ਤੁ ਅਤ੍ਤਨਾ ਲਦ੍ਧਧਾਤੁਭਾਗਂ ਗਹੇਤ੍વਾ ਸਤ੍ਤ વਸ੍ਸਾਨਿ ਸਤ੍ਤ ਚ ਮਾਸੇ ਸਤ੍ਤ ਚ ਦਿવਸੇ ਬੁਦ੍ਧਗੁਣੇ ਅਨੁਸ੍ਸਰਨ੍ਤੋ ਉਲ਼ਾਰਪੂਜਂ ਪવਤ੍ਤੇਸਿ। ਤਤ੍ਥ ਅਸਙ੍ਖੇਯ੍ਯਾ ਅਪ੍ਪਮੇਯ੍ਯਾ ਮਨੁਸ੍ਸਾ ਚਿਤ੍ਤਾਨਿ ਪਸਾਦੇਤ੍વਾ ਸਗ੍ਗੂਪਗਾ ਅਹੇਸੁਂ, ਛਲ਼ਾਸੀਤਿਮਤ੍ਤਾਨਿ ਪਨ ਪੁਰਿਸਸਹਸ੍ਸਾਨਿ ਚਿਰਕਾਲਭਾવਿਤੇਨ ਅਸ੍ਸਦ੍ਧਿਯੇਨ ਮਿਚ੍ਛਾਦਸ੍ਸਨੇਨ ਚ વਿਪਲ੍ਲਤ੍ਥਚਿਤ੍ਤਾ ਪਸਾਦਨੀਯੇਪਿ ਠਾਨੇ ਅਤ੍ਤਨੋ ਚਿਤ੍ਤਾਨਿ ਪਦੋਸੇਤ੍વਾ ਪੇਤੇਸੁ ਉਪ੍ਪਜ੍ਜਿਂਸੁ। ਤਸ੍ਮਿਂਯੇવ ਰਾਜਗਹੇ ਅਞ੍ਞਤਰਸ੍ਸ વਿਭવਸਮ੍ਪਨ੍ਨਸ੍ਸ ਕੁਟੁਮ੍ਬਿਕਸ੍ਸ ਭਰਿਯਾ ਧੀਤਾ ਸੁਣਿਸਾ ਚ ਪਸਨ੍ਨਚਿਤ੍ਤਾ ‘‘ਧਾਤੁਪੂਜਂ ਕਰਿਸ੍ਸਾਮਾ’’ਤਿ ਗਨ੍ਧਪੁਪ੍ਫਾਦੀਨਿ ਗਹੇਤ੍વਾ ਧਾਤੁਟ੍ਠਾਨਂ ਗਨ੍ਤੁਂ ਆਰਦ੍ਧਾ। ਸੋ ਕੁਟੁਮ੍ਬਿਕੋ ‘‘ਕਿਂ ਅਟ੍ਠਿਕਾਨਂ ਪੂਜਨੇਨਾ’’ਤਿ ਤਾ ਪਰਿਭਾਸੇਤ੍વਾ ਧਾਤੁਪੂਜਂ વਿવਣ੍ਣੇਸਿ। ਤਾਪਿ ਤਸ੍ਸ વਚਨਂ ਅਨਾਦਿਯਿਤ੍વਾ ਤਤ੍ਥ ਗਨ੍ਤ੍વਾ ਧਾਤੁਪੂਜਂ ਕਤ੍વਾ ਗੇਹਂ ਆਗਤਾ ਤਾਦਿਸੇਨ ਰੋਗੇਨ ਅਭਿਭੂਤਾ ਨਚਿਰਸ੍ਸੇવ ਕਾਲਂ ਕਤ੍વਾ ਦੇવਲੋਕੇ ਨਿਬ੍ਬਤ੍ਤਿਂਸੁ। ਸੋ ਪਨ ਕੋਧੇਨ ਅਭਿਭੂਤੋ ਨਚਿਰਸ੍ਸੇવ ਕਾਲਂ ਕਤ੍વਾ ਤੇਨ ਪਾਪਕਮ੍ਮੇਨ ਪੇਤੇਸੁ ਨਿਬ੍ਬਤ੍ਤਿ।
Antalikkhasmiṃtiṭṭhantoti idaṃ dhātuvivaṇṇapetavatthu. Bhagavati kusinārāyaṃ upavattane mallānaṃ sālavane yamakasālānamantare parinibbute dhātuvibhāge ca kate rājā ajātasattu attanā laddhadhātubhāgaṃ gahetvā satta vassāni satta ca māse satta ca divase buddhaguṇe anussaranto uḷārapūjaṃ pavattesi. Tattha asaṅkheyyā appameyyā manussā cittāni pasādetvā saggūpagā ahesuṃ, chaḷāsītimattāni pana purisasahassāni cirakālabhāvitena assaddhiyena micchādassanena ca vipallatthacittā pasādanīyepi ṭhāne attano cittāni padosetvā petesu uppajjiṃsu. Tasmiṃyeva rājagahe aññatarassa vibhavasampannassa kuṭumbikassa bhariyā dhītā suṇisā ca pasannacittā ‘‘dhātupūjaṃ karissāmā’’ti gandhapupphādīni gahetvā dhātuṭṭhānaṃ gantuṃ āraddhā. So kuṭumbiko ‘‘kiṃ aṭṭhikānaṃ pūjanenā’’ti tā paribhāsetvā dhātupūjaṃ vivaṇṇesi. Tāpi tassa vacanaṃ anādiyitvā tattha gantvā dhātupūjaṃ katvā gehaṃ āgatā tādisena rogena abhibhūtā nacirasseva kālaṃ katvā devaloke nibbattiṃsu. So pana kodhena abhibhūto nacirasseva kālaṃ katvā tena pāpakammena petesu nibbatti.
ਅਥੇਕਦਿવਸਂ ਆਯਸ੍ਮਾ ਮਹਾਕਸ੍ਸਪੋ ਸਤ੍ਤੇਸੁ ਅਨੁਕਮ੍ਪਾਯ ਤਥਾਰੂਪਂ ਇਦ੍ਧਾਭਿਸਙ੍ਖਾਰਂ ਅਭਿਸਙ੍ਖਾਸਿ, ਯਥਾ ਮਨੁਸ੍ਸਾ ਤੇ ਪੇਤੇ ਤਾ ਚ ਦੇવਤਾਯੋ ਪਸ੍ਸਨ੍ਤਿ। ਤਥਾ ਪਨ ਕਤ੍વਾ ਚੇਤਿਯਙ੍ਗਣੇ ਠਿਤੋ ਤਂ ਧਾਤੁવਿવਣ੍ਣਕਂ ਪੇਤਂ ਤੀਹਿ ਗਾਥਾਹਿ ਪੁਚ੍ਛਿ। ਤਸ੍ਸ ਸੋ ਪੇਤੋ ਬ੍ਯਾਕਾਸਿ –
Athekadivasaṃ āyasmā mahākassapo sattesu anukampāya tathārūpaṃ iddhābhisaṅkhāraṃ abhisaṅkhāsi, yathā manussā te pete tā ca devatāyo passanti. Tathā pana katvā cetiyaṅgaṇe ṭhito taṃ dhātuvivaṇṇakaṃ petaṃ tīhi gāthāhi pucchi. Tassa so peto byākāsi –
੫੦੭.
507.
‘‘ਅਨ੍ਤਲਿਕ੍ਖਸ੍ਮਿਂ ਤਿਟ੍ਠਨ੍ਤੋ, ਦੁਗ੍ਗਨ੍ਧੋ ਪੂਤਿ વਾਯਸਿ।
‘‘Antalikkhasmiṃ tiṭṭhanto, duggandho pūti vāyasi;
ਮੁਖਞ੍ਚ ਤੇ ਕਿਮਯੋ ਪੂਤਿਗਨ੍ਧਂ, ਖਾਦਨ੍ਤਿ ਕਿਂ ਕਮ੍ਮਮਕਾਸਿ ਪੁਬ੍ਬੇ॥
Mukhañca te kimayo pūtigandhaṃ, khādanti kiṃ kammamakāsi pubbe.
੫੦੮.
508.
‘‘ਤਤੋ ਸਤ੍ਥਂ ਗਹੇਤ੍વਾਨ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਂ।
‘‘Tato satthaṃ gahetvāna, okkantanti punappunaṃ;
ਖਾਰੇਨ ਪਰਿਪ੍ਫੋਸਿਤ੍વਾ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਂ॥
Khārena paripphositvā, okkantanti punappunaṃ.
੫੦੯.
509.
‘‘ਕਿਂ ਨੁ ਕਾਯੇਨ વਾਚਾਯ, ਮਨਸਾ ਦੁਕ੍ਕਟਂ ਕਤਂ।
‘‘Kiṃ nu kāyena vācāya, manasā dukkaṭaṃ kataṃ;
ਕਿਸ੍ਸਕਮ੍ਮવਿਪਾਕੇਨ, ਇਦਂ ਦੁਕ੍ਖਂ ਨਿਗਚ੍ਛਸੀ’’ਤਿ॥
Kissakammavipākena, idaṃ dukkhaṃ nigacchasī’’ti.
੫੧੦.
510.
‘‘ਅਹਂ ਰਾਜਗਹੇ ਰਮ੍ਮੇ, ਰਮਣੀਯੇ ਗਿਰਿਬ੍ਬਜੇ।
‘‘Ahaṃ rājagahe ramme, ramaṇīye giribbaje;
ਇਸ੍ਸਰੋ ਧਨਧਞ੍ਞਸ੍ਸ, ਸੁਪਹੂਤਸ੍ਸ ਮਾਰਿਸ॥
Issaro dhanadhaññassa, supahūtassa mārisa.
੫੧੧.
511.
‘‘ਤਸ੍ਸਾਯਂ ਮੇ ਭਰਿਯਾ ਚ, ਧੀਤਾ ਚ ਸੁਣਿਸਾ ਚ ਮੇ।
‘‘Tassāyaṃ me bhariyā ca, dhītā ca suṇisā ca me;
ਤਾ ਮਾਲਂ ਉਪ੍ਪਲਞ੍ਚਾਪਿ, ਪਚ੍ਚਗ੍ਘਞ੍ਚ વਿਲੇਪਨਂ।
Tā mālaṃ uppalañcāpi, paccagghañca vilepanaṃ;
ਥੂਪਂ ਹਰਨ੍ਤਿਯੋ વਾਰੇਸਿਂ, ਤਂ ਪਾਪਂ ਪਕਤਂ ਮਯਾ॥
Thūpaṃ harantiyo vāresiṃ, taṃ pāpaṃ pakataṃ mayā.
੫੧੨.
512.
‘‘ਛਲ਼ਾਸੀਤਿਸਹਸ੍ਸਾਨਿ , ਮਯਂ ਪਚ੍ਚਤ੍ਤવੇਦਨਾ।
‘‘Chaḷāsītisahassāni , mayaṃ paccattavedanā;
ਥੂਪਪੂਜਂ વਿવਣ੍ਣੇਤ੍વਾ, ਪਚ੍ਚਾਮ ਨਿਰਯੇ ਭੁਸਂ॥
Thūpapūjaṃ vivaṇṇetvā, paccāma niraye bhusaṃ.
੫੧੩.
513.
‘‘ਯੇ ਚ ਖੋ ਥੂਪਪੂਜਾਯ, વਤ੍ਤਨ੍ਤੇ ਅਰਹਤੋ ਮਹੇ।
‘‘Ye ca kho thūpapūjāya, vattante arahato mahe;
ਆਦੀਨવਂ ਪਕਾਸੇਨ੍ਤਿ, વਿવੇਚਯੇਥ ਨੇ ਤਤੋ॥
Ādīnavaṃ pakāsenti, vivecayetha ne tato.
੫੧੪.
514.
‘‘ਇਮਾ ਚ ਪਸ੍ਸ ਅਯਨ੍ਤਿਯੋ, ਮਾਲਧਾਰੀ ਅਲਙ੍ਕਤਾ।
‘‘Imā ca passa ayantiyo, māladhārī alaṅkatā;
ਮਾਲਾવਿਪਾਕਂਨੁਭੋਨ੍ਤਿਯੋ, ਸਮਿਦ੍ਧਾ ਚ ਤਾ ਯਸਸ੍ਸਿਨਿਯੋ॥
Mālāvipākaṃnubhontiyo, samiddhā ca tā yasassiniyo.
੫੧੫.
515.
‘‘ਤਞ੍ਚ ਦਿਸ੍વਾਨ ਅਚ੍ਛੇਰਂ, ਅਬ੍ਭੁਤਂ ਲੋਮਹਂਸਨਂ।
‘‘Tañca disvāna accheraṃ, abbhutaṃ lomahaṃsanaṃ;
ਨਮੋ ਕਰੋਨ੍ਤਿ ਸਪ੍ਪਞ੍ਞਾ, વਨ੍ਦਨ੍ਤਿ ਤਂ ਮਹਾਮੁਨਿਂ॥
Namo karonti sappaññā, vandanti taṃ mahāmuniṃ.
੫੧੬.
516.
‘‘ਸੋਹਂ ਨੂਨ ਇਤੋ ਗਨ੍ਤ੍વਾ, ਯੋਨਿਂ ਲਦ੍ਧਾਨ ਮਾਨੁਸਿਂ।
‘‘Sohaṃ nūna ito gantvā, yoniṃ laddhāna mānusiṃ;
ਥੂਪਪੂਜਂ ਕਰਿਸ੍ਸਾਮਿ, ਅਪ੍ਪਮਤ੍ਤੋ ਪੁਨਪ੍ਪੁਨ’’ਨ੍ਤਿ॥
Thūpapūjaṃ karissāmi, appamatto punappuna’’nti.
੫੦੭-੮. ਤਤ੍ਥ ਦੁਗ੍ਗਨ੍ਧੋਤਿ ਅਨਿਟ੍ਠਗਨ੍ਧੋ, ਕੁਣਪਗਨ੍ਧਗਨ੍ਧੀਤਿ ਅਤ੍ਥੋ। ਤੇਨਾਹ ‘‘ਪੂਤਿ વਾਯਸੀ’’ਤਿ। ਤਤੋਤਿ ਦੁਗ੍ਗਨ੍ਧવਾਯਨਤੋ ਕਿਮੀਹਿ ਖਾਯਿਤਬ੍ਬਤੋ ਚ ਉਪਰਿ। ਸਤ੍ਤਂ ਗਹੇਤ੍વਾਨ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਨ੍ਤਿ ਕਮ੍ਮਸਞ੍ਚੋਦਿਤਾ ਸਤ੍ਤਾ ਨਿਸਿਤਧਾਰਂ ਸਤ੍ਥਂ ਗਹੇਤ੍વਾ ਪੁਨਪ੍ਪੁਨਂ ਤਂ વਣਮੁਖਂ ਅવਕਨ੍ਤਨ੍ਤਿ। ਖਾਰੇਨ ਪਰਿਪ੍ਫੋਸਿਤ੍વਾ, ਓਕ੍ਕਨ੍ਤਨ੍ਤਿ ਪੁਨਪ੍ਪੁਨਨ੍ਤਿ ਅવਕਨ੍ਤਿਤਟ੍ਠਾਨੇ ਖਾਰੋਦਕੇਨ ਆਸਿਞ੍ਚਿਤ੍વਾ ਪੁਨਪ੍ਪੁਨਮ੍ਪਿ ਅવਕਨ੍ਤਨ੍ਤਿ।
507-8. Tattha duggandhoti aniṭṭhagandho, kuṇapagandhagandhīti attho. Tenāha ‘‘pūti vāyasī’’ti. Tatoti duggandhavāyanato kimīhi khāyitabbato ca upari. Sattaṃ gahetvāna, okkantanti punappunanti kammasañcoditā sattā nisitadhāraṃ satthaṃ gahetvā punappunaṃ taṃ vaṇamukhaṃ avakantanti. Khārena paripphositvā, okkantanti punappunanti avakantitaṭṭhāne khārodakena āsiñcitvā punappunampi avakantanti.
੫੧੦. ਇਸ੍ਸਰੋ ਧਨਧਞ੍ਞਸ੍ਸ, ਸੁਪਹੂਤਸ੍ਸਾਤਿ ਅਤਿવਿਯ ਪਹੂਤਸ੍ਸ ਧਨਸ੍ਸ ਧਞ੍ਞਸ੍ਸ ਚ ਇਸ੍ਸਰੋ ਸਾਮੀ, ਅਡ੍ਢੋ ਮਹਦ੍ਧਨੋਤਿ ਅਤ੍ਥੋ।
510.Issaro dhanadhaññassa, supahūtassāti ativiya pahūtassa dhanassa dhaññassa ca issaro sāmī, aḍḍho mahaddhanoti attho.
੫੧੧. ਤਸ੍ਸਾਯਂ ਮੇ ਭਰਿਯਾ ਚ, ਧੀਤਾ ਚ ਸੁਣਿਸਾ ਚਾਤਿ ਤਸ੍ਸ ਮਯ੍ਹਂ ਅਯਂ ਪੁਰਿਮਤ੍ਤਭਾવੇ ਭਰਿਯਾ, ਅਯਂ ਧੀਤਾ, ਅਯਂ ਸੁਣਿਸਾ। ਤਾ ਦੇવਭੂਤਾ ਆਕਾਸੇ ਠਿਤਾਤਿ ਦਸ੍ਸੇਨ੍ਤੋ વਦਤਿ। ਪਚ੍ਚਗ੍ਘਨ੍ਤਿ ਅਭਿਨવਂ। ਥੂਪਂ ਹਰਨ੍ਤਿਯੋ વਾਰੇਸਿਨ੍ਤਿ ਥੂਪਂ ਪੂਜੇਤੁਂ ਉਪਨੇਨ੍ਤਿਯੋ ਧਾਤੁਂ વਿવਣ੍ਣੇਨ੍ਤੋ ਪਟਿਕ੍ਖਿਪਿਂ। ਤਂ ਪਾਪਂ ਪਕਤਂ ਮਯਾਤਿ ਤਂ ਧਾਤੁવਿવਣ੍ਣਨਪਾਪਂ ਕਤਂ ਸਮਾਚਰਿਤਂ ਮਯਾਤਿ વਿਪ੍ਪਟਿਸਾਰਪ੍ਪਤ੍ਤੋ વਦਤਿ।
511.Tassāyaṃ me bhariyā ca, dhītā ca suṇisā cāti tassa mayhaṃ ayaṃ purimattabhāve bhariyā, ayaṃ dhītā, ayaṃ suṇisā. Tā devabhūtā ākāse ṭhitāti dassento vadati. Paccagghanti abhinavaṃ. Thūpaṃ harantiyo vāresinti thūpaṃ pūjetuṃ upanentiyo dhātuṃ vivaṇṇento paṭikkhipiṃ. Taṃ pāpaṃ pakataṃ mayāti taṃ dhātuvivaṇṇanapāpaṃ kataṃ samācaritaṃ mayāti vippaṭisārappatto vadati.
੫੧੨. ਛਲ਼ਾਸੀਤਿਸਹਸ੍ਸਾਨੀਤਿ ਛਸਹਸ੍ਸਾਧਿਕਾ ਅਸੀਤਿਸਹਸ੍ਸਮਤ੍ਤਾ। ਮਯਨ੍ਤਿ ਤੇ ਪੇਤੇ ਅਤ੍ਤਨਾ ਸਦ੍ਧਿਂ ਸਙ੍ਗਹੇਤ੍વਾ વਦਤਿ। ਪਚ੍ਚਤ੍ਤવੇਦਨਾਤਿ વਿਸੁਂ વਿਸੁਂ ਅਨੁਭੁਯ੍ਯਮਾਨਦੁਕ੍ਖવੇਦਨਾ। ਨਿਰਯੇਤਿ ਬਲਦੁਕ੍ਖਤਾਯ ਪੇਤ੍ਤਿવਿਸਯਂ ਨਿਰਯਸਦਿਸਂ ਕਤ੍વਾ ਆਹ।
512.Chaḷāsītisahassānīti chasahassādhikā asītisahassamattā. Mayanti te pete attanā saddhiṃ saṅgahetvā vadati. Paccattavedanāti visuṃ visuṃ anubhuyyamānadukkhavedanā. Nirayeti baladukkhatāya pettivisayaṃ nirayasadisaṃ katvā āha.
੫੧੩. ਯੇ ਚ ਖੋ ਥੂਪਪੂਜਾਯ, વਤ੍ਤਨ੍ਤੇ ਅਰਹਤੋ ਮਹੇਤਿ ਅਰਹਤੋ ਸਮ੍ਮਾਸਮ੍ਬੁਦ੍ਧਸ੍ਸ ਥੂਪਂ ਉਦ੍ਦਿਸ੍ਸ ਪੂਜਾਮਹੇ ਪવਤ੍ਤਮਾਨੇ ਅਹਂ વਿਯ ਯੇ ਥੂਪਪੂਜਾਯ ਆਦੀਨવਂ ਦੋਸਂ ਪਕਾਸੇਨ੍ਤਿ। ਤੇ ਪੁਗ੍ਗਲੇ ਤਤੋ ਪੁਞ੍ਞਤੋ વਿવੇਚਯੇਥ વਿવੇਚਾਪਯੇਥ, ਪਰਿਬਾਹਿਰੇ ਜਨਯੇਥਾਤਿ ਅਞ੍ਞਾਪਦੇਸੇਨ ਅਤ੍ਤਨੋ ਮਹਾਜਾਨਿਯਤਂ વਿਭਾવੇਤਿ।
513.Ye ca kho thūpapūjāya, vattante arahato maheti arahato sammāsambuddhassa thūpaṃ uddissa pūjāmahe pavattamāne ahaṃ viya ye thūpapūjāya ādīnavaṃ dosaṃ pakāsenti. Te puggale tato puññato vivecayetha vivecāpayetha, paribāhire janayethāti aññāpadesena attano mahājāniyataṃ vibhāveti.
੫੧੪. ਆਯਨ੍ਤਿਯੋਤਿ ਆਕਾਸੇਨ ਆਗਚ੍ਛਨ੍ਤਿਯੋ। ਮਾਲਾવਿਪਾਕਨ੍ਤਿ ਥੂਪੇ ਕਤਮਾਲਾਪੂਜਾਯ વਿਪਾਕਂ ਫਲਂ। ਸਮਿਦ੍ਧਾਤਿ ਦਿਬ੍ਬਸਮ੍ਪਤ੍ਤਿਯਾ ਸਮਿਦ੍ਧਾ। ਤਾ ਯਸਸ੍ਸਿਨਿਯੋਤਿ ਤਾ ਪਰਿવਾਰવਨ੍ਤਿਯੋ।
514.Āyantiyoti ākāsena āgacchantiyo. Mālāvipākanti thūpe katamālāpūjāya vipākaṃ phalaṃ. Samiddhāti dibbasampattiyā samiddhā. Tā yasassiniyoti tā parivāravantiyo.
੫੧੫. ਤਞ੍ਚ ਦਿਸ੍વਾਨਾਤਿ ਤਸ੍ਸ ਅਤਿਪਰਿਤ੍ਤਸ੍ਸ ਪੂਜਾਪੁਞ੍ਞਸ੍ਸ ਅਚ੍ਛਰਿਯਂ ਅਬ੍ਭੁਤਂ ਲੋਮਹਂਸਨਂ ਅਤਿਉਲ਼ਾਰਂ વਿਪਾਕવਿਸੇਸਂ ਦਿਸ੍વਾ। ਨਮੋ ਕਰੋਨ੍ਤਿ ਸਪ੍ਪਞ੍ਞਾ, વਨ੍ਦਨ੍ਤਿ ਤਂ ਮਹਾਮੁਨਿਨ੍ਤਿ, ਭਨ੍ਤੇ ਕਸ੍ਸਪ, ਇਮਾ ਇਤ੍ਥਿਯੋ ਤਂ ਉਤ੍ਤਮਪੁਞ੍ਞਕ੍ਖੇਤ੍ਤਭੂਤਂ વਨ੍ਦਨ੍ਤਿ ਅਭਿવਾਦੇਨ੍ਤਿ, ਨਮੋ ਕਰੋਨ੍ਤਿ ਨਮਕ੍ਕਾਰਞ੍ਚ ਕਰੋਨ੍ਤੀਤਿ ਅਤ੍ਥੋ।
515.Tañca disvānāti tassa atiparittassa pūjāpuññassa acchariyaṃ abbhutaṃ lomahaṃsanaṃ atiuḷāraṃ vipākavisesaṃ disvā. Namo karonti sappaññā, vandanti taṃ mahāmuninti, bhante kassapa, imā itthiyo taṃ uttamapuññakkhettabhūtaṃ vandanti abhivādenti, namo karonti namakkārañca karontīti attho.
੫੧੬. ਅਥ ਸੋ ਪੇਤੋ ਸਂવਿਗ੍ਗਮਾਨਸੋ ਸਂવੇਗਾਨੁਰੂਪਂ ਆਯਤਿਂ ਅਤ੍ਤਨਾ ਕਾਤਬ੍ਬਂ ਦਸ੍ਸੇਨ੍ਤੋ ‘‘ਸੋਹਂ ਨੂਨਾ’’ਤਿ ਗਾਥਮਾਹ। ਤਂ ਉਤ੍ਤਾਨਤ੍ਥਮੇવ।
516. Atha so peto saṃviggamānaso saṃvegānurūpaṃ āyatiṃ attanā kātabbaṃ dassento ‘‘sohaṃ nūnā’’ti gāthamāha. Taṃ uttānatthameva.
ਏવਂ ਪੇਤੇਨ વੁਤ੍ਤੋ ਮਹਾਕਸ੍ਸਪੋ ਤਂ ਅਟ੍ਠੁਪ੍ਪਤ੍ਤਿਂ ਕਤ੍વਾ ਸਮ੍ਪਤ੍ਤਪਰਿਸਾਯ ਧਮ੍ਮਂ ਦੇਸੇਸਿ।
Evaṃ petena vutto mahākassapo taṃ aṭṭhuppattiṃ katvā sampattaparisāya dhammaṃ desesi.
ਧਾਤੁવਿવਣ੍ਣਪੇਤવਤ੍ਥੁવਣ੍ਣਨਾ ਨਿਟ੍ਠਿਤਾ।
Dhātuvivaṇṇapetavatthuvaṇṇanā niṭṭhitā.
ਇਤਿ ਖੁਦ੍ਦਕ-ਅਟ੍ਠਕਥਾਯ ਪੇਤવਤ੍ਥੁਸ੍ਮਿਂ
Iti khuddaka-aṭṭhakathāya petavatthusmiṃ
ਦਸવਤ੍ਥੁਪਟਿਮਣ੍ਡਿਤਸ੍ਸ
Dasavatthupaṭimaṇḍitassa
ਤਤਿਯਸ੍ਸ ਚੂਲ਼વਗ੍ਗਸ੍ਸ ਅਤ੍ਥਸਂવਣ੍ਣਨਾ ਨਿਟ੍ਠਿਤਾ।
Tatiyassa cūḷavaggassa atthasaṃvaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਖੁਦ੍ਦਕਨਿਕਾਯ • Khuddakanikāya / ਪੇਤવਤ੍ਥੁਪਾਲ਼ਿ • Petavatthupāḷi / ੧੦. ਧਾਤੁવਿવਣ੍ਣਪੇਤવਤ੍ਥੁ • 10. Dhātuvivaṇṇapetavatthu
