| Library / Tipiṭaka / තිපිටක • Tipiṭaka / චූළනිද්‌දෙසපාළි • Cūḷaniddesapāḷi |
5. ධොතකමාණවපුච්‌ඡා
5. Dhotakamāṇavapucchā
86.
86.
‘‘පුච්‌ඡාමි තං භගවා බ්‍රූහි මෙතං, [ඉච්‌චායස්‌මා ධොතකො]
‘‘Pucchāmi taṃ bhagavā brūhi metaṃ, [iccāyasmā dhotako]
වාචාභිකඞ්‌ඛාමි මහෙසි තුය්‌හං;
Vācābhikaṅkhāmi mahesi tuyhaṃ;
තව සුත්‌වාන නිග්‌ඝොසං, සික්‌ඛෙ නිබ්‌බානමත්‌තනො’’.
Tava sutvāna nigghosaṃ, sikkhe nibbānamattano’’.
87.
87.
‘‘තෙනහාතප්‌පං කරොහි, [ධොතකාති භගවා]
‘‘Tenahātappaṃ karohi, [dhotakāti bhagavā]
ඉධෙව නිපකො සතො;
Idheva nipako sato;
ඉතො සුත්‌වාන නිග්‌ඝොසං, සික්‌ඛෙ නිබ්‌බානමත්‌තනො’’.
Ito sutvāna nigghosaṃ, sikkhe nibbānamattano’’.
88.
88.
‘‘පස්‌සාමහං දෙවමනුස්‌සලොකෙ, අකිඤ්‌චනං බ්‍රාහ්‌මණමිරියමානං;
‘‘Passāmahaṃ devamanussaloke, akiñcanaṃ brāhmaṇamiriyamānaṃ;
තං තං නමස්‌සාමි සමන්‌තචක්‌ඛු, පමුඤ්‌ච මං සක්‌ක කථංකථාහි’’.
Taṃ taṃ namassāmi samantacakkhu, pamuñca maṃ sakka kathaṃkathāhi’’.
89.
89.
‘‘නාහං සහිස්‌සාමි පමොචනාය, කථංකථිං ධොතක කඤ්‌චි ලොකෙ;
‘‘Nāhaṃ sahissāmi pamocanāya, kathaṃkathiṃ dhotaka kañci loke;
ධම්‌මඤ්‌ච සෙට්‌ඨං අභිජානමානො 1, එවං තුවං ඔඝමිමං තරෙසි’’.
Dhammañca seṭṭhaṃ abhijānamāno 2, evaṃ tuvaṃ oghamimaṃ taresi’’.
90.
90.
‘‘අනුසාස බ්‍රහ්‌මෙ කරුණායමානො, විවෙකධම්‌මං යමහං විජඤ්‌ඤං;
‘‘Anusāsa brahme karuṇāyamāno, vivekadhammaṃ yamahaṃ vijaññaṃ;
යථාහං ආකාසොව අබ්‍යාපජ්‌ජමානො, ඉධෙව සන්‌තො අසිතො චරෙය්‍යං’’.
Yathāhaṃ ākāsova abyāpajjamāno, idheva santo asito careyyaṃ’’.
91.
91.
‘‘කිත්‌තයිස්‌සාමි තෙ සන්‌තිං, [ධොතකාති භගවා]
‘‘Kittayissāmi te santiṃ, [dhotakāti bhagavā]
දිට්‌ඨෙ ධම්‌මෙ අනීතිහං;
Diṭṭhe dhamme anītihaṃ;
යං විදිත්‌වා සතො චරං, තරෙ ලොකෙ විසත්‌තිකං’’.
Yaṃ viditvā sato caraṃ, tare loke visattikaṃ’’.
92.
92.
‘‘තඤ්‌චාහං අභිනන්‌දාමි, මහෙසි සන්‌තිමුත්‌තමං;
‘‘Tañcāhaṃ abhinandāmi, mahesi santimuttamaṃ;
යං විදිත්‌වා සතො චරං, තරෙ ලොකෙ විසත්‌තිකං’’.
Yaṃ viditvā sato caraṃ, tare loke visattikaṃ’’.
93.
93.
‘‘යං කිඤ්‌චි සම්‌පජානාසි, [ධොතකාති භගවා]
‘‘Yaṃ kiñci sampajānāsi, [dhotakāti bhagavā]
උද්‌ධං අධො තිරියඤ්‌චාපි මජ්‌ඣෙ;
Uddhaṃ adho tiriyañcāpi majjhe;
එතං විදිත්‌වා සඞ්‌ගොති ලොකෙ, භවාභවාය මාකාසි තණ්‌හ’’න්‌ති.
Etaṃ viditvā saṅgoti loke, bhavābhavāya mākāsi taṇha’’nti.
ධොතකමාණවපුච්‌ඡා පඤ්‌චමී.
Dhotakamāṇavapucchā pañcamī.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / චූළනිද්‌දෙස-අට්‌ඨකථා • Cūḷaniddesa-aṭṭhakathā / 5. ධොතකමාණවසුත්‌තනිද්‌දෙසවණ්‌ණනා • 5. Dhotakamāṇavasuttaniddesavaṇṇanā
