| Library / Tipiṭaka / திபிடக • Tipiṭaka / சூளனித்³தே³ஸ-அட்ட²கதா² • Cūḷaniddesa-aṭṭhakathā |
5. தோ⁴தகமாணவஸுத்தனித்³தே³ஸவண்ணனா
5. Dhotakamāṇavasuttaniddesavaṇṇanā
30. பஞ்சமே தோ⁴தகஸுத்தே – வாசாபி⁴கங்கா²மீதி வாசங் அபி⁴கங்கா²மி. ஸிக்கே² நிப்³பா³னமத்தனோதி அத்தனோ ராகா³தீ³னங் நிப்³பா³னத்தா²ய அதி⁴ஸீலாதீ³னி ஸிக்கெ²ய்ய. நித்³தே³ஸே அபுப்³ப³ங் நத்தி².
30. Pañcame dhotakasutte – vācābhikaṅkhāmīti vācaṃ abhikaṅkhāmi. Sikkhe nibbānamattanoti attano rāgādīnaṃ nibbānatthāya adhisīlādīni sikkheyya. Niddese apubbaṃ natthi.
31.
31.
இதோதி மம முக²தோ.
Itoti mama mukhato.
நித்³தே³ஸே ஆதப்பந்தி கிலேஸதாபனங். உஸ்ஸாஹந்தி அஸங்கோசங். உஸ்ஸொள்ஹீந்தி ப³லவவீரியங். தா²மந்தி அஸிதி²லங். தி⁴திந்தி தா⁴ரணங். வீரியங் கரோஹீதி பரக்கமங் கரோஹி. ச²ந்த³ங் ஜனேஹீதி ருசிங் உப்பாதே³ஹி.
Niddese ātappanti kilesatāpanaṃ. Ussāhanti asaṅkocaṃ. Ussoḷhīnti balavavīriyaṃ. Thāmanti asithilaṃ. Dhitinti dhāraṇaṃ. Vīriyaṃ karohīti parakkamaṃ karohi. Chandaṃ janehīti ruciṃ uppādehi.
32. ஏவங் வுத்தே அத்தமனோ தோ⁴தகோ ப⁴க³வந்தங் அபி⁴த்த²வமானோ கத²ங்கதா²பமொக்க²ங் யாசந்தோ ‘‘பஸ்ஸாமஹ’’ந்தி கா³த²மாஹ. தத்த² பஸ்ஸாமஹங் தே³வமனுஸ்ஸலோகேதி பஸ்ஸாமி அஹங் தே³வமனுஸ்ஸலோகே. தங் தங் நமஸ்ஸாமீதி தங் ஏவரூபங் தங் நமஸ்ஸாமி. பமுஞ்சாதி பமோசேஹி.
32. Evaṃ vutte attamano dhotako bhagavantaṃ abhitthavamāno kathaṃkathāpamokkhaṃ yācanto ‘‘passāmaha’’nti gāthamāha. Tattha passāmahaṃ devamanussaloketi passāmi ahaṃ devamanussaloke. Taṃ taṃ namassāmīti taṃ evarūpaṃ taṃ namassāmi. Pamuñcāti pamocehi.
நித்³தே³ஸே பச்சேகபு³த்³தா⁴தி தங் தங் ஆரம்மணங் பாடியேக்கங் சதுஸச்சங் ஸயமேவ பு³த்³தா⁴ படிவேத⁴ப்பத்தாதி பச்சேகபு³த்³தா⁴. ஸீஹஸீஹோதி அச²ம்பி⁴தட்டே²ன ஸீஹானங் அதிஸீஹோ. நாக³னாகோ³தி நிக்கிலேஸட்டே²ன, மஹந்தட்டே²ன வா நாகா³னங் அதினாகோ³. க³ணிக³ணீதி க³ணவந்தானங் அதீவ க³ணவா. முனிமுனீதி ஞாணவந்தானங் அதீவ ஞாணவா. ராஜராஜாதி உத்தமராஜா. முஞ்ச மந்தி மோசேஹி மங். பமுஞ்ச மந்தி நானாவிதே⁴ன முஞ்சேஹி மங். மோசேஹி மந்தி ஸிதி²லங் கரோஹி மங். பமோசேஹி மந்தி அதீவ ஸிதி²லங் கரோஹி மங். உத்³த⁴ர மந்தி மங் ஸங்ஸாரபங்கா உத்³த⁴ரித்வா த²லே பதிட்டா²பேஹி. ஸமுத்³த⁴ர மந்தி ஸம்மா உத்³த⁴ரித்வா த²லே பதிட்டா²பேஹி மங். வுட்டா²பேஹீதி விசிகிச்சா²ஸல்லதோ அபனெத்வா விஸுங் கரணவஸேன உட்டா²பேஹி.
Niddese paccekabuddhāti taṃ taṃ ārammaṇaṃ pāṭiyekkaṃ catusaccaṃ sayameva buddhā paṭivedhappattāti paccekabuddhā. Sīhasīhoti achambhitaṭṭhena sīhānaṃ atisīho. Nāganāgoti nikkilesaṭṭhena, mahantaṭṭhena vā nāgānaṃ atināgo. Gaṇigaṇīti gaṇavantānaṃ atīva gaṇavā. Munimunīti ñāṇavantānaṃ atīva ñāṇavā. Rājarājāti uttamarājā. Muñca manti mocehi maṃ. Pamuñca manti nānāvidhena muñcehi maṃ. Mocehi manti sithilaṃ karohi maṃ. Pamocehi manti atīva sithilaṃ karohi maṃ. Uddhara manti maṃ saṃsārapaṅkā uddharitvā thale patiṭṭhāpehi. Samuddhara manti sammā uddharitvā thale patiṭṭhāpehi maṃ. Vuṭṭhāpehīti vicikicchāsallato apanetvā visuṃ karaṇavasena uṭṭhāpehi.
33. அத²ஸ்ஸ ப⁴க³வா அத்தாதீ⁴னமேவ கத²ங்கதா²பமொக்க²ங் ஓக⁴தரணமுகே²ன த³ஸ்ஸெந்தோ ‘‘நாஹ’’ந்தி கா³த²மாஹ. தத்த² நாஹங் ஸஹிஸ்ஸாமீதி அஹங் ந ஸஹிஸ்ஸாமி ந ஸக்கோமி. ந வாயமிஸ்ஸாமீதி வுத்தங் ஹோதி. பமோசனாயாதி பமோசேதுங். கத²ங்கதி²ந்தி ஸகங்க²ங். தரேஸீதி தரெய்யாஸி.
33. Athassa bhagavā attādhīnameva kathaṃkathāpamokkhaṃ oghataraṇamukhena dassento ‘‘nāha’’nti gāthamāha. Tattha nāhaṃ sahissāmīti ahaṃ na sahissāmi na sakkomi. Na vāyamissāmīti vuttaṃ hoti. Pamocanāyāti pamocetuṃ. Kathaṃkathinti sakaṅkhaṃ. Taresīti tareyyāsi.
நித்³தே³ஸே ந ஈஹாமீதி பயோக³ங் ந கரோமி. ந ஸமீஹாமீதி அதீவ பயோக³ங் ந கரோமி. அஸ்ஸத்³தே⁴ புக்³க³லேதி ரதனத்தயே ஸத்³தா⁴விரஹிதே புக்³க³லே. அச்ச²ந்தி³கேதி மக்³க³ப²லத்த²ங் ருசிவிரஹிதே. குஸீதேதி ஸமாதி⁴விரஹிதே. ஹீனவீரியேதி நிப்³பீ³ரியே. அப்படிபஜ்ஜமானேதி படிபத்தியா ந படிபஜ்ஜமானே.
Niddese na īhāmīti payogaṃ na karomi. Na samīhāmīti atīva payogaṃ na karomi. Assaddhe puggaleti ratanattaye saddhāvirahite puggale. Acchandiketi maggaphalatthaṃ rucivirahite. Kusīteti samādhivirahite. Hīnavīriyeti nibbīriye. Appaṭipajjamāneti paṭipattiyā na paṭipajjamāne.
34. ஏவங் வுத்தே அத்தமனதரோ தோ⁴தகோ ப⁴க³வந்தங் அபி⁴த்த²வமானோ அனுஸாஸனிங் யாசந்தோ ‘‘அனுஸாஸ ப்³ரஹ்மே’’தி கா³த²மாஹ. தத்த² ப்³ரஹ்மேதி ஸெட்ட²வசனமேதங். தேன ப⁴க³வந்தங் ஆமந்தயமானோ ஆஹ ‘‘அனுஸாஸ ப்³ரஹ்மே’’தி. விவேகத⁴ம்மந்தி ஸப்³ப³ஸங்கா²ரவிவேகங் நிப்³பா³னத⁴ம்மங். அப்³யாபஜ்ஜமானோதி நானப்பகாரகங் அனாபஜ்ஜமானோ. இதே⁴வ ஸந்தோதி இதே⁴வ ஸமானோ. அஸிதோதி அனிஸ்ஸிதோ.
34. Evaṃ vutte attamanataro dhotako bhagavantaṃ abhitthavamāno anusāsaniṃ yācanto ‘‘anusāsa brahme’’ti gāthamāha. Tattha brahmeti seṭṭhavacanametaṃ. Tena bhagavantaṃ āmantayamāno āha ‘‘anusāsa brahme’’ti. Vivekadhammanti sabbasaṅkhāravivekaṃ nibbānadhammaṃ. Abyāpajjamānoti nānappakārakaṃ anāpajjamāno. Idheva santoti idheva samāno. Asitoti anissito.
35-7. இதோ பரா த்³வே கா³தா² மெத்தகூ³ஸுத்தே வுத்தனயா ஏவ. கேவலஞ்ஹி தத்த² த⁴ம்மங், இத⁴ ஸந்திந்தி அயங் விஸேஸோ. ததியகா³தா²யபி புப்³ப³ட்³ட⁴ங் தத்த² வுத்தனயமேவ. அபரட்³டே⁴ ஸங்கோ³தி ஸஜ்ஜனட்டா²னங், லக்³க³னந்தி வுத்தங் ஹோதி. ஸேஸங் ஸப்³ப³த்த² பாகடமேவ.
35-7. Ito parā dve gāthā mettagūsutte vuttanayā eva. Kevalañhi tattha dhammaṃ, idha santinti ayaṃ viseso. Tatiyagāthāyapi pubbaḍḍhaṃ tattha vuttanayameva. Aparaḍḍhe saṅgoti sajjanaṭṭhānaṃ, laggananti vuttaṃ hoti. Sesaṃ sabbattha pākaṭameva.
ஏவங் ப⁴க³வா இத³ம்பி ஸுத்தங் அரஹத்தனிகூடேனேவ தே³ஸேஸி, தே³ஸனாபரியோஸானே ச வுத்தஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā idampi suttaṃ arahattanikūṭeneva desesi, desanāpariyosāne ca vuttasadiso eva dhammābhisamayo ahosīti.
ஸத்³த⁴ம்மப்பஜ்ஜோதிகாய சூளனித்³தே³ஸ-அட்ட²கதா²ய
Saddhammappajjotikāya cūḷaniddesa-aṭṭhakathāya
தோ⁴தகமாணவஸுத்தனித்³தே³ஸவண்ணனா நிட்டி²தா.
Dhotakamāṇavasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சூளனித்³தே³ஸபாளி • Cūḷaniddesapāḷi
5. தோ⁴தகமாணவபுச்சா² • 5. Dhotakamāṇavapucchā
5. தோ⁴தகமாணவபுச்சா²னித்³தே³ஸோ • 5. Dhotakamāṇavapucchāniddeso
