| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
5. தோ⁴தகஸுத்தவண்ணனா
5. Dhotakasuttavaṇṇanā
1068-9. புச்சா²மி தந்தி தோ⁴தகஸுத்தங். தத்த² வாசாபி⁴கங்கா²மீதி வாசங் அபி⁴கங்கா²மி. ஸிக்கே² நிப்³பா³னமத்தனோதி அத்தனோ ராகா³தீ³னங் நிப்³பா³னத்தா²ய அதி⁴ஸீலாதீ³னி ஸிக்கெ²ய்ய. இதோதி மம முக²தோ.
1068-9.Pucchāmitanti dhotakasuttaṃ. Tattha vācābhikaṅkhāmīti vācaṃ abhikaṅkhāmi. Sikkhe nibbānamattanoti attano rāgādīnaṃ nibbānatthāya adhisīlādīni sikkheyya. Itoti mama mukhato.
1070. ஏவங் வுத்தே அத்தமனோ தோ⁴தகோ ப⁴க³வந்தங் அபி⁴த்த²வமானோ கத²ங்கதா²பமொக்க²ங் யாசந்தோ ‘‘பஸ்ஸாமஹ’’ந்தி கா³த²மாஹ. தத்த² பஸ்ஸாமஹங் தே³வமனுஸ்ஸலோகேதி பஸ்ஸாமி அஹங் தே³வமனுஸ்ஸலோகே. தங் தங் நமஸ்ஸாமீதி தங் ஏவரூபங் நமஸ்ஸாமி. பமுஞ்சாதி பமோசேஹி.
1070. Evaṃ vutte attamano dhotako bhagavantaṃ abhitthavamāno kathaṃkathāpamokkhaṃ yācanto ‘‘passāmaha’’nti gāthamāha. Tattha passāmahaṃ devamanussaloketi passāmi ahaṃ devamanussaloke. Taṃ taṃ namassāmīti taṃ evarūpaṃ namassāmi. Pamuñcāti pamocehi.
1071. அத²ஸ்ஸ ப⁴க³வா அத்தாதீ⁴னமேவ கத²ங்கதா²பமொக்க²ங் ஓக⁴தரணமுகே²ன த³ஸ்ஸெந்தோ ‘‘நாஹ’’ந்தி கா³த²மாஹ. தத்த² நாஹங் ஸஹிஸ்ஸாமீதி அஹங் ந ஸஹிஸ்ஸாமி ந ஸக்கி²ஸ்ஸாமி, ந வாயமிஸ்ஸாமீதி வுத்தங் ஹோதி. பமோசனாயாதி பமாசேதுங். கத²ங்கதி²ந்தி ஸகங்க²ங். தரேஸீதி தரெய்யாஸி.
1071. Athassa bhagavā attādhīnameva kathaṃkathāpamokkhaṃ oghataraṇamukhena dassento ‘‘nāha’’nti gāthamāha. Tattha nāhaṃ sahissāmīti ahaṃ na sahissāmi na sakkhissāmi, na vāyamissāmīti vuttaṃ hoti. Pamocanāyāti pamācetuṃ. Kathaṃkathinti sakaṅkhaṃ. Taresīti tareyyāsi.
1072-5. ஏவங் வுத்தே அத்தமனதரோ தோ⁴தகோ ப⁴க³வந்தங் அபி⁴த்த²வமானோ அனுஸாஸனிங் யாசந்தோ ‘‘அனுஸாஸ ப்³ரஹ்மே’’தி கா³த²மாஹ. தத்த² ப்³ரஹ்மாதி ஸெட்ட²வசனமேதங். தேன ப⁴க³வந்தங் ஆமந்தயமானோ ஆஹ – ‘‘அனுஸாஸ ப்³ரஹ்மே’’தி . விவேகத⁴ம்மந்தி ஸப்³ப³ஸங்கா²ரவிவேகனிப்³பா³னத⁴ம்மங். அப்³யாபஜ்ஜமானோதி நானப்பகாரதங் அனாபஜ்ஜமானோ. இதே⁴வ ஸந்தோதி இதே⁴வ ஸமானோ. அஸிதோதி அனிஸ்ஸிதோ. இதோ பரா த்³வே கா³தா² மெத்தகு³ஸுத்தே வுத்தனயா ஏவ. கேவலஞ்ஹி தத்த² த⁴ம்மங், இத⁴ ஸந்திந்தி அயங் விஸேஸோ. ததியகா³தா²யபி புப்³ப³ட்³ட⁴ங் தத்த² வுதனயமேவ அபரட்³டே⁴ ஸங்கோ³தி ஸஜ்ஜனட்டா²னங், லக்³க³னந்தி வுத்தங் ஹோதி. ஸேஸங் ஸப்³ப³த்த² பாகடமேவ.
1072-5. Evaṃ vutte attamanataro dhotako bhagavantaṃ abhitthavamāno anusāsaniṃ yācanto ‘‘anusāsa brahme’’ti gāthamāha. Tattha brahmāti seṭṭhavacanametaṃ. Tena bhagavantaṃ āmantayamāno āha – ‘‘anusāsa brahme’’ti . Vivekadhammanti sabbasaṅkhāravivekanibbānadhammaṃ. Abyāpajjamānoti nānappakārataṃ anāpajjamāno. Idheva santoti idheva samāno. Asitoti anissito. Ito parā dve gāthā mettagusutte vuttanayā eva. Kevalañhi tattha dhammaṃ, idha santinti ayaṃ viseso. Tatiyagāthāyapi pubbaḍḍhaṃ tattha vutanayameva aparaḍḍhe saṅgoti sajjanaṭṭhānaṃ, laggananti vuttaṃ hoti. Sesaṃ sabbattha pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச வுத்தஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய தோ⁴தகஸுத்தவண்ணனா நிட்டி²தா.
Suttanipāta-aṭṭhakathāya dhotakasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 5. தோ⁴தகமாணவபுச்சா² • 5. Dhotakamāṇavapucchā
