| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൬. ധൂപദായകത്ഥേരഅപദാനവണ്ണനാ
6. Dhūpadāyakattheraapadānavaṇṇanā
സിദ്ധത്ഥസ്സ ഭഗവതോതിആദികം ആയസ്മതോ ധൂപദായകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ സിദ്ധത്ഥസ്സ ഭഗവതോ കാലേ കുലഗേഹേ നിബ്ബത്തോ സിദ്ധത്ഥേ ഭഗവതി ചിത്തം പസാദേത്വാ തസ്സ ഭഗവതോ ഗന്ധകുടിയം ചന്ദനാഗരുകാളാനുസാരിആദിനാ കതേഹി അനേകേഹി ധൂപേഹി ധൂപപൂജം അകാസി. സോ തേന പുഞ്ഞേന ദേവേസു ച മനുസ്സേസു ച ഉഭയസമ്പത്തിയോ അനുഭവന്തോ നിബ്ബത്തനിബ്ബത്തഭവേ പൂജനീയോ ഹുത്വാ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ പുഞ്ഞസമ്ഭാരാനുഭാവേന സാസനേ പബ്ബജിത്വാ വിപസ്സനം വഡ്ഢേത്വാ അരഹത്തം പത്വാ കതധൂപപൂജാപുഞ്ഞത്താ നാമേന ധൂപദായകത്ഥേരോതി സബ്ബത്ഥ പാകടോ. സോ പത്തഅരഹത്തഫലോ അത്തനോ പുബ്ബകമ്മം സരിത്വാ സോമനസ്സജാതോ പുബ്ബചരിതാപദാനം ദസ്സേന്തോ സിദ്ധത്ഥസ്സ ഭഗവതോതിആദിമാഹ. സിദ്ധോ പരിപുണ്ണോ സബ്ബഞ്ഞുതഞ്ഞാണാദിഗുണസങ്ഖാതോ അത്ഥോ പയോജനം യസ്സ ഭഗവതോ സോയം സിദ്ധത്ഥോ, തസ്സ സിദ്ധത്ഥസ്സ ഭഗവതോ ഭഗ്യാദിഗുണവന്തസ്സ ലോകജേട്ഠസ്സ സകലലോകുത്തമസ്സ താദിനോ ഇട്ഠാനിട്ഠേസു താദിസസ്സ അചലസഭാവസ്സാതി അത്ഥോ. സേസം ഉത്താനത്ഥമേവാതി.
Siddhatthassa bhagavatotiādikaṃ āyasmato dhūpadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle kulagehe nibbatto siddhatthe bhagavati cittaṃ pasādetvā tassa bhagavato gandhakuṭiyaṃ candanāgarukāḷānusāriādinā katehi anekehi dhūpehi dhūpapūjaṃ akāsi. So tena puññena devesu ca manussesu ca ubhayasampattiyo anubhavanto nibbattanibbattabhave pūjanīyo hutvā imasmiṃ buddhuppāde ekasmiṃ kulagehe nibbatto puññasambhārānubhāvena sāsane pabbajitvā vipassanaṃ vaḍḍhetvā arahattaṃ patvā katadhūpapūjāpuññattā nāmena dhūpadāyakattheroti sabbattha pākaṭo. So pattaarahattaphalo attano pubbakammaṃ saritvā somanassajāto pubbacaritāpadānaṃ dassento siddhatthassa bhagavatotiādimāha. Siddho paripuṇṇo sabbaññutaññāṇādiguṇasaṅkhāto attho payojanaṃ yassa bhagavato soyaṃ siddhattho, tassa siddhatthassa bhagavato bhagyādiguṇavantassa lokajeṭṭhassa sakalalokuttamassa tādino iṭṭhāniṭṭhesu tādisassa acalasabhāvassāti attho. Sesaṃ uttānatthamevāti.
ധൂപദായകത്ഥേരഅപദാനവണ്ണനാ സമത്താ.
Dhūpadāyakattheraapadānavaṇṇanā samattā.
