| Library / Tipiṭaka / तिपिटक • Tipiṭaka / परिवारपाळि • Parivārapāḷi |
६. धुतङ्गवग्गो
6. Dhutaṅgavaggo
४४३. ‘‘कति नु खो, भन्ते, आरञ्ञिका’’ति? ‘‘पञ्चिमे, उपालि, आरञ्ञिका 1। कतमे पञ्च? मन्दत्ता मोमूहत्ता आरञ्ञिको होति, पापिच्छो इच्छापकतो आरञ्ञिको होति, उम्मादा चित्तक्खेपा आरञ्ञिको होति, वण्णितं बुद्धेहि बुद्धसावकेहीति आरञ्ञिको होति, अपि च अप्पिच्छञ्ञेव निस्साय सन्तुट्ठिञ्ञेव निस्साय – सल्लेखञ्ञेव निस्साय पविवेकञ्ञेव निस्साय इदमत्थितञ्ञेव निस्साय आरञ्ञिको होति – इमे खो, उपालि, पञ्च आरञ्ञिका’’ति।
443. ‘‘Kati nu kho, bhante, āraññikā’’ti? ‘‘Pañcime, upāli, āraññikā 2. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, api ca appicchaññeva nissāya santuṭṭhiññeva nissāya – sallekhaññeva nissāya pavivekaññeva nissāya idamatthitaññeva nissāya āraññiko hoti – ime kho, upāli, pañca āraññikā’’ti.
‘‘कति नु खो, भन्ते, पिण्डपातिकाति…पे॰… कति नु खो, भन्ते, पंसुकूलिकाति…पे॰… कति नु खो, भन्ते, रुक्खमूलिकाति…पे॰… कति नु खो, भन्ते, सोसानिकाति…पे॰… कति नु खो, भन्ते, अब्भोकासिकाति…पे॰… कति नु खो, भन्ते, तेचीवरिकाति…पे॰… कति नु खो, भन्ते, सपदानचारिकाति…पे॰… कति नु खो, भन्ते, नेसज्जिकाति…पे॰… कति नु खो, भन्ते, यथासन्थतिकाति…पे॰… कति नु खो, भन्ते, एकासनिकाति…पे॰… कति नु खो, भन्ते, खलुपच्छाभत्तिकाति…पे॰… कति नु खो, भन्ते, पत्तपिण्डिकाति? पञ्चिमे, उपालि, पत्तपिण्डिका। कतमे पञ्च? मन्दत्ता मोमूहत्ता पत्तपिण्डिको होति, पापिच्छो इच्छापकतो पत्तपिण्डिको होति, उम्मादा चित्तक्खेपा पत्तपिण्डिको होति, वण्णितं बुद्धेहि बुद्धसावकेहीति पत्तपिण्डिको होति, अपि च अप्पिच्छञ्ञेव निस्साय सन्तुट्ठिञ्ञेव निस्साय सल्लेखञ्ञेव निस्साय पविवेकञ्ञेव निस्साय इदमत्थितञ्ञेव निस्साय पत्तपिण्डिको होति – इमे खो, उपालि, पञ्च पत्तपिण्डिका’’ति।
‘‘Kati nu kho, bhante, piṇḍapātikāti…pe… kati nu kho, bhante, paṃsukūlikāti…pe… kati nu kho, bhante, rukkhamūlikāti…pe… kati nu kho, bhante, sosānikāti…pe… kati nu kho, bhante, abbhokāsikāti…pe… kati nu kho, bhante, tecīvarikāti…pe… kati nu kho, bhante, sapadānacārikāti…pe… kati nu kho, bhante, nesajjikāti…pe… kati nu kho, bhante, yathāsanthatikāti…pe… kati nu kho, bhante, ekāsanikāti…pe… kati nu kho, bhante, khalupacchābhattikāti…pe… kati nu kho, bhante, pattapiṇḍikāti? Pañcime, upāli, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, vaṇṇitaṃ buddhehi buddhasāvakehīti pattapiṇḍiko hoti, api ca appicchaññeva nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva nissāya pattapiṇḍiko hoti – ime kho, upāli, pañca pattapiṇḍikā’’ti.
धुतङ्गवग्गो निट्ठितो छट्ठो।
Dhutaṅgavaggo niṭṭhito chaṭṭho.
तस्सुद्दानं –
Tassuddānaṃ –
आरञ्ञिको पिण्डिपंसु, रुक्खसुसानपञ्चमं।
Āraññiko piṇḍipaṃsu, rukkhasusānapañcamaṃ;
अब्भो तेचीवरञ्चेव, सपदाननेसज्जिका।
Abbho tecīvarañceva, sapadānanesajjikā;
सन्थतेकासनञ्चेव, खलुपच्छा पत्तपिण्डिकाति॥
Santhatekāsanañceva, khalupacchā pattapiṇḍikāti.
Footnotes:
