| Library / Tipiṭaka / តិបិដក • Tipiṭaka / បរិវារបាឡិ • Parivārapāḷi |
៦. ធុតង្គវគ្គោ
6. Dhutaṅgavaggo
៤៤៣. ‘‘កតិ នុ ខោ, ភន្តេ, អារញ្ញិកា’’តិ? ‘‘បញ្ចិមេ, ឧបាលិ, អារញ្ញិកា 1។ កតមេ បញ្ច? មន្ទត្តា មោមូហត្តា អារញ្ញិកោ ហោតិ, បាបិច្ឆោ ឥច្ឆាបកតោ អារញ្ញិកោ ហោតិ, ឧម្មាទា ចិត្តក្ខេបា អារញ្ញិកោ ហោតិ, វណ្ណិតំ ពុទ្ធេហិ ពុទ្ធសាវកេហីតិ អារញ្ញិកោ ហោតិ, អបិ ច អប្បិច្ឆញ្ញេវ និស្សាយ សន្តុដ្ឋិញ្ញេវ និស្សាយ – សល្លេខញ្ញេវ និស្សាយ បវិវេកញ្ញេវ និស្សាយ ឥទមត្ថិតញ្ញេវ និស្សាយ អារញ្ញិកោ ហោតិ – ឥមេ ខោ, ឧបាលិ, បញ្ច អារញ្ញិកា’’តិ។
443. ‘‘Kati nu kho, bhante, āraññikā’’ti? ‘‘Pañcime, upāli, āraññikā 2. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, api ca appicchaññeva nissāya santuṭṭhiññeva nissāya – sallekhaññeva nissāya pavivekaññeva nissāya idamatthitaññeva nissāya āraññiko hoti – ime kho, upāli, pañca āraññikā’’ti.
‘‘កតិ នុ ខោ, ភន្តេ, បិណ្ឌបាតិកាតិ…បេ.… កតិ នុ ខោ, ភន្តេ, បំសុកូលិកាតិ…បេ.… កតិ នុ ខោ, ភន្តេ, រុក្ខមូលិកាតិ…បេ.… កតិ នុ ខោ, ភន្តេ, សោសានិកាតិ…បេ.… កតិ នុ ខោ, ភន្តេ, អព្ភោកាសិកាតិ…បេ.… កតិ នុ ខោ, ភន្តេ, តេចីវរិកាតិ…បេ.… កតិ នុ ខោ, ភន្តេ, សបទានចារិកាតិ…បេ.… កតិ នុ ខោ, ភន្តេ, នេសជ្ជិកាតិ…បេ.… កតិ នុ ខោ, ភន្តេ, យថាសន្ថតិកាតិ…បេ.… កតិ នុ ខោ, ភន្តេ, ឯកាសនិកាតិ…បេ.… កតិ នុ ខោ, ភន្តេ, ខលុបច្ឆាភត្តិកាតិ…បេ.… កតិ នុ ខោ, ភន្តេ, បត្តបិណ្ឌិកាតិ? បញ្ចិមេ, ឧបាលិ, បត្តបិណ្ឌិកា។ កតមេ បញ្ច? មន្ទត្តា មោមូហត្តា បត្តបិណ្ឌិកោ ហោតិ, បាបិច្ឆោ ឥច្ឆាបកតោ បត្តបិណ្ឌិកោ ហោតិ, ឧម្មាទា ចិត្តក្ខេបា បត្តបិណ្ឌិកោ ហោតិ, វណ្ណិតំ ពុទ្ធេហិ ពុទ្ធសាវកេហីតិ បត្តបិណ្ឌិកោ ហោតិ, អបិ ច អប្បិច្ឆញ្ញេវ និស្សាយ សន្តុដ្ឋិញ្ញេវ និស្សាយ សល្លេខញ្ញេវ និស្សាយ បវិវេកញ្ញេវ និស្សាយ ឥទមត្ថិតញ្ញេវ និស្សាយ បត្តបិណ្ឌិកោ ហោតិ – ឥមេ ខោ, ឧបាលិ, បញ្ច បត្តបិណ្ឌិកា’’តិ។
‘‘Kati nu kho, bhante, piṇḍapātikāti…pe… kati nu kho, bhante, paṃsukūlikāti…pe… kati nu kho, bhante, rukkhamūlikāti…pe… kati nu kho, bhante, sosānikāti…pe… kati nu kho, bhante, abbhokāsikāti…pe… kati nu kho, bhante, tecīvarikāti…pe… kati nu kho, bhante, sapadānacārikāti…pe… kati nu kho, bhante, nesajjikāti…pe… kati nu kho, bhante, yathāsanthatikāti…pe… kati nu kho, bhante, ekāsanikāti…pe… kati nu kho, bhante, khalupacchābhattikāti…pe… kati nu kho, bhante, pattapiṇḍikāti? Pañcime, upāli, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, vaṇṇitaṃ buddhehi buddhasāvakehīti pattapiṇḍiko hoti, api ca appicchaññeva nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva nissāya pattapiṇḍiko hoti – ime kho, upāli, pañca pattapiṇḍikā’’ti.
ធុតង្គវគ្គោ និដ្ឋិតោ ឆដ្ឋោ។
Dhutaṅgavaggo niṭṭhito chaṭṭho.
តស្សុទ្ទានំ –
Tassuddānaṃ –
អារញ្ញិកោ បិណ្ឌិបំសុ, រុក្ខសុសានបញ្ចមំ;
Āraññiko piṇḍipaṃsu, rukkhasusānapañcamaṃ;
អព្ភោ តេចីវរញ្ចេវ, សបទាននេសជ្ជិកា;
Abbho tecīvarañceva, sapadānanesajjikā;
សន្ថតេកាសនញ្ចេវ, ខលុបច្ឆា បត្តបិណ្ឌិកាតិ។
Santhatekāsanañceva, khalupacchā pattapiṇḍikāti.
Footnotes:
