| Library / Tipiṭaka / ತಿಪಿಟಕ • Tipiṭaka / ಪರಿವಾರಪಾಳಿ • Parivārapāḷi |
೬. ಧುತಙ್ಗವಗ್ಗೋ
6. Dhutaṅgavaggo
೪೪೩. ‘‘ಕತಿ ನು ಖೋ, ಭನ್ತೇ, ಆರಞ್ಞಿಕಾ’’ತಿ? ‘‘ಪಞ್ಚಿಮೇ, ಉಪಾಲಿ, ಆರಞ್ಞಿಕಾ 1। ಕತಮೇ ಪಞ್ಚ? ಮನ್ದತ್ತಾ ಮೋಮೂಹತ್ತಾ ಆರಞ್ಞಿಕೋ ಹೋತಿ, ಪಾಪಿಚ್ಛೋ ಇಚ್ಛಾಪಕತೋ ಆರಞ್ಞಿಕೋ ಹೋತಿ, ಉಮ್ಮಾದಾ ಚಿತ್ತಕ್ಖೇಪಾ ಆರಞ್ಞಿಕೋ ಹೋತಿ, ವಣ್ಣಿತಂ ಬುದ್ಧೇಹಿ ಬುದ್ಧಸಾವಕೇಹೀತಿ ಆರಞ್ಞಿಕೋ ಹೋತಿ, ಅಪಿ ಚ ಅಪ್ಪಿಚ್ಛಞ್ಞೇವ ನಿಸ್ಸಾಯ ಸನ್ತುಟ್ಠಿಞ್ಞೇವ ನಿಸ್ಸಾಯ – ಸಲ್ಲೇಖಞ್ಞೇವ ನಿಸ್ಸಾಯ ಪವಿವೇಕಞ್ಞೇವ ನಿಸ್ಸಾಯ ಇದಮತ್ಥಿತಞ್ಞೇವ ನಿಸ್ಸಾಯ ಆರಞ್ಞಿಕೋ ಹೋತಿ – ಇಮೇ ಖೋ, ಉಪಾಲಿ, ಪಞ್ಚ ಆರಞ್ಞಿಕಾ’’ತಿ।
443. ‘‘Kati nu kho, bhante, āraññikā’’ti? ‘‘Pañcime, upāli, āraññikā 2. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, api ca appicchaññeva nissāya santuṭṭhiññeva nissāya – sallekhaññeva nissāya pavivekaññeva nissāya idamatthitaññeva nissāya āraññiko hoti – ime kho, upāli, pañca āraññikā’’ti.
‘‘ಕತಿ ನು ಖೋ, ಭನ್ತೇ, ಪಿಣ್ಡಪಾತಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ಪಂಸುಕೂಲಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ರುಕ್ಖಮೂಲಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ಸೋಸಾನಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ಅಬ್ಭೋಕಾಸಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ತೇಚೀವರಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ಸಪದಾನಚಾರಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ನೇಸಜ್ಜಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ಯಥಾಸನ್ಥತಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ಏಕಾಸನಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ಖಲುಪಚ್ಛಾಭತ್ತಿಕಾತಿ…ಪೇ॰… ಕತಿ ನು ಖೋ, ಭನ್ತೇ, ಪತ್ತಪಿಣ್ಡಿಕಾತಿ? ಪಞ್ಚಿಮೇ, ಉಪಾಲಿ, ಪತ್ತಪಿಣ್ಡಿಕಾ। ಕತಮೇ ಪಞ್ಚ? ಮನ್ದತ್ತಾ ಮೋಮೂಹತ್ತಾ ಪತ್ತಪಿಣ್ಡಿಕೋ ಹೋತಿ, ಪಾಪಿಚ್ಛೋ ಇಚ್ಛಾಪಕತೋ ಪತ್ತಪಿಣ್ಡಿಕೋ ಹೋತಿ, ಉಮ್ಮಾದಾ ಚಿತ್ತಕ್ಖೇಪಾ ಪತ್ತಪಿಣ್ಡಿಕೋ ಹೋತಿ, ವಣ್ಣಿತಂ ಬುದ್ಧೇಹಿ ಬುದ್ಧಸಾವಕೇಹೀತಿ ಪತ್ತಪಿಣ್ಡಿಕೋ ಹೋತಿ, ಅಪಿ ಚ ಅಪ್ಪಿಚ್ಛಞ್ಞೇವ ನಿಸ್ಸಾಯ ಸನ್ತುಟ್ಠಿಞ್ಞೇವ ನಿಸ್ಸಾಯ ಸಲ್ಲೇಖಞ್ಞೇವ ನಿಸ್ಸಾಯ ಪವಿವೇಕಞ್ಞೇವ ನಿಸ್ಸಾಯ ಇದಮತ್ಥಿತಞ್ಞೇವ ನಿಸ್ಸಾಯ ಪತ್ತಪಿಣ್ಡಿಕೋ ಹೋತಿ – ಇಮೇ ಖೋ, ಉಪಾಲಿ, ಪಞ್ಚ ಪತ್ತಪಿಣ್ಡಿಕಾ’’ತಿ।
‘‘Kati nu kho, bhante, piṇḍapātikāti…pe… kati nu kho, bhante, paṃsukūlikāti…pe… kati nu kho, bhante, rukkhamūlikāti…pe… kati nu kho, bhante, sosānikāti…pe… kati nu kho, bhante, abbhokāsikāti…pe… kati nu kho, bhante, tecīvarikāti…pe… kati nu kho, bhante, sapadānacārikāti…pe… kati nu kho, bhante, nesajjikāti…pe… kati nu kho, bhante, yathāsanthatikāti…pe… kati nu kho, bhante, ekāsanikāti…pe… kati nu kho, bhante, khalupacchābhattikāti…pe… kati nu kho, bhante, pattapiṇḍikāti? Pañcime, upāli, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, vaṇṇitaṃ buddhehi buddhasāvakehīti pattapiṇḍiko hoti, api ca appicchaññeva nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva nissāya pattapiṇḍiko hoti – ime kho, upāli, pañca pattapiṇḍikā’’ti.
ಧುತಙ್ಗವಗ್ಗೋ ನಿಟ್ಠಿತೋ ಛಟ್ಠೋ।
Dhutaṅgavaggo niṭṭhito chaṭṭho.
ತಸ್ಸುದ್ದಾನಂ –
Tassuddānaṃ –
ಆರಞ್ಞಿಕೋ ಪಿಣ್ಡಿಪಂಸು, ರುಕ್ಖಸುಸಾನಪಞ್ಚಮಂ।
Āraññiko piṇḍipaṃsu, rukkhasusānapañcamaṃ;
ಅಬ್ಭೋ ತೇಚೀವರಞ್ಚೇವ, ಸಪದಾನನೇಸಜ್ಜಿಕಾ।
Abbho tecīvarañceva, sapadānanesajjikā;
ಸನ್ಥತೇಕಾಸನಞ್ಚೇವ, ಖಲುಪಚ್ಛಾ ಪತ್ತಪಿಣ್ಡಿಕಾತಿ॥
Santhatekāsanañceva, khalupacchā pattapiṇḍikāti.
Footnotes:
