| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
6. ධුතඞ්‌ගවග්‌ගො
6. Dhutaṅgavaggo
443. ‘‘කති නු ඛො, භන්‌තෙ, ආරඤ්‌ඤිකා’’ති? ‘‘පඤ්‌චිමෙ, උපාලි, ආරඤ්‌ඤිකා 1. කතමෙ පඤ්‌ච? මන්‌දත්‌තා මොමූහත්‌තා ආරඤ්‌ඤිකො හොති, පාපිච්‌ඡො ඉච්‌ඡාපකතො ආරඤ්‌ඤිකො හොති, උම්‌මාදා චිත්‌තක්‌ඛෙපා ආරඤ්‌ඤිකො හොති, වණ්‌ණිතං බුද්‌ධෙහි බුද්‌ධසාවකෙහීති ආරඤ්‌ඤිකො හොති, අපි ච අප්‌පිච්‌ඡඤ්‌ඤෙව නිස්‌සාය සන්‌තුට්‌ඨිඤ්‌ඤෙව නිස්‌සාය – සල්‌ලෙඛඤ්‌ඤෙව නිස්‌සාය පවිවෙකඤ්‌ඤෙව නිස්‌සාය ඉදමත්‌ථිතඤ්‌ඤෙව නිස්‌සාය ආරඤ්‌ඤිකො හොති – ඉමෙ ඛො, උපාලි, පඤ්‌ච ආරඤ්‌ඤිකා’’ති.
443. ‘‘Kati nu kho, bhante, āraññikā’’ti? ‘‘Pañcime, upāli, āraññikā 2. Katame pañca? Mandattā momūhattā āraññiko hoti, pāpiccho icchāpakato āraññiko hoti, ummādā cittakkhepā āraññiko hoti, vaṇṇitaṃ buddhehi buddhasāvakehīti āraññiko hoti, api ca appicchaññeva nissāya santuṭṭhiññeva nissāya – sallekhaññeva nissāya pavivekaññeva nissāya idamatthitaññeva nissāya āraññiko hoti – ime kho, upāli, pañca āraññikā’’ti.
‘‘කති නු ඛො, භන්‌තෙ, පිණ්‌ඩපාතිකාති…පෙ.… කති නු ඛො, භන්‌තෙ, පංසුකූලිකාති…පෙ.… කති නු ඛො, භන්‌තෙ, රුක්‌ඛමූලිකාති…පෙ.… කති නු ඛො, භන්‌තෙ, සොසානිකාති…පෙ.… කති නු ඛො, භන්‌තෙ, අබ්‌භොකාසිකාති…පෙ.… කති නු ඛො, භන්‌තෙ, තෙචීවරිකාති…පෙ.… කති නු ඛො, භන්‌තෙ, සපදානචාරිකාති…පෙ.… කති නු ඛො, භන්‌තෙ, නෙසජ්‌ජිකාති…පෙ.… කති නු ඛො, භන්‌තෙ, යථාසන්‌ථතිකාති…පෙ.… කති නු ඛො, භන්‌තෙ, එකාසනිකාති…පෙ.… කති නු ඛො, භන්‌තෙ, ඛලුපච්‌ඡාභත්‌තිකාති…පෙ.… කති නු ඛො, භන්‌තෙ, පත්‌තපිණ්‌ඩිකාති? පඤ්‌චිමෙ, උපාලි, පත්‌තපිණ්‌ඩිකා. කතමෙ පඤ්‌ච? මන්‌දත්‌තා මොමූහත්‌තා පත්‌තපිණ්‌ඩිකො හොති, පාපිච්‌ඡො ඉච්‌ඡාපකතො පත්‌තපිණ්‌ඩිකො හොති, උම්‌මාදා චිත්‌තක්‌ඛෙපා පත්‌තපිණ්‌ඩිකො හොති, වණ්‌ණිතං බුද්‌ධෙහි බුද්‌ධසාවකෙහීති පත්‌තපිණ්‌ඩිකො හොති, අපි ච අප්‌පිච්‌ඡඤ්‌ඤෙව නිස්‌සාය සන්‌තුට්‌ඨිඤ්‌ඤෙව නිස්‌සාය සල්‌ලෙඛඤ්‌ඤෙව නිස්‌සාය පවිවෙකඤ්‌ඤෙව නිස්‌සාය ඉදමත්‌ථිතඤ්‌ඤෙව නිස්‌සාය පත්‌තපිණ්‌ඩිකො හොති – ඉමෙ ඛො, උපාලි, පඤ්‌ච පත්‌තපිණ්‌ඩිකා’’ති.
‘‘Kati nu kho, bhante, piṇḍapātikāti…pe… kati nu kho, bhante, paṃsukūlikāti…pe… kati nu kho, bhante, rukkhamūlikāti…pe… kati nu kho, bhante, sosānikāti…pe… kati nu kho, bhante, abbhokāsikāti…pe… kati nu kho, bhante, tecīvarikāti…pe… kati nu kho, bhante, sapadānacārikāti…pe… kati nu kho, bhante, nesajjikāti…pe… kati nu kho, bhante, yathāsanthatikāti…pe… kati nu kho, bhante, ekāsanikāti…pe… kati nu kho, bhante, khalupacchābhattikāti…pe… kati nu kho, bhante, pattapiṇḍikāti? Pañcime, upāli, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, vaṇṇitaṃ buddhehi buddhasāvakehīti pattapiṇḍiko hoti, api ca appicchaññeva nissāya santuṭṭhiññeva nissāya sallekhaññeva nissāya pavivekaññeva nissāya idamatthitaññeva nissāya pattapiṇḍiko hoti – ime kho, upāli, pañca pattapiṇḍikā’’ti.
ධුතඞ්‌ගවග්‌ගො නිට්‌ඨිතො ඡට්‌ඨො.
Dhutaṅgavaggo niṭṭhito chaṭṭho.
තස්‌සුද්‌දානං –
Tassuddānaṃ –
ආරඤ්‌ඤිකො පිණ්‌ඩිපංසු, රුක්‌ඛසුසානපඤ්‌චමං;
Āraññiko piṇḍipaṃsu, rukkhasusānapañcamaṃ;
අබ්‌භො තෙචීවරඤ්‌චෙව, සපදානනෙසජ්‌ජිකා;
Abbho tecīvarañceva, sapadānanesajjikā;
සන්‌ථතෙකාසනඤ්‌චෙව, ඛලුපච්‌ඡා පත්‌තපිණ්‌ඩිකාති.
Santhatekāsanañceva, khalupacchā pattapiṇḍikāti.
Footnotes:
