| Library / Tipiṭaka / திபிடக • Tipiṭaka / பஞ்சபகரண-அட்ட²கதா² • Pañcapakaraṇa-aṭṭhakathā |
7. தி³ப்³ப³சக்கு²கதா²வண்ணனா
7. Dibbacakkhukathāvaṇṇanā
373. இதா³னி தி³ப்³ப³சக்கு²கதா² நாம ஹோதி. தத்த² யேஸங் சதுத்த²ஜ்ஜா²னத⁴ம்மூபத்த²த்³த⁴ங் மங்ஸசக்கு²மேவ தி³ப்³ப³சக்கு² நாம ஹோதீதி லத்³தி⁴, ஸெய்யதா²பி ஏதரஹி அந்த⁴கானஞ்சேவ ஸம்மிதியானஞ்ச; தே ஸந்தா⁴ய மங்ஸசக்கு²ந்தி புச்சா² ஸகவாதி³ஸ்ஸ, படிஞ்ஞா இதரஸ்ஸ.
373. Idāni dibbacakkhukathā nāma hoti. Tattha yesaṃ catutthajjhānadhammūpatthaddhaṃ maṃsacakkhumeva dibbacakkhu nāma hotīti laddhi, seyyathāpi etarahi andhakānañceva sammitiyānañca; te sandhāya maṃsacakkhunti pucchā sakavādissa, paṭiññā itarassa.
புன ‘‘மங்ஸசக்கு² தி³ப்³ப³சக்கு², தி³ப்³ப³சக்கு² மங்ஸசக்கூ²’’தி புட்டோ² தங் மத்தமேவ தங் ந ஹோதீதி படிக்கி²பதி. யாதி³ஸந்திஆதி³புச்சா²ஸுபி உபி⁴ன்னங் ஏகஸபா⁴வாபா⁴வேனேவ படிக்கி²பதி.
Puna ‘‘maṃsacakkhu dibbacakkhu, dibbacakkhu maṃsacakkhū’’ti puṭṭho taṃ mattameva taṃ na hotīti paṭikkhipati. Yādisantiādipucchāsupi ubhinnaṃ ekasabhāvābhāveneva paṭikkhipati.
விஸயோதிஆதீ³ஸு உபி⁴ன்னம்பி ரூபாயதனமேவ விஸயோ. மங்ஸசக்கு² பன ஆபாத²க³தமேவ பஸ்ஸதி. இதரங் அனாபாத²க³தங் திரோபப்³ப³தாதி³க³தம்பி. தி³ப்³ப³சக்கு²ஸ்ஸ ச அதிஸுகு²மம்பி ரூபங் கோ³சரோ, ந தாதி³ஸங் இதரஸ்ஸாதி ஏவமேதேஸங் ஆனுபா⁴வகோ³சரா அஸதி³ஸா.
Visayotiādīsu ubhinnampi rūpāyatanameva visayo. Maṃsacakkhu pana āpāthagatameva passati. Itaraṃ anāpāthagataṃ tiropabbatādigatampi. Dibbacakkhussa ca atisukhumampi rūpaṃ gocaro, na tādisaṃ itarassāti evametesaṃ ānubhāvagocarā asadisā.
உபாதி³ண்ணங் ஹுத்வா அனுபாதி³ண்ணங் ஹோதீதி புட்டோ² யஸ்மா மங்ஸசக்கு² உபாதி³ண்ணங், தி³ப்³ப³சக்கு² அனுபாதி³ண்ணங், ந ச மங்ஸசக்கு²மேவ தி³ப்³ப³சக்கூ²தி இச்ச²தி, தஸ்மா படிக்கி²பதி. து³தியங் புட்டோ² யஸ்மா ‘‘மங்ஸசக்கு²ஸ்ஸ உப்பாதோ³, மக்³கோ³ தி³ப்³ப³ஸ்ஸ சக்கு²னோ’’தி வசனங் நிஸ்ஸாய மங்ஸசக்கு²பச்சயா தி³ப்³ப³சக்கு² உப்பஜ்ஜதி, தஞ்ச ரூபாவசரிகானங் சதுன்னங் மஹாபூ⁴தானங் பஸாதோ³தி இச்ச²தி, தஸ்மா படிஜானாதி. காமாவசரங் ஹுத்வாதி புட்டோ²பி யஸ்மா ந மங்ஸசக்கு²மேவ தி³ப்³ப³சக்கூ²தி இச்ச²தி, தஸ்மா படிக்கி²பதி. து³தியங் புட்டோ² ரூபாவசரஜ்ஜா²னபச்சயேன உப்பன்னத்தா ரூபாவசரங் நாம ஜாதந்தி படிஜானாதி.
Upādiṇṇaṃ hutvā anupādiṇṇaṃ hotīti puṭṭho yasmā maṃsacakkhu upādiṇṇaṃ, dibbacakkhu anupādiṇṇaṃ, na ca maṃsacakkhumeva dibbacakkhūti icchati, tasmā paṭikkhipati. Dutiyaṃ puṭṭho yasmā ‘‘maṃsacakkhussa uppādo, maggo dibbassa cakkhuno’’ti vacanaṃ nissāya maṃsacakkhupaccayā dibbacakkhu uppajjati, tañca rūpāvacarikānaṃ catunnaṃ mahābhūtānaṃ pasādoti icchati, tasmā paṭijānāti. Kāmāvacaraṃ hutvāti puṭṭhopi yasmā na maṃsacakkhumeva dibbacakkhūti icchati, tasmā paṭikkhipati. Dutiyaṃ puṭṭho rūpāvacarajjhānapaccayena uppannattā rūpāvacaraṃ nāma jātanti paṭijānāti.
ரூபாவசரங் ஹுத்வா அரூபாவசரந்தி புட்டோ²பி ததோ பரங் பா⁴வனாய அரூபாவசரக்க²ணே ரூபாவசரசித்தஸ்ஸ அபா⁴வா படிக்கி²பதி. து³தியங் புட்டோ² அரூபாவசரிகானங் சதுன்னங் மஹாபூ⁴தானங் பஸாதோ³ ஹுத்வா உப்பஜ்ஜதீதி லத்³தி⁴யா படிஜானாதி. அபரியாபன்னபா⁴வங் பனஸ்ஸ ந இச்ச²தி, தஸ்மா படிக்கி²பதியேவ.
Rūpāvacaraṃ hutvā arūpāvacaranti puṭṭhopi tato paraṃ bhāvanāya arūpāvacarakkhaṇe rūpāvacaracittassa abhāvā paṭikkhipati. Dutiyaṃ puṭṭho arūpāvacarikānaṃ catunnaṃ mahābhūtānaṃ pasādo hutvā uppajjatīti laddhiyā paṭijānāti. Apariyāpannabhāvaṃ panassa na icchati, tasmā paṭikkhipatiyeva.
374. தி³ப்³ப³சக்கு²ங் த⁴ம்முபத்த²த்³த⁴ந்தி காமாவசரத⁴ம்மேன உபத்த²ம்பி⁴தங் ஹுத்வா. புன த⁴ம்முபத்த²த்³த⁴ந்தி லோகுத்தரத⁴ம்மேன உபத்த²த்³த⁴ங். த்³வேவ சக்கூ²னீதி புட்டோ² கிஞ்சாபி தி³ப்³ப³சக்கு²னோ த⁴ம்முபத்த²த்³த⁴ஸ்ஸ பஞ்ஞாசக்கு²பா⁴வங் ந இச்ச²தி, பஞ்ஞாசக்கு²ஸ்ஸ பன அத்தி²தாய படிக்கி²பதி. புன புட்டோ² மங்ஸசக்கு² த⁴ம்முபத்த²த்³த⁴ங் தி³ப்³ப³சக்கு² ஹோதீதி லத்³தி⁴வஸேன படிஜானாதி. ஸேஸமெத்த² உத்தானத்த²மேவாதி.
374. Dibbacakkhuṃ dhammupatthaddhanti kāmāvacaradhammena upatthambhitaṃ hutvā. Puna dhammupatthaddhanti lokuttaradhammena upatthaddhaṃ. Dveva cakkhūnīti puṭṭho kiñcāpi dibbacakkhuno dhammupatthaddhassa paññācakkhubhāvaṃ na icchati, paññācakkhussa pana atthitāya paṭikkhipati. Puna puṭṭho maṃsacakkhu dhammupatthaddhaṃ dibbacakkhu hotīti laddhivasena paṭijānāti. Sesamettha uttānatthamevāti.
தி³ப்³ப³சக்கு²கதா²வண்ணனா.
Dibbacakkhukathāvaṇṇanā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (27) 7. தி³ப்³ப³சக்கு²கதா² • (27) 7. Dibbacakkhukathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. தி³ப்³ப³சக்கு²கதா²வண்ணனா • 7. Dibbacakkhukathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. தி³ப்³ப³சக்கு²கதா²வண்ணனா • 7. Dibbacakkhukathāvaṇṇanā
