| Library / Tipiṭaka / திபிடக • Tipiṭaka / பஞ்சபகரண-மூலடீகா • Pañcapakaraṇa-mūlaṭīkā |
7. தி³ப்³ப³சக்கு²கதா²வண்ணனா
7. Dibbacakkhukathāvaṇṇanā
373. உபத்த²த்³த⁴ந்தி யதா² விஸயானுபா⁴வகோ³சரேஹி விஸிட்ட²ங் ஹோதி, ததா² பச்சயபூ⁴தேன கதப³லாதா⁴னந்தி அத்தோ². தங்மத்தமேவாதி புரிமங் மங்ஸசக்கு²மத்தமேவ த⁴ம்முபத்த²த்³த⁴ங் ந ஹோதீதி அத்தோ². அனாபாத²க³தந்தி மங்ஸசக்கு²னா க³ஹேதப்³ப³ட்டா²னங் ஆபாத²ங் நாக³தங். எத்த² ச விஸயஸ்ஸ தீ³பகங் ஆனுபா⁴வகோ³சரானமேவ அஸதி³ஸதங் வத³ந்தோ யாதி³ஸோ மங்ஸசக்கு²ஸ்ஸ விஸயோதி விஸயக்³க³ஹணங் ந விஸயவிஸேஸத³ஸ்ஸனத்த²ங், அத² கோ² யாதி³ஸே விஸயே ஆனுபா⁴வகோ³சரவிஸேஸா ஹொந்தி, தாதி³ஸஸ்ஸ ரூபவிஸயஸ்ஸ த³ஸ்ஸனத்த²ந்தி தீ³பேதி, ஸதி³ஸஸ்ஸ வா விஸயஸ்ஸ ஆனுபா⁴வகோ³சரவிஸேஸோவ விஸேஸங்.
373. Upatthaddhanti yathā visayānubhāvagocarehi visiṭṭhaṃ hoti, tathā paccayabhūtena katabalādhānanti attho. Taṃmattamevāti purimaṃ maṃsacakkhumattameva dhammupatthaddhaṃ na hotīti attho. Anāpāthagatanti maṃsacakkhunā gahetabbaṭṭhānaṃ āpāthaṃ nāgataṃ. Ettha ca visayassa dīpakaṃ ānubhāvagocarānameva asadisataṃ vadanto yādiso maṃsacakkhussa visayoti visayaggahaṇaṃ na visayavisesadassanatthaṃ, atha kho yādise visaye ānubhāvagocaravisesā honti, tādisassa rūpavisayassa dassanatthanti dīpeti, sadisassa vā visayassa ānubhāvagocaravisesova visesaṃ.
ந ச மங்ஸசக்கு²மேவ தி³ப்³ப³சக்கூ²தி இச்ச²தீதி த⁴ம்முபத்த²த்³த⁴காலே புரிமங் மங்ஸசக்கு²மேவாதி ந இச்ச²தீதி அதி⁴ப்பாயோ. மங்ஸசக்கு²ஸ்ஸ உப்பாதோ³ மக்³கோ³தி மங்ஸசக்கு²பச்சயதாத³ஸ்ஸனத்த²மேவ வுத்தங், ந தேன அனுபாதி³ன்னதாஸாத⁴னத்த²ங். ரூபாவசரிகானந்தி ரூபாவசரஜ்ஜா²னபச்சயேன உப்பன்னானி மஹாபூ⁴தானி ரூபாவசரிகானீதி ஸோ இச்ச²தீதி அதி⁴ப்பாயோ. ஏஸ நயோ ‘‘அரூபாவசரிகான’’ந்தி எத்தா²பி. அரூபாவசரக்க²ணே ரூபாவசரசித்தஸ்ஸ அபா⁴வா படிக்கி²பதீதி தஸ்மிங்யேவ க²ணே ரூபாவசரங் ஹுத்வா அரூபாவசரங் ந ஜாதந்தி படிக்கி²பதீதி அதி⁴ப்பாயோ.
Na ca maṃsacakkhumeva dibbacakkhūti icchatīti dhammupatthaddhakāle purimaṃ maṃsacakkhumevāti na icchatīti adhippāyo. Maṃsacakkhussa uppādo maggoti maṃsacakkhupaccayatādassanatthameva vuttaṃ, na tena anupādinnatāsādhanatthaṃ. Rūpāvacarikānanti rūpāvacarajjhānapaccayena uppannāni mahābhūtāni rūpāvacarikānīti so icchatīti adhippāyo. Esa nayo ‘‘arūpāvacarikāna’’nti etthāpi. Arūpāvacarakkhaṇe rūpāvacaracittassa abhāvā paṭikkhipatīti tasmiṃyeva khaṇe rūpāvacaraṃ hutvā arūpāvacaraṃ na jātanti paṭikkhipatīti adhippāyo.
374. கிஞ்சாபி தி³ப்³ப³சக்கு²னோ த⁴ம்முபத்த²த்³த⁴ஸ்ஸ பஞ்ஞாசக்கு²பா⁴வங் ந இச்ச²தி, யேன தீணி சக்கூ²னி த⁴ம்முபத்த²ம்பே⁴ன சக்கு²ந்தரபா⁴வங் வத³தோ ப⁴வெய்யுந்தி அதி⁴ப்பாயோ.
374. Kiñcāpi dibbacakkhuno dhammupatthaddhassa paññācakkhubhāvaṃ na icchati, yena tīṇi cakkhūni dhammupatthambhena cakkhuntarabhāvaṃ vadato bhaveyyunti adhippāyo.
தி³ப்³ப³சக்கு²கதா²வண்ணனா நிட்டி²தா.
Dibbacakkhukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (27) 7. தி³ப்³ப³சக்கு²கதா² • (27) 7. Dibbacakkhukathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 7. தி³ப்³ப³சக்கு²கதா²வண்ணனா • 7. Dibbacakkhukathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 7. தி³ப்³ப³சக்கு²கதா²வண்ணனா • 7. Dibbacakkhukathāvaṇṇanā
