| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
7. தி³ப்³ப³சக்கு²கதா²வண்ணனா
7. Dibbacakkhukathāvaṇṇanā
373. விஸினோதி விஸேஸேன ப³ந்த⁴தி விஸயீனங் அத்தபடிப³ந்த⁴ங் கரோதீதி விஸயோ, ஆரம்மணங் , அனுப⁴வதி ஏதேனாதி ஆனுபா⁴வோ, ஸாமத்தி²யங், ப³லந்தி அத்தோ², கோ³சரகரணங் கோ³சரோ, விஸயே ஆனுபா⁴வகோ³சரா விஸய…பே॰… சராதி. தேஹி யதா² விஸிட்ட²ங் விஸேஸங் ஹோதி, ததா² பச்சயபூ⁴தேன ஜா²னத⁴ம்மேன ஆஹிதப³லங் கதப³லாதா⁴னங். விஸயக்³க³ஹணஞ்செத்த² ஆனுபா⁴வகோ³சரகரணானங் பவத்திட்டா²னத³ஸ்ஸனங் யத்த²ஸ்ஸ தேஹி உபத்த²த்³த⁴த்தா ப³லாதா⁴னங் பாகடங் ஹோதி. தேனாஹ ‘‘யாதி³ஸே விஸயே’’திஆதி³. ப³லாதா⁴னஞ்ச உத்தரிமனுஸ்ஸத⁴ம்மதோ மஹக்³க³தத⁴ம்மவிஸேஸதோ உப்பன்னேஹி பணீதேஹி சித்தஜரூபேஹி விஸேஸாபத்தி. யங் நிஸ்ஸாய பராவுத்தீதி ஏகே வத³ந்தி. புரிமங் மங்ஸசக்கு²மத்தமேவாதி யதா²வுத்தப³லாதா⁴னதோ புரிமங் மங்ஸசக்கு²மத்தமேவ. வத³ந்தோ ஸங்க³ஹகாரோ. விஸயக்³க³ஹணங் பாளியங் கதங். ந விஸயவிஸேஸத³ஸ்ஸனத்த²ந்தி ந விஸயஸ்ஸ விஸேஸத³ஸ்ஸனத்த²ங். யதோ உபி⁴ன்னம்பி ரூபாயதனமேவ விஸயோதி விஸயஸ்ஸ ஸதி³ஸதங் அவிஸேஸங் ஆஹ, ஸதி³ஸஸ்ஸ வா விஸேஸங் தீ³பேதீதி யோஜனா.
373. Visinoti visesena bandhati visayīnaṃ attapaṭibandhaṃ karotīti visayo, ārammaṇaṃ , anubhavati etenāti ānubhāvo, sāmatthiyaṃ, balanti attho, gocarakaraṇaṃ gocaro, visaye ānubhāvagocarā visaya…pe… carāti. Tehi yathā visiṭṭhaṃ visesaṃ hoti, tathā paccayabhūtena jhānadhammena āhitabalaṃ katabalādhānaṃ. Visayaggahaṇañcettha ānubhāvagocarakaraṇānaṃ pavattiṭṭhānadassanaṃ yatthassa tehi upatthaddhattā balādhānaṃ pākaṭaṃ hoti. Tenāha ‘‘yādise visaye’’tiādi. Balādhānañca uttarimanussadhammato mahaggatadhammavisesato uppannehi paṇītehi cittajarūpehi visesāpatti. Yaṃ nissāya parāvuttīti eke vadanti. Purimaṃ maṃsacakkhumattamevāti yathāvuttabalādhānato purimaṃ maṃsacakkhumattameva. Vadanto saṅgahakāro. Visayaggahaṇaṃ pāḷiyaṃ kataṃ. Na visayavisesadassanatthanti na visayassa visesadassanatthaṃ. Yato ubhinnampi rūpāyatanameva visayoti visayassa sadisataṃ avisesaṃ āha, sadisassa vā visesaṃ dīpetīti yojanā.
த⁴ம்முபத்த²த்³த⁴ …பே॰… அதி⁴ப்பாயோ, அஞ்ஞதா² லத்³தி⁴யேவ ந ஸியாதி பா⁴வோ. மக்³கோ³தி உபாயோ, காரணந்தி அத்தோ². பகதிசக்கு²மதோ ஏவ ஹி தி³ப்³ப³சக்கு² உப்பஜ்ஜதி. கஸ்மா? கஸிணாலோகங் வட்³டெ⁴த்வா தி³ப்³ப³சக்கு²ஞாணஸ்ஸ உப்பாத³னங், ஸோ ச கஸிணமண்ட³லே உக்³க³ஹனிமித்தேன வினா நத்தி², தஸ்மா வுத்தங் ‘‘மங்ஸசக்கு²பச்சயதாத³ஸ்ஸனத்த²மேவ வுத்த’’ந்தி. தேனாதி ‘‘மக்³கோ³’’தி வசனேன. ரூபாவசரஜ்ஜா²னபச்சயேனாதி ரூபாவசரஜ்ஜா²னேன பச்சயபூ⁴தேன உப்பன்னானி ரூபாவசரஜ்ஜா²னசித்தஸமுட்டி²தானி. ஜா²னகம்மஸமுட்டி²தேஸு வத்தப்³ப³மேவ நத்தி². தஸ்ஸ ஹேஸா லத்³தி⁴.
Dhammupatthaddha…pe… adhippāyo, aññathā laddhiyeva na siyāti bhāvo. Maggoti upāyo, kāraṇanti attho. Pakaticakkhumato eva hi dibbacakkhu uppajjati. Kasmā? Kasiṇālokaṃ vaḍḍhetvā dibbacakkhuñāṇassa uppādanaṃ, so ca kasiṇamaṇḍale uggahanimittena vinā natthi, tasmā vuttaṃ ‘‘maṃsacakkhupaccayatādassanatthameva vutta’’nti. Tenāti ‘‘maggo’’ti vacanena. Rūpāvacarajjhānapaccayenāti rūpāvacarajjhānena paccayabhūtena uppannāni rūpāvacarajjhānacittasamuṭṭhitāni. Jhānakammasamuṭṭhitesu vattabbameva natthi. Tassa hesā laddhi.
374. யேன தி³ப்³ப³சக்கு²னோ பஞ்ஞாசக்கு²பா⁴வஸ்ஸ இச்ச²னேன படிஜானநேன. தீணி சக்கூ²னி மங்ஸதி³ப்³ப³பஞ்ஞாசக்கூ²னி சக்கு²ந்தரபா⁴வங் வத³தோ ப⁴வெய்யுங், தஸ்மா தங் ந இச்ச²தீதி அத்தோ².
374. Yena dibbacakkhuno paññācakkhubhāvassa icchanena paṭijānanena. Tīṇi cakkhūni maṃsadibbapaññācakkhūni cakkhuntarabhāvaṃ vadato bhaveyyuṃ, tasmā taṃ na icchatīti attho.
தி³ப்³ப³சக்கு²கதா²வண்ணனா நிட்டி²தா.
Dibbacakkhukathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (27) 7. தி³ப்³ப³சக்கு²கதா² • (27) 7. Dibbacakkhukathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 7. தி³ப்³ப³சக்கு²கதா²வண்ணனா • 7. Dibbacakkhukathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. தி³ப்³ப³சக்கு²கதா²வண்ணனா • 7. Dibbacakkhukathāvaṇṇanā
