| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā |
༥༤. དིབྦཙཀྑུཉཱཎནིདྡེསཝཎྞནཱ
54. Dibbacakkhuñāṇaniddesavaṇṇanā
༡༠༦. དིབྦཙཀྑུཉཱཎནིདྡེསེ ཨཱལོཀསཉྙཾ མནསི ཀརོཏཱིཏི དིཝཱ ཝཱ རཏྟིཾ ཝཱ སཱུརིཡཛོཏིཙནྡམཎིཨཱལོཀཾ ཨཱལོཀོཏི མནསི ཀརོཏི། ཨེཝཾ མནསིཀརོནྟོ ཙ ཨཱལོཀོཏི སཉྙཾ མནསི པཝཏྟནཏོ ‘‘ཨཱལོཀསཉྙཾ མནསི ཀརོཏཱི’’ཏི ཝུཙྩཏི། དིཝཱསཉྙཾ ཨདྷིཊྛཱཏཱིཏི ཨེཝཾ ཨཱལོཀསཉྙཾ མནསིཀརིཏྭཱ དིཝཱཏི སཉྙཾ ཋཔེཏི། ཡཐཱ དིཝཱ ཏཐཱ རཏྟིནྟི ཡཐཱ དིཝཱ ཨཱལོཀོ དིཊྛོ, ཏཐེཝ རཏྟིམྤི མནསི ཀརོཏི། ཡཐཱ རཏྟིཾ ཏཐཱ དིཝཱཏི ཡཐཱ རཏྟིཾ ཨཱལོཀོ དིཊྛོ, ཏཐེཝ དིཝཱཔི མནསི ཀརོཏི། ཨིཏི ཝིཝཊེན ཙེཏསཱཏི ཨེཝཾ ཨཔིཧིཏེན ཙིཏྟེན། ཨཔརིཡོནདྡྷེནཱཏི སམནྟཏོ ཨནདྡྷེན། སཔྤབྷཱསཾ ཙིཏྟཾ བྷཱཝེཏཱིཏི སཨོབྷཱསཾ ཙིཏྟཾ ཝཌྜྷེཏི། ཨེཏེན དིབྦཙཀྑུསྶ པརིཀམྨཱལོཀཱརམྨཎཾ ཙིཏྟཾ ཀཐིཏཾ། ཨཱལོཀཀསིཎཱརམྨཎཾ ཙཏུཏྠཛ྄ཛྷཱནམེཝ ཝཱ སནྡྷཱཡ ཝུཏྟཾ། ཏསྶེཝཾ བྷཱཝཡཏོ ཨོབྷཱསཛཱཏཾ ཙིཏྟཾ ཧོཏི ཝིགཏནྡྷཀཱརཱཝརཎཾ། ཏེན ཧི དིབྦཙཀྑུཾ ཨུཔྤཱདེཏུཀཱམེན ཨཱདིཀམྨིཀེན ཀུལཔུཏྟེན ཨིམིསྶཱཡེཝ པཱལི༹ཡཱ ཨནུསཱརེན ཀསིཎཱརམྨཎཾ ཨབྷིཉྙཱཔཱདཀཛ྄ཛྷཱནཾ སབྦཱཀཱརེན ཨབྷིནཱིཧཱརཀྑམཾ ཀཏྭཱ ‘‘ཏེཛོཀསིཎཾ ཨོདཱཏཀསིཎཾ ཨཱལོཀཀསིཎ’’ནྟི ཨིམེསུ ཏཱིསུ ཀསིཎེསུ ཨཉྙཏརཾ ཨཱསནྣཾ ཀཱཏབྦཾ, ཨུཔཙཱརཛ྄ཛྷཱནགོཙརཾ ཀཏྭཱ ཝཌྜྷེཏྭཱ ཋཔེཏབྦཾ, ན ཏཏྠ ཨཔྤནཱ ཨུཔྤཱདེཏབྦཱཏི ཨདྷིཔྤཱཡོ། སཙེ ཧི ཨུཔྤཱདེཏི, པཱདཀཛ྄ཛྷཱནནིསྶཡཾ ཧོཏི, ན པརིཀམྨནིསྶཡཾ། ཨིམེསུ ཙ པན ཏཱིསུ ཨཱལོཀཀསིཎཾཡེཝ སེཊྛཏརཾ, ཏདནུལོམེན པན ཨིཏརཾ ཀསིཎདྭཡམྤི ཝུཏྟཾ། ཏསྨཱ ཨཱལོཀཀསིཎཾ ཨིཏརེསཾ ཝཱ ཨཉྙཏརཾ ཨཱརམྨཎཾ ཀཏྭཱ ཙཏྟཱརི ཛྷཱནཱནི ཨུཔྤཱདེཏྭཱ པུན ཨུཔཙཱརབྷཱུམིཡཾཡེཝ ཋཏྭཱ ཀསིཎཾ ཝཌྜྷེཏབྦཾ། ཝཌྜྷིཏཝཌྜྷིཏཊྛཱནསྶ ཨནྟོཡེཝ རཱུཔགཏཾ པསྶིཏབྦཾ། རཱུཔགཏཾ པསྶཏོ པནསྶ ཏེན བྱཱཔཱརེན པརིཀམྨཙིཏྟེན ཨཱལོཀཕརཎཾ ཨཀུབྦཏོ པརིཀམྨསྶ ཝཱརོ ཨཏིཀྐམཏི, ཏཏོ ཨཱལོཀོ ཨནྟརདྷཱཡཏི, ཏསྨིཾ ཨནྟརཧིཏེ རཱུཔགཏམྤི ན དིསྶཏི། ཨཐཱནེན པུནཔྤུནཾ པཱདཀཛ྄ཛྷཱནམེཝ པཝིསིཏྭཱ ཏཏོ ཝུཊྛཱཡ ཨཱལོཀོ ཕརིཏབྦོ། ཨེཝཾ ཨནུཀྐམེན ཨཱལོཀོ ཐཱམགཏོ ཧོཏཱིཏི། ‘‘ཨེཏྠ ཨཱལོཀོ ཧོཏཱུ’’ཏི ཡཏྟཀཾ ཋཱནཾ པརིཙྪིནྡཏི, ཏཏྠ ཨཱལོཀོ ཏིཊྛཏིཡེཝ། དིཝསམྤི ནིསཱིདིཏྭཱ པསྶཏོ རཱུཔདསྶནཾ ཧོཏི། ཏཏྠ ཡདཱ ཏསྶ བྷིཀྑུནོ མཾསཙཀྑུསྶ ཨནཱཔཱཐགཏཾ ཨནྟོཀུཙྪིགཏཾ ཧདཡཝཏྠུནིསྶིཏཾ ཧེཊྛཱཔཐཝཱིཏལནིསྶིཏཾ ཏིརོཀུཊྚཔབྦཏཔཱཀཱརགཏཾ པརཙཀྐཝཱལ༹གཏནྟི ཨིདཾ རཱུཔཾ ཉཱཎཙཀྑུསྶ ཨཱཔཱཐཾ ཨཱགཙྪཏི, མཾསཙཀྑུནཱ དིསྶམཱནཾ ཝིཡ ཧོཏི, ཏདཱ དིབྦཙཀྑུ ཨུཔྤནྣཾ ཧོཏི། ཏདེཝ ཙེཏྠ རཱུཔདསྶནསམཏྠཾ, ན པུབྦབྷཱགཙིཏྟཱནི།
106. Dibbacakkhuñāṇaniddese ālokasaññaṃ manasi karotīti divā vā rattiṃ vā sūriyajoticandamaṇiālokaṃ ālokoti manasi karoti. Evaṃ manasikaronto ca ālokoti saññaṃ manasi pavattanato ‘‘ālokasaññaṃ manasi karotī’’ti vuccati. Divāsaññaṃ adhiṭṭhātīti evaṃ ālokasaññaṃ manasikaritvā divāti saññaṃ ṭhapeti. Yathādivā tathā rattinti yathā divā āloko diṭṭho, tatheva rattimpi manasi karoti. Yathā rattiṃ tathā divāti yathā rattiṃ āloko diṭṭho, tatheva divāpi manasi karoti. Iti vivaṭena cetasāti evaṃ apihitena cittena. Apariyonaddhenāti samantato anaddhena. Sappabhāsaṃ cittaṃ bhāvetīti saobhāsaṃ cittaṃ vaḍḍheti. Etena dibbacakkhussa parikammālokārammaṇaṃ cittaṃ kathitaṃ. Ālokakasiṇārammaṇaṃ catutthajjhānameva vā sandhāya vuttaṃ. Tassevaṃ bhāvayato obhāsajātaṃ cittaṃ hoti vigatandhakārāvaraṇaṃ. Tena hi dibbacakkhuṃ uppādetukāmena ādikammikena kulaputtena imissāyeva pāḷiyā anusārena kasiṇārammaṇaṃ abhiññāpādakajjhānaṃ sabbākārena abhinīhārakkhamaṃ katvā ‘‘tejokasiṇaṃ odātakasiṇaṃ ālokakasiṇa’’nti imesu tīsu kasiṇesu aññataraṃ āsannaṃ kātabbaṃ, upacārajjhānagocaraṃ katvā vaḍḍhetvā ṭhapetabbaṃ, na tattha appanā uppādetabbāti adhippāyo. Sace hi uppādeti, pādakajjhānanissayaṃ hoti, na parikammanissayaṃ. Imesu ca pana tīsu ālokakasiṇaṃyeva seṭṭhataraṃ, tadanulomena pana itaraṃ kasiṇadvayampi vuttaṃ. Tasmā ālokakasiṇaṃ itaresaṃ vā aññataraṃ ārammaṇaṃ katvā cattāri jhānāni uppādetvā puna upacārabhūmiyaṃyeva ṭhatvā kasiṇaṃ vaḍḍhetabbaṃ. Vaḍḍhitavaḍḍhitaṭṭhānassa antoyeva rūpagataṃ passitabbaṃ. Rūpagataṃ passato panassa tena byāpārena parikammacittena ālokapharaṇaṃ akubbato parikammassa vāro atikkamati, tato āloko antaradhāyati, tasmiṃ antarahite rūpagatampi na dissati. Athānena punappunaṃ pādakajjhānameva pavisitvā tato vuṭṭhāya āloko pharitabbo. Evaṃ anukkamena āloko thāmagato hotīti. ‘‘Ettha āloko hotū’’ti yattakaṃ ṭhānaṃ paricchindati, tattha āloko tiṭṭhatiyeva. Divasampi nisīditvā passato rūpadassanaṃ hoti. Tattha yadā tassa bhikkhuno maṃsacakkhussa anāpāthagataṃ antokucchigataṃ hadayavatthunissitaṃ heṭṭhāpathavītalanissitaṃ tirokuṭṭapabbatapākāragataṃ paracakkavāḷagatanti idaṃ rūpaṃ ñāṇacakkhussa āpāthaṃ āgacchati, maṃsacakkhunā dissamānaṃ viya hoti, tadā dibbacakkhu uppannaṃ hoti. Tadeva cettha rūpadassanasamatthaṃ, na pubbabhāgacittāni.
ཏཏྲཱཡཾ དིབྦཙཀྑུནོ ཨུཔྤཏྟིཀྐམོ – ཝུཏྟཔྤཀཱརམེཏཾ རཱུཔམཱརམྨཎཾ ཀཏྭཱ མནོདྭཱརཱཝཛྫནེ ཨུཔྤཛྫིཏྭཱ ནིརུདྡྷེ ཏདེཝ རཱུཔམཱརམྨཎཾ ཀཏྭཱ ཙཏྟཱརི པཉྩ ཝཱ ཛཝནཱནི ཨུཔྤཛྫནྟཱིཏི པུབྦེ ཝུཏྟནཡེནེཝ ཝེདིཏབྦཾ། ཨིདཾ པན ཉཱཎཾ ‘‘སཏྟཱནཾ ཙུཏཱུཔཔཱཏེ ཉཱཎ’’ནྟིཔི ‘‘དིབྦཙཀྑུཉཱཎ’’ནྟིཔི ཝུཙྩཏི། ཏཾ པནེཏཾ པུཐུཛྫནསྶ པརིཔནྠོ ཧོཏི། སོ ཧི ‘‘ཡཏྠ ཡཏྠ ཨཱལོཀོ ཧོཏཱུ’’ཏི ཨདྷིཊྛཱཏི, ཏཾ ཏཾ པཐཝཱིསམུདྡཔབྦཏེ ཝིནིཝིཛ྄ཛྷིཏྭཱཔི ཨེཀཱལོཀཾ ཧོཏི། ཨཐསྶ ཏཏྠ བྷཡཱནཀཱནི ཡཀྑརཀྑསཱདིརཱུཔཱནི པསྶཏོ བྷཡཾ ཨུཔྤཛྫཏི། ཏེན ཙིཏྟཝིཀྑེཔཾ པཏྭཱ ཛྷཱནཝིབྦྷནྟཀོ ཧོཏི། ཏསྨཱ རཱུཔདསྶནེ ཨཔྤམཏྟེན བྷཝིཏབྦཾ།
Tatrāyaṃ dibbacakkhuno uppattikkamo – vuttappakārametaṃ rūpamārammaṇaṃ katvā manodvārāvajjane uppajjitvā niruddhe tadeva rūpamārammaṇaṃ katvā cattāri pañca vā javanāni uppajjantīti pubbe vuttanayeneva veditabbaṃ. Idaṃ pana ñāṇaṃ ‘‘sattānaṃ cutūpapāte ñāṇa’’ntipi ‘‘dibbacakkhuñāṇa’’ntipi vuccati. Taṃ panetaṃ puthujjanassa paripantho hoti. So hi ‘‘yattha yattha āloko hotū’’ti adhiṭṭhāti, taṃ taṃ pathavīsamuddapabbate vinivijjhitvāpi ekālokaṃ hoti. Athassa tattha bhayānakāni yakkharakkhasādirūpāni passato bhayaṃ uppajjati. Tena cittavikkhepaṃ patvā jhānavibbhantako hoti. Tasmā rūpadassane appamattena bhavitabbaṃ.
སཏྟཱནཾ ཙུཏཱུཔཔཱཏཉཱཎཱཡཱཏི སཏྟཱནཾ ཙུཏིཡཱ ཙ ཨུཔཔཱཏེ ཙ ཉཱཎཱཡ། ཡེན ཉཱཎེན སཏྟཱནཾ ཙུཏི ཙ ཨུཔཔཱཏོ ཙ ཉཱཡཏི, ཏདཏྠཾ དིབྦཙཀྑུཉཱཎཏྠནྟི ཝུཏྟཾ ཧོཏི། དིབྦེན ཙཀྑུནཱཏི ཝུཏྟཏྠམེཝ། ཝིསུདྡྷེནཱཏི ཙུཏཱུཔཔཱཏདསྶནེན དིཊྛིཝིསུདྡྷིཧེཏུཏྟཱ ཝིསུདྡྷཾ། ཡོ ཧི ཙུཏིམཏྟམེཝ པསྶཏི, ན ཨུཔཔཱཏཾ, སོ ཨུཙྪེདདིཊྛིཾ གཎྷཱཏི། ཡོ ཨུཔཔཱཏམེཝ པསྶཏི, ན ཙུཏིཾ, སོ ནཝསཏྟཔཱཏུབྷཱཝདིཊྛིཾ གཎྷཱཏི། ཡོ པན ཏདུབྷཡཾ པསྶཏི, སོ ཡསྨཱ དུཝིདྷམྤི ཏཾ དིཊྛིགཏམཏིཝཏྟཏི, ཏསྨཱསྶ ཏཾ དསྶནཾ དིཊྛིཝིསུདྡྷིཧེཏུ ཧོཏི། ཨུབྷཡཉྩེཏཾ བུདྡྷཔུཏྟཱ པསྶནྟི ། ཏེན ཝུཏྟཾ – ‘‘ཙུཏཱུཔཔཱཏདསྶནེན དིཊྛིཝིསུདྡྷིཧེཏུཏྟཱ ཝིསུདྡྷ’’ནྟི། མནུསྶཱུཔཙཱརཾ ཨཏིཀྐམིཏྭཱ རཱུཔདསྶནེན ཨཏིཀྐནྟམཱནུསཀཾ, མཱནུསཀཾ ཝཱ མཾསཙཀྑུཾ ཨཏིཀྐནྟཏྟཱ ཨཏིཀྐནྟམཱནུསཀཾ། ཏེན དིབྦེན ཙཀྑུནཱ ཝིསུདྡྷེན ཨཏིཀྐནྟམཱནུསཀེན།
Sattānaṃ cutūpapātañāṇāyāti sattānaṃ cutiyā ca upapāte ca ñāṇāya. Yena ñāṇena sattānaṃ cuti ca upapāto ca ñāyati, tadatthaṃ dibbacakkhuñāṇatthanti vuttaṃ hoti. Dibbena cakkhunāti vuttatthameva. Visuddhenāti cutūpapātadassanena diṭṭhivisuddhihetuttā visuddhaṃ. Yo hi cutimattameva passati, na upapātaṃ, so ucchedadiṭṭhiṃ gaṇhāti. Yo upapātameva passati, na cutiṃ, so navasattapātubhāvadiṭṭhiṃ gaṇhāti. Yo pana tadubhayaṃ passati, so yasmā duvidhampi taṃ diṭṭhigatamativattati, tasmāssa taṃ dassanaṃ diṭṭhivisuddhihetu hoti. Ubhayañcetaṃ buddhaputtā passanti . Tena vuttaṃ – ‘‘cutūpapātadassanena diṭṭhivisuddhihetuttā visuddha’’nti. Manussūpacāraṃ atikkamitvā rūpadassanena atikkantamānusakaṃ, mānusakaṃ vā maṃsacakkhuṃ atikkantattā atikkantamānusakaṃ. Tena dibbena cakkhunā visuddhena atikkantamānusakena.
སཏྟེ པསྶཏཱིཏི མནུསྶཱནཾ མཾསཙཀྑུནཱ ཝིཡ སཏྟེ ཨོལོཀེཏི། ཙཝམཱནེ ཨུཔཔཛྫམཱནེཏི ཨེཏྠ ཙུཏིཀྑཎེ ཨུཔཔཏྟིཀྑཎེ ཝཱ དིབྦཙཀྑུནཱ དཊྛུཾ ན སཀྐཱ, ཡེ པན ཨཱསནྣཙུཏིཀཱ ཨིདཱནི ཙཝིསྶནྟི། ཏེ ཙཝམཱནཱ། ཡེ ཙ གཧིཏཔཊིསནྡྷིཀཱ སམྤཏིནིབྦཏྟཱ ཝཱ, ཏེ ཨུཔཔཛྫམཱནཱཏི ཨདྷིཔྤེཏཱ། ཏེ ཨེཝརཱུཔེ ཙཝམཱནེ ཙ ཨུཔཔཛྫམཱནེ ཙ པསྶཏཱིཏི དསྶེཏི། ཧཱིནེཏི མོཧནིསྶནྡཡུཏྟཏྟཱ ཧཱིནཱནཾ ཛཱཏིཀུལབྷོགཱདཱིནཾ ཝསེན ཧཱིལི༹ཏེ ཨོཧཱིལི༹ཏེ ཨོཉྙཱཏེ ཨཝཉྙཱཏེ། པཎཱིཏེཏི ཨམོཧནིསྶནྡཡུཏྟཏྟཱ ཏབྦིཔརཱིཏེ། སུཝཎྞེཏི ཨདོསནིསྶནྡཡུཏྟཏྟཱ ཨིཊྛཀནྟམནཱཔཝཎྞཡུཏྟེ། དུབྦཎྞེཏི དོསནིསྶནྡཡུཏྟཏྟཱ ཨནིཊྛཱཀནྟཱམནཱཔཝཎྞཡུཏྟེ, ཨནབྷིརཱུཔེ ཝིརཱུཔེཏིཔི ཨཏྠོ། སུགཏེཏི སུགཏིགཏེ, ཨལོབྷནིསྶནྡཡུཏྟཏྟཱ ཝཱ ཨཌྜྷེ མཧདྡྷནེ། དུགྒཏེཏི དུགྒཏིགཏེ, ལོབྷནིསྶནྡཡུཏྟཏྟཱ ཝཱ དལིདྡེ ཨཔྤནྣཔཱནེ། ཡཐཱཀམྨཱུཔགེཏི ཡཾ ཡཾ ཀམྨཾ ཨུཔཙིཏཾ, ཏེན ཏེན ཨུཔགཏེ། ཏཏྠ པུརིམེཧི ‘‘ཙཝམཱནེ’’ཏིཨཱདཱིཧི དིབྦཙཀྑུཀིཙྩཾ ཝུཏྟཾ, ཨིམིནཱ པན པདེན ཡཐཱཀམྨཱུཔགཉཱཎཀིཙྩཾ།
Satte passatīti manussānaṃ maṃsacakkhunā viya satte oloketi. Cavamāne upapajjamāneti ettha cutikkhaṇe upapattikkhaṇe vā dibbacakkhunā daṭṭhuṃ na sakkā, ye pana āsannacutikā idāni cavissanti. Te cavamānā. Ye ca gahitapaṭisandhikā sampatinibbattā vā, te upapajjamānāti adhippetā. Te evarūpe cavamāne ca upapajjamāne ca passatīti dasseti. Hīneti mohanissandayuttattā hīnānaṃ jātikulabhogādīnaṃ vasena hīḷite ohīḷite oññāte avaññāte. Paṇīteti amohanissandayuttattā tabbiparīte. Suvaṇṇeti adosanissandayuttattā iṭṭhakantamanāpavaṇṇayutte. Dubbaṇṇeti dosanissandayuttattā aniṭṭhākantāmanāpavaṇṇayutte, anabhirūpe virūpetipi attho. Sugateti sugatigate, alobhanissandayuttattā vā aḍḍhe mahaddhane. Duggateti duggatigate, lobhanissandayuttattā vā dalidde appannapāne. Yathākammūpageti yaṃ yaṃ kammaṃ upacitaṃ, tena tena upagate. Tattha purimehi ‘‘cavamāne’’tiādīhi dibbacakkhukiccaṃ vuttaṃ, iminā pana padena yathākammūpagañāṇakiccaṃ.
ཏསྶ ཙ ཉཱཎསྶ ཨཡམུཔྤཏྟིཀྐམོ – ཨིདྷ བྷིཀྑུ ཧེཊྛཱནིརཡཱབྷིམུཁཾ ཨཱལོཀཾ ཝཌྜྷེཏྭཱ ནེརཡིཀེ སཏྟེ པསྶཏི མཧཱདུཀྑམནུབྷཝམཱནེ, ཏཾ དསྶནཾ དིབྦཙཀྑུཀིཙྩམེཝ། སོ ཨེཝཾ མནསི ཀརོཏི ‘‘ཀིཾ ནུ ཁོ ཀམྨཾ ཀཏྭཱ ཨིམེ སཏྟཱ ཨེཏཾ དུཀྑམནུབྷཝནྟཱི’’ཏི། ཨཐསྶ ‘‘ཨིདཾ ནཱམ ཀཏྭཱ’’ཏི ཏཾཀམྨཱརམྨཎཾ ཉཱཎམུཔྤཛྫཏི། ཏཐཱ ཨུཔརིདེཝལོཀཱབྷིམུཁཾ ཨཱལོཀཾ ཝཌྜྷེཏྭཱ ནནྡནཝནམིསྶཀཝནཕཱརུསཀཝནཱདཱིསུ སཏྟེ པསྶཏི མཧཱསམྤཏྟིཾ ཨནུབྷཝམཱནེ, ཏམྤི དསྶནཾ དིབྦཙཀྑུཀིཙྩམེཝ། སོ ཨེཝཾ མནསི ཀརོཏི ‘‘ཀིཾ ནུ ཁོ ཀམྨཾ ཀཏྭཱ ཨིམེ སཏྟཱ ཨེཏཾ སམྤཏྟིཾ ཨནུབྷཝནྟཱི’’ཏི། ཨཐསྶ ‘‘ཨིདཾ ནཱམ ཀཏྭཱ’’ཏི ཏཾཀམྨཱརམྨཎཾ ཉཱཎམུཔྤཛྫཏི། ཨིདཾ ཡཐཱཀམྨཱུཔགཉཱཎཾ ནཱམ། ཨིམསྶ ཝིསུཾ པརིཀམྨཾ ནཱམ ནཏྠི། ཡཐཱ ཙིམསྶ, ཨེཝཾ ཨནཱགཏཾསཉཱཎསྶཱཔི། དིབྦཙཀྑུཔཱདཀཱནེཝ ཧི ཨིམཱནི དིབྦཙཀྑུནཱ སཧེཝ ཨིཛ྄ཛྷནྟི།
Tassa ca ñāṇassa ayamuppattikkamo – idha bhikkhu heṭṭhānirayābhimukhaṃ ālokaṃ vaḍḍhetvā nerayike satte passati mahādukkhamanubhavamāne, taṃ dassanaṃ dibbacakkhukiccameva. So evaṃ manasi karoti ‘‘kiṃ nu kho kammaṃ katvā ime sattā etaṃ dukkhamanubhavantī’’ti. Athassa ‘‘idaṃ nāma katvā’’ti taṃkammārammaṇaṃ ñāṇamuppajjati. Tathā uparidevalokābhimukhaṃ ālokaṃ vaḍḍhetvā nandanavanamissakavanaphārusakavanādīsu satte passati mahāsampattiṃ anubhavamāne, tampi dassanaṃ dibbacakkhukiccameva. So evaṃ manasi karoti ‘‘kiṃ nu kho kammaṃ katvā ime sattā etaṃ sampattiṃ anubhavantī’’ti. Athassa ‘‘idaṃ nāma katvā’’ti taṃkammārammaṇaṃ ñāṇamuppajjati. Idaṃ yathākammūpagañāṇaṃ nāma. Imassa visuṃ parikammaṃ nāma natthi. Yathā cimassa, evaṃ anāgataṃsañāṇassāpi. Dibbacakkhupādakāneva hi imāni dibbacakkhunā saheva ijjhanti.
ཨིམེ ཝཏ བྷོནྟོཏིཨཱདཱིསུ ཨིམེཏི དིབྦཙཀྑུནཱ དིཊྛཱནཾ ནིདསྶནཝཙནཾ། ཝཏཱཏི ཨནུལོམཝཙནཏྠེ ནིཔཱཏོ། བྷོནྟོཏི བྷཝནྟོ། དུཊྛུ ཙརིཏཾ, དུཊྛཾ ཝཱ ཙརིཏཾ ཀིལེསཔཱུཏིཀཏྟཱཏི དུཙྩརིཏཾ, ཀཱཡེན དུཙྩརིཏཾ, ཀཱཡཏོ ཝཱ ཨུཔྤནྣཾ དུཙྩརིཏནྟི ཀཱཡདུཙྩརིཏཾ ། ཨིཏརེསུཔི ཨེསེཝ ནཡོ། སམནྣཱགཏཱཏི སམངྒཱིབྷཱུཏཱ། ཨརིཡཱནཾ ཨུཔཝཱདཀཱཏི བུདྡྷཔཙྩེཀབུདྡྷསཱཝཀཱནཾ ཨརིཡཱནཾ ཨནྟམསོ གིཧིསོཏཱཔནྣཱནམྤི ཨནཏྠཀཱམཱ ཧུཏྭཱ ཨནྟིམཝཏྠུནཱ ཝཱ གུཎཔརིདྷཾསནེན ཝཱ ཨུཔཝཱདཀཱ, ཨཀྐོསཀཱ གརཧཀཱཏི ཝུཏྟཾ ཧོཏི། ཏཏྠ ‘‘ནཏྠི ཨིམེསཾ སམཎདྷམྨོ, ཨསྶམཎཱ ཨེཏེ’’ཏི ཝདནྟོ ཨནྟིམཝཏྠུནཱ ཨུཔཝདཏི, ‘‘ནཏྠི ཨིམེསཾ ཛྷཱནཾ ཝཱ ཝིམོཀྑོ ཝཱ མགྒོ ཝཱ ཕལཾ ཝཱ’’ཏིཨཱདཱིནི ཝདནྟོ གུཎཔརིདྷཾསནེན ཨུཔཝདཏཱིཏི ཝེདིཏབྦོ། སོ ཙ ཛཱནཾ ཝཱ ཨུཔཝདེཡྻ ཨཛཱནཾ ཝཱ, ཨུབྷཡཐཱཔི ཨརིཡཱུཔཝཱདོཝ ཧོཏི། བྷཱརིཡཾ ཀམྨཾ ཨཱནནྟརིཡསདིསཾ སགྒཱཝརཎཾ མགྒཱཝརཎཉྩ, སཏེཀིཙྪཾ པན ཧོཏི། ཏསྨཱ ཡོ ཨརིཡཾ ཨུཔཝདཏི, ཏེན གནྟྭཱ སཙེ ཨཏྟནཱ ཝུཌྜྷཏརོ ཧོཏི, ཨུཀྐུཊིཀཾ ནིསཱིདིཏྭཱ ‘‘ཨཧཾ ཨཱཡསྨནྟཾ ཨིདཉྩིདཉྩ ཨཝཙཾ, ཏཾ མེ ཁམཱཧཱི’’ཏི ཁམཱཔེཏབྦོ། སཙེ ནཝཀཏརོ ཧོཏི, ཝནྡིཏྭཱ ཨུཀྐུཊིཀཾ ནིསཱིདིཏྭཱ ཨཉྫལིཾ པགྒཧེཏྭཱ ‘‘ཨཧཾ, བྷནྟེ, ཏུམྷེ ཨིདཉྩིདཉྩ ཨཝཙཾ, ཏཾ མེ ཁམཐཱ’’ཏི ཁམཱཔེཏབྦོ། སཙེ དིསཱཔཀྐནྟོ ཧོཏི, སཡཾ ཝཱ གནྟྭཱ སདྡྷིཝིཧཱརིཀཱདིཀེ ཝཱ པེསེཏྭཱ ཁམཱཔེཏབྦོ། སཙེ ནཱཔི གནྟུཾ ན པེསེཏུཾ སཀྐཱ ཧོཏི, ཡེ ཏསྨིཾ ཝིཧཱརེ བྷིཀྑཱུ ཝསནྟི, ཏེསཾ སནྟིཀཾ གནྟྭཱ སཙེ ནཝཀཏརཱ ཧོནྟི, ཨུཀྐུཊིཀཾ ནིསཱིདིཏྭཱ, སཙེ ཝུཌྜྷཏརཱ, ཝུཌྜྷེ ཝུཏྟནཡེནེཝ པཊིཔཛྫིཏྭཱ ‘‘ཨཧཾ, བྷནྟེ, ཨསུཀཾ ནཱམ ཨཱཡསྨནྟཾ ཨིདཉྩིདཉྩ ཨཝཙཾ, ཁམཏུ མེ སོ ཨཱཡསྨཱ’’ཏི ཝཏྭཱ ཁམཱཔེཏབྦོ། སམྨུཁཱ ཨཀྑམནྟེཔི ཨེཏདེཝ ཀཱཏབྦཾ། སཙེ ཨེཀཙཱརིཀབྷིཀྑུ ཧོཏི, ནེཝ ཏསྶ ཝསནཊྛཱནཾ, ན གཏཊྛཱནཾ པཉྙཱཡཏི, ཨེཀསྶ པཎྜིཏསྶ བྷིཀྑུནོ སནྟིཀཾ གནྟྭཱ ‘‘ཨཧཾ, བྷནྟེ, ཨསུཀཾ ནཱམ ཨཱཡསྨནྟཾ ཨིདཉྩིདཉྩ ཨཝཙཾ, ཏཾ མེ ཨནུསྶརཏོ ཝིཔྤཊིསཱརོ ཧོཏི, ཀིཾ ཀརོམཱི’’ཏི ཝཏྟབྦཾ། སོ ཝཀྑཏི ‘‘ཏུམྷེ མཱ ཙིནྟཡིཏྠ, ཐེརོ ཏུམྷཱཀཾ ཁམཏི, ཙིཏྟཾ ཝཱུཔསམེཐཱ’’ཏི། ཏེནཱཔི ཨརིཡསྶ གཏདིསཱབྷིམུཁེན ཨཉྫལིཾ པགྒཧེཏྭཱ ‘‘ཁམཐཱ’’ཏི ཝཏྟབྦཾ། ཡདི སོ པརིནིབྦུཏོ ཧོཏི, པརིནིབྦུཏམཉྩཊྛཱནཾ གནྟྭཱ ཡཱཝ སིཝཐིཀཾ གནྟྭཱཔི ཁམཱཔེཏབྦཾ། ཨེཝཾ ཀཏེ ནེཝ སགྒཱཝརཎཾ, ན མགྒཱཝརཎཾ ཧོཏི, པཱཀཏིཀམེཝ ཧོཏཱིཏི།
Ime vata bhontotiādīsu imeti dibbacakkhunā diṭṭhānaṃ nidassanavacanaṃ. Vatāti anulomavacanatthe nipāto. Bhontoti bhavanto. Duṭṭhu caritaṃ, duṭṭhaṃ vā caritaṃ kilesapūtikattāti duccaritaṃ, kāyena duccaritaṃ, kāyato vā uppannaṃ duccaritanti kāyaduccaritaṃ. Itaresupi eseva nayo. Samannāgatāti samaṅgībhūtā. Ariyānaṃ upavādakāti buddhapaccekabuddhasāvakānaṃ ariyānaṃ antamaso gihisotāpannānampi anatthakāmā hutvā antimavatthunā vā guṇaparidhaṃsanena vā upavādakā, akkosakā garahakāti vuttaṃ hoti. Tattha ‘‘natthi imesaṃ samaṇadhammo, assamaṇā ete’’ti vadanto antimavatthunā upavadati, ‘‘natthi imesaṃ jhānaṃ vā vimokkho vā maggo vā phalaṃ vā’’tiādīni vadanto guṇaparidhaṃsanena upavadatīti veditabbo. So ca jānaṃ vā upavadeyya ajānaṃ vā, ubhayathāpi ariyūpavādova hoti. Bhāriyaṃ kammaṃ ānantariyasadisaṃ saggāvaraṇaṃ maggāvaraṇañca, satekicchaṃ pana hoti. Tasmā yo ariyaṃ upavadati, tena gantvā sace attanā vuḍḍhataro hoti, ukkuṭikaṃ nisīditvā ‘‘ahaṃ āyasmantaṃ idañcidañca avacaṃ, taṃ me khamāhī’’ti khamāpetabbo. Sace navakataro hoti, vanditvā ukkuṭikaṃ nisīditvā añjaliṃ paggahetvā ‘‘ahaṃ, bhante, tumhe idañcidañca avacaṃ, taṃ me khamathā’’ti khamāpetabbo. Sace disāpakkanto hoti, sayaṃ vā gantvā saddhivihārikādike vā pesetvā khamāpetabbo. Sace nāpi gantuṃ na pesetuṃ sakkā hoti, ye tasmiṃ vihāre bhikkhū vasanti, tesaṃ santikaṃ gantvā sace navakatarā honti, ukkuṭikaṃ nisīditvā, sace vuḍḍhatarā, vuḍḍhe vuttanayeneva paṭipajjitvā ‘‘ahaṃ, bhante, asukaṃ nāma āyasmantaṃ idañcidañca avacaṃ, khamatu me so āyasmā’’ti vatvā khamāpetabbo. Sammukhā akkhamantepi etadeva kātabbaṃ. Sace ekacārikabhikkhu hoti, neva tassa vasanaṭṭhānaṃ, na gataṭṭhānaṃ paññāyati, ekassa paṇḍitassa bhikkhuno santikaṃ gantvā ‘‘ahaṃ, bhante, asukaṃ nāma āyasmantaṃ idañcidañca avacaṃ, taṃ me anussarato vippaṭisāro hoti, kiṃ karomī’’ti vattabbaṃ. So vakkhati ‘‘tumhe mā cintayittha, thero tumhākaṃ khamati, cittaṃ vūpasamethā’’ti. Tenāpi ariyassa gatadisābhimukhena añjaliṃ paggahetvā ‘‘khamathā’’ti vattabbaṃ. Yadi so parinibbuto hoti, parinibbutamañcaṭṭhānaṃ gantvā yāva sivathikaṃ gantvāpi khamāpetabbaṃ. Evaṃ kate neva saggāvaraṇaṃ, na maggāvaraṇaṃ hoti, pākatikameva hotīti.
མིཙྪཱདིཊྛིཀཱཏི ཝིཔརཱིཏདསྶནཱ། མིཙྪཱདིཊྛིཀམྨསམཱདཱནཱཏི མིཙྪཱདིཊྛིཝསེན སམཱདིནྣནཱནཱཝིདྷཀམྨཱ, ཡེ ཙ མིཙྪཱདིཊྛིམཱུལཀེསུ ཀཱཡཀམྨཱདཱིསུ ཨཉྙེཔི སམཱདཔེནྟི། ཨེཏྠ ཙ ཝཙཱིདུཙྩརིཏགྒཧཎེནེཝ ཨརིཡཱུཔཝཱདེ, མནོདུཙྩརིཏགྒཧཎེན ཙ མིཙྪཱདིཊྛིཡཱ སངྒཧིཏཱཡཔི ཨིམེསཾ དྭིནྣཾ པུན ཝཙནཾ མཧཱསཱཝཛྫབྷཱཝདསྶནཏྠནྟི ཝེདིཏབྦཾ། མཧཱསཱཝཛྫོ ཧི ཨརིཡཱུཔཝཱདོ ཨཱནནྟརིཡསདིསཏྟཱ། ཝུཏྟམྤི ཙེཏཾ ‘‘སེཡྻཐཱཔི, སཱརིཔུཏྟ, བྷིཀྑུ སཱིལསམྤནྣོ སམཱདྷིསམྤནྣོ པཉྙཱསམྤནྣོ དིཊྛེཝ དྷམྨེ ཨཉྙཾ ཨཱརཱདྷེཡྻ, ཨེཝཾསམྤདམིདཾ སཱརིཔུཏྟ ཝདཱམི ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ ཡཐཱབྷཏཾ ནིཀྑིཏྟོ, ཨེཝཾ ནིརཡེ’’ཏི (མ॰ ནི॰ ༡.༡༤༩)། མིཙྪཱདིཊྛིཏོ ཙ མཧཱསཱཝཛྫཏརཾ ནཱམ ཨཉྙཾ ནཏྠི། ཡཐཱཧ – ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ མཧཱསཱཝཛྫཾ, ཡཐཡིདཾ, བྷིཀྑཝེ, མིཙྪཱདིཊྛི, མིཙྪཱདིཊྛིཔརམཱནི, བྷིཀྑཝེ, ཝཛྫཱནཱི’’ཏི (ཨ॰ ནི॰ ༡.༣༡༠)།
Micchādiṭṭhikāti viparītadassanā. Micchādiṭṭhikammasamādānāti micchādiṭṭhivasena samādinnanānāvidhakammā, ye ca micchādiṭṭhimūlakesu kāyakammādīsu aññepi samādapenti. Ettha ca vacīduccaritaggahaṇeneva ariyūpavāde, manoduccaritaggahaṇena ca micchādiṭṭhiyā saṅgahitāyapi imesaṃ dvinnaṃ puna vacanaṃ mahāsāvajjabhāvadassanatthanti veditabbaṃ. Mahāsāvajjo hi ariyūpavādo ānantariyasadisattā. Vuttampi cetaṃ ‘‘seyyathāpi, sāriputta, bhikkhu sīlasampanno samādhisampanno paññāsampanno diṭṭheva dhamme aññaṃ ārādheyya, evaṃsampadamidaṃ sāriputta vadāmi taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā yathābhataṃ nikkhitto, evaṃ niraye’’ti (ma. ni. 1.149). Micchādiṭṭhito ca mahāsāvajjataraṃ nāma aññaṃ natthi. Yathāha – ‘‘nāhaṃ, bhikkhave, aññaṃ ekadhammampi samanupassāmi, yaṃ evaṃ mahāsāvajjaṃ, yathayidaṃ, bhikkhave, micchādiṭṭhi, micchādiṭṭhiparamāni, bhikkhave, vajjānī’’ti (a. ni. 1.310).
ཀཱཡསྶ བྷེདཱཏི ཨུཔཱདིནྣཀྑནྡྷཔརིཙྩཱགཱ། པརཾ མརཎཱཏི ཏདནནྟརཾ ཨབྷིནིབྦཏྟིཀྑནྡྷགྒཧཎེ། ཨཐ ཝཱ ཀཱཡསྶ བྷེདཱཏི ཛཱིཝིཏིནྡྲིཡསྶུཔཙྪེདཱ། པརཾ མརཎཱཏི ཙུཏིཙིཏྟཏོ ཨུདྡྷཾ། ཨཔཱཡནྟི ཨེཝམཱདི སབྦཾ ནིརཡཝེཝཙནམེཝ། ནིརཡོ ཧི སགྒམོཀྑཧེཏུབྷཱུཏཱ པུཉྙསམྨཏཱ ཨཡཱ ཨཔེཏཏྟཱ, སུཁཱནཾ ཝཱ ཨཱཡསྶ ཨབྷཱཝཱ ཨཔཱཡོ། དུཀྑསྶ གཏི པཊིསརཎནྟི དུགྒཏི, དོསབཧུལཏཱཡ ཝཱ དུཊྛེན ཀམྨུནཱ ནིབྦཏྟཱ གཏི དུགྒཏི། ཝིཝསཱ ནིཔཏནྟི ཏཏྠ དུཀྐཊཀཱརིནོཏི ཝིནིཔཱཏོ, ཝིནསྶནྟཱ ཝཱ ཨེཏྠ པཏནྟི སམྦྷིཛྫམཱནངྒཔཙྩངྒཱཏིཔི ཝིནིཔཱཏོ། ནཏྠི ཨེཏྠ ཨསྶཱདསཉྙིཏོ ཨཡོཏི ནིརཡོ།
Kāyassabhedāti upādinnakkhandhapariccāgā. Paraṃ maraṇāti tadanantaraṃ abhinibbattikkhandhaggahaṇe. Atha vā kāyassa bhedāti jīvitindriyassupacchedā. Paraṃ maraṇāti cuticittato uddhaṃ. Apāyanti evamādi sabbaṃ nirayavevacanameva. Nirayo hi saggamokkhahetubhūtā puññasammatā ayā apetattā, sukhānaṃ vā āyassa abhāvā apāyo. Dukkhassa gati paṭisaraṇanti duggati, dosabahulatāya vā duṭṭhena kammunā nibbattā gati duggati. Vivasā nipatanti tattha dukkaṭakārinoti vinipāto, vinassantā vā ettha patanti sambhijjamānaṅgapaccaṅgātipi vinipāto. Natthi ettha assādasaññito ayoti nirayo.
ཨཐ ཝཱ ཨཔཱཡགྒཧཎེན ཏིརཙྪཱནཡོནིཾ དཱིཔེཏི། ཏིརཙྪཱནཡོནི ཧི ཨཔཱཡོ སུགཏིཏོ ཨཔེཏཏྟཱ, ན དུགྒཏི མཧེསཀྑཱནཾ ནཱགརཱཛཱདཱིནཾ སམྦྷཝཏོ། དུགྒཏིགྒཧཎེན པེཏྟིཝིསཡཾ། སོ ཧི ཨཔཱཡོ ཙེཝ དུགྒཏི ཙ སུགཏིཏོ ཨཔེཏཏྟཱ དུཀྑསྶ ཙ གཏིབྷཱུཏཏྟཱ, ན ཏུ ཝིནིཔཱཏོ ཨསུརསདིསཾ ཨཝིནིཔཏིཏཏྟཱ། ཝིནིཔཱཏགྒཧཎེན ཨསུརཀཱཡཾ། སོ ཧི ཡཐཱཝུཏྟེན ཨཏྠེན ཨཔཱཡོ ཙེཝ དུགྒཏི ཙ སབྦསམུསྶཡེཧི ཙ ཝིནིཔཏིཏཏྟཱ ཝིནིཔཱཏོཏི ཝུཙྩཏི། ནིརཡགྒཧཎེན ཨཝཱིཙིཨཱདིམནེཀཔྤཀཱརཾ ནིརཡམེཝཱཏི། ཨུཔཔནྣཱཏི ཨུཔགཏཱ, ཏཏྠ ཨབྷིནིབྦཏྟཱཏི ཨདྷིཔྤཱཡོ། ཝུཏྟཝིཔརིཡཱཡེན སུཀྐཔཀྑོ ཝེདིཏབྦོ།
Atha vā apāyaggahaṇena tiracchānayoniṃ dīpeti. Tiracchānayoni hi apāyo sugatito apetattā, na duggati mahesakkhānaṃ nāgarājādīnaṃ sambhavato. Duggatiggahaṇena pettivisayaṃ. So hi apāyo ceva duggati ca sugatito apetattā dukkhassa ca gatibhūtattā, na tu vinipāto asurasadisaṃ avinipatitattā. Vinipātaggahaṇena asurakāyaṃ. So hi yathāvuttena atthena apāyo ceva duggati ca sabbasamussayehi ca vinipatitattā vinipātoti vuccati. Nirayaggahaṇena avīciādimanekappakāraṃ nirayamevāti. Upapannāti upagatā, tattha abhinibbattāti adhippāyo. Vuttavipariyāyena sukkapakkho veditabbo.
ཨཡཾ པན ཝིསེསོ – ཏཏྠ སུགཏིགྒཧཎེན མནུསྶགཏིཔི སངྒཡ྄ཧཏི, སགྒགྒཧཎེན དེཝགཏིཡེཝ། ཏཏྠ སུནྡརཱ གཏཱིཏི སུགཏི། རཱུཔཱདཱིཧི ཝིསཡེཧི སུཊྛུ ཨགྒོཏི སགྒོ། སོ སབྦོཔི ལུཛྫནཔལུཛྫནཊྛེན ལོཀོཏི ཨཡཾ ཝཙནཏྠོ། ཨིཏི ‘‘དིབྦེན ཙཀྑུནཱ’’ཏིཨཱདི སབྦཾ ནིགམནཝཙནཾ། ཨེཝཾ དིབྦེན ཙཀྑུནཱ པསྶཏཱིཏི ཨཡམེཏྠ སངྑེཔཏྠོཏི།
Ayaṃ pana viseso – tattha sugatiggahaṇena manussagatipi saṅgayhati, saggaggahaṇena devagatiyeva. Tattha sundarā gatīti sugati. Rūpādīhi visayehi suṭṭhu aggoti saggo. So sabbopi lujjanapalujjanaṭṭhena lokoti ayaṃ vacanattho. Iti ‘‘dibbena cakkhunā’’tiādi sabbaṃ nigamanavacanaṃ. Evaṃ dibbena cakkhunā passatīti ayamettha saṅkhepatthoti.
དིབྦཙཀྑུཉཱཎནིདྡེསཝཎྞནཱ ནིཊྛིཏཱ།
Dibbacakkhuñāṇaniddesavaṇṇanā niṭṭhitā.
པཉྩཉཱཎཔཀིཎྞཀཾ
Pañcañāṇapakiṇṇakaṃ
ཨིམེསུ པཉྩསུ ཉཱཎེསུ ཨིདྡྷིཝིདྷཉཱཎཾ པརིཏྟམཧགྒཏཨཏཱིཏཱནཱགཏཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན སཏྟསུ ཨཱརམྨཎེསུ པཝཏྟཏི། སོཏདྷཱཏུཝིསུདྡྷིཉཱཎཾ པརིཏྟཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན ཙཏཱུསུ ཨཱརམྨཎེསུ པཝཏྟཏི། ཙེཏོཔརིཡཉཱཎཾ པརིཏྟམཧགྒཏཨཔྤམཱཎམགྒཨཏཱིཏཱནཱགཏཔཙྩུཔྤནྣབཧིདྡྷཱརམྨཎཝསེན ཨཊྛསུ ཨཱརམྨཎེསུ པཝཏྟཏི། པུབྦེནིཝཱསཱནུསྶཏིཉཱཎཾ
Imesu pañcasu ñāṇesu iddhividhañāṇaṃ parittamahaggataatītānāgatapaccuppannaajjhattabahiddhārammaṇavasena sattasu ārammaṇesu pavattati. Sotadhātuvisuddhiñāṇaṃ parittapaccuppannaajjhattabahiddhārammaṇavasena catūsu ārammaṇesu pavattati. Cetopariyañāṇaṃ parittamahaggataappamāṇamaggaatītānāgatapaccuppannabahiddhārammaṇavasena aṭṭhasu ārammaṇesu pavattati. Pubbenivāsānussatiñāṇaṃ
པརིཏྟམཧགྒཏཨཔྤམཱཎམགྒཨཏཱིཏཨཛ྄ཛྷཏྟབཧིདྡྷཱནཝཏྟབྦཱརམྨཎཝསེན ཨཊྛསུ ཨཱརམྨཎེསུ པཝཏྟཏི། དིབྦཙཀྑུཉཱཎཾ པརིཏྟཔཙྩུཔྤནྣཨཛ྄ཛྷཏྟབཧིདྡྷཱརམྨཎཝསེན ཙཏཱུསུ ཨཱརམྨཎེསུ པཝཏྟཏི། ཡཐཱཀམྨཱུཔགཉཱཎཾ པརིཏྟམཧགྒཏཨཏཱིཏཨཛ྄ཛྷཏྟབཧིདྡྷཱརམྨཎཝསེན པཉྩསུ ཨཱརམྨཎེསུ པཝཏྟཏི། ཨནཱགཏཾསཉཱཎཾ པརིཏྟམཧགྒཏཨཔྤམཱཎམགྒཨནཱགཏཨཛ྄ཛྷཏྟབཧིདྡྷཱནཝཏྟབྦཱརམྨཎཝསེན ཨཊྛསུ ཨཱརམྨཎེསུ པཝཏྟཏཱིཏི།
Parittamahaggataappamāṇamaggaatītaajjhattabahiddhānavattabbārammaṇavasena aṭṭhasu ārammaṇesu pavattati. Dibbacakkhuñāṇaṃ parittapaccuppannaajjhattabahiddhārammaṇavasena catūsu ārammaṇesu pavattati. Yathākammūpagañāṇaṃ parittamahaggataatītaajjhattabahiddhārammaṇavasena pañcasu ārammaṇesu pavattati. Anāgataṃsañāṇaṃ parittamahaggataappamāṇamaggaanāgataajjhattabahiddhānavattabbārammaṇavasena aṭṭhasu ārammaṇesu pavattatīti.
པཉྩཉཱཎཔཀིཎྞཀཾ ནིཊྛིཏཾ།
Pañcañāṇapakiṇṇakaṃ niṭṭhitaṃ.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / པཊིསམྦྷིདཱམགྒཔཱལི༹ • Paṭisambhidāmaggapāḷi / ༥༤. དིབྦཙཀྑུཉཱཎནིདྡེསོ • 54. Dibbacakkhuñāṇaniddeso
