| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၄-၅. ဒီဃဇာဏုသုတ္တာဒိဝဏ္ဏနာ
4-5. Dīghajāṇusuttādivaṇṇanā
၅၄-၅၅. စတုတ္ထေ (ဒီ. နိ. အဋ္ဌ. ၃.၂၆၅) ဧကေန ဘောဂေ ဘုဉ္ဇေယ္ယာတိ ဧကေန ကောဋ္ဌာသေန ဘောဂေ ဘုဉ္ဇေယ္ယ, ဝိနိဘုဉ္ဇေယ္ယ ဝာတိ အတ္ထော။ ဒ္ဝီဟိ ကမ္မန္တိ ဒ္ဝီဟိ ကောဋ္ဌာသေဟိ ကသိဝဏိဇ္ဇာဒိကမ္မံ ပယောဇေယ္ယ။ နိဓာပေယ္ယာတိ စတုတ္ထကောဋ္ဌာသံ နိဓေတ္ဝာ ဌပေယ္ယ, နိဒဟိတ္ဝာ ဘူမိဂတံ ကတ္ဝာ ဌပေယ္ယာတိ အတ္ထော။ အာပဒာသု ဘဝိသ္သတီတိ ကုလာနဉ္ဟိ န သဗ္ဗကာလံ ဧကသဒိသံ ဝတ္တတိ, ကဒာစိ ရာဇအဂ္ဂိစောရဒုဗ္ဘိက္ခာဒိဝသေန အာပဒာ ဥပ္ပဇ္ဇန္တိ, တသ္မာ ဧဝံ အာပဒာသု ဥပ္ပန္နာသု ဘဝိသ္သတီတိ ဧကံ ကောဋ္ဌာသံ နိဓာပေယ္ယာတိ ဝုတ္တံ။ ဣမေသု ပန စတူသု ကောဋ္ဌာသေသု ကတရံ ကောဋ္ဌာသံ ဂဟေတ္ဝာ ကုသလံ ကာတဗ္ဗန္တိ? ‘‘ဘောဂေ ဘုဉ္ဇေယ္ယာ’’တိ ဝုတ္တကောဋ္ဌာသံ။ တတော ဂဏ္ဟိတ္ဝာ ဟိ ဘိက္ခူနမ္ပိ ကပဏဒ္ဓိကာနမ္ပိ ဒာနံ ဒာတဗ္ဗံ, ပေသကာရန္ဟာပိတာဒီနမ္ပိ ဝေတနံ ဒာတဗ္ဗံ။ သမဏဗ္ရာဟ္မဏကပဏဒ္ဓိကာဒီနံ ဒာနဝသေန စေဝ, အဓိဝတ္ထဒေဝတာဒီနံ ပေတဗလိဝသေန, န္ဟာပိတာဒီနံ ဝေတနဝသေန စ ဝိနိယောဂောပိ ဥပယောဂော ဧဝ။
54-55. Catutthe (dī. ni. aṭṭha. 3.265) ekena bhoge bhuñjeyyāti ekena koṭṭhāsena bhoge bhuñjeyya, vinibhuñjeyya vāti attho. Dvīhi kammanti dvīhi koṭṭhāsehi kasivaṇijjādikammaṃ payojeyya. Nidhāpeyyāti catutthakoṭṭhāsaṃ nidhetvā ṭhapeyya, nidahitvā bhūmigataṃ katvā ṭhapeyyāti attho. Āpadāsu bhavissatīti kulānañhi na sabbakālaṃ ekasadisaṃ vattati, kadāci rājaaggicoradubbhikkhādivasena āpadā uppajjanti, tasmā evaṃ āpadāsu uppannāsu bhavissatīti ekaṃ koṭṭhāsaṃ nidhāpeyyāti vuttaṃ. Imesu pana catūsu koṭṭhāsesu kataraṃ koṭṭhāsaṃ gahetvā kusalaṃ kātabbanti? ‘‘Bhoge bhuñjeyyā’’ti vuttakoṭṭhāsaṃ. Tato gaṇhitvā hi bhikkhūnampi kapaṇaddhikānampi dānaṃ dātabbaṃ, pesakāranhāpitādīnampi vetanaṃ dātabbaṃ. Samaṇabrāhmaṇakapaṇaddhikādīnaṃ dānavasena ceva, adhivatthadevatādīnaṃ petabalivasena, nhāpitādīnaṃ vetanavasena ca viniyogopi upayogo eva.
အပေန္တိ ဂစ္ဆန္တိ, အပေန္တာ ဝာ ဧတေဟီတိ အပာယာ, အပာယာ ဧဝ မုခာနိ ဒ္ဝာရာနီတိ အပာယမုခာနိ။ ဝိနာသဒ္ဝာရာနီတိ ဧတ္ထာပိ ဧသေဝ နယော။ ပဉ္စမေ နတ္ထိ ဝတ္တဗ္ဗံ။
Apenti gacchanti, apentā vā etehīti apāyā, apāyā eva mukhāni dvārānīti apāyamukhāni. Vināsadvārānīti etthāpi eseva nayo. Pañcame natthi vattabbaṃ.
ဒီဃဇာဏုသုတ္တာဒိဝဏ္ဏနာ နိဋ္ဌိတာ။
Dīghajāṇusuttādivaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya
၄. ဒီဃဇာဏုသုတ္တံ • 4. Dīghajāṇusuttaṃ
၅. ဥဇ္ဇယသုတ္တံ • 5. Ujjayasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄. ဒီဃဇာဏုသုတ္တဝဏ္ဏနာ • 4. Dīghajāṇusuttavaṇṇanā
