| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੪. ਦੀਘਜਾਣੁਸੁਤ੍ਤવਣ੍ਣਨਾ
4. Dīghajāṇusuttavaṇṇanā
੫੪. ਚਤੁਤ੍ਥੇ ਬ੍ਯਗ੍ਘਪਜ੍ਜਾਤਿ ਇਦਮਸ੍ਸ ਪવੇਣਿ ਨਾਮ વਸੇਨ ਆਲਪਨਂ। ਤਸ੍ਸ ਹਿ ਪੁਬ੍ਬਪੁਰਿਸਾ ਬ੍ਯਗ੍ਘਪਥੇ ਜਾਤਾਤਿ ਤਸ੍ਮਿਂ ਕੁਲੇ ਮਨੁਸ੍ਸਾ ਬ੍ਯਗ੍ਘਪਜ੍ਜਾਤਿ વੁਚ੍ਚਨ੍ਤਿ। ਇਸ੍ਸਤ੍ਥੇਨਾਤਿ ਇਸ੍ਸਾਸਕਮ੍ਮੇਨ। ਤਤ੍ਰੁਪਾਯਾਯਾਤਿ ‘‘ਇਮਸ੍ਮਿਂ ਕਾਲੇ ਇਦਂ ਨਾਮ ਕਾਤੁਂ વਟ੍ਟਤੀ’’ਤਿ ਜਾਨਨੇ ਉਪਾਯਭੂਤਾਯ। વੁਦ੍ਧਸੀਲਿਨੋਤਿ વਡ੍ਢਿਤਸੀਲਾ વੁਦ੍ਧਸਮਾਚਾਰਾ। ਆਯਨ੍ਤਿ ਆਗਮਨਂ। ਨਾਚ੍ਚੋਗਾਲ਼੍ਹਨ੍ਤਿ ਨਾਤਿਮਹਨ੍ਤਂ। ਨਾਤਿਹੀਨਨ੍ਤਿ ਨਾਤਿਕਸਿਰਂ। ਪਰਿਯਾਦਾਯਾਤਿ ਗਹੇਤ੍વਾ ਖੇਪੇਤ੍વਾ। ਤਤ੍ਥ ਯਸ੍ਸ વਯਤੋ ਦਿਗੁਣੋ ਆਯੋ, ਤਸ੍ਸ વਯੋ ਆਯਂ ਪਰਿਯਾਦਾਤੁਂ ਨ ਸਕ੍ਕੋਤਿ।
54. Catutthe byagghapajjāti idamassa paveṇi nāma vasena ālapanaṃ. Tassa hi pubbapurisā byagghapathe jātāti tasmiṃ kule manussā byagghapajjāti vuccanti. Issatthenāti issāsakammena. Tatrupāyāyāti ‘‘imasmiṃ kāle idaṃ nāma kātuṃ vaṭṭatī’’ti jānane upāyabhūtāya. Vuddhasīlinoti vaḍḍhitasīlā vuddhasamācārā. Āyanti āgamanaṃ. Nāccogāḷhanti nātimahantaṃ. Nātihīnanti nātikasiraṃ. Pariyādāyāti gahetvā khepetvā. Tattha yassa vayato diguṇo āyo, tassa vayo āyaṃ pariyādātuṃ na sakkoti.
‘‘ਚਤੁਧਾ વਿਭਜੇ ਭੋਗੇ, ਪਣ੍ਡਿਤੋ ਘਰਮਾવਸਂ।
‘‘Catudhā vibhaje bhoge, paṇḍito gharamāvasaṃ;
ਏਕੇਨ ਭੋਗੇ ਭੁਞ੍ਜੇਯ੍ਯ, ਦ੍વੀਹਿ ਕਮ੍ਮਂ ਪਯੋਜਯੇ।
Ekena bhoge bhuñjeyya, dvīhi kammaṃ payojaye;
ਚਤੁਤ੍ਥਞ੍ਚ ਨਿਧਾਪੇਯ੍ਯ, ਆਪਦਾਸੁ ਭવਿਸ੍ਸਤੀ’’ਤਿ॥ (ਦੀ॰ ਨਿ॰ ੩.੨੬੫) –
Catutthañca nidhāpeyya, āpadāsu bhavissatī’’ti. (dī. ni. 3.265) –
ਏવਂ ਪਟਿਪਜ੍ਜਤੋ ਪਨ વਯੋ ਆਯਂ ਪਰਿਯਾਦਾਤੁਂ ਨ ਸਕ੍ਕੋਤਿਯੇવ।
Evaṃ paṭipajjato pana vayo āyaṃ pariyādātuṃ na sakkotiyeva.
ਉਦੁਮ੍ਬਰਖਾਦੀવਾਤਿ ਯਥਾ ਉਦੁਮ੍ਬਰਾਨਿ ਖਾਦਿਤੁਕਾਮੇਨ ਪਕ੍ਕੇ ਉਦੁਮ੍ਬਰਰੁਕ੍ਖੇ ਚਾਲਿਤੇ ਏਕਪ੍ਪਹਾਰੇਨੇવ ਬਹੂਨਿ ਫਲਾਨਿ ਪਤਨ੍ਤਿ, ਸੋ ਖਾਦਿਤਬ੍ਬਯੁਤ੍ਤਕਾਨਿ ਖਾਦਿਤ੍વਾ ਇਤਰਾਨਿ ਬਹੁਤਰਾਨਿ ਪਹਾਯ ਗਚ੍ਛਤਿ, ਏવਮੇવਂ ਯੋ ਆਯਤੋ વਯਂ ਬਹੁਤਰਂ ਕਤ੍વਾ વਿਪ੍ਪਕਿਰਨ੍ਤੋ ਭੋਗੇ ਪਰਿਭੁਞ੍ਜਤਿ, ਸੋ ‘‘ਉਦੁਮ੍ਬਰਖਾਦਿਕਂવਾਯਂ ਕੁਲਪੁਤ੍ਤੋ ਭੋਗੇ ਖਾਦਤੀ’’ਤਿ વੁਚ੍ਚਤਿ। ਅਜੇਟ੍ਠਮਰਣਨ੍ਤਿ ਅਨਾਯਕਮਰਣਂ । ਸਮਂ ਜੀવਿਕਂ ਕਪ੍ਪੇਤੀਤਿ ਸਮ੍ਮਾ ਜੀવਿਕਂ ਕਪ੍ਪੇਤਿ। ਸਮਜੀવਿਤਾਤਿ ਸਮਜੀવਿਤਾਯ ਜੀવਿਤਾ। ਅਪਾਯਮੁਖਾਨੀਤਿ વਿਨਾਸਸ੍ਸ ਠਾਨਾਨਿ।
Udumbarakhādīvāti yathā udumbarāni khāditukāmena pakke udumbararukkhe cālite ekappahāreneva bahūni phalāni patanti, so khāditabbayuttakāni khāditvā itarāni bahutarāni pahāya gacchati, evamevaṃ yo āyato vayaṃ bahutaraṃ katvā vippakiranto bhoge paribhuñjati, so ‘‘udumbarakhādikaṃvāyaṃ kulaputto bhoge khādatī’’ti vuccati. Ajeṭṭhamaraṇanti anāyakamaraṇaṃ . Samaṃ jīvikaṃ kappetīti sammā jīvikaṃ kappeti. Samajīvitāti samajīvitāya jīvitā. Apāyamukhānīti vināsassa ṭhānāni.
ਉਟ੍ਠਾਤਾ ਕਮ੍ਮਧੇਯ੍ਯੇਸੂਤਿ ਕਮ੍ਮਕਰਣਟ੍ਠਾਨੇਸੁ ਉਟ੍ਠਾਨવੀਰਿਯਸਮ੍ਪਨ੍ਨੋ। વਿਧਾਨવਾਤਿ વਿਦਹਨਸਮ੍ਪਨ੍ਨੋ। ਸੋਤ੍ਥਾਨਂ ਸਮ੍ਪਰਾਯਿਕਨ੍ਤਿ ਸੋਤ੍ਥਿਭੂਤਂ ਸਮ੍ਪਰਾਯਿਕਂ। ਸਚ੍ਚਨਾਮੇਨਾਤਿ ਬੁਦ੍ਧਤ੍ਤਾਯੇવ ਬੁਦ੍ਧੋਤਿ ਏવਂ ਅવਿਤਥਨਾਮੇਨ। ਚਾਗੋ ਪੁਞ੍ਞਂ ਪવਡ੍ਢਤੀਤਿ ਚਾਗੋ ਚ ਸੇਸਪੁਞ੍ਞਞ੍ਚ ਪવਡ੍ਢਤਿ। ਇਮਸ੍ਮਿਂ ਸੁਤ੍ਤੇ ਸਦ੍ਧਾਦਯੋ ਮਿਸ੍ਸਕਾ ਕਥਿਤਾ। ਪਞ੍ਚਮਂ ਉਤ੍ਤਾਨਮੇવ।
Uṭṭhātā kammadheyyesūti kammakaraṇaṭṭhānesu uṭṭhānavīriyasampanno. Vidhānavāti vidahanasampanno. Sotthānaṃ samparāyikanti sotthibhūtaṃ samparāyikaṃ. Saccanāmenāti buddhattāyeva buddhoti evaṃ avitathanāmena. Cāgo puññaṃ pavaḍḍhatīti cāgo ca sesapuññañca pavaḍḍhati. Imasmiṃ sutte saddhādayo missakā kathitā. Pañcamaṃ uttānameva.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੪. ਦੀਘਜਾਣੁਸੁਤ੍ਤਂ • 4. Dīghajāṇusuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੪-੫. ਦੀਘਜਾਣੁਸੁਤ੍ਤਾਦਿવਣ੍ਣਨਾ • 4-5. Dīghajāṇusuttādivaṇṇanā
